Search form

Mak 11

Yesu Yelusalemmo i sola saḡa

(Metiu 21:1-11; Luk 19:28-40; Diyoni 12:12-19)

1Yesu bi ena tauwaikaiwatana Yelusalem diyanemo nuwedi tava, tedi malagai Betpage bi Betenimo a tava oya Olip diyanemo. Yesu ena tauwaikaiwatana labu i gei giukamaḡedi a doli, 2“Ko nawa Yelusalem malagainemo bi laḡannemo ḡome ko tavana ba donki lauewalina waitamina ko kita, mote aiyai i geluwe, temi ko kuvesi bi ko natome.”+ 3Bi aiyai yai talayemina, “Bai aubaina niga mai ko voivoiye? Ba temi tana ko giuwena gado, ‘Bada ya ḡoyeḡoye, bi mote lofana te ya munaḡe.’”

4Lava labu a nawa malagaimo a tava bi donki lauewalina a kita eta diyanemo mataetamo waitamina i moimoito, kamaina bi a kuvesi. 5Ḡome lava ḡesaudi diyanemo a moimoitona ai talayedina gado, “Bai aubaina mba donkina ko kuvekuvesi?” 6Kamaina bi lavedi Yesu bai i giugiuwedina mainana ai mune. Ḡome tedi ai aninedi te donki ai doli nawe. 7Tedi labu donki ai doli nawe Yesu lisinemo bi edi kwama a kai kamaḡedi bi donki dabanemo a yesidi bi dabedimo Yesu i miya. +

8Lava wapewapedi edi kwama etamo a yesidi bi ḡesaudi kai ma lugulugudi a bwalidi bi a yesi nawedi.+ 9Lava a dolidolina bi a mulimulina a binauna gado,

“Maimaituwa ta kasaḡekaḡe.

Kakavisuvisuna ya natonato Bada isanemo.+

10Ta kasaḡesaḡe Deivida ena tubulelesemo ya natonatona yai badaeda.

Maimaituwa ta kasaḡesaḡe, noke galewemo!”

11Tana Yelusalemmo i tava bi i nawa Maimaituwa ena vanuwemo. Ḡome bai matabuna i kita kovidi, bi kaikana aubiga aubaina te ena tauwaikaiwatana 12 vaitedi a nawa Beteni.

Yesu kai damaya i pasili

(Metiu 21:18-19)

12Laḡani i sako Beteni a gose bi a nawanawa te Yesu kani i peki. 13Kamaina bi i wai kita manemaneka te kai damaya luguna i kita. Bi i nawa diyanemo bi i kita kaukauwe te votana geḡa, banina mote ena vota bolimanina. 14Yesu kai damaya i giuwena gado, “Mote aiyai kaka votam ima kani munaḡe!” Mai i giugiu ba ena tauwaikaiwatana ena giu a vaiye.

Yesu taugimala bi taukune Maimaituwa ena vanuwa didiyaunemo i kwavidi a potiyo.

(Metiu 21:12-17; Luk 19:45-48; Diyoni 2:13-22)

15Yesu ena tauwaikaiwatana vaitedi Yelusalemmo a tava bi tana i nawa Maimaituwa ena vanuwa ganakukuna noponemo. Ḡome tedi mabai a wai kunekunena bi a wai ka siposipona i kwavidi a potiyovo. Tedi mabai manemo a wai kunekunena bi mwanuwa gabubu a wai kunekuneyedina edi bena bi edi animiya i vitaledi.+ 16Bi lava i waiḡakedi te waikunekune mwalidi mote sima avala bi Maimaituwa ena vanuwa ganakukuna noponaḡa sima nawa. 17Bi tana lava i wailovelovedi bi i giuwedina gado, “Kulikulina wadubonemo Maimaituwa i giuna gado, ‘Tagu egu vanuwa sai isana pali vanuwina lava dobu matabuna aubaidi. +

Bi temi kona voiye te taudanedanene edi gabu i tubuḡa.’” + +

18Pilisi edi babada bi waiḡake tauwailovelovena niga giuna a vaiye bi eta a tavutavu te bainewa maso ai peki. Bi geḡa te a naile banina lava kumna ena wailovelove a sovesove.

19Kamaina bi suwala bulubulumo Yesu ena tauwaikaiwatana vaitedi Yelusalem a gose bi a nawa.

Damaya kaina i poki

(Metiu 21:20-22)

20Olaolala ḡesaunemo tedi a munamunaḡa, ba kaina a kita i poki pakanemo te damonemo. 21Gome tedi kai a kitakita ba Pita Yesu ena giu i noḡoti bi i giuna gado, “Tauwailovelove kwa kita, damaya kaina kuna pasipasilina i poki.”

22Yesu edi giu i waimunena gado, “Emi waisumaḡa Maimaituwa lisinemo ko sako. 23Giukauwemo yea giugiuwemi, aiyai niga oyana ya giuwe, ‘Ku pwalaḡe nawem nisamo’ bi tana noponemo mote ima nuwalaḡalaḡa, bi yai sumaḡa te bai i giugiuwena ba aubaina ya tubuḡa.” 24Taunana aubaina yea giugiuwemi te bai palimo ko wai baḡaena, ba koi sumaḡa te kona banavi, bi mba temi aubaimi. 25-26Bi laḡannemo ko laulaupali ba dolina tedi mabai gebogebo lisimimo a voivoiyena, ko noḡoti kamaḡedi mainana kaka Tamemi galewemo emi gebogebo ya noḡoti kamaḡedi.

Yesu ena waibada waitalana

(Metiu 21:23-27; Luk 20:1-8)

27Tedi a tava munaḡa Yelusalemmo, bi Yesu Maimaituwa ena vanuwa didiyaunaḡa i nawanawa. Pilisi edi babada, waiḡake tauwailovelovena bi Diu babadidi a tava Yesu lisinemo 28bi ai talayena gado, “Tam bamo em waibada kuna vai bi niga kauwidi kwa voivoiyedi? Em waibada aiyai i vitem?” 29Kamaina bi Yesu edi giu i wai munena gado, “Waitala ḡemota yai talayemi bi giu koi mune kaka yea giuwemi te bamo tagu waibada e vai bi niga kauwidi yea voivoiyedi. 30Ko giuwegu, Ko giuwegu aiyai Diyoni waibadana i vite bi i waibulu? Maimaituwa i vite e lava dobumo?” 31Tedi taudiḡa ai talapili bi a giu, “Bamoda ta giuna gado, ‘Galewaḡa,’ ba tana ya giuna gado, ‘Bai aubaina mote koi sumaḡe.’ 32Bi bamoda ta giuna gado, ‘Lava lisidiḡa,’ ba sa ḡasieda. Tedi a naila banina lava matabudi a sibe te Diyoni tana kamaina te taugiuwatana. + 33Taunana aubaina ena giu ai munena gado, “Tama mote ka sibe.” Bi Yesu i giuwedina gado, “Tagu kota mote yea ma giuwemi te egu waibada bamo e vai bi niga kauwidi yea voivoiyedi.”

Kakabai Mak

© 2009, Wycliffe Bible Translators, Inc. All rights reserved. More Info | Version Index