Search form

NaIpru gail 3

AYesu iyalyal sǝhor aMoses

1Imagenan bathudud mǝttovi siGot sǝb̃on, aGot ekis ginamit mai gamito hǝn datb̃evi lan nǝmav. Mitinau vahvahur aYesu egaii, evi ahai pispisul siGot mai ab̃iltihai tutumav dattokel ur nadǝlomian dattokade lan. 2AYesu idaŋ len aGot totabtabuh lan, igol nǝsa tokele, sum̃an aMoses todaŋ len aGot hǝn b̃ekǝtkǝta tǝban naim siGot tovi alat siGot.* 3AGot ebunusi ke, aYesu inor hǝn nǝ-sal-suhi-an sǝhor aMoses, hum nǝvanuan na-um-im-an tonor hǝn nǝ-sal-suhi-an sǝhor naim toum hǝni. 4Husur naim p̃isi ikad nǝvanuan na-um-im-an toum hǝni, be aGot eum hǝn natit p̃isi. 5AMoses idaŋ len aGot hum nǝvanuan nauman tokǝtkǝta tǝban naim siGot tovi nǝvanuan san gail. Nǝsa aMoses togole ehum nasoruan kǝta tokel kot nǝsa aGot b̃ikele balai. 6Be aKristo tovi aNatun aGot idaŋ len aGot, ale naim kavkav siGot ipat len navǝlan. Ale datovi im san. Datb̃eil b̃ur namǝtahwan, datb̃etǝgau gat nǝ-vatvat-viri-an dattokade len aKristo, ale datb̃eṽiv hǝni, datovi vanuan san gail, datovi im siGot.

Na-sor-vǝsvǝsaii-an hǝn Nǝb̃e 95

7Imagenan, ehum aNunun aGot tokele, ike,

“Damǝŋai, mǝtb̃esǝsǝloŋ hǝn nadolon aGot,

8nǝlomit timab̃ur, sa-nǝkadumit tihaihai

sum̃an atǝmamit gail ta sutuai lotohaihai

nǝboŋ lotopair dan ginau,

lototaltal kitev nǝdaŋan sagw ke imabe

len naut masmas tob̃ǝb̃esw.

9Len naut ei atǝmamit gail ta sutuai

lukoblen kitev nǝdaŋan sagw ke tomabe,

luke leris nǝdaŋan sagw,

ale len nasihau gail van vǝbar nasihau tovi 40 lorisi len nǝsa notogol gail.

10Husur enan nǝlogw epǝŋas naur enan, ale nuke,

‘Akis nǝlolit ipair dan ginau,

ale lǝsalǝboi sǝhot naṽide sagw gail.’

11Ale len nǝlol paŋpaŋ sagw,

nuta gat na-kel-gati-an sagw len nahǝsagw ke,

‘Asike lob̃is len naut nǝŋavŋavan sagw boŋ ideh.’”*

12Bathudud nadǝlomian, mǝtelǝlǝgau ke gamit ideh asike ikad nǝsaan len nǝlon, asike nǝlon ipar dǝlomian. Sa-nǝlomit timaienan hǝn b̃ipair hǝn gamito dan aGot tovi nǝkadun nǝmauran. 13Be mitigol mǝtelǝŋon tivoi am len nǝlomit gabag akis, len nǝboŋ p̃isi dattokisi hǝn “damǝŋai,” sal, hǝn nagǝgǝrasan hǝn nǝsaan asike b̃igol gamit ideh b̃ihaihai dan aGot. 14Husur datb̃etǝgau gat nadǝlomian dattokade len aKristo van vǝbar nagilen, hum dattogole nǝboŋ dattotub̃at riŋ nǝlodat lan, namilen ke dattokatǝp̃ol mai aKristo len nǝsa tovi esan.

15Hum natosian siGot toke,

“Damǝŋai, mǝtb̃esǝsǝloŋ hǝn nadolon aGot,

nǝlomit timab̃ur, sa-nǝkadumit tihaihai,

sum̃an atǝmamit gail ta sutuai lotohaihai

nǝboŋ lotopair dan aGot.”*

16Nǝvanuan lotosǝsǝloŋ hǝn nadolon aGot ale lotopair dani, as galito? Lovi vanuan gail aMoses tosǝhar galit dan naut a Ijip. 17Ale len nasihau gail van vǝbar nasihau tovi 40, nǝlon aGot epǝŋas as galito? Nǝlon epǝŋas alat lotogol nǝsaan, nibelit lototeh, lotomat len naut masmas tob̃ǝb̃esw. 18Ale nǝboŋ aGot toke, “Asike lob̃is len naut nǝŋavŋavan sagw boŋ ideh,” isor mai as galito?* Ikel naten mai alat lǝsagol husur nǝsa tokel mai galito.+ 19Imaienan, datobunusi ke, husur lotopar dǝlomian lan, lǝsalǝboi lǝb̃eb̃is len naut nǝŋavŋavan san.