Search form

San Marcos 1

Juan ne, vitenda rë xuta ngajan ngu xín tsëhë nandya

1Cuitjin cavetsihin cjua tsëhë Jesucristu, me xi Quihndi rë Nina Jain.

2Isaías ne, ngu xutachanga xi cama cafaha cjua rë Nina hacuaha cachja me cojo xuta hatsëë nixtin. Cuitjin catsihindu me, hacutjin cachja Nina cojo me:

Tsingátju titjun ngu cha xi cjuaha cjua naha, cojo sa xi scuxaha cha cjuatacun rë xuta, tsëhë xi cjuehe ngaye.

3Hane hiscan jemu xín tsëhë nandya ne, ngajan cuejña cha. Hane cuitjin cuichja cha:

“Sacuatjin matyjahi ndiya hya xi nduva ngu xuta rcun ne, cuatjin nihñu tyjahi cjuatacun nuju tsëhë xi cuinduva me xi matitjun tsajan.” Cuatjin cuichja cha.

4Sacuatjin jain catsihindu Isaías ne, cuatjin jain camá ta cafehe cha xi catsingatju Nina, cha xi hmí rë Juan, ngajan hiscan jemu xín tsëhë nandya. Casua cha camachaya rë xuta ta meje rë xi tsindeya me cjuatacun rë me hacuaha xtenda me, cojo sa xi tsinchataha Nina me tsëhë jyë́ rë me. 5Hane jercu cjín xuta quijitjengui me cha, xuta tsëhë distritu Judea cojo nandya Jerusalén. Hane cavitenda cha me xi cavijacun jyë́ rë cojo Nina ngajan ndajyë Jordán.

6Tsjian rë cha Juan jan ne, tsja rë chu camellu camá. Cojo ngu cinturón chuxin quitaha cahntsua cha. Xi camá niñu rë cha ne, chu nchahva. Cojo tsjen rë chu tusen cahvi cha. 7Cuitjin cachja cha:

―‍Canduvá ngahan titjun. Peru sehe cuinduva ngu me xi hitsë sa vechu cjuatacun rë xi cumá ná ngahan, xi hisca chuxinxtë rë me cumaji tsinguisehercu sahme tyjahi. 8Ngahan ne, tu caviténda ni nuju. Peru me vëhë ne, cueya me Hasen rë Nina cahntsua xahasen nuju.

Jesús ne, caxtenda me

9Sacuaha nixtin vëhë ne, cavetju Jesús tsëhë nandya Nasaret, distritu Galilea. Quijitjengui me cha Juan xi cuitenda cha me. Hane cavitenda cha me ngajan ndajyë Jordán. 10Xi camá caxtenda me ne, xi tu tivetju me tsëhë nandan jan ne, cavëë me xi ngahnga ne tituxaha, hacuaha Hasen rë Nina ne, nduvajne sacuaha tsejen ngu paloma, quiji cavisehen cahntsua xahasen rë me. 11Hacuaha canuhya rë ngu cjua ngajan ngahnga xi chja cuitjin:

―‍Ngaye ne, quihndi naha ngaye. Jercu hmucacun ri. Jercu ndama ná ngatsë riji.

Jesús ne, cafahachuva xitsehen me

12Ngajan xi Jesús ne, ngutjen ni quiji me ngajan ngu xín ta tsëhë xi Hasen rë Nina ne, cavaxëxin rë me. 13Casetaha me ngajan xín yachan nixtin. Hacuatjin cojo Satanás quijitjengui rë me. Hane handasa jercu cavangui Satanás chuva rë xi choho sahmi Jesús ne, peru casahmii me. Hacuaha quiji ángel caviyujutaha xi cjuahacuenda rë me.

Jesús ne, vetsihin me cojo xa rë me

14Hacuaha camá nga ngu xcusun xi xuta xi matitjun ne, caveya me cha Juan ndavaya. Cavatju vëhë ne, sehe cavuya cafe nga Jesús distritu Galilea, cachja me cojo xuta cjua rë Nina. 15Cuitjin cachja me:

―‍Camatiña nixtin xi Nina ne, cuitexa me ngasunhndë. Vëhë xi meje rë xi nindeyun cjuatacun nuju hacuaha catamacjain nuju cjua xi tichjá cojo nuju.

Jesús ne, cajindaya me ñuju cha xi tsuva rë chu ti xi cuma cha ladu rë me

16Nixtin xi catsujyihiya me hya ne, cavatju me tjehen laguna tsëhë Galilea. Hora hya ne, cavëë me cha Simón cojo cha Andrés hntsë cha. Titsingatjenya cha nahya ngajñi laguna jan, tsëhë xi ha tuxa xa vëhë sahmi cha. 17Hane ngajan xi cachja me cojo cha ta:

―‍Nduvun cuanguen cojo ná. Hane cuicuyá nuju xi nuvun xuta xi cuisehen me ladu naja ngojo rë xi chu ti nuvun. ―‍Cuatjin cachja me.

18Hane hora vëhë ni caviyuju cha nahya jan ne, quiji cha cojo me. 19Ha xcun xi ha cjui Jesús cojo cha xi cuacun jan hitsë ni nguvan ne, cavëë me cha Jacobo cojo cha Juan hntsë cha, quihndi rë Zebedeo. Hincha cha cahntsua barcu, tifuyataha cha nahya. 20Hane hacuaha cajindaya me cha. Sehe caviyuju cha nahmi rë cha xi hmí Zebedeo cojo mosu rë me ngajan cahntsua barcu. Sehe quiji cha cojo Jesús.

Ngu cha xi jiya rë ngu xitsehen

21Hya xi camá ne, cafehe me cojo catsiñuju cha xi cuacun vëhë nandya Capernaum. Hane hya xi cavechu nixtin xi chjahájenda rë ne, quiji me yungun, cavicuya me xuta. 22Hane xuta jan ne, quijircun rë me hacutjin vicuya Jesús ta, tsëhë xi tivicuya me sacuaha ngu xi matitjun jain, hacuiin sacuatjin maestru xi vicuya ley rë xuta tsëhë nangui Israel. 23Hacuaha ha tu ñahñu canduva ngu cha xi jiya xitsehen cahntsua xahasen rë cha ngajan cahntsua yungun jan. 24Hane cuitjin cajindaya cha:

―‍Ngayun ne, ¿mé cuenda nuju tsijin? ¿Há nduvun nicjun niji? Ngayun ne, Jesús tsëhë nandya Nasaret ngayun. Hacuaha hvë xi ngayun xi tsajin jyë́ nuju ngayun xi catsingatju nuju Nina.

25Hane Jesús ne, cachja cjan me cojo xitsehen xi jiya xahasen rë cha jan. Cuitjin cachja me:

―‍Jyuu nechin. Hacuaha tetjixin tsëhë cha vi.

26Xi tu cahmexcuen cha xi casahmi xitsehen ne, hisca cajindaya, hane cavetjuxin tsëhë cha. 27Yëjë ni xuta jan ne, jemu quijircun rë me, hisca cavisiajmi me cojo xicjin me cuitjin:

―‍¿Mé nga xcusun vihi ni? Ngu cjua xatsë xi vicuya me vihi, ta hisca xitsehen, hacuaha hndë tsëhë me.

28Hacuaha marcu macjain canuhya rë tsëhë me jinguyëjë ni ladu tsëhë distritu Galilea.

Jesús ne, sahmi me xi mandaja nahya rë Simón Pedru

29Hya xi camá ne, cavetju me yungun jan, quiji me ndava cha Simón. Quiji me cojo cha Jacobo cojo cha Juan, hacuaha cojo cha Andrés hntsë cha Simón. 30Hane nahya rë cha Simón ne, jiña na xi hmu rë na cojo chihinsuë. Hane ngutjen cachja cha cojo Jesús xi hmu rë na. 31Ngajan xi quiji tiña Jesús hiscan jiña na, cafaha me tsja na, catsisatjen me na. Hane hora vëhë ni, casejyu suë xi má rë na. Hisca cafaha cuenda na xi sinë me cojo xicjin me.

Jesús ne, sahmi me xi mandaja xutacjín xi hmu rë

32Hane xi cavetje tsuhi ne, jemu cjín xuta quijicojo me xuta hmu rë hiscan tacun Jesús, hacuaha cojo me xi hincha xitsehen xahasen rë, 33camatangun me cojo xuta nandya ngajan tingotjo ndihya. 34Hane jemu cjín xuta hmu rë camandaja me xi casahmi Jesús, xuta xi má rë me tu mé ni chíhin xi má rë xuta. Hacuaha jemu cjín xitsehen cavaxëxin me tsëhë xahasen rë xuta. Hane casuaain me cahndë́ xi cachja xitsehen ta tsëhë xi ha vëë rë me. Hane ngutjen cuichja ta me vëhë xi catsingatju Nina me.

Jesús ne, sua machaya rë xuta cjua rë Nina ngajan yungun

35Xi camá nchujuni, jñu sa nguitajñu cavisatjenhnga me. Hane cavetju me ndihya quiji me ngu cahndë́ hiscan xin. Hane ngajan cavisiajmi me cojo Nina. 36Ngajan xi cha Simón cojo cha xi yahnga jan ne, cavanguise cha Jesús. 37Hane xi casacu rë cha me ne, sehe cachja cha cojo me ta:

―‍Jemu cjín xuta cafehetjengui nuju me. ―‍Cuatjin chja cha.

38Ngajan xi cachja me cojo cha ta:

―‍Cuanguen sa nandya xi siu tahndee, cojo sa xi hacuaha cuichjá cojo xuta vëhë cjua rë Nina ta tsëhë xi xa vëhë canduvá. ―‍Cuatjin cachja me.

39Hane sehe quiji sa me yungun xi siu yëjë ni nandya tsëhë Galilea. Cachja me cojo xuta cjua rë Nina, hacuaha cavaxëxin me xitsehen xi hincha xahasen rë ngujo xuta xi siu nandya jan.

Jesús ne, sahmi xi mandaja ngu cha xi ma rë chíhin xi vitaha rë yojo naja

40Hya xi catsujyihiya me nandya xi cuacun vëhë, hya cachja ngu cha xi yaha rë ngu chíhin vitaha xi setaha chuxin naja. Hane cachjajyë cha cojo Jesús, hisca cavixcuhnchi cha xcun me, sehe cachja cha cuitjin:

―‍Sá xi nihñu favor ne, cuma naxunxun chíhin xi yaha ná.

41Jesús ne, camayuma rë me cha. Hane cavetahatsja me cha. Sehe cachja me cojo cha cuitjin:

―‍Joho. Ha camandaja ngaye. ―‍Cuatjin cachja me.

42Hane ngutjen ni cavetjuxin chíhin jan ne, camandaja cha. 43Hane sehe casua me cha cuidadu. Hane ngutjen ni catsingatju me cha, quiji cha. 44Cuitjin cachja me:

―‍Ndaja cuidadu xi canujiin camahani xcusun vi cojo hisca ngu. Peru tihin ningacuin yojo riji cojo nahmi ngajan yungun. Hane tejñi ngu cjuatjo sacuatjin chja ley tsëhë Moisés ta camandaja ngaye, cojo sa xi xuta ne, cumacjain rë me. ―‍Cuatjin cachja me cojo cha.

45Peru xi cavetju cha quiji cha ne, cavetsihin casua cha camachaya rë xuta. Jercu cachjatë cha tsëhë xcusun vëhë. Vëhë xi Jesús ne, ha quihndë cavisiin me nandya ta tsëhë xi ha ngutjen jercu tsë xuta. Hane ngajan ni nguijña casetaha me. Peru xuta ne, yëjë ni ladu cavetju me, quijitjengui me Jesús.