Search form

Maka 1

Odoo howo sauwidili, Yoneeye to tekepo taka goo

(Matiyu 3:1-12, Luka 3:1-18, Yonee 1:19-28)

1To tekepo bei mimooloogoo hagoso, Godeeyo owolo Yesu Kelisowo goo. 2Daga hoogoo Godeeyo to tosili odoo Aisaya yayo booka mapoo Godeeye Yesu mapoo to taka egeesee hoguguso:

“Ayo mo to tosili odoo malalo diye dalaiso.

Osoloso yayo dileso nee eli moodoolame.

3Miwe poogoo mi omaga edebeeyo egeesee idagoo,

‘Lodee yayo sibilei eli moodee.

Osoloso medee hoodo magee.’”

4Yonee odoo howo sauwidili miwe poogoo mi mapoo peledoboloso, yayo odoo howo sauwudulone to tekepo takolone egeesee takaso, “Niba goo su wuduloso nibada goo tokenee maga waki pialoso howo sauwige, egeeseega Godeeye nibada goo tokenee hapoloso boobado pigileiso.” 5Yudiya mi mapoo debeli mosobia sabolo, osoloso Yoluselem mi toowa mapoo debeli odoo susuga Yoneeye to taka dulame diadeeso, osoloso dibada tokenee Yonee mapoo yiligime, Yoneeye diba Yoden howo mapoo sauwidiso. 6Yonee yo kemol be hu too dugo masi dusa kaloso silone gala kolo gudu masi kalo sili. Osoloso nei yayo nali tapala toowa sabolo koo sabolo nali. 7Yayo odoo susuga mapoo egeesee takeliso, “Odoo hee ama hamamee sibileiso. Yayo kitulugu toowa ayo kitulugu yayo dagadi. A tekeponee o homo bei mapoo gawuloso o homo bi tikamakalai. 8Ayo niba howodeeso sauwidiso, esino niba hamamee yayo Dio Tei maga howo sauwidileiso.”

Yesu howo sauwe sabolo kuku sabolo

(Matiyu 3:13—4:11, Luka 3:21-22; 4:1-13)

9Haga bologolega Yesu Gelili mi toowa ma kulodu mi pepoko Naselet omaga sibume, Yoneeye yo Yoden howomoo howo sauwidiso. 10Yesu howomooga gasibileso egeino, kei mi yamagoloso Dio Tei molo masi yimapoo pubalogome egeiso. 11Osoloso keimi ma dokodooga to egeesee taka, “No ayo gooma mo holo noso, a namapoo dia goomogo.” 12Osoloso beeame omapoo Dio Teiso Yesu miwe poogoo mi omapoo diye diso. 13Yesu beeame 40 omapoo gala seebee sabolo badoboome, saitenso kuku demeleeso. Esino Godeeyo momaiye sibileso yo pidiso.

Yesuye di kebili odoo bakadio bakadiodi gilimadoo goo

(Matiyu 4:12-22, Luka 4:14-15; 5:1-11)

14Yu odoo wiligi toba Helodeeye, Yonee neliga ma kulodu husuloso, hamamee Yesu yo Gelili mi toowa mapoo dileso, to medee tekepo Godee maga simi takomo siliso. 15Yayo egeesee takaso, “Beeame tekepo olo simiso, osoloso Godeeye wiligi doloso badeli oso sibilei koola toopooso. Esiga niba goo tokenee maga waki pialoso, to tekepo mapoo tei te.”

16Beeame heeso, Yesu Gelili abei palaga dimeleeno, di kebikeli odoo bakadio Saimon dio omolo Endulu dio peiso di giligamolome yayo egeiso. 17Eseme Yesuye dimapoo egeesee takaso, “Niba ama hamamee sibadee, ayo niba odoo gilimeli eligileiya.” 18Eseme diba Yesuwo to duloso, dibada pei pogoloso, yima hamamee diadeeso.

19Osoloso yo pepoko hoogoo dileso, di kebikeli odoo abo Sebediyo owolo bakadio, Yemes dio omolo Yonee dio du ma kulodu dopolone pei moodoomolome egeiso. 20Osoloso Yesu diba ogoloso, yayo diba gilimadooso. Eseme diayo dulone o tou telagali odoo sabolo oma Sebedi sabolo du ma kulodu gilimane pogoloso, Yesu ma hamamee diadeeso.

Odoo bo holo pala

(Luka 4:31-37)

21Yesu o hamamee dili odoo sabolo Kapeniyum mi mapoo simiso. Osoloso Yu odoowo tei beeame hee mapoo, Yesu howo gisili moso omapoo peleso, Godeeyo to eligilame mimooloogooso. 22Odoo susuga yayo eligi dume howoogaso, bei yayo kitulugu sabolo eligime. Eseme odoo susuga diso nei woosa nei woosa demeleso egeesee takaso, “Odoo hagee ogumo? Ibada tei goo eligili odoo oso eligi goo egesinee. Bei diayo eligi mapoo kitulugu mauwe.” 23Epedee omapoo, odoo bo holo pala oso howo gisili moso kulodu gadileso agadiso. 24“Yesu Naselet odoo nayo amapoo osoloso bo holo abo mapoo ogoo goo moodoolameyo? No hamapoo iba tokenee palame ka simiyo? A gooleedooso, no Godeeyo tei odoo.”

25Yesuye bo holo odoo mapoo to kitulugu sabolo egeesee takaso, “To koodobie, no odoo ma kuloduga peegoo gadi!” 26Eseme bo holo oso odoo ma kulodu badolone neligidi kikiligameleso gwa sabolo peegoo gadiso.

27Eseme, odoo susuga dia howoogaso, osoloso disono nei woosa nei woosa diso, “Goo hagee ogoo goowo? Goo hagee dia eligi kitulugu sabolo eligi, bei edebeeyo bo holo mapoo to takooga, peegoo koo gadili. Esino Yesuye bo holo mapoo to takooga, mesiloso peegoo gadiliso.” 28Eseme Gelili mi toowa mapoo odoo susuga goo ee saga takomo diso.

Yesuye odoo paigiga tekepo moodoo

(Matiyu 8:14-17, Luka 4:38-41)

29Howo gisili moso poogoo dileso, Yesu Yonee sabolo Yemes sabolo, Saimon dio Endulu dio dibada moso mapoo diso. 30Saimonwo nalobo paiye kolo dei moodoome debi mapoo tiameleeso. Diayo Yesu mapoo sobo paiye eyo goo takaso. 31Osoloso Yesu sobo paiye mapoo dileso, o dee mapoo toloso, “Teebee,” diso. Eseme paiye kolo dei saga yimaga koodo diso. Eseme yayo dimapoo nei teneeso.

32Habe osoko tolopume odoo abo oso Yesu mapoo odoo paigiga sabolo bo holo paladee odoo sabolo ido sibadeeso. 33Osoloso Kapeniyum mi toowa mapoo debeli odoo susuga Yesuye odoo paigiga moodoo ee agalame osulu miyopoo mooloogoodooso. 34Eseme Yesuye odoo paigiga mudu opusomo opusomodi yayo takeme tekepo poloso weido diso. Osoloso bo holo odoo ma kulodu debei peegoo hasisilone dimapoo egeesee takaso, “Mo goo na takee,” diso, bei bo holo susuga diba Yesu Godeeyo owolo deli gooleedooso.

Yesuye Gelili mi toowa mapoo to takomo di goo

(Luka 4:42-44)

35Gesikolodee mi hadopeelega, Yesu hogabuloso moso poogoo dileso, obusomo odoo koola mauwe mapoo dokodoo toodagalame diso. 36Hamamee Saimonbolo debei odoo abo sabolo Yesu esiamo diso. 37Diayo yo egeme yimapoo takaso, “Odoo susuga no esia moloso.”

38Yesuye to nei takaso, “Iba mi abo mapoo dimo, omapoo dileso Godeeyo to takalame. Bei kasee magayo a goo egee talame simi.” 39Osoloso yo Gelili mi toowa ma kulodu mi pepoko susuga mapoo dileso, Yu odoowo howo gisili moso eyo kulodu Godeeyo to takomo sileeso. Osoloso bo holo odoo ma kulodu pala peegoo hasisopugu demeleeso.

Yesuye odoo kolo e bia masi moodoo

(Matiyu 8:1-4, Luka 5:12-16)

40Odoo kolo e bia masi Yesu mapoo sibileso ebiso miyomoo tugusaloso egeesee takaso, “Nayo a tekepo moodoolai goomogoga, a tekepo moodee.”

41Yesuye yo dia sooloo dolome o kolo mapoo sigolone yimapoo egeesee takaso, “Ayo no tekepo palai goomogo, esiga no tekepo pe.” 42Eseme epedee omapoo o kolo mapoo e bia masi mauwe poogooso. 43Yesuye yo di dolone to kitulugu sabolo egeesee takaso, 44“Nayo dileso no ayo tekepo pa goo ee odoo abo mapoo na takee. Esino, nee su tekepo pa goo ee, goo tokenee hapalame gala hu weli wiligi odoo toba yimapoo dileso eligi. Osoloso nee su tekepo pa amaga emegeidi bi tenee, Moseseeye tei magoo goo ee dodolone, odoo susuga oso ogoloso tekepo pa ee gooleedalame.”

45Esino yo Yesuwo to mapoo tei telega pogoloso, odoo susuga mapoo o kolo e bia masi moodoo oposususo. Bei egeesee maga Yesuye mi kamapoo disomo, odoo susuga oso Yesu agalame dia mooloogoodoo diso. Eseme Yesu mi abo mapoo odoo howo woola sile. Esino yo mi odoo mauwe mapoo bado neme edebeeyo mi opusomo opusomodi maga yayo badebei mi mapoo yo agalame sibadee demeleeso.

Odoodee Baibel

© 2006 Wycliffe Bible Translators, Inc. All rights reserved.

More Info | Version Index