Search form

Ujuni 49

Uţup wi Yakob ţi uko unkmbiiŋ kaţëp pa babukul

1Yakob adu babukul aji na baka :

« Nabiin nayit, nţupan uko unknţëpuŋ ţi ŋwal ŋankmbiiŋ.

2Nabiini, naŧiinkan, an babuk Yakob,

naŧiinkan *Iŧrayel aşinan.

3« Ruben, iwi iwooŋ bajeen i naan,

naŧeek i pwiinţ pi naan,

dbuku wi nhumuŋ nhinaa,

iwo ñaaŋ anŧaŋuŋ maakan

abot ahina maakan.

4Aşë wo ji bdëk banţuunkuŋ,

iinkak awo andëmnuŋ ţi babuk şaaş,

ţiki ikowandënën wi ipayiŋ ţi kalişa ki naan,

apiinţ na aloŋ ţi bahar naan.

5« Ŧimeoŋ na Lewi, an nawo na ŋşal ŋloolan,

naŧiinkar aţij ugut.

6Kë nji nşë wo mënkneej ţi iko yi nan,

mënknaakiir na an ţi uko wi naŧiinkaruŋ,

ţiki ţi udeeb wi nan nafiŋ bañaaŋ,

aţakman ŋgit ŋkaş ţiki ulilan.

7Dfëp udeeb wi baka uwuţaan,

na uko utam wi badoluŋ.

Ddo baka bawayëşar ţi itoh yi babuk Yakob,

kafaaş baka ţi ikub yi Iŧrayel.

8« Kë iwi Yuda, babuk şaaş baluŋ kadëmanu,

kañen ki nu kawo ţi imbuŋ yi başooradu,

babuk şaaş babot baŋup ţi kadunu.

9Yuda abuk naan, iwo ji uliihu,

umpënnuŋ pjan ade uko wi umobuŋ,

aya jot apiinţ,

iwi uliihu umpiinţuŋ in akñoomuŋ kabi kanaţanu?

10Pşih paankpën ţi iwi,

kë pjuuţi pi pşih pakak aduka ţi pntaali pankpënnuŋ ţi iwi

te wal wi ajug pa na manjoonan akbiiŋ,

ñaaŋ i bañaaŋ biki ŋŧaak bŧi bakdooŋ kado uko wi ajakuŋ.

11Atan ubuuru wi nul ţi bko bdolni ubiñu

aşë tan umpoţi wi wa ţi kanah kanuurnaaniiŋ.

Anaj kamişa ki nul na ubiñu,

bayeti bi nul ţi meel mi mnko manjaaŋ mandolna ubiñu.

12Ubiñu ujeenkan këşul

kë mntow manfaaŧan iñiiŋul.

13« Kë Ŧabulon ul, afëţ kakab bdëk

du pkëŋ pi ŋlanŧu,

ufëţ wi nul udëm te kaban Ŧidoŋ.

14« Iŧaakar awo ji ubuuru ukëm

umpiinţuŋ ţi kampen pŧoof.

15Awin kë dko dalil ppiinţ

kë uŧaak ubot alil,

ajiŋ akuŋa bdaaj

kë bakak ajuuknţëna ţi ulemp.

16« Dan aşih pntaali pi nul,

jibi babuk aşin bakşihuŋ ki baka.

17Awo upula ţi bgah,

umagënţ ţi plël,

atib umpëlënŧ ţi kahoţ,

ampayiiŋ ţi wa ajotna feţ.

18« Dhaţ kë iwi *Yawe Nawat Kabuka ikbuuranaanuŋ.

19« Kë iwi Gad, bañaaŋ bajotnu

işë ilukan ibot idookar na baka.

20« Aşer ul, uŧaak wi nul uŧum iko ide,

iko ide yi başih.

21« Neftali awo ji ubaŧa unŧaruŋ,

unkdooŋ kabuk ŋmpoţi ŋnuura.

22« Yoŧef awo ji bko banjaaŋ babuk maakan

banwooŋ ţi kakab dko di meel.

Inah yi ba iji idëm kalawşa kabiig.

23Bañaaŋ biki işuuri bala'a ugut,

awata işuuri ajotna.

24Kë kaŋaanan ki nul kaşë liinŧ

kë iñen yi nul ihil kawiinţu,

Naşibaţi anhiniiŋ, i Yakob ajaaŋ adëman adoluŋ iko mënţ bŧi.

Naşibaţi mënţ awooŋ nayafan i Iŧrayel, plaak pi danaţnuŋ aliinŧ.

25Naşibaţi i şaaş ajaaŋ adëman abi kaţënku pdo iko mënţ bŧi

*El Şaday, Naşibaţi Anhiniiŋ iko bŧi

awulu bnuura banwoonuŋ baţi

awulu bnuura na meel mi ŋkumpëş

awulu bnuura kado ibuk bapoţ baŧum

ŋnŧaam ŋi nu ŋabot ŋabuk ŋaŧuman.

26Bnuura bi şaaş akñehandëriiŋ

badëm kapel bnuura bi inkuŋ iweek injonuŋ nwoo,

kapel iko inuura inwooŋ ţi inkuŋ inkwooŋ te mnţo.

Bnuura buŋ bŧi bawaliin ţi bkow bi Yoŧef,

ţi pjuk pi i badatuŋ ţi pŧoof pi babuk aşin.

27« Benyamin awo ji uko ujooţ wi uţeeh,

na nfa uji ufiŋ kade,

na utaakal ufaaşër uko wi uyaaŋ aka. »

28Bukuŋ bawooŋ bajug itoh inwooŋ ţi Iŧrayel, bawo iñeen na batëb. Uko waŋ wi wi aşin baka ajakuŋ na baka, añehandër andoluŋ Naşibaţi uko wi awooŋ i kañehandëra.

Pkeţ pi Yakob

29Yakob akak abi aji na babukul : « Dya hënkuŋ du bajug naan. Namoyaan du kakab bateem naan du bhër banwooŋ du uţeeh wi Efron nahitit, 30du Makpela danŧaaŋuŋ na Mamre du uŧaak wi Kanaan, du uţeeh wi Abraham abiiŋ anug du Efron nahitit ado dko dmoyni bañaaŋ biki nul. 31Dul di Abraham na Ŧaara aharul bamoynaaniiŋ ; kë dul di Iŧaak na Rebeka aharul bakaaŋ amoynaana ; kë dul di mmoynuŋ Leya. 32Uţeeh na bhër banwooŋ ţi wa inuganaana ţi bahitit. »

33Wi Yakob abaaŋ pţup babukul uko wi bawooŋ i kado, apul ihoţ akakan ţi kalişa, aşë jëmşa aya du bajugul.

Ulibra wi Naşibaţi

© 2014, Wycliffe Bible Translators, Inc. All rights reserved. More Info | Version Index