Search form

San Lucas 3

Cachja Juan Vitenda rë Xuta cjuandajyihi rë Nina

1Cuitjin xu camá hya xi cafë tyjuhun nu jiya me xi matitjun camaha ni xi hmí rë Tiberio César xcun xá rë me xi vitexa me jingu ni ladu. Poncio Pilatu ne, me vëhë vitexa xu me distritu Judea, hane Herodes ne, me vëhë xu vitexa me distritu Galilea, hane hntsëjñu me xi hmí rë Felipe ne, me vëhë xu vitexa me distritu Iturea cojo distritu Traconite, hacuaha Lisanias ne, me vëhë xu vitexa me distritu Abilinia. 2Hane sacuaha nahmi xi matitjun xu ne, Anás cojo Caifás má me. Hane sacuaha nixtin vëhë ne, Juan quihndi rë Zacarías ne, hya xi quitahá me ngajan ngu xín tsëhë nandya ne, cafahatsja me cjua xi catsingatju xu Nina. 3Hane quiji catsujyihiya me yëjë ni ladu tiña tsëhë ndajyë Jordán, tichja me xi meje rë xi tsindeya xu xuta cjuatacun rë me hacuaha xtenda me, cojo sa xi tsinchataha Nina xuta tsëhë jyë́ rë me. 4Xi cuatjin xu casahmi Juan ne, casahmichihin me sacuatjin camahindu hatsëë nixtin xcun xujun xi chja cjua rë profeta Isaías xi chja cuitjin:

Cuitjin jercu hñu cuichja ngu xuta ngajan hiscan jemu xín tsëhë nandya:

“Tuhunchjinu ndiya tsëhë Nai naja;

ninguixun ndiya tsëhë me.

5Yëjë ni hiscan nangui cahntsua ne, tsë́ya rë,

yëjë ni ndetjún cojo yëjë ni naxi ne, cuijnenangui,

yëjë ni ndiya lahñi ne, cuma quixi,

yëjë ni ndiya xi hacuiin chihin ne, cuma chihin.

6Hane yëjë ni xuta ne, scuëë me hacutjin vaxëtje Nina xuta rë me.”

Cuatjin xu catsihindu Isaías cjua xi jercu hñu cuichja xuta jan.

7Ngajan xi hya xi quiji xutacjín xi xtenda me ne, cuitjin xu cachja Juan cojo xuta:

―‍¡Ngayujun ni ngayun quihndi rë chu tsehen matsejen ne!, ¿yo cavinchangui nuju xi nihñu ngahñu xi cuetjuntjun tsëhë castigu xi hatuxa tsingatju Nina? 8Sá xi meje jain cuetjuntjun matsejen ne, nihñu suvá cjuandaja sacuatjin sahmi xuta xi catsindeya jain me cjuatacun rë me. Xicanujuun cahntsua xahasen nuju cjua vihi: “Ngayaan ne, tsajin mé cuma naja ta, tsëhë xi tjë rë Abraham ngayaan.” Xicanujuun cuatjin matsejen ta, nguehe cuichjá cojo nuju ta Nina ne, hisca ndyojo xi cuicun vi ne, cuma sahmi me tjë rë Abraham. 9Chutsujun ta ngayun matsejen ne, tangun ngayun cojo yatjë xi ha quitaháchjine quicharcu tyjama rë xi cuetsihin xtí. Yëjë ni yatjë xi suaain tu xi ndaja matsejen ne, xtí rë, sehe cjue cueti. ―‍Cuatjin xu cachja Juan.

10Ngajan xi xutacjín jan ne, cuitjin xu cavinenguise rë me Juan:

―‍¿Hacutjin ndatjin nihñi xi cuma nihñi cjuandaja xi nújun vë ni? ―‍Cuatjin xu cavinenguise me.

11Hane xi cafayangui Juan ne, cuitjin xu cachja me:

―‍Jarë ngayun xi tjin nuju jo tsjian nuju ne, tuhun rë ngu yo xi tsajin rë. Jarë ngayun xi tjin xi chinu ne, ha chuva vëhë ni tuhun hitsë catjinë me xi tsajin xi sinë. ―‍Cuatjin xu cachja me.

12Hacuaha canduva sa xu ngujo cha xi faha tujúnsa xi meje rë cha xi xtenda cha, hane cuitjin xu cavinenguise cha:

―‍Tatá, ¿mé xi ndatjin nihñi ngayin? ―‍Cuatjin xu cavinenguise cha.

13Sehe ngajan xi Juan ne, cuitjin xu cachja me cojo cha:

―‍Hacuiin cjín sa tujún chjahyun rë xuta. Chjahyun rë me hacutjin xi casatëxa ni nuju. ―‍Cuatjin xu cachja me.

14Hacuaha cavinenguise nga ngujo sindadu me cuitjin:

―‍Hane ngayin ne, ¿mé xi ndatjin nihñi? ―‍Cuatjin xu cavinenguise cha.

Sehe cachja xu me cojo cha cuitjin:

―‍Xicanaxuun rë xuta tujún cojo cjuachan, o sá xi cojo ngu cjuandacha. Catamangutacún ni cojo tujún xi ha ma chji nuju. ―‍Cuatjin xu cachja me.

15Xuta ne, jercu siuya camahani me mé xi cuma, hacuaha vinenguise xu me cahntsua xahasen rë me cuitjin: “Hyaan sa xi Juan rë vi Xihin xi Tsingatju Nina xi cuaxëtje naja me.” Cuatjin xu cavinenguise me. 16Sehe ngajan xi Juan ne, cuitjin xu cachja me cojo yëjë xuta jan:

―‍Ngahan matsejen ne, cojo nandá ni tiviténda nuju, peru sehe cuinduva me xi cueyá me Hasen rë Nina cahntsua xahasen nuju, hacuaha cuaha me sacuaha ngu ndihi xi tsityjahi rë cjuatacun nuju. Me vëhë ne, hitsë sa jyë hnga me cojo cjuatacun rë xi cumá ná ngahan, hisca cumaji tsinguisehercu sahme tyjahi chuxinxtë rë me. 17Me xi tsingatju Nina jan matsejen ne, sacuaha xi ha yahatsja me quicha xi tsinguitjen rë xtë rë trigu cojo sa xi cuma tyjahi ndaja trigu xi casechun rë tsëhë me, hacuaha cjuaya me trigu tyjahi xi cuinchandaja me, hane xtë rë jan matsejen ne, cuaca me xcun ngu ndihi xi tsajin nixtin hvo. ―‍Cuatjin xu cachja Juan.

18Hacuaha hacuiin suvá xu ni cjua vëhë cachja Juan cojo xuta hya xi cachja me cjuandajyihi rë Nina ta cachja sa xu me jemu cjín cjua. 19Herodes, me xi cavitexa ngajan distritu Galilea ne, hacuaha cachjataha xu Juan me ngatsë rë xi cafaha Herodes na Herodía, chjuun rë hntsëjñu me, xi cumá chjuun rë me na. Hacuaha cachjataha sa xu Juan me tsëhë jingu sa xcusun tsehen xi casahmi me. 20Peru xcun yëjë cjuatsehen vëhë ne, cavetahacoo sa Herodes xcusun vihi: caveya xu me Juan ndavaya.

Caxtenda Jesucristu

21Hane hya xi chaja sa xu cjue Juan ndavaya ne, ngu nixtin xi caxtenda yëjë ni xuta ne, hacuaha cojo xu Jesús caxtenda me. Hane xi cavatju caxtenda me ne, hora xi tisahmi xu me oración rë me ne, ngahnga ne, catuxaha, 22hane Hasen rë Nina ne, canduvajnetsejen casesun rcu me. Sacuajyihi ngu paloma jyihi. Hacuaha hora vëhë ni ne, canuhya xu rë ngu cjua ngajan ngahnga xi cachja xu cuitjin: “Ngaye xi quihndi naha ngaye xi jemu hmú cácun ri. Jemu ndama ná ngatsë riji.” Cuatjin xu cachja.

Xutachanga rë Jesucristu

23Quihndë ne, Jesús ne, tjin xu rë me sacuaha cantë nu hya xi cavetsihin me cojo xá rë me. Hacuaha xi má xu rë xuta ne, quihndi rë José má me. Hane José ne, quihndi rë Elí. 24Elí ne, quihndi rë Matat. Matat ne, quihndi rë Leví. Leví ne, quihndi rë Melqui. Melqui ne, quihndi rë Jana. Jana ne, quihndi rë José. 25José ne, quihndi rë Matatías. Matatías ne, quihndi rë Amós. Amós ne, quihndi rë Nahum. Nahum ne, quihndi rë Esli. Esli ne, quihndi rë Nagai. 26Nagai ne, quihndi rë Maat. Maat ne, quihndi rë Matatías. Matatías ne, quihndi rë Semei. Semei ne, quihndi rë José. José ne, quihndi rë Judá. 27Judá ne, quihndi rë Joana. Joana ne, quihndi rë Resa. Resa ne, quihndi rë Zorobabel. Zorobabel ne, quihndi rë Salatiel. Salatiel ne, quihndi rë Neri. 28Neri ne, quihndi rë Melqui. Melqui ne, quihndi rë Adi. Adi ne, quihndi rë Cosam. Cosam ne, quihndi rë Elmodam. Elmodam ne, quihndi rë Er. 29Er ne, quihndi rë Jesús. Jesús ne, quihndi rë Eliezer. Eliezer ne, quihndi rë Jorim. Jorim ne, quihndi rë Matat. 30Matat ne, quihndi rë Leví. Leví ne, quihndi rë Simeón. Simeón ne, quihndi rë Judá. Judá ne, quihndi rë José. José ne, quihndi rë Jonán. Jonán ne, quihndi rë Eliaquim. 31Eliaquim ne, quihndi rë Melea. Melea ne, quihndi rë Mainán. Mainán ne, quihndi rë Matata. Matata ne, quihndi rë Natán. 32Natán ne, quihndi rë David. David ne, quihndi rë Isaí. Isaí ne, quihndi rë Obed. Obed ne, quihndi rë Booz. Booz ne, quihndi rë Salmón. Salmón ne, quihndi rë Naasón. 33Naasón ne, quihndi rë Aminadab. Aminadab ne, quihndi rë Aram. Aram ne, quihndi rë Esrom. Esrom ne, quihndi rë Fares. Fares ne, quihndi rë Judá. 34Judá ne, quihndi rë Jacob. Jacob ne, quihndi rë Isaac. Isaac ne, quihndi rë Abraham. Abraham ne, quihndi rë Taré. Taré ne, quihndi rë Nacor. 35Nacor ne, quihndi rë Serug. Serug ne, quihndi rë Ragau. Ragau ne, quihndi rë Peleg. Peleg ne, quihndi rë Heber. Heber ne, quihndi rë Sala. 36Sala ne, quihndi rë Cainán. Cainán ne, quihndi rë Arfaxad. Arfaxad ne, quihndi rë Sem. Sem ne, quihndi rë Noé. Noé ne, quihndi rë Lamec. 37Lamec ne, quihndi rë Matusalén. Matusalén ne, quihndi rë Enoc. Enoc ne, quihndi rë Jared. Jared ne, quihndi rë Mahalaleel. Mahalaleel ne, quihndi rë Cainán. 38Cainán ne, quihndi rë Enós. Enós ne, quihndi rë Set. Set ne, quihndi rë Adán. Adán ne, me vëhë xi Nina casahmi rë me.