Search form

Ñwaè' Mfaè' Ñgaâa Ntuu Jisoès 6

1AÈ m ba aè mnoèñ ca ce ñgoo ñgaâa yá'ni buu Jisoès aè m ce kuè', beèe ce a m ce laèa li Greâk a m laèañger a kuu beèe ce a m ce laèa li Hibruè njobeè' a m ce gaèpshi buu neè beèe aè mnoèñ wááwá, a ce fa byepkúú wap ka'. 2Beèe ce ncoèp-baa-aè-rrúèú a ká' ñgaâa yá'ni buu Jisoès, a laa neè woweèe enáê, “Yi yu yáánïì ená weèr borni efa rfeè'shi blaâa Nyúè ce gaèpshi ba buu neè beèe ka'. 3Bfúr weêr, baná weèe fúr mmbañruè saèambaê, efa weâe mú ce yap ñgeèe yi yu yáánïì, woweèe a ruusïì neè Yú' Rara, a ker riñ buu, tá weèr bo fa rfaè' ca mbe waâp mmboè, 4loèr yeèr nfeè' ce geèe rloo, keèr ce feè'shi blaâa Nyúè.”

5Yuu ce a m laèa, yi m boèñ beèe wááwá, woweèe a ce Stáfaèn ce e m byemi seê, a ker ruusi neè Yú' Rara, ba Feleêp, ba Pukoruès, ba Nikanoè, ba Timúèn, ba Pámánaès, ba Nikoèlaès ñwáâ aè rla' Antïìyoèk, ce e m loè a byemi neè Nyúè beèe Juês. 6Woweèe a m loèr beèe ca a tár njeptii ñgaâa ntuu, woweèe a loo, a lá map mmbo mbe waâp nduè.

7Blaâa Nyúè vi m duè kuèntombïì, ñgoo beèe ce a m ce duè aèmbuèu Jisoès aè rla' Jáèrusaláèm aè ku' seê. Ñgaâa tañshi tañshïì ce a m yu' blaâa rbyemïì ca a byemi, a m ba goèr.

8Stáfaèn aè m túr rboâñ Nyúè ba ñger Nyúè seê, a gee buu bghagha' ba buu bbáèá aè múè beèe. 9Yi ka' ba wa'a, beèe mo' ce a m ba beèe embe ndap rloo ce a m ce too ená ndap rloo beèe ce a bii faè' bkwaèa ka', ce aè m ba beâe aè rla' Saèiren ba aè rla' AÈláèksandaè ker ba beâe aè ñgoâñ Sïìlesïìyaè ba Áshaè a m ce sár mnsár a Stáfaèn weèe. 10Yap ñger mnsár aè Stáfaèn weèe yi m sáè njobeè' Stáfaèn aè m ce laèa ba neè bfee ba ñger Yú' Rara ce Nyúè aè m fa ye. 11Woweèe a du embenjïì a cepshi beèe mo' ená woweèe a nya' mnde' mbe tu Stáfaèn. Woweèe a ká' a laa enáê, “Weèr aè yu' aèmboè e ce nya' mnde' a ce bepsi rlii Musïìs ba Nyúè.” 12Ca yi m geèe mntee beèe ba mntee bleebeèe ba mntee ñgaâa yá'ni beèe mncir, vi yááñgeèr, woweèe a vú mbenduè Stáfaèn, a koo ye a du aègho mbe kansuèr.

13A ka' duè aègho, a vú neè beèe ená a vú táá njïìnsa' mnaèñ, laa enáê, “Ñwáè ca aè be buu efa rlaèa yuu bebep aèmboè dïû' rara ca ba mncir Musïìs ka'. 14Weèr a yu' aèmboè e ce laèa ená Jisoès ce aè rla' Nasaráèt be saè'si dïì' ca keèr kupse ndeèe to' ce Musïìs aè m fa neè seèe.” 15Beèe wááwá embe kansuèr a ka' fyá' bsii Stáfaèn, a yá vi ba aèmboè bsii ncïìndap Nyúè wa'a.

Limbum New Testament

@ Bible Society of Cameroon

More Info | Version Index