Search form

Hebreos 1

1Nixtin titjun ne, jemu cjín ndiya hacuaha jemu cjín chuva rë xi casua Nina camachaya rë xutachanga naja ngu cjua hya xi catsingatju me cjua cojo profeta rë me. 2Peru quihndë nixtin vihi ne, casua me camachaya naja hya xi catsingatju me cjua cojo Quihndi rë me. Hane me vëhë xi cachja Nina xi cuma Nai rë yëjë ni xcusun xi tjin ngasunhndë, hacuaha casuaxa Nina Quihndi rë me jan xi me vëhë casahmi me ngasunhndë. 3Hacuaha sacuatjin jemu jyë hnga Nina cojo hasen ndajyihi rë me ne, cuatjin jyë hnga Quihndi rë me cojo hasen rë. Hacuaha sacuajyihi suvá Nina ne, cuajyihi camahani Quihndi rë me. Hacuaha Quihndi rë Nina jan ne, yahangui me yëjë ni xcusun xi tjin ngasunhndë cojo cjua rë me xi jemu hñu ngahñu rë. Hane xi cafë catsityjahi me xuta tsëhë jyë́ rë ne, sehe quiji me ngahnga, cavejña me taha ladu quixi tsëhë Nina.

Hitsë sa matitjun Quihndi rë Nina xi cumá rë yëjë ni ángel

4Hacuaha tu tjin xi hitsë sa jemu ndajyihi xa xi casacu rë Quihndi rë Nina xi cumá rë xa xi casacu rë ángel ne, hacuanitjin ni cavechutaha me xi hitsë sa jemu camatitjun me tsëhë ángel xi cuacun jan, hya xi quiji cavejña me cojo Nina. 5Hisca xi ngu ángel ne, cachjaain Nina cojo cjua vihi, sacuatjin cachja me cojo Quihndi rë me:

Ngaye xi quihndi naha ngaye;

hacuaha quihndë casuáxa ri.

Cuatjin cachja me. Hacuaha cachjaain me tsëhë ngu ángel cuitjin:

Ngahan cumá ngahan nahmi rë cha,

hane cha vëhë ne, cumá cha quihndi naha.

Cachjaain me cuatjin cojo ángel. 6Hane ngu ndiya nga, hya xi tsingatju me Quihndi ngu rë me ngasunhndë ne, cuitjin chja me tsëhë Quihndi rë me:

Yëjë ni ángel naha ne, catjaharcun rë me.

Cuatjin cachja me. 7Hane xi tsëhë ángel rë me ne, cuitjin chja me:

Ngahan sahme xi ángel naha ne, tangun xcusun rë cojo tjo,

hane ángel xi fahacuenda xa naha ne, sahme xi tangun xcusun rë cojo ndihi.

Cuatjin cachja me. 8Peru xi tsëhë Quihndi rë me ne, cuitjin chja me:

Ngayun Nina, tsajin nu tsajin nixtin cuijnetaha gubiernu nuju,

hacuaha gubiernu xi nihñu ne, hatuxa cjuaquixi.

9Canihmutacun cjuaquixi hane choho cahyun cjuatsehen;

hane vëhë xi ngahan Nina nuju ne, cavaxejen nuju,

hacuaha hitsë sa jyë cjuasua casuá nuju ngayun

xi cuma rë xingun.

Cuatjin cachja me. 10Hacuaha chja nga me cuitjin:

Ngayun, Nai naha, ntsacu cavetsihin ne, ngayun canindujun nangui;

hacuanitjin ni ngahnga, hacuaha ngayun canindujun.

11Yëjë xcusun vëhë ne, cuechu nixtin xi cjuë,

peru ngayun ne, tsajin nu tsajin nixtin xi cjuë ngayun.

Hacuaha yëjë xcusun vëhë ne, cuma changá sacuatjin rë ngu tsjian xi chajá rë;

12hacuaha cuechu nixtin xi nijeyun xcusun xi cuacun vë sacuaha ngu tsjian tsjanga,

hacuaha nindeyun sacuaha vindeya ngu tsjian xi chajá rë.

Peru ngayun ne, hatuxa vindeyaain ngayun;

hacuaha nixtin nuju ne, hatuxa cuijnitaain.

Cuatjin cachja me. 13Hacuaha hisca ngu ángel ne, cachjaain Nina cojo rë cjua vihi, sacuatjin cachja me cojo Quihndi rë me:

Tinechin nguehe ladu quixi naha,

hisca hya xi yëjë ni xi sahmi ri condra ne, cuiyujú ngahan ngahma gubiernu riji.

14Sacuaha ángel ne hacui hasen xi tsujyihiya tixa tsëhë Nina. Nina tsingatju me ángel xi cuacun vë xi fehe visecoo naja ngayaan xi cuetjuntjen tsëhë jyë́ naja.