Search form

Luka 14

Yecu ocano dano ame two too me awura-kom

1I ceŋ cabittoro acel Yecu onwoŋo owoto ka camo cem i ot Aparicayo moro ame aloc; gin obedo ka kiye atek. 2I nyime kannono rik tye iye dano moro ame two too awura-kom. 3Yecu te penyo opwonycik kede Oparicayo ni, “Cik ye ni can dano i cen cabit onyo mom?” 4Ento gin oliŋ aliŋa. Yecu omake, ocaŋe, te cike ni owot gire. 5Openyogi ni, “Ŋa i akinawu ame ka tye kede kana mere onyo twonnere, ka orette i akoŋ, mom bino wayo oko i ceŋ me cabit?” 6Gamo pennyere odoko tek baŋgi.

Yecu opwonyo wele kede won ot

7Ka oneno kite a jo ame olwoŋo yero kede kabedo me kwogo, en okobbigi carokop ni mano, 8“Ka olwoŋi i arama me nyom, kur ibed i kabedo me kwogo; aŋar onyo ca otyeko cwano ŋattoro adit kati oko, 9mio dano ame olwoŋo wun aryo luŋ ka obino, bino kobbi ni, ‘Wekki dano man kabedo,’ eka ite dok i kabedo apiny kede lewic adwoŋ. 10Ento ka olwoŋi, wot ibed i kabedo apiny, ame ka dano olwoŋi obino, en bino kobbi ni, ‘Awotta, jer i kom amalo’; eka ite bedo kede kwogo i nyim jo luŋ ame ibedo kedgi i dog cam. 11Pien dano ame kette kene ni etye malo, obino dwoke piny, dano ame mwolle kene obino tiŋe malo,”

12Okobo baŋ dano ame ocwane ni, “Ka ilwoŋo jo i cem me dyeceŋ aŋar me otyeno, kur ilwoŋ owoteni, onyo omegoni, onyo wati meri, onyo oturwu ame olonyo, me gin daŋ kur bin lwoŋi pi culo waŋ lwoŋogi. 13Ento ka itedo arama, lwoŋ ocan, oŋwalo, jo a komo akoma, kede otowaŋ; 14ibino nwoŋo giri winyo, pien gin mom twero culi. Obino culi i kare me cero jo a kitegi atir.”

Carokop i kom arama adwoŋ

15Ŋattoro acel i akina a jo obedo kede i dog cam ka owinyo kop man, okobo ni, “Ŋat a bino camo kwon i loc Obaŋa tye kede winyo!” 16Cite en ogamo koppere ni, “Dano moro rik obin otedo arama adwoŋ, daŋ te lwoŋo iye jo apol. 17Ka kare me arama oromo, en te oro amiro mere me kobbi jo ame olwoŋogi ni, ‘Bye wunu, pien jami luŋ doŋ oyiko oko.’ 18Gin ducu ocako bako doggi i kite acel ni timgi kica. Dano me agege okobbe ni, ‘Awilo poto, myero koŋ awot, anen; akwai, tima kica.’ 19Dano ocele okobo ni, ‘Awilo twoni apar me pur, awot ka nenogi; akwai, tima kica.’ 20Dano ocele okobo ni, ‘Kom an pwod anyomo dako nyen, pi mano mom atwero bino.’ 21Amiro obino, otitti adwoŋere kitenono. Akemo omako won ot, okobbi amiro mere ni, ‘Wot oyotoyot i waŋa yo atitino me boma kede i akina pacci, ikel ocan, oŋwalo, otowaŋ kede jo a komo akoma,’ 22Amiro okobo ni, ‘Adwoŋ, gin ame iciko doŋ otum, ento kabedo pwod odoŋ gire.’ 23Adwoŋ okobo baŋ amiro ni, ‘Wot i yo adoŋo kede i ŋet yo, di jo wek obin odony i ot, me oda poŋ. 24Pien atittiwu ni, mom tye dano moro i akina jo ame ocwanogi ame bino bilo aramana.’ ”

Lubo Yecu mom gin ayot

25Lwak ecipan owoto karacel kede, en te lokere tuŋ baŋgi, te kobbigi ni, 26“Ka duno moro bino baŋa ame mom koŋ okwero pappere kede tottere, kede dako mere, kede itino mere, omego mere kede amego mere, anaka kadi kwo mere ikome, mom twero bedo ŋat a luba, 27ŋat a mom tiŋo yataria mere, te luba, mom twero bedo ŋat a luba. 28Kara ŋa i akinawu, ka amito gero ot abor, mom koŋ geo bedo piny, te kwano wellim a mitte, ka ce etye kede ame romme tyeko? 29Me kur ecib acakki tere, tyeko te loye, jo luŋ ame neno bino nyere, 30kun okobo ni, ‘Dano man ocako gedo, tyeko te loye oko.’ 31Onyo aloccene, ame ka awot i mony me romo kede aloc ocele, mom koŋ bedo piny, poro kop, ka ce en kede jo mere tutumia apar etwero romo kede won jo tutumia pyeraryo ame abino baŋe. 32Ka mom amannono, en cwao kwena pi penyo kop me kuc ame dano ca pwod tye kannabor. 33Amannono, ŋattoro iyi akinawu ame yie mom cao gin ducu ame etye kede, mom twero bedo ŋat a luba.

Kado ka odoko bot

34“Kado gire ber: ento kado ka odoko abot, obino loko doko amit iŋo? 35Mom doŋ ber me aketa i lobo, kadi anaka i wi odur; jo onyo oko, ŋat a tye i yit me winyo, winyi!”

Baibul 1979

© 1979 The Bible Society of Uganda

More Info | Version Index