Search form

Pe eya 27

MAANA GE YAKUB NE

(27-36)

Yakub ame wak busu ge Esawu ne

1Isaku sabe gwagwa, na ndwara fa̰ ma lar, gá be kwar swaga. Tol Esawu ge na vya pul soy, na vya vin na go: «Mbi né!» 2Isaku jan go: «Mbi hatɗa sabar, mbi kwa dam siya ge mbi ne to, 3he mo walam, mo kajamle ne na kul, mbo kyare, mo ɓyare mbi kaŋ so̰y ya. 4Ke mbi kaŋzam ge ame mbi wak tuli ya, ne jo̰ mbi laar wa̰ na wan. Mo gene mbi na ya, mbi ba zam, ne da pe mbi e mo wak busu ɓya, mbi ba ɗage suya.»

5Swaga ge Isaku ne ka jan na vya Esawu fare go ɗe, Rebeka za̰ nama fare janna. Esawu ɗage mbo ful zi ndwara mbo ke kyare. 6Na go̰r go, Rebeka jan na vya Yakub go: «Mbi za̰ mo bá jan mo ná vya Esawu go: 7‹Mbo hun mbi nii ya, mo ke mbi kaŋzam ge ame mbi wak tuli. Swaga ge mbi ma̰ zamma, mbi ba e mo wak busu Bage ɗiŋnedin ndwara se, mbi ba ɗage suya›. 8Se no ɗe, mbi vya, za̰ mbi, ke fare ge mbi ne jan mo no. 9Mbo ɗyagarta zi ya, wa̰ gii vya ma ya azi, mbi ba ke kaŋzam ge mo bá laar ne ɓyare, mbi ba hon na. 10Mo ba gene na mbo hon mo bá, na ba zam, na ba é wak busu mo pal, na ba ɗage suya gale.»

11Yakub jan na ná go: «Ndi mbi ná vya Esawu duur susu, amma mbi duur susu to! 12Tamekyala, mbi bá ma̰ lale mbi sḛ, ma̰ kwa go mbi mbuɗi na mbuɗi. Go no mbi ma̰ zwal wak vḛneya ya mbi pal, ge mbi te ya ɓol wak busu.» 13Na ná jan na go: «Mbi vya, ya̰ wak vḛneya mbe na dé mbi pal! Za̰ mbi fare, wa̰ mbi gii vya ya.»

14Na sḛ mbo wan nama ya, gene nama ya hon na ná. Na ná ke kaŋzam ge tuli ge na bá laar ne ɓyare na. 15Uwale, Rebeka abe na vya pul soy Esawu ba̰r ge siŋli ge ne yadiŋ, kan na na vya ge jyale Yakub ta. 16So̰me na tok ma ne na ka̰l, swaga ge susu ne go to ma, ne gii dab. 17Hon na kaŋzam ma ne katugum ge na ne ke na tok go. 18Mbo na bá ta ya, tol na wak. Na bá vin na go: «Mbi né!» Ele go: «Mbi vya, a mo wuɗi ne ɗaa?» 19Yakub jan na bá go: «A mbi Esawu, mo vya pul soy ne, mbi ke ya kaŋ ge mo ne jya̰ mbi, mbi kaɗe mo, ɗage digi katɗa, zá kaŋ ge mbi ne hṵ ya duur, go no mo ba e mbi wak busu.» 20Isaku jan na vya go: «Mo te ke gyana mo ba set ya avun go tetek ɗaa?» Yakub jan na go: «A Bage ɗiŋnedin Dok ge mo ne, e mbi set na avun cap ne.» 21Isaku jan Yakub go: «Nda tene ya mbi ta zi gwa, mbi ba lale mo, ne da pe mbi ba kwar go, mo mbi vya Esawu ne ko de.» 22Yakub ndar tene ya na bá Isaku ta zi gwa, lale na sḛ, jan go: «Ka̰l farra no, a Yakub ka̰l ne, amma tok ma no, a Esawu tok ma ne.» 23Amma be gwan kwar go, na Yakub ne to, ne da pe, na tok ma ka susu dimma ne ge Esawu ne ma go. Zḛ ge go na é na wak busu na pal, 24ele na go: «A mo ge mbi vya Esawu ne ɓaa?» Yakub vin, jan na go: «A mbi ne!» 25Isaku jan na go: «Mbi vya, ho̰ mbi, mbi za kaŋ ge mo ne hṵ ya duur, go no mbi ba e wak busu mo pal.» Yakub hon na kaŋzam, zam, hon na oyo̰r-jiya̰l me, na sḛ njot. 26Go no, na bá Isaku jan na go: «Nda tene ya mbi ta zi gwa, abe mbi mo sḛ zi.» 27Yakub ndar tene ya na bá ta zi gwa, abe na na sḛ zi. Isaku za̰ huri ge na ba̰r ma ne, e na wak busu, jan go:

«O̰, huri ge mbi vya ne

a dimma ca ne huri

ge gaaso ge Bage ɗiŋnedin ne e na wak busu ne na pal go.

28Dok na ho̰ mo mbyar ge ne kan ne digi zi ya,

ne kaŋ kwaɗa ge suwar ne ma.

Na ho̰ mo gḛme ma ne oyo̰r-jiya̰l gḛ ceɗed!

29Ya̰ pehir ma ke mo temel mo̰r,

pehir ge ɗogle ma gu nama koo mo ndwara se,

ka ga̰l ge mo ná vya ma ne,

mo ná vya ma, nama gu nama koo mo ndwara se.

Wak vḛneya na ka ndu ge ne vḛne na wak mo pal pal,

Wak busu na ka ndu ge ne é wak busu mo pal pal me.»

30Swaga ge Isaku ne á e wak busu Yakub pal ɗe, Yakub ɗage, wat ne na bá Isaku ta zi ya zum. Swaga mbe go me, Esawu yan ne na swaga kyare ya me, 31Ke kaŋzam ge tuli me, gene na ya na bá ta, jan na go: «Ɗage digi katɗa, za kaŋ ge mbi ne hṵ ya duur, ge mbi ne gene mo na ya no, go no, mo ba é mbi mo wak busu.» 32Na bá ele na go: «A mo wuɗi ne ɗaa?» Na sḛ jan na go: «A mbi Esawu, mo vya ge pul soy ne!»

33Isaku ɗage ndatɗa ne bagre gḛ ge be to, ele na go: «Te wuɗi mbo kyare ne ɗo, hṵ kaŋ no, gene mbi na ya no ɗaa? Ndi, ne mo ndwara zḛ gale no, mbi zam na ya mwaɗak, mbi e na wak busu no, ago wak busu mbe gá na pal dedet.»

34Swaga ge Esawu ne za̰ fare janna ge na bá ne ɗe, á na pe fyalla ne ka̰l ndaar, ne laar hotɗa gḛ, jan na bá go: «Báá, é mbi wak busu me!» 35Isaku jan na go: «Mo ná vya mbo ya ne son, ame mo wak busu ya ya.» 36Esawu jan go: «Da ne a tó na dḭl go Yakub pe ɗo, lase mbi no ndwara azi ɗaa! Ame mbi joo ge vya pul soy ne, se no, gwan ame mbi wak busu ya go!» Esawu gwan jan na bá go: «Mo be koy wak busu a̰me ɗu ne mbi pe to’a?» 37Isaku jan na go: «Ndi mbi é na na ka ga̰l ge mo ne, mbi hon na ná vya ma mwaɗak nama naa ge ke na temel mo̰r ma, mbi ho̰ na gḛme ma ne oyo̰r-jiya̰l ge giya̰l. Mbi vya, mbi gwan ke ne mo gyana ɗaa?» 38Esawu gwarge tene na bá ta jan na go: «Báá, mo wak busu mbe ɗu kikit ɗaa? E mbi wak busu me, báá!» Esawu par na wak fyaso. 39Na bá jan na go:

«Mo swaga katɗa mbo kat suwar ge be don kaŋ to go,

ge swaga ge mbyar ne kan to go.

40Mo mbo ka wal tene dḛ da ne mo kasagar,

mo mbo ke temel mo̰r hon mo ná vya.

Amma a̰reya ge mo ne zi, mo mbo gá suli,

mo mbo ka hal na jug ne mo ka̰l pal go uzi.»

Yakub sya Esawu ndwara zḛ, mbo na nā Laban ta ya

41Esawu gá huur ne Yakub, ne na ne ame wak busu ge bama bá ne pe. Esawu ka jan na dulwak zi go: «Mbi bá gá gwa suya, dam ge na sḛ ne su ya, mbi mbo hun mbi ná vya Yakub.» 42Swaga ge Rebeka ne za̰ fare janna ge na vya Esawu ne ma ɗe, tol Yakub, jan na go: «Mo ná vya Esawu ɓyare hun mo, ndwara gele tene. 43Se no, mbi vya, za̰ mbi fare, ɗage, sya mbo mbi ná vya Laban ta suwal Haran ya. 44Ká na ta ya go, diŋ mo ná vya laar iyal ɓya. 45Swaga ge mo ná vya ne mbo vyale kaŋ ge mo ne ke ne na ya, na laar iyal ɗe, mbi mbo gwan ne mo ya. Mbi ɓyare ban aŋ jwak dam ge ɗu go to?»

46Rebeka jan Isaku go: «Mbi sḛ mbyatɗa go ne mbi tisi ge Hittitiya mbe ma no. Kadɗa Yakub gwan san vya gwale ge suwal mbe no ne ɗe, a ma tuli ge mbi ba gwan kat dunya zi ne ɗaa?»

Bible kim

2013 Bible Society of Chad

More Info | Version Index