Search form

Lv 1

I. EB' LI MAYEJ (1-7)

Eb' li k'atb'il mayej

1Li Qaawa' kixb'oq laj Moisés sa' li Loq'laj Muheb'aal, ut kixye re chi jo'ka'in:

2“Aatinan rik'ineb' laj Israel ut ye reheb': Wi ani eere tixk'am chaq we xmayej xul, tento tixk'e jun reheb' li xwakax malaj reheb' li xkarneer.

3“Wi li xul li tixyeechi'i cho'q xk'atb'il mayej, a'an isinb'il chaq sa' xyanqeb' li xwakax, tento naq a'anaq jun teelom wakax li maak'a' reek'.a Ut tento tixyeechi'i sa' rokeb'aal li Loq'laj Muheb'aal, re naq k'ulb'ilaq xb'aan li Qaawa', 4ut tixk'e ajwi' li ruq' sa' xb'een xjolom li xul. Chi jo'kan li xul k'ulb'ilaq xb'aan li Qaawa' re naq kuyb'il sachb'ilaq li xmaak li ani xyeechi'ink re. 5Tixyok' li xkux li teelom wakax chiru li Qaawa'. Chirix chik a'an eb' li ralal xk'ajol laj Aharón ut eb' laj tij te'xyeechi'i li kik' ut te'xkirkiri chi xsutam li artal li wank sa' rokeb'aal li Loq'laj Muheb'aal. 6Ani tixyeechi'i junaq xul cho'q mayej, tento taarisi li xtz'uumal ut tixkok'seti; 7eb' laj tij te'xloch li xam sa' xb'een li artal ut te'xtus chi chaab'il li si' 8re xk'eeb'al sa' xb'een li setinb'il xul, jo' ajwi' li xjolom ut li xxeeb'ul li xk'amk'ot. 9Ani tixyeechi'i k'atb'il xul cho'q xmayej tento tixch'aj rik'in ha' li xk'amk'ot ut li ra' li xul, ut laj tij tixk'at chixjunil sa' xb'een li artal. A'an jun k'atb'il mayej jwal sununk xb'ook chiru li Qaawa'.

10“Wi li xul li tixyeechi'i cho'q xk'atb'il mayej, a'an isinb'il chaq sa' xyanqeb' li xkarneer malaj ut xchib'aat, tento naq teelomaq chi maak'a' reek'. 11Tento naq tixyok' li xkux sa' xjayal releb'l iq' chi xk'atq li artal, chiru li Qaawa'. Eb' li ralal xk'ajol laj Aharón ut eb' laj tij te'xk'irk'isi li xkik'el li xul chi xsutam li artal. 12Chirix chik a'an taakok'setimanq li xul, ut laj tij tixk'e sa' xb'een li si' li yooq chi k'atk sa' xb'een li artal, rochb'een li xjolom ut li xxeeb'ul li xk'amk'ot. 13Ani tixyeechi'i xk'atb'il mayej tento tixch'aj rik'in ha' li xk'amk'ot ut li ra' li xul, ut laj tij tixk'at chixjunil sa' xb'een li artal cho'q k'atb'il mayej jwal sununk xb'ook chiru li Qaawa'.

14“Wi li xul tixyeechi'i cho'q xk'atb'il mayej chiru li Qaawa', a'an jun li xul narupupik, tento naq a'anaq jun mukuy malaj jun k'ook'ob'. 15Laj tij tixyeechi'i li mayej a'an sa' xb'een li artal: taarisi li xjolom ut tixk'at sa' xb'een li artal naq akaq xraqe'k chi tz'ilonk li xkik'el chi xk'atq li artal. 16Taarisi li xpuj ut li wank chisa'; toja' naq tixk'e sa' xjayal releb'l li saq'e chi xk'atq li artal, naraj naxye sa' xna'aj li cha. 17Chirix a'an tixcho' sa' xyi li mukuy, tixchap sa' xxik', ab'an moko tixjach ta chi junwaakaj, ut tixk'at sa' li artal, sa' xb'een li si' li wank sa' li xam. A'an jun k'atb'il mayej sununk xb'ook chiru li Qaawa'.