Search form

Maka 14

Wiligi odoo tebisa oso Yesu wolomalame to mou goo

(Matiyu 26:1-5, Luka 22:1-2, Yonee 11:45-53)

1Osoloso Godeeye gababia goolee pugu wo nalai sabolo osoloso wo mosoowe nalai beeame bakadio hoogoo meleeso. Eseme tei moso wiligi tebisa odoo sabolo osoloso tei eligili odoo sabolo diayo Yesu toloso mada wolomalame eli esiamo silesibiso. 2Esino diayo diso nediliyo egeesee takaso, “Iyo wo ne hamapoo yo toloso wolomalaime, bei odoo susuga oso imapoo kamanaloso ibolo biligiyaga,” diso.

Betani mi mapoo soboso bo i sisigagili medee tekepo oso Yesuwo wiligi mapoo soo goo

(Matiyu 26:6-13, Yonee 12:1-8)

3Yesu Betani mi mapoo Saimon daga kolo e bia masi eyo mosopoo badolone nei nameleeso. Eseme sobo heeso bo i sisigagili medee tekepo mai masi pepoko, o hu alabasta, omapoo keedo simiso. Yo sibileso bo i sisigagili medee tekepo keesoo, o hu nad, me gooboopuguloso, Yesuwo wiligi mapoo sooso.

4Eseme odoo abo omapoo debei oso ogoloso komonolone diso nediliyo egeesee wosogaso, “Bei kasimaga sobo yayo bo i sisigagili medee tekepo goo mauwe mapoo sologo pugulone ka mauwe paga pele?” diso. 5“Yayo bo i sisigagili medee tekepo ee odoo mapoo neiso talame tenee diepi, molee toowa 300 ee toloso bi mauwe odoo mapoo teneli.” Diayo dee takoloso, sobo yimapoo kamanaso.

6Eseme Yesuye dimapoo nei takaso, “Yimapoo egeesee na takee. Bei kasimaga niyo yimapoo kamanaloso ka takala? Yayo amapoo goo tekepo moodooso. 7Esiga bi me odoo beeame susuga nibolo dabalaiso. Esiga niyo diba gooleepuguga, diba biso pidilei tekepo. Esino beeame susuga ma kulodu a nibolo badalaime, esiga niyo beeame susuga omapoo a pidileime. 8Esiga sobo hagoso yayo moodoolai dee goolee goo ee amapoo moodooso. Yayo mo suso hamamee midoo ma kulodu malai goo ee goolee pugulone, bo i sisigagili medee tekepo oso amapoo sooso. 9Ayo nimapoo tei goo hee taka, edebeeyo mi toowa mapoo to medee tekepo takomo duga, sobo hagoso amapoo moodoo goo ee see takalaiso, osoloso diayo yo see goolee pigilame,” diso.

Yudaseeye Yesu toloso ha teli mapoo tenelame to tiasoo goo

(Matiyu 26:14-16, Luka 22:3-6)

10Osoloso Yesu o hamamee dili 12 ma kulodu odoo hee Yudasee Isakeliyot yayo tei moso wiligi tebisa mapoo dileso Yesu dimapoo tiasalame diso. 11Eseme diayo o goo dume, dia goomogolone yimapoo molee nei tenelame to takoloso tei magooso. Eseme Yudaseeye Yesu toloso dimapoo tenelame eli esiamo silone beeame tekepo bameleeso.

Yesuye o hamamee dili odoo sabolo Godeeye gababia wo ne goo

(Matiyu 26:17-25, Luka 22:7-14,21-23, Yonee 13:21-30)

12Osoloso wo mosoowe nalai beeame oso mimooloogooga, daga hoogoo Godeeye gababia omapoo Yu odoo dibada amawe piligilega poogoo ee goolee pigilame, diayo Godeeye gababia wo nali beeame omapoo, diayo sipi be hu molubo gie kakauwa wologaliso. Eseme Yesuwo hamamee dili odoo oso Yesu mapoo egeesee woosaso, “Nayo iba kamapoo dileso Godeeye gababia wo nalai moodoolai ka goomogolo?”

13Eseme Yesu o hamamee dili odoo bakadio diye dolone egeesee takaso, “Niba Yoluselem mi toowa mapoo diadee. Osoloso niba omapoo dileso ogoga odoo howo keedoloso eli domopoo dumologa tugodalaiso, osoloso niyo yimapoo hamamee deedee. 14Osoloso yo moso kulodu gaduga, moso eyo oma mapoo egeesee takee, ‘Eligili odoo oso egeesee taka, “Ayo mo hamamee dili odoo gilimadoloso, Godeeye gababia wo nalame debi poopa gooboogoo kasomo?’” dee takee. 15Osoloso yayo niba moso dokodoo ido peleso debi poopa gooboogoo toowa olo moodoo doloso melee eligileiso. Esiga ibada wo niyo omapoo moodee,” diso.

16Eseme Yesu o hamamee dili odoo bakadio oso Yoluselem mi toowa mapoo diadeeso. Diba omapoo dileso egeino, goo Yesuye dimapoo taka goo susuga ee molome egeiso. Eseme diayo Godeeye gababia wo nalai omapoo moodooloso, diba see Yesuye o hamamee dili odoo abo sabolo debei mapoo wedi diso.

17Osoloso habedee mapoo Yesu o hamamee dili 12 sabolo sibileso moso omapoo peledabaso. 18Diba omapoo wo nolone dopome, Yesuye dimapoo egeesee takaso, “Ayo nimapoo tei taka, mooloogoodoo hagee ma kulodu odoo hee abolo wo hagee namolo oso a tiasalaiso.”

19Eseme Yesu o hamamee dili odoo oso to hagee dume, dia gooheleme, diayo Yesu mapoo egeesee woosaso, “Ayonee, o ayowo?” diso.

20Eseme yayo dimapoo nei takaso, “12 odoo mooloogoodoo hagee ma kulodu, odoo agayo abolo wo podoloso homokoko si eyo i daga keedoloso bedi mapoo olugu doloso naga, odoo oso a tiasalaiso. 21Esiga Godeeyo toso daga hoogoo booka mapoo taka Odoo Holo, a talaiso, diso. Esiga to ee dodolone a talaiso. Esino Odoo Holo, a wolomalame tiasili odoo yo dala toowa talaiso. Esiga oweeye yo soomagelega poogoo diepi, yo tekepo peliyo,” diso.

Lodee goolee pugu wo ne goo

(Matiyu 26:26-30, Luka 22:19-20)

22Osoloso diba wo nalaga molome, Yesuye wo toloso, Godee mapoo goomoga toodagoloso wo popeiso. Osoloso o hamamee dili odoo mapoo pulone egeesee takaso, “Ne, hagee mo suso,” diso.

23Osoloso yo see geleipi ko i kapu mapoo keesoo toloso, Godee mapoo goomoga toodagoloso, dimapoo teneme, diayo susuga homokoko i neso.

24Osoloso Yesuye see egeesee takaso, “Hagee mo sawo. Godeeye olo takaso, ‘A odoo bei sabolo hedepe dalaiso,’ diso. Esiga goo hagoso peledabalame mo sawo peegoo sologo pigileiso. 25Esiga ayo nimapoo tei goo hee taka, a epedee hamapoo geleipi ko i keesoo see nalaime. Esino hamamee Godeeye wiligi doloso badalai mi mapoo geleipi ko i keesoo dia nalaiso.”

26Osoloso diba goomoga kosaiya pouloso, see Olipi mubi dokodoo paladeeso.

Pitaye Yesu boobado pigilei maga Yesuye taka goo

(Matiyu 26:31-35, Luka 22:31-34, Yonee 13:36-38)

27Eseme Yesuye see dimapoo egeesee takaso, “Niyo susuga a pogoloso kukulo dileiso. Bei Godeeyo toso booka maga egeesee takooso,

‘Godeeye sipi be hu bali odoo ee wolomalaiso, osoloso sipi be hu susuga oso yimaga peegoo kukulo dileiso.’”

28Osoloso Yesuye see egeesee takaso, “A ta maga see hogabuloso, malalo dileso, Gelili mi toowa mapoo niba tugodalaiso.”

29Eseme Pitaye Yesuye to taka duloso Yesu mapoo egeesee takaso, “Haye! Odoo aboso no pogoloso diadeega, ayo no pogoloso dileime.”

30Esino Yesuye yimapoo see egeesee takaso, “Ayo namapoo tei taka, gesi hamapoo kolokoloso taka bakadio delega, malalo hoogoo mologa, nayo bakadio hedepedi omapoo ‘A yo gooleedele’, dee takalaiso.”

31Esino Pitaye Yesuwo to su mapoo to kitulugu sabolo nei egeesee takaso, “Ayo egeeseelaime! Edebeeyo no wolomaga, a nobolo talaiso.” Eseme Yesuwo hamamee dili odoo susuga to hedepe egeesee takaso.

Yesuye Getesemeni homolee mapoo Godee mapoo toodagemelee goo

(Matiyu 26:36-46, Luka 22:39-46)

32Osoloso Yesu o hamamee dili odoo sabolo Getesemeni olipi homo segei homolee omapoo sibadeeso. Osoloso Yesuye o hamamee dili odoo dimapoo egeesee takaso, “A dileso Godee mapoo toodagalaiya, niba hamapoo deebee,” diso. 33Osoloso yayo dulone Pita, Yemes osoloso Yonee gilimadoloso diso. Yesu yo omapoo dileso badoboome, goohele goo sabolo su ma kulodu hegi goo oso yimapoo simiso. 34Eseme Yesuye dimapoo egeesee takaso, “Mo su ma kulodu goohele goo oso sibilone, a teyaga. Esiga niba hamapoo dopolone toodagolone deebee,” diso.

35Osoloso yo dimaga pepoko hoogoo dileso, ebiso miyomoo tugusaloso balaboo tialoso molone Godee mapoo toodagaso, yimapoo dala toowa egee sibo Godeeye yimaga peegoo tokopigilame. 36Yayo toodagolone egeesee takaso, “Ma, mo ma! Goo susuga namapoo kalawanee. Esiga dala toowa oso amapoo hagee sibo, nayo peegoo magalai soowayo? Esino nayo goomoga goo moodee, ayo goomoga goonee,” diso.

37Osoloso Yesu dokodoo toodagoloso wedi dileso egeino, o hamamee dili odoo bakadio hedepedi tiesa molome egeiso. Eseme yayo Pita tidipuguloso yimapoo egeesee takaso, “Saimon, no tiayo? No beeame deiyepo hamapoo abolo bolone badalai tebiledo? 38Esiga niba bolone Godee mapoo toodagolone deebee, niba kukuli goo mapoo homodobiaga. Bei nibada googoolee oso goo tekepo talame goomogoso, esino nibada su oso goo tokenee talame goomogoso,” diso.

39Osoloso yo see wedi dileso, Godee mapoo toodagolone goo hedepe onosee toodagaso. 40Osoloso yo see dimapoo wedi sibileso egeino, diba tiesa molome egeiso, bei diba tila paga oso howo seme. Osoloso diayo Yesu mapoo to nei takalai gooleedele poogooso.

41Yesu yo see bakadio hedepedi mapoo toodagoloso, o hamamee dili odoo mapoo wedi sibileso, diba tidipuguloso egeesee takaso, “Niba hosolone wulo tiesa malala? Tia olo oso! Odoo Holo, a tokenee odoo mapoo toloso tenelai beeame olo epedee hamapoo sibo. 42Ege, a tiasili odoo sibo. Teebee, iba diba tugodalame dimo!” diso.

Edebeeyo Yesu too goo

(Matiyu 26:47-56, Luka 22:47-53, Yonee 18:3-12)

43Yesu yo to takomolome, o hamamee dili odoo hedepe, Yudasee, omapoo peledabaso. Odoo bei Yudaseebolo sibulone Yesu talame wei sabolo kaiya sabolo toloso tosibadeeso. Odoo sibadee hagee, tei moso wiligi odoo tebisa sabolo, tei eligili odoo tebisa sabolo, Yu wiligi odoo tebisa oso, diba diye diso.

44Yudasee yo sibilame badolone, Yesu talai odoo mapoo egeesee takaso, “Ayo dileso odoo toloso adaga, odoo oso. Esiga niyo dileso yo toloso medee bolone ido di,” diso. 45Osoloso Yudasee yo odoo mooloogoodoo pogoloso dileso, Yesuye tebidi mapoo hoogoo dileso, yayo egeesee takaso, “Eligili odoo!” dee takoloso, Yesu adaso. 46Eseme odoo abo oso sibileso Yesu tooso. 47Esino Yesu o hamamee dili odoo hee koola omapoo tebidi oso o kaiya tadoloso, tei moso wiligi toba eyo tou teli odoo kaiyaso woomeleso eyo doopoo poogoome, dulu asooso.

48Eseme odoo Yesu talame sibadee dimapoo Yesuye egeesee woosaso, “Niyo goolee a heli teli odoo oso badoboome a talame kaiya sabolo wei sabolo toloso ka sibadeeyo? 49Osoloso ayo beeame susuga tei moso tegei ma kulodu eligimili niyo egeiso. Esino bei kasimaga niyo a omapoo telega ka poogoowo? Esino Godeeyo to booka oso taka ee dodolone, niyo epedee sibileso a ka toso,” diso. 50Eseme Yesu o hamamee dili odoo susuga oso yo pogoloso kukulo diadeeso.

51Osoloso odoo gie kauwa dugo booloso, Yesu diayo toloso dime hamamee deedee diso. Eseme diayo yo ogoloso, yibolo talame o dugo mapoo temeleso, o dugo puo puguso. 52Esino o dugo dimapoo yane pogoloso, yo bododiwe piaso.

Yesu wiligi odoo tebisa mapoo goo palabalame ido di goo

(Matiyu 26:57-68, Luka 22:54-55,63-71, Yonee 18:13-14,19-24)

53Osoloso diayo Yesu idoloso tei moso tegei wiligi toba eyo mosopoo, tei moso wiligi odoo tebisa sabolo, Yu odoo wiligi tebisa sabolo, tei eligili wiligi tebisa sabolo oso mooloogoodoloso debei omapoo ido diso. 54Eseme Pitaye hamameedee Yesu deedee dileso, tei moso wiligi eyo moso belee ma kulodu badebeiso. Yo omapoo badolone tei moso gibali odoo sabolo kekeiseme dou hameleeso.

55-56Eseme tei moso wiligi tebisa sabolo osoloso Yu wiligi tebisa sabolo oso Yesu wolomalame goo tokenee esiaso. Osoloso odoo susuga oso Yesuwo hu maga gamenee takolone goo mudu opusomo opusomodi takaso. Esino diayo to mudu opusomo opusomodi taka ma kulodu, tei goo egele.

57Esino odoo aboso tebisaloso, Yesuwo hu maga gamenee egeesee takaso, 58“Iba odoo hagoso egeesee takeme duso, ‘Edebeeyo tei moso tegei hagee ayo guopuguloso, see beeame bakadio hedepedi ma kulodu tei moso dia takalaiso. Esino edebeeyo takalaime,’ yayo dee takeme duso,” diso. 59Esino diayo to mudu opusomo opusomodi taka ma kulodu tei goo egele.

60Eseme tei moso wiligi odoo toba oso odoo susuga mooloogoodoo ma kuloduga taba molone Yesu mapoo egeesee woosaso, “Edebeeyo nee hu maga goo mudu opusomo opusomodi egee takoo maga nayo to nei dimapoo takalaisomo?” 61Esino Yesuye to nei takele poogooso.

Eseme tei moso wiligi odoo toba oso to see Yesu mapoo egeesee woosaso, “No Godeeyo owolo, Keliso somo?” diso.

62Eseme Yesuye to nei egeesee takaso, “O, aso. Esiga hamamee Odoo Holo, a ma Godee kitulugu eyo dee deedee dokolo buloso yibolo wiligi doloso badoga niyo agalaiso, osoloso keimi ma dokodooga, kolobo ma kuloduga see wedi siboga niyo agalaiso,” diso.

63Eseme tei moso wiligi odoo toba oso to hagee dume, dia komolone o dugo tologo puguloso egeesee takaso, “Bei kasimaga iyo yimapoo goo abo ka esileiyo? 64Bei yayo ‘a Godeeyo owolo oso’ dee taka maga, yayo Godee mapoo mesilega osoloso ebilega to tokenee taka, niyo olo duso. Esiga niyo goolee yimapoo ogoo goo moodoolaiyo?” diso.

Eseme Yu wiligi tebisa susuga oso egeesee takaso, “Yesu dia tokenee odoo, esiga yo wolomalai tekepo,” diso. 65Eseme odoo aboso Yesu mapoo makawo pagaso. Osoloso diayo Yesuwo howo mapoo dugoso tialogooso, dibada dee tiadoo oso mudu mapoo woolone egeesee takaso, “Nayo takeliso no Godeeso, osoloso goo susuga gooleedooso, diso. Esiga no odoo agayo woolo? Imapoo takee,” diso. Osoloso tei moso gibali odoo oso yo ido dulone woomodiso.

Pitaye Yesu yo gooleedele, dee taka

(Matiyu 26:69-75, Luka 22:56-62, Yonee 18:15-18,25-27)

66-67Osoloso Pita yo tei moso wiligi toba eyo moso belee ma kulodu kekeiseme dou holone badebeiso. Eseme tei moso wiligi toba eyo tou teli sobo hedepe oso yayo badebei omapoo sibileso yimapoo medee bameleso, egeesee takaso,

“No Naselet odoo, Yesubolo silime egei odoo hee noso,” diso.

68Eseme Pitaye sobo yimapoo gamenee egeesee takaso, “Nayo odoo egee takoo eyo goo, a gooleedele,” diso. Osoloso Pita yayo egeesee takoloso, moso belee osulu gasibili pee mapoo diso. Eseme kolokolo takaso.

69Osoloso tei moso wiligi toba eyo tou teli sobo yayo Pita see omapoo tebidi egeme, yayo odoo abo yibolo tebidi omapoo egeesee takaso, “Odoo hagee tei Yesubolo sili hee yoso,” diso. 70Eseme Pitaye see takaso, “Haye! Asonee,” diso.

Eseme diba pepoko doboso hamamee, odoo abo koola hamapoo tebidi oso Pita mapoo see egeesee takaso, “Bei no Gelili odoo osoloso Yesu sabolo Gelili odoo, esiga no Yesubolo sili odoo hee noso,” diso.

71Eseme Pitaye to kitulugu sabolo egeesee takaso, “Ayo tei goo takelega poogooga, Godeeye amapoo dala toowa tenelai goomogo! Niyo odoo egee takoo a gooleedele!” diso.

72Osoloso Pita yo egeesee takoloso epedee omapoo, kolokoloso taka bakadio diso. Eseme Pita Yesuye yimapoo to taka hagee goolee puguso, “No kolokoloso taka bakadio delega, malalo hoogoo mologa, nayo bakadio hedepedi omapoo ‘A yo gooleedele’ dee takalaiso.” Eseme Pitaye to hagee goolee pugume, goohele toowa sibume, dia pisaso.

Odoodee Baibel

© 2006 Wycliffe Bible Translators, Inc. All rights reserved.

More Info | Version Index