Search form

San Marcos 6

Jesús ne, fi nga me Nazaret

1Hya xi cavetju Jesús tsëhë Capernaum ne, cavuya cafe me cojo cha ladu rë me nandya Nasaret, hiscan xi camacha me. 2Hya xi cavechu nixtin xi chjahájenda rë ne, cavetsihin cavicuya me xuta ngajan yungun. Hane xutacjín xi tivisiñuju cjua rë Jesús jan ne, jemu quijircun rë me. Sehe cachja me ngajñi rë me cuitjin:

―‍¿Jani cavutaya cha xi cuijyihi vi cjua xi tichja cha? Jemu tjin rë cha cjuatacun. Hacuaha jemu yehe cjuarcun sahmi cha. 3Há hyan ngayaan xi cha vihi xi chjineya jan ni, cha xi quihndi rë na María. Hntsë cha ne, hacui cha Jacobo, cha José, cha Judas cojo cha Simón. Hacuaha nandya naja tacun ndava tíchja cha.

Hane jemu xti rë xuta jan, tsëhë xi ha vëë me Jesús. 4Vëhë xi Jesús ne, cachja me cojo xuta jan cuitjin:

―‍Xuta ne, ha tuxa faharcun me ngu xihin xi suacuenda cjua rë Nina. Suva ni xuta rë xihin jan cojo xuta xi tangun nangui rë cojo, me vëhë xi faharcuaain me xihin jan.

5Ngajan ne, hacuiin cjín cjuarcun casahmi me, tsëhë xi macjaain rë xuta me. Tu cavisanetsja ni me ngujo xuta hmu rë, hane camandaja xuta hmu rë jan. 6Hane Jesús ne quijircun rë me ta, tsëhë xi xuta jan ne, cuatjin camacaain rë me. Hane sehe quiji catsujyihiya Jesús nandya tahndee rë jan, cavicuya me xuta.

Jesús ne, tsingatju me cha ladu rë me xi sua cha machaya rë xuta tsëhë gubiernu rë Nina

7Sehe casahmitangun me cha xi tejó jan hane cavetsihin catsingatju me jo jo cha jima ngu ladu. Hacuaha casua me cha ngahñu xi cuma cuaxëxin cha xitsehen. 8Hacuaha cachja me cojo yëjë ni cha xi tsajin mé xi cjuaha cha xi cjue cha. Suva ni ngu ya xi cuisecoo rë cha. Hacuiin niñu ne, hacuiin morra, hacuiin xi tujún. 9Chuxinxtë ni catincha ntsacu cha. Hacuaha cuaain cha chingá. 10Ngajan xi cachja me cojo yëjë ni cha cuitjin:

―‍Hya xi cjuhun ngu ndihya ne, xi cuisuhun ne, ha ngajan ni tinechun nguixun nguixun ni hisca xi cuetjun tsëhë nandya hiscan xi casatë nuju. 11Tuyani ni xi tsingatiin nuju me hacuaha hisca cuisiñijii me tsujun ne, tetjun tsëhë ngajan ne, titsunu chojo rë ntsacu. Vëhë cuma ngu seña tsëhë jyë́ rë me.

12Xi cajnetaha cachja Jesús cuatjin ne, sehe cavetju cha quiji cha hiscan xi casatë rë cha. Cachja cha cojo xuta xi tsindeya me cjuatacun rë me. 13Hacuaha jemu cjín xitsehen cavaxëxin cha. Hane xuta hmu rë ne, aceite tsëhë tuxine xi hmí olivu catsufë cha xten me hane camandaja me jan.

Cjuaveya rë Juan Vitenda rë Xuta

14Me xi matitjun xi hmí rë Herodes ne, cahndë me cjua tsëhë Jesús, tsëhë xi xuta ne, jercu cachja me tsëhë Jesús. Hane ngujo me ne, cuitjin cachja me:

―‍Nima Juan, cha xi cavitenda rë xuta ne, ha ndasa cahme cha, peru cavascaya rë cha. Vëhë xi ma sahmi cha cjuarcun.

15Hane ngujo nga me ne, cachja me ta Jesús ne, hacui rë Elías, ngu xutachanga xi casuacuenda cjua rë Nina hatsëë. Hane cachja sa yahnga me ta Jesús ne, hacui rë ngu profeta, sacuaha me xi casuacuenda xutachanga xi caviyuju titjun. 16Peru Herodes ne, hya xi cahndë me cjua vëhë ne, sehe cachja me ta:

―‍Nima Juan má me. Catsingátju catisun rë rcu cha, hane cavuya rë cjuahñu rë cha. ―‍Cuatjin cachja Herodes.

17Herodes ne, ha catsingatju me cachjaha rë cha Juan xi cjue cha ndavaya. Cuatjin casahmi me ngatsë rë na Herodía. Na vëhë cafaha Herodes, camá chjuun rë me ha ndasa xi ha chjuun rë cha Felipe hntsëjñu me má na. 18Hane ngatsë rë vëhë, cuitjin cachja cha Juan cojo rë me:

―‍Chja ley ta ndajintjin camahani xi chjahan chjuun rë xingueen. Vëhë xi ngayun ne, ndajintjin xi cuatjin canihñu. ―‍Cuatjin cachja cha Juan.

19Ngajan xi na Herodía ne, caveyacacun na cavutsejen na cha Juan. Hane meje rë na xi cueya cha. Peru camaji ta tsëhë xi 20Herodes ne, cafaharcun me cha, tsëhë xi vëë me ta Juan ne, ngu xihin xi tyjahi cjuatacun rë cha, hane cavéjña cha tsëhë Nina. Hane vëhë xi casahmi me cha cuidadu. Hacuaha hya xi Herodes cavisiñuju me cjua rë cha Juan ne, jercu cachuya rë me ha ndasa casecjan cjuatacun rë me. 21Peru casacu rë na Herodía cahndë́ tsëhë xi meje rë na hya xi cavechu nixtin tsëhë suhi rë Herodes. Hya cachja Herodes cojo ngujo xutaxa rë ndihyavasen cojo me xi matitjun tsëhë sindadu, cojo sa ngujo xuta changá xi matitjun tsëhë distritu Galilea, xi cjue me ta casehenchjine ngu comida tsëhë suhi rë me. 22Hane hora xi tijinë me ne, cavisehen na quihndi rë na Herodía, catë na. Hane jercu cachuya rë Herodes cojo me xi yahnga jan hacutjin catë na. Sehe ngajan xi Herodes, me xi matitjun jan ne, cachja me cojo na cuitjin:

―‍Tu mé ni xi meje ri ne, chjahye ná, hane suá ri. 23Vëë Nina jain ta suá ri hisca vasentjin nandya xi siu ntsa. ―‍Cuatjin cachja me.

24Xi tu cavetju na quiji na hiscan tacun naa rë na ne, cavinenguise na cuitjin:

―‍¿Mé xi ndatjin cjuéhya rë me?

Sehe ngajan xi chja naa rë na ta:

―‍Chjaye rcu cha Juan, cha xi vitenda rë xuta. ―‍Cuatjin cavinchangui naa rë na na.

25Xi tu cavuya cavisehen na hiscan tacun Herodes ne, ngajan xi cachja na cuitjin:

―‍Meje ná xi ngutjen ni ne, cahntsua ngu tyuva ne tuhun ná rcu cha Juan. ―‍Cuatjin cachja na quihndi jan.

26Ngajan xi Herodes ne, jemu choho camá rë me peru tsëhë xi hisca Nina caveyanangui me xi casua me cjua rë me, hacuaha tsëhë xi yëjë ni amigu rë me cahndë me cjua jan, vëhë sahmi xi má sava rë me tsindeya me cjua rë me cojo na. 27Ngajan xi Herodes ne, ngutjen catsingatju me ngu sindadu hiscan jiya cha Juan. Hacuaha cavitexa me xi cuinduva cojo cha rcu cha Juan. Sehe ngajan xi cha sindadu jan ne, quiji cha ndavaya, cavatësun cha rcu cha Juan. 28Sehe caveya cha cahntsua tyuva, quijicojo cha. Xi cafehe cha cojo ne, casua cha na quihndi rë na Herodía. Hane sehe casua na naa rë na. 29Sehe hya xi cahndë cha ladu rë cha Juan tsëhë mé xi cavatju cha cama ne, sehe quiji cha cafaha cha nima caveyaniji cha.

Jesús ne, tsicjen me hñu mil xihin

30Hya xi cajnetaha catsujyihiya cha apóstol xi catsingatju Jesús jan ne, cavuya camatangun nga cha cojo me. Sehe cachja cha hacutjin casahmi cha hacuaha hacutjin cavicuya cha. 31Sehe ngajan xi Jesús ne, cachja me cojo cha cuitjin:

―‍Nduvun suvun ni ne, cuanguen hiscan xín, chjahanjeyan hitsë.

Cuatjin meje cjue cjuahajeya me ta tsëhë xi jemu cjín xuta xi cjui nduva me hiscan tacun Jesús. Hisca maxatiin jinë me niñu. 32Sehe quiji me cojo cha ladu rë me cojo barcu ngajan hiscan xín. 33Hane xuta jan ne, cavëë me xi cjui me cojo cha ladu rë me. Hacuaha vëë me xi hacui Jesús. Sehe xuta tsëhë nandya tahndee jan ne, cavanga me quiji me taha vëhë. Hisca tjun sa me cafehe me, sehe cafehe Jesús cojo cha ladu rë me. 34Xi tu cavetju Jesús tsëhë barcu jan ne, cavëë me xi jemu cjín xuta siu me. Hane camayuma rë me xuta jan ta tsëhë xi siu me sacuaha chu tsánga xi tsajin yo xi cjuahacuenda rë chu. Sehe cavetsihin cavicuya me xuta jan, jemu cjín cjua cavicuya me. 35Hya xi ha quiji hora jan ne, ngajan xi cachja cha ladu rë me cojo me ta:

―‍Nguehe ne jemu xín camahani. Hacuaha jemu quiji hora. 36Ninguijnutuhun cjua cojo xutacjín vi cojo sa xi catji me nandya xi siu tiñataha, hane catatsë me xi sinë me. ―‍Cuatjin cachja cha.

37Hane cuitjin cafayangui Jesús:

―‍Tuhun ngayun xi sinë me.

Sehe ngajan xi cachja cha ladu rë me cuitjin:

―‍¿Hacutjin sacú niji xi sinë me xi cuarcu cjín me? Xi cuatjin cjín pan chihin ne, meje miji chji rë jo cientu mosu. ―‍Cuatjin cachja cha.

38Sehe cachja Jesús cuitjin:

―‍Tangun chutsujun ¿há cjín pan tjin ngajñi nuju ngayujun ni?

Xi tu cavëë cha há cjín pan tjin ra ne, sehe cachja cha cojo me cuitjin:

―‍Hñú pan, cojo jo ti má.

39Sehe ngajan xi cachja Jesús cojo cha ta catichja cha cojo xuta, catiyuju me xcun ndiji, ngujo ngujo me ngu ngu cahndë́. 40Hane caviyuju me ngu cientu me ngu cahndë́, o vasen cientu ngu cahndë́ hisca xi cafë yëjë me caviyujuchihin me. 41Sehe Jesús ne, cafaha me xi hñu pan cojo jo ti jan, cavutsejenniji me ngahnga ne, casua me nacuechji rë Nina, sehe cavotoho langa me pan jan. Hane casua me cha ladu rë me xi sua cha sinë xuta. Hacuaha cojo catsijo ti jan cavatëcja Jesús xi sinë xuta. 42Jercu caxuva pan cojo ti jan. Hane yëjë ni me cajinë me hacutjin xi cachuya rë xahasen rë me. 43Xi cavatju cajinë xuta jan ne, sehe cafaya cha pan cojo ti xi cafiin jan ne, hane catsinguitsë cha tejó chajne cojo. 44Me xi cajinë pan jan ne, hñu mil má me xi xihin. Hacuaha xin má yachjin cojo langa xi cajinë me.

Jesús ne, fi ntsacu me xcun ndachacun

45Ngajan xi Jesús ne, catsingatju me cha ladu rë me cojo barcu jan xi cjue titjun ni cha ngunda vëhë, hiscan nandya Betsaida, jinguyëjë rë xi tsinguijnetaha me cjua cojo xuta. 46Hya xi camá catsinguijnetaha me cjua jan, sehe camiji me ngu ndetjún xi cuisiajmi me cojo Nina. 47Hane hora xi camá nguixun ne, barcu jan ne, vasencja laguna cjui. Hane Jesús ne, tacun suva cuaha me nangui quixí. 48Hacuaha cavutsejen me ta jemu chja tivatju cha xi cjui cha cojo barcu, tsëhë xi tjo ne, taha hiscan cjui cha ne, ngajan nduva. Hane xi tiña sahasen ne, camatiña Jesús tsëhë cha, cjui me xcun nandan. Hane cuatjin cjui me sacuaha xi meje cuatjutaha me cha. 49Xi tu cavëë cha xi cjui me xcun nandan ne, catsingatahacacun cha ta nima xi meje cuincharcun rë cha. Hane jercu cajindayatë cha, 50tsëhë xi catsacjun cha xi cavëë cha me. Hane ngutjen ni cachja Jesús cojo cha cuitjin:

―‍Xi carcuun.

51Hane sehe cavisehen Jesús barcu hiscan siu cha. Hora vëhë ne, casejyu tjo. Ngajan xi jemu quijircun camahani rë cha ta, 52ha ndasa cavëë cha cjuarcun xi casahmi Jesús cojo pan jan ne, peru cajnii rcu cha, tsëhë xi vechiin cjuatacun rë cha.

Jesús ne, sahmi me xi mandaja xuta xi hmu rë tsëhë nandya Genesaret

53Xi quiji sa me cojo barcu ne, cafehe me tjehen laguna, tiña nandya xi hmí Genesaret. Hane ngajan catsihñu me barcu. 54Hya xi cavetju Jesús tsëhë barcu ne, cavëë xuta ta hacui Jesús. 55Hane xuta jan ne, marcu macjain quiji me yëjë ni ladu tsëhë nandya jan, xi quiji jaha me xuta hmu rë, caviyuju me xcun Jesús. 56Hane tuyani ni xi quiji Jesús, há nandya langa ne, há nandya hñu, o há xi ranchun, caviyuju me xuta hmu rë hiscan ndetsin. Sehe cafehya me cojo Jesús xi ndastu satëtaha xuta hmu rë jan tsjian rë Jesús. Hane yëjë ni xuta hmu rë xi casatë tsjian rë Jesús ne, camandaja me.