Search form

Luk 3

Naşibaţi ayil Yowan Nabatŧaar

(Maci 3.1-6; Markuŧ 1.2-6; natenan ţi Yowan 1.19-23)

1Uwo ţi wal wi Tiber *Ŧeŧar awooŋ ţi uşubal uţënk ŋşubal iñeen na kañeen wi awooŋ naşih najeenkal+, kë Ponŧ-*Pilat awo nanŧuŋa i uŧaak wi Yuda, kë *Herod awo nanŧuŋa i uŧaak wi *Galilay, Filip naweek Herod kë awo nanŧuŋa i ŋŧaak ŋi Iture na Trakonitid, kë Liŧaniyaŧ awo nanŧuŋa i uŧaak wi Abilen, 2ţi wal wi Anaŧ na Kayif bawooŋ *baţeŋan baweek biki Naşibaţi. Ţi uşubal mënţ *Yowan abuk Ŧakariya awo du *pndiiş, kë Naşibaţi aşë ţiini na a, awula uţup wi nul. 3Wi wi aşaaŋ ajun pñaay ţi uŧaak bŧi unñoguŋ bdëk bi Yordan, aji na bañaaŋ: « Nawutan pjuban, naţëlëş ŋbida, nado *batiŧmu, Naşibaţi aşë pënanan ipekadu. » 4Kë hënk di uko wi *Iŧayi *Naţupar Naşibaţi apiiŧuŋ ţi Ulibra wi Naşibaţi udolaniiŋ, apiiŧ aji :

« Pdiim ploŋ pahuuran du pndiiş aji :

“Nabomaan bgah bi Ajugun akluŋ kaţëpna,

nadolana ilël iŧool!

5Injiir iluŋ kafukana,

inkuŋ iweek na impoţi ifom kaliŋran na igah.

Igah inŋotuŋ ikak iŧool.

Igah inşëkrëtiiŋ ikak idaaŋ.

6Hënk, bañaaŋ bŧi baluŋ kawin jibi Naşibaţi abuuranuŋ un.” »+

Uko wi pdo, kawutna pjuban

(Maci 3.7-10)

7*Yowan aji ji na pnŧuk pweek pi bañaaŋ panjaaŋ pabi ţi a pyeenk *batiŧmu : « An, nawo pntuni pi ŋnfunan! In ahoopaţanaŋ aji naţi udeeb wi Naşibaţi unkmbiiŋ ba? 8Nadolan keeri iko inkyuujuŋ kë nawut pjuban abot aţëlëş ŋbida ; nawutan kaşal kaji : “Ŋwo biki pşini pi Abraham!” Dţupan : Naşibaţi ahilan kakakan mnlaak mi babuk *Abraham. 9Ptibi padobi bëkan bëkan ţi mnko uţeeh, bko banwooŋ baankbuk mnko mnuura bafal kafël du bdoo. »

10Pnŧuk pi bañaaŋ pahepara aji : « Kë ŋbaa do do hum ba? » 11Kë aŧeem baka aji : « Ankaaŋ imişa itëb, apënan kaloŋ kaţen anwaaŋuŋ. Ankaaŋ uko ude, afaaşiir na anwaaŋuŋ ! » 12*Bakobraar daaşa baloŋ babi kak pdolan batiŧmu, aşë hepara aji : « Najukan, we wi ŋwooŋ kado? » 13Kë aji na baka : « Nakhepar kapelan wi baţu'anaŋ pyeenk. » 14Bangoli bahepara kak, aji : « Kë un, we wi ŋwooŋ kado? » Kë aŧeem baka aji : « Nawutan kaŧeh nin ñaaŋ aloŋ itaka na uyoh, këme ţi ŋţilan, naliŋan ţi baluk bi nan. »

Yowan aţiiniyaan ñaaŋ ankluŋ kabi

(Maci 3.11-12; Maci 1.7-8; natenan ţi Yowan 1.24-28)

15Jibi bañaaŋ bŧi bakyoonkuŋ uko unwooŋ wi pbi aşë şal aji : « Wom *Yowan awooŋ *Kriŧtu? » 16Kë Yowan aşë ţiini na baka bŧi aji : « Nji, dji kabatŧaaran na meel. Kë, anşaaŋ aluŋ kabi aşë dëm apelën maakan, mëndoo ñoom ñoom kaŋup pfënëşa işapaat. Ul akluŋ kabatŧaaran na *Uhaaş wi Naşibaţi na bdoo. 17Awo na kajeţ ţi iñen, aweey kapaţëş ptiij na plëfar. Aya katoor ptiij ţi pnkuŧi, kaşë kafël plëfar du bdoo banwooŋ baankjëmşa. » 18Yowan akak ajukan pnŧuk pi bañaaŋ iko iŧum, ameeţanaan baka *Uţup Ulil Unuura.

Bawat Yowan Nabatŧaar ukalabuş

19*Herod nanŧuŋa ajej Herodiyana ñaaţ i naweekul akak ado iko iwuţaan iŧum iloŋ kak, ukaaŋ kë *Yowan aŋoman na a. 20Kë Herod, abaa beeh beeh ado kak buţaan bloŋ: Awat Yowan ukalabuş!

Batiŧmu bi Yeŧu

(Maci 3.13-17; Markuŧ 1.9-11)

21Wi bañaaŋ bŧi bakdolanuŋ *batiŧmu, Yeŧu kak ado batiŧmu. Wi awooŋ ţi pñehan Naşibaţi, kë baţi başë haabëşa. 22Wi wi *Uhaaş wi Naşibaţi uşaaŋ awala ţi a, awo wo ji ubalab ufaaŧal. Kë pdiim ploŋ paşë pënna baţi, aji : « Iwi, iwooŋ Abuk naan, dŋalu maakan, dmaganu. »

Pşini pi Yeŧu

(Maci 1.1-17)

23Yeŧu aka uko ji ŋşubal iñeen ŋwajanţ wi ajunuŋ pjukan bañaaŋ. Ţi uşal wi bañaaŋ bŧi, Yeŧu awo abuk Yoŧef, i Heli, 24i Matŧat, i Lewi, i Melki, i Yanayi, i Yoŧef, 25i Mataŧiya, i Amoŧ, i Nahum, i Heŧli, i Nagayi, 26i Maaŧ, i Mataŧiya, i Ŧemeyin, i Yoŧek, i Yoda, 27i Yowanan, i Reŧa, i Ŧerubabel, i Ŧalaŧiyel, i Neri, 28i Melki, i Adi, i Koŧam, i Elmadam, i Er, 29i Yeŧu, i Eliyeŧer, i Yorim, i Matŧat, i Lewi, 30i Ŧimeyoŋ, i Yuda, i Yoŧef, i Yonam, i Eliyakim, 31i Meleya, i Mena, i Mataŧa, i Naŧan, i Dayiţ, 32i Yeŧe, i Yobed, i Booŧ, i Ŧala, i Naaŧon, 33i Aminadab, i Admin, i Arni, i Heŧrom, i Pereŧ, i Yuda, 34i Yakob, i Iŧaak, i Abraham, i Terah, i Nahor, 35i Ŧerug, i Ragawu, i Falek, i Eber, i Ŧala, 36i Kayinam, i Arfakŧad, i Ŧem, i Nowe, i Lamek, 37i Meŧuŧela, i Henok, i Yaret, i Malalalel, i Kayinam, 38i Enoŧ, i Ŧeŧ, i Adam, i Naşibaţi.

Ulibra wi Naşibaţi

© 2014, Wycliffe Bible Translators, Inc. All rights reserved. More Info | Version Index