Search form

Maka 5

Yesuye odoo bo holo pala moodoo

(Matiyu 8:28-34, Luka 8:26-39)

1Esiga Yesu o hamamee dili odoo sabolo Gelili abei daso. Osoloso dibada du Gelasa mosobia dibada mi su mapoo oluguso. 2Osoloso diba du olo oluguloso, Yesu yo mubi dokodoo polomeleeno, odoo bo holo pala oso odoo bi maga Yesu mapoo simiso. 3Odoo hagee beeame susuga odoo bi mapoo badeli, yo kitulugu toowaga edebeeyo yo ki tiso koo tialekili. 4Beeame susuga o homo sabolo dee sabolo ki tiso tialokoloso magooga eyo kitulugu oso ki ti kokisa pigiliso. Esiga edebeeyo yo balai eli opupa meli. 5Beeame susuga osoloso gesi susuga odoo bi mapoo osoloso esia mapoo eyo nediliyo yoso kolo kookoome gwa sabolo siliso.

6Yesu eli sage hoogooga sibumolome, odoo yo Yesu ogoloso yo tugodalame hoguodiso. Osoloso o homo beiyopoo gawuaso. 7-8Eseme Yesuye yimapoo egeesee takaso, “Bo holo, no odoo yimaga peegoo gadi.” Esino bo holo pala odoo oso neligi agadulone egeesee takaso, “Yesu dokodoo badeli Godeeyo owolo, no ogoo talame amapoo ka simiyo? Godeeyo goo maga amapoo dala toowa na tenee!”

9Osoloso Yesuye see egeesee takaso, “Nee hu ogumo?”

Eseme odoo oso to nei yimapoo egeesee takaso, “Mo hu Bei, bei iba bei odoo hageeyo kulodu.” 10Osoloso bo holo oso Yesu mapoo see howa see howa diso, bo holo mi hee mapoo seesee peegeeyaga.

11Esino koola mapoo esia dokodoo be hu bei mooloogoo doloso, mi nalagamo sile sibiso. 12Eseme bo holo oso Yesu mapoo see howaso, “Nayo iba be mapoo palame seesee pagalai soowayo?” diso. 13Eseme Yesuye diba be ma kulodu gasoowadee neme, bo holo odoo ma kuloduga galagasibileso see be ma kulodu soowadeeso. Eseme be bei 2,000 egesi oso esia dokodooga abei mapoo kuko meileso abei ma kulodu weidaso.

14Be gi debeli odoo oso goo hagee ogoloso kuko dulone mi toowa mapoo osoloso mi pepoko abo mapoo takomo diso. Eseme odoo susuga to hagee duloso, diba agalame sibadeeso. 15Odoo susuga Yesu mapoo sibileso mooloogoodooso, esino odoo bo holo pala see tekepo poloso, goo tekepo gooleme dugo tekepo kaloso, Yesubolo badoboome ogoloso dia ebiaso. 16Be gi debeli odoo diayo goo odoo mapoo peledapa sabolo be mapoo peledapa sabolo ogoloso odoo susuga mapoo takaso. 17Osoloso odoo mooloogoodoo susuga oso to hagee duloso, Yesu mapoo see howa see howa diso, “No hamaga peegoo di!” diso.

18Yesu dilame du mapoo topome, odoo daga bo holo polome Yesuye moodoo oso Yesu mapoo egeesee howaso, “A nobolo dilei goomogo.” 19Esino Yesuye yimapoo egeesee takaso, “Haye, no mosopoo wedi dileso, Lodeeye sooloo dolone goo tekepo namapoo moodoo nemisi dimapoo takalame di,” diso. 20Eseme odoo see abaga wedi dino Dekapolisi mi mapoo mosobia 10 mapoo takomo diso. Odoo susuga yayo taka duloso dia howoogaso.

Yesu mapoo tei teme nei yayo odoo paiye moodoo

(Matiyu 9:18-26, Luka 8:40-56)

21Yesu o hamamee dili odoo sabolo abei dala soowaso, osoloso abei palaga mapoo odoo susuga yimapoo mooloogoodooso. 22Mi omapoo Yu odoowo howo gisili moso mapoo wiligi odoo toba, o hu Yailas, yayo Yesu ogoloso o homo beiyopoo gawuaso. 23Osoloso yayo see Yesu mapoo howaso, “Mo sobo holo paiye moodoolame, yo talai koola tapa, esiga nee deeso yo sigilame sibe, yo paiye wediloso, see gie badalame.”

24Eseme Yesu yibolo dime odoo mooloogoodoo susuga hamamee yo pupugamo diso. 25Osoloso mooloogoodoo eyo kulodu sobo aso woloma oso sawo dimili ososee dugo 12 poogooso. 26Sobo yo melesenee neli odoo bei mapoo diayo pidilame dugo susuga dimiliso, esino diayo yimapoo dala toowa tenemeleeso. Osoloso yayo dimapoo melesenee talame, melesenee eyo nei magolone o molee susuga hosudooso, esino yo sawo dimili koodobilega see toowa poloso, sawo osee dimiliso. 27Esino sobo yo daga Yesuye odoo tekepo moodoomo sili duloso, yo odoo mooloogoodoo kuloduga Yesuwo miligiyo hamamee sibileso o dugo sage yayo ka mapoo sigeso. 28Sobo yayo goolee Yesuwo dugo sigoga yo wedilei gooleeso. 29Yayo Yesuwo dugo sigime sawo dimili saga koodobiaso. Eseme yo eyo egeesee gooleeso, “Sawo dimili tekepo pa,” gooleeso.

30Yesu eyo gooleeno odoo moodeli kitulugu yimaga peegoo di neme, yo odoo mooloogoodoo mapoo hodio bidi puguloso egeesee takaso, “Edebeeyo mo dugo sigo. Ayo gooleedalaiya, mo dugo odoo agayo sigoba.”

31Eseme o hamamee dili odoo oso yimapoo egeesee takaso, “Odoo mooloogoodoo susuga nama hodu kokosooso. Esiga nayo kasalame, ‘Edebeeyo mo dugo sigo. Ayo gooleedalaiya, mo dugo odoo agayo sigoba’ doloso ka takala? Bei odoo susuga oso nama sigoso.”

32Yesu odoo mooloogoodoo kulodu osee esia meleeso, yo odoo agayo sigebeleeso. 33Esino sobo Yesuwo dugo sige oso eyono moodoo goolee puguloso obulone kikilika sabolo sibileso o homo beiyopoo badebeiso, osoloso eyo goo moodoo Yesu mapoo takaso. 34Yesuye nei yimapoo egeesee takaso, “Mo holo, no amapoo tei too maga no tekepo moodooso, esiga no Godeeyo mesie goo sabolo di. No olo weidooso.”

35Yesu to osee takomolome, odoo abo Yailas eyo moso abaga sibileso Yailas mapoo egeesee takaso, “Nee sobo holo taso. Esiga eligili odoo yo ido sibilei goo hee mauwe, yo haga na goolee.”

36Esino Yesu diayo taka to telega pogoloso Yailas mapoo egeesee takaso, “No haga na ebi, wulo amapoo tei te.”

37Osoloso Yesuye egeesee takaso, “Odoo susuga, niba deebee,” doloso hedepe Pita, Yemes, Yonee, osoloso Yailus esee Yesubolo diso. 38Diba abaga dino Yailas eyo moso mapoo peledoboloso, odoo susuga to boowa sabolo pupusuga molome egeiso. 39Yesu moso kulodu gadileso odoo susuga dimapoo egeesee takaso, “Niba kaseega to boowa sabolo ka pupusuga malala? Sobo holo yo tele, yo wulo tia moloso.” 40Odoo susuga Yesuye to taka duloso sisiyiligaso.

Eseme Yesuye odoo susuga dimapoo egeesee takaso, “Niba moso kuloduga peegoo galagadi,” diso. Osoloso Yesu yo sobo holo oso tia melee debi mapoo dulone hedepe oma dio owee dio osoloso o hamamee dili odoo sabolo kulodu gadiso. 41Yesuye sobo holo ta o dee mapoo toloso yimapoo egeesee takaso, “Talita koum!” (To eyo bei sobo holo, no teebee.) 42Eseme sobo holo yo epedee omapoo saga toboloso siliso (yo dugo 12). Eseme oma dio owee dio, osoloso Yesu o hamamee dili odoo sabolo dia howoogaso. 43Yesuye dimapoo to kitulugu sabolo egeesee takaso, “Ayo sobo holo hagee wedilame moodoo niyo odoo hee mapoo na takee,” diso. Osoloso oma dio owee dio mapoo Yesuye egeesee takaso, “Nibada sobo holo nei nali bi tenee,” diso.

Odoodee Baibel

© 2006 Wycliffe Bible Translators, Inc. All rights reserved.

More Info | Version Index