Search form

San Lucas 24

Cavuya Jesucristu cjuahñu

1Peru tu casahasen ni tsëhë nixtin ngu tsëhë totje ne, yachjin jan ne, cavuya quiji nga xu me xcun tsjun jan hacuaha cavaha xu me rqui xi ha cavëhëchjine me jan. 2Hane xi cafehe me jan ne, cavëë xu me xi ndyojo xi cavechja rë tingotjo rë tsjun jan ne, ha canivahaxin rë. 3Hane xi cavisehen me cahntsua tsjun jan ne, cavëë xu me xi tsajin nima Nai naja Jesús. 4Hane jinguyëjë rë xi sacuinyiin rë me mé sahmi me ne, ha tu ñahñu camatsejen xu jo ángel jan, xi jercu tu setí camaha xu ni tsjian rë. 5Hane xi jemu catsacjun me camá ne, catsiquindi xu me xcun me. Sehe ngajan xi ángel jan ne, cuitjin xu cachja cojo rë me:

―‍¿Mé má ngajñi rë nima vinchunsun me xi quicun? 6Me vëhë ne, tsajin me nguehe ta cavuya me cjuahñu. Ninguitsjun hacutjin cachja me cojo nuju hya xi tacun cuaha me ngajan Galilea, 7hya xi cachja me xi me xi Quihndi rë Xuta Jain ne, hatuxa tjin xi cuma me entregadu tsja xuta tsehen, sehe cueya me xcun cru, hane xi cuma jyan nixtin ne, cuya nga me cjuahñu. ―‍Cuatjin xu cachja ángel jan.

8Sehe ngajan xi yachjin jan ne, catsinguitsjen xu me cjua rë Jesús. 9Hane xi cavuya me xi quiji me xcun tsjun jan ne, quiji casua xu me camachaya rë xuta ladu rë Jesús xi tengu jan cojo yëjë sa me xi yahnga tsëhë yëjë ni hacutjin cavatju me camá. 10Quihndë ne, yachjin xi casua camachaya rë apóstol jan ne, hacui xu na María na Mágdala cojo na Juana cojo na María naa rë Jacobo cojo sa yachjin xi yahnga. 11Peru apóstol jan ne, xi má xu rë me ne, suvá cjuangarca xi chja yachjin jan, vëhë xi camacjaain xu rë me.

12Peru Pedru ne, vangasanii xu me quiji me hiscan tacun tsjun jan. Hane xi cafehe me jan ne, catsiquindi xu me yojo rë me, sehe cavutsejenya xu me cahntsua tsjun jan ne, hane cavëë xu me suvá tsjian jan siu. Sehe cavuya cafe xu me. Jercu quijircun xu rë me tsëhë xcusun xi camá jan.

Ndiya Emaús

13Hya xi camá ne, ha nixtin hya xu ni ne, jo cha ladu rë Jesús jan ne, cavetju xu cha quiji cha ngu nandya xi hmí rë Emaús, xi tacun sacuaha chuva rë tengu kilómetro tsëhë Jerusalén. 14Hane ndiya cjui cha jan ne, cavisiajmi xu cha ngajñi rë cha tsëhë yëjë xcusun xi camá. 15Hane jinguyëjë rë xi tivisiajmi cha jan ne, cavechútáha xu Jesús cha, hane quijitangun xu me cojo cha. 16Peru handasa vutsejen cha me ne, casuaain xu Nina cahndë́ xi scuëë cha xi hacui me. 17Sehe ngajan xi Jesús ne, cavinenguise xu me cha cuitjin:

―‍¿Mé cjua xi tivisiajmu xi táha tivangun? ―‍Cuatjin xu cavinenguise me.

Hane cha xi cuacun jan ne, caxinchacunhñu xu cha, hacuaha jemu va tjin cacun cha. 18Hane ngu cha xi cuacun jan xi hmí rë Cleofas ne, cachja xu cha cojo Jesús cuitjin:

―‍¿Há ngu tu tu ngayun xi nechuntuhun nguehe Jerusalén xi cuatjin hyúun mé xi sehe cavatju camá ni? ―‍Cuatjin xu cachja cha cojo Jesús.

19Sehe ngajan xi Jesús ne, cuitjin xu cachja me cojo cha:

―‍¿Mé xcusun jan? ―‍Cuatjin xu cachja me.

Hane cha xi cuacun jan ne, cuitjin xu cachja cha:

―‍Xcusun xi cavatju ngu me xi hmí rë Jesús camá, ngu me xi canduva tsëhë nandya Nasaret. Me vëhë ne, xi camá rë Nina cojo xi camá rë yëjë ni xuta ne, ngu profeta me, xi jemu tjin rë me ngahñu xi casahmi me yëjë ni xcusun xi casahmi me, hacuaha xi cavicuya me yëjë ni cjua xi cavicuya me. 20Hacuaha nahmi xi matitjun cojo xutaxa rë yungun naja ne, casahmi me entregadu me vëhë cojo xutaxa rë Roma xi cueya me. Hane cuaha jain tjin cavetaha me xcun cru. 21Ngayin ne, ha cavetihin tacuín xi me vëhë xi cuaxëtje naja me ngayejen ni ngayaan xuta tjë rë Israel. Cojo yëjë sa ne, quihndë ne, ha camá jyan nixtin cavatju xcusun xi cuacun vë. 22Hacuaha ngujo yachjin tsëhë ladu niji ne, catsisca na cjuatacun niji, tsëhë xi xati sa nguitajñu ne, quiji xu na xcun tsjun, 23hane xi casacuiin rë na nima ne, cafehe cachja na cojo niji xi cavëë na sacuaha ángel ngajan, hane cachja cojo rë na xi me vëhë ne, tacun me cjuahñu. 24Hya xi camá ne, ngujo cha xi siu cojo niji ne, quiji cha xcun tsjun jan, cavëë cha xi quixi jain cjua xi cachja na, peru me vëhë ne, cahviin cha me. ―‍Cuatjin xu cachja cha cojo Jesús.

25Sehe ngajan xi Jesús ne, cuitjin xu cachja me cojo cha:

―‍Ngayun yuma hasen, ngayun xi jemu tafi sehe macjain nuju yëjë cjua xi cachja profeta. 26¿Hacuiin hatuxa casahmi ngujyë xi me xi catsingatju Nina ne, cuatjin cavatju me cjuañihi, sehe camajyë camahnga me cojo hasen ndajyihi rë me? ―‍Cuatjin xu cachja Jesús.

27Hane sehe ngajan xi Jesús ne, casuacuenda xu me cha mé vijne yëjë ni cjua xi camahindu tsëhë me xcun yëjë ni xujun rë Nina, cavetsihin me cojo cjua xi catsihindu Moisés, hane cajnetaha me cojo hisca cjua xi catsihindu yëjë sa profeta.

28Hya xi camá ne, xi camatiña xu cha cojo Jesús nandya hiscan cjui cha jan ne, Jesús ne, casahmi xu me sacuaha xi cjuenduju sa me. 29Peru cha xi cuacun jan ne, jercu cjín xu cachja cha cojo rë me cuitjin:

―‍Tinechun cojo niji ta quihndë ne, ha quiji hora hacuaha hisca meje cjuë nixtin. ―‍Cuatjin xu cachja cha.

Ngajan xi Jesús ne, quiji xu me cojo cha, hane cavisehen me ndava cha xi cuejña me cojo cha. 30Hane xi ha cafaha me cahndë́ rë me xcun maxë xi sinë me niñu cojo cha ne, sehe cafaha xu me ngu niñu, hane casua me nacuechji rë Nina, sehe cavatëlanga me, casua xu me cha. 31Hane hora vëhë xu casua Nina cahndë́ xi camá cavëë cha xi hacui Jesús. Hya xi camá ne, ha tu ñahñu cafëya xu me. 32Hane sehe cachja xu cha ngajñi rë cha cojo xicjin cha cuitjin:

―‍¡Jercu ndaja camahani camá rë xahasen naja, hora xi tichja me cojo naja ngajan ndiya jan mé vijne cjua xi hincha xcun xujun rë Nina! ―‍Cuatjin xu cachja cha cojo xicjin cha.

33Hane hora vëhë ni ne, cavisatjenhnga xu cha tsëhë maxë jan, sehe cavuya quiji cha Jerusalén. Hane xi cafehe cha jan ne, casacutsja xu cha me xi tengu jan, tjintangun me cojo me xi yahnga sa. 34Hane sehe cachja xu me cojo cha cuitjin:

―‍Quixi jain xi cavuya Nai naja cjuahñu, hacuaha cha Simón ne, cavëë cha me. ―‍Cuatjin xu cachja me.

35Ngajan xi cha xi cuacun jan ne, casuacuenda xu cha hacutjin cavatju cha camá ngajan ndiya, hacuaha hacutjin camá cavëë cha xi hacui Jesús hya xi cavatëlanga me niñu.

Cafehe Jesucristu hiscan tjin tangun xuta ladu rë me

36Hane tu tichja cuaha xu cha xi cuacun jan cojo me vëhë cjua jan ne, ha tu ñahñu cavëë xu yëjë me Jesús, secun me ngajñi rë me. Hane Jesús ne, cachja xu me nina cojo rë me cuitjin:

―‍Nina sua nuju me cjuandaja cjuajeya. ―‍Cuatjin xu cachja me.

37Hane yëjë xuta ladu rë Jesús jan ne, jemu catsacjun camaha xu ni me camá tsëhë xi xi má rë me ne, tivutsejen me ngu hasen. 38Ngajan xi Jesús ne, cachja xu me cuitjin:

―‍¿Mé má cuatjin jemu fircun nuju? Hacuaha ¿mé má cuatjin mangu majo tacún? 39Chutsujun ntsa cojo ntsacú ta ngahan vi. Nduvun tetuhun ntsun ná, hacuaha chutsujun ná ta ngu hasen ne, tsajin yojo rë hacuaha tsajin nínda rë sacuatjin chutsujun ná ngahan cojo yojo cojo nínda naha. ―‍Cuatjin xu cachja Jesús.

40Hane xi cavatju cachja me cjua vëhë ne, sehe catsingacun xu me tsja me cojo ntsacu me. 41Hane xuta ladu rë Jesús jan ne, hisca maji xu macjain rë me ngatsë rë xi jercu tu ndaja má camahani rë me hacuaha hisca fircun rë me. Ngajan xi Jesús ne, cavinenguise xu me xuta jan cuitjin:

―‍¿Há tjin nuju hitsë xi xinëë nguehe? ―‍Cuatjin xu cavinenguise me.

42Hane ngu me jan ne, casua xu me ngu rquí ti camatsju. 43Hane xi cafaha me ne, cajinë xu me xcun yëjë ni xuta. 44Sehe cachja xu me cuitjin:

―‍Yëjë xcusun xi cavátju camá ne, tsëhë vëhë cjua xi cachjá cojo nuju hya xi tejña cuaha ngajñi nuju. Cachjá cojo nuju ta hatuxa meje rë xi cuetjucaa yëjë hacutjin camahindu tsahan xcun xujun xi catsihindu Moisés cojo xcun xujun xi catsihindu profeta, cojo xcun xujun tsëhë Salmo. ―‍Cuatjin xu cachja Jesús.

45Sehe ngajan xi Jesús ne, cavuxaha xu me cjuatacun rë xuta jan, cojo sa xi cuijnercu me cjua xi camahindu xcun xujun rë Nina. 46Hacuaha cachja xu me cuitjin:

―‍Cuitjin camahindu xi me xi catsingatju Nina ne, hatuxa cuatju me cjuañihi, hane xi cjuë jyan nixtin xi cueya me ne, cuya nga me cjuahñu, 47hacuaha sacú cumachaya rë yëjë ni xuta tsëhë ngasunhndë xi sá xi mangucacun me cojo me vëhë hacuaha tsindeya me cjuatacun rë me ne, tsinchataha Nina me tsëhë jyë́ rë me. Jerusalén vi ne, nguehe cuetsihin cuitsojo cjua vëhë. 48Ngayun cuinújun cojo xuta cjua vihi ta ngayun xi cahyun hacutjin camá. 49Chutsujun ni, ngahan tsingátju nuju Hasen xi ha cachja Nahmi naha xi sua nuju me. Peru ha tinechun ni nguehe nandya vihi hisca xi chjuhunntsun Hasen vëhë, xi cuinduva hisca ngahnga. ―‍Cuatjin xu cachja Jesús.

Quiji Jesucristu ngahnga

50Hya xi camá ne, cavaxëxin xu Jesús xuta ladu rë me tsëhë nandya Jerusalén, quijicojo me me hisca nandya Betania. Hane xi cafehe me jan ne, catsiquijin xu Jesús tsja me hane catsinchacun me xuta jan. 51Hane ngajñi rë xi titsinchacun me xuta jan ne, cavetjuxin xu me quiji me ngahnga. 52Hane xuta ladu rë Jesús jan ne, xi cavatju cafaharcun me Jesús ne, sehe cavuya nga xu me Jerusalén cojo jemu jyë cjuasua. 53Hacuaha nchunchujun ni quiji xu me yungun xi matitjun, vaxëndaja me Nina.