Search form

Maka 10

Sobo huloso pegeli goo

(Matiyu 19:1-12, Luka 16:18)

1Yesu o hamamee dili odoo sabolo Kapeniyum mi pogoloso abaga dino Yudiya mi mapoo peledoboloso, see abaga dino Yoden howo daso. Osoloso omapoo egeino, odoo mooloogoodoo yimapoo sibadeeme, Yesuye dimapoo Godeeyo goo eyo daga eligi egeesee eligiso.

2Osoloso Pelisi odoo aboso sibileso Yesuye to tokenee takabeleeso, kukulo agalame yimapoo woosaso, “Esiga gisoso sobo huloso pagalai soowayo?”

3Eseme Yesuye dimapoo to nei egeesee takaso, “Sobo huloso pegeli eyo goo Moseseeye nimapoo tei kasee eligiliyo?” diso.

4Eseme diayo egeesee takaso, “Moseseeye imapoo tei egeesee eligiso, gisoso sobo poogooga, daga sobo pegeli peipa omapoo hoguloso sobo yo ka peegeena.”

5Esino Yesuye dimapoo to nei egeesee takaso, “Mosesee yayo nimapoo egeino nibada sooloo dia kalawa neme tei hagee ka magoo. 6Godeeye mipoo toowa hagee daga moodoo mapoo, giso sabolo sobo sabolo moodooso. 7Bei egeesi maga gisoso oma dio owee dio pogoloso, see osobo sabolo hedepe doloso dabalaiso. 8Osoloso diba daga giso obusomo, sobo obusomo doloso badebeiso. Esino diba see olo hedepe doloso doso.” 9Yesuye egeesee takaso, “Godeeye giso dio sobo dio hedepedi, domo na pi,” diso.

10Osoloso hamamee Yesu o hamamee dili odoo sabolo moso kulodu dopolone, sobo huloso pegeli eyo goo diayo Yesu mapoo see woosaso. 11Eseme Yesuye dimapoo egeesee takaso, “Edebeeyo osobo pogoloso, sobo hee huga, yo odoo heeyo sobo peedee huso. 12Osoloso sobo yo omo pogoloso giso hee huga, yo odoo heeyo giso peedee huso.”

Yesu sabolo holaiso sabolo

(Matiyu 19:13-15, Luka 18:15-17)

13Beeame hedepeso odoo aboso holaiso Yesu mapoo ido sibadeeso, o deeso sigoloso diba pidilame. Esino o hamamee dili odoo oso goo egee ogoloso hamaga takaso. 14Osoloso Yesuye o hamamee dili odoo oso holaiso hamaga taka ogoloso, kamana sabolo dimapoo takaso, “Holaiso amapoo sibilei soowa. Niyo na hamaga takee, bei odoo holaiso hageesi masi oso Godeeye wiligi doloso badeli mapoo gasibileiso. 15Ayo nimapoo tei goo hee taka, edebeeyo o goo holaiso masi omamo to mapoo mesimo sili, egeesi pelega pogoloso, Godee mapoo mesilega poogooga, yo Godeeye wiligi doloso badeli mapoo gasibilei mauwe.” 16Osoloso Yesuye holaiso gilimadoloso, yayo hedepe maduloso o deeso sigolone Godeeye no pidi dee takoo, hedepe maduloso o deeso sigolone Godeeye no pidi dee takoo, diso.

Bi bei odoo

(Matiyu 19:16-30, Luka 18:18-30)

17Yesu o hamamee dili odoo sabolo mi hee mapoo dimeleeno, odoo hee hoguo sibileso, o homo beiyopoo gauwoloso, yimapoo egeesee takaso, “Eligili odoo tekepo, ayo ogoo goo toga badoboso kookaiyo gie badeli ka talaiyo?”

18Eseme Yesu yo Godeeye hudi magoo doloso gooleedalame, yayo nei egeesee takaso, “Bei kasalame nayo a tekepo ka sisala? Hedepe Godeeno medee tekepo. 19Esino nayo woosa to eyo nei, Godeeyo tei magoo no olo gooleedooso: odoo na wolome, adaba kooka sobo na peedee hui, heli na te, odoo hee mapoo gamenee na gigidi, odoo hee mapoo gamenee goo maga heli na te, osoloso nama dio noowee dio to taka mapoo mesie.”

20Osoloso odoo yayo Yesu mapoo egeesee takaso, “Eligili odoo, a holope maga simi tei susuga hagee ayo tobuloso tomo simiso.”

21Eseme Yesu sooloo dala sabolo odoo omapoo bolone yimapoo egeesee takaso, “No goo hedepe doopoo dagadi moloso. No dileso, nee bi susuga odoo abo mapoo nei moleeso talame todi. Osoloso bi too eyo nei molee bi mauwe odoo mapoo pi. Eseega no kei mi mapoo nei tenelaiso. Osoloso no ayo di hamamee sibe,” diso.

22Osoloso bi bei odoo yo Yesuye to taka duloso, pupuda sabolo diso, bei bi bei mologa, o bi odoo abo mapoo tenelai goomogele.

23Eseme bi bei odoo dime, Yesu o hamamee dili odoo mapoo bolone egeesee takaso, “Bi bei odoo oso Godeeye wiligi doloso badeli mapoo gasibilei kalawa toowa.”

24Yesuye to taka duloso diba howoogaso. Esino Yesuye see dimapoo takaso, “Mo holo dio, Godeeye wiligi doloso badeli mapoo gasibilei kalawa toowa. 25Esiga dugo duseli midole ou maga be toowa, kemol oso gadilei kalawa. Esino bi bei odoo oso Godeeye wiligi doloso badeli mapoo gasibilei kalawa toowa.”

26O hamamee dili odoo Yesuye to taka duloso dia howoogaso. Osoloso disono nei woosa nei woosa dolone egeesee takaso, “Odoo agayo gie badeli ka talaisomo?”

27Eseme Yesuye dimapoo bolone to nei takaso, “Edebeeyo eyo kitulugu maga Godeeye wiligi doloso badeli mapoo gasibileime, esino Godeeyo kitulugu sabolo bi susuga kalawanee.”

28Osoloso Pitaye Yesu mapoo egeesee takaso, “No ege, iba bi susuga poogooso, nayo di hamamee sibilame.”

29Esino Yesuye egeesee takaso, “Ayo nimapoo goo hee toowa taka, edebeeyo ayo di hamamee sibilame, osoloso to tekepo eyo goo maga, o moso, o emei, o omoo, o omolo, o owee, o ama, o holaiso, osoloso mi poogooga, 30odoo yayo o bi susuga poogoo eyo nei toowa daga dileso talaiso. Osoloso yo mi toowa hamapoo badolone, see moso, emei, omoo, omolo, owee, holaiso, osoloso mi bei malaiso. Osoloso edebeeyo yimapoo dala tenelaiso, bei yayo mo to mapoo mesiliga. Esino yo mo to tekepo eyo goo maga dala toloso, mi hoo poogoo mapoo see Godeeyo mi siboga, yo badoboso kookaiyo gie badeli talaiso. 31Esiga epedee hamapoo odoo malalo egee do, see hamamee dabalaiso. Osoloso hamamee egee doso, see malalo dabalaiso.”

Yesu eyo talai see tobu taka

(Matiyu 20:17-19, Luka 18:31-34)

32Yesu o hamamee dili odoo sabolo Yoluselem mi mapoo dulone, Yesuye malaso. Esino o hamamee dili odoo goo howoogamo dime, odoo abo hamamee sibadee dia ebigaso. Bei odoo susuga oso goolee Yoluselem mapoo goo tokenee peledeebeeyaga. Osoloso Yesu o hamamee dili odoowe gilimadoloso peegoo dopolone, Yoluselem mapoo goo yimapoo peledabalai dimapoo takaso. 33Yesuye dimapoo egeesee takaso, “Iba Yoluselem mapoo peledobooga, Odoo Holo, a edebeeyo tei moso wiligi tebisa sabolo, tei eligili odoo abo mapoo tenelaiso. Osoloso amapoo midileiso, osoloso a teli mapoo magalaiso, osoloso Yu odoonee mapoo tenelaiso. 34Diayo a manalaiso, osoloso amapoo makawo pakalaiso, osoloso a tiso dapalaiso, osoloso a wolomalaiso. Esino beeame bakadio hedepedi pogoloso hamamee ta maga see hogado sibileiso.”

Yemes dio Yonee dio goomoga goo Yesu mapoo ogo taka

(Matiyu 20:20-28)

35Osoloso Sebediyo owolo Yemes dio Yonee dio Yesu mapoo sibileso egeesee takaso, “Eligili odoo, goo iyo goomoga namapoo taka,” diso.

36Eseme Yesuye nei takaso, “Ogoo goowo?”

37Eseme diayo nei egeesee takaso, “Nama Godeeye wiligi doloso badeli mi toowa mapoo siboga, iba goomogo, odoo hee nee dee deedee dokolo buo, osoloso dee dobusu dokolo buo doloso goo susuga nobolo wiligi dalame,” diso.

38Esino Yesuye dimapoo nei egeesee takaso, “Niyo egee takoo goo eyo bei niba gooleedele. Esiga niba dala toowa ayo talame egee molo, niba dala egeesee talai soowayo? Osoloso niba ayo talame egee molo niba egeesee talai soowado?”

39Eseme diayo nei egeesee takaso, “O, iba dala egee talai goomogo.”

Eseme Yesuye see egeesee takaso, “Niba dala toowa ayo talame egee molo, niba dala egeesee talaiso. Osoloso ayo talame egee molo, niba egeesee talaiso. 40Esino odoo hee mo dee deedee dokolo buo, mo dee dobusu dokolo buo dalai, ayo hudi magalaime, bei debi omapoo bilei Godeeye olo hudi magooso.”

41Osoloso Yesu o hamamee dili odoo abo 10 diayo Yemes dio Yonee dio to taka duloso, dimapoo dia kamanaso. 42Yesu o hamamee dili odoo gilimadoloso, dimapoo egeesee takaso, “Mipoo toowa hageeyo wiligi odoo tebisa diayo odoo abo dibada hemi egee do mapoo dala sabolo, hegi sabolo teniliso. 43Esiga niba mipoo toowa hageeyo wiligi odoo tebisa dia goo na peedee. Esino odoo agayo malalo badalai goomogoga, nibada kulodu odoo hee dia pidi. 44Osoloso odoo agayo see malalo badalai dia goomogoga, no odoo susuga wulo nei mauwe wulayo dia pidi. 45Esiga Odoo Holo, a mi hamapoo edebeeyo a pidilame ka sibile, esino ayo mi odoo pidilame ka simi. Osoloso mipoo toowa hamapoo odoo bei Godee mapoo iyado sibilame a talame ka simi.”

Yesuye odoo howo bakadio si moodoo

(Matiyu 20:29-34, Luka 18:35-43)

46Osoloso diba Yeliko mi mapoo peledoboloso, Yesu o hamamee dili odoo sabolo mi egee pogoloso dimeleeno, odoo mooloogoodoo susuga diayo di hamamee simiso. Eseme odoo howo bakadio si o hu Batimeyes, Timayes eyo owolo, Yesuye sibilei eli pee mapoo badolone molee howameleeso. 47Esiga Batimeyesye Yesu Nasalet odoo sibogodi dume, Yesu mapoo idagaso, “Yesu, Debidiyo amawe, nayo a sooloo dele, osoloso pidi!”

48Batimeyes Yesu mapoo idageme, odoo aboso yo hamaga takaso. Esino yo koodobilega, see dia neligidi idagaso, “Debidiyo amawe, nayo a sooloo dele, osoloso pidi!”

49Yesu Batimeyes yayo i duloso, kookoo tabaso, osoloso egeesee takaso, “Yo hapoo sibe dee takee.” Eseme diayo howo bakadio si odoo iso, osoloso yimapoo egeesee takaso, “Goomoge. No toboloso, di. Yesuye no i,” diso. 50Eseme Batimeyes o gidei togobuloso, saga dokodoo pupeleso, Yesu mapoo simiso.

51Yesuye yimapoo egeesee takaso, “Ayo namapoo kasee moodoolameyo?”

Eseme howo bakadio si odoo oso nei egeesee takaso, “Eligili odoo, a agalai goomogo.”

52Eseme Yesuye yimapoo egeesee takaso, “No wulo di. Nee tei too oso no tekepo paso.” Eseme howo bakadio si odoo yo epedee omapoo see medee egeiso, osoloso yo Yesubolo eli maga diso.

Odoodee Baibel

© 2006 Wycliffe Bible Translators, Inc. All rights reserved.

More Info | Version Index