Search form

San Mateo 26

Camachihin cjua hacutjin xi chjahá rë Jesucristu

1Hya xi camá ne, xi cajnetaha cachja Jesús yëjë cjua cuatjin ne, sehe cachja me cojo xuta ladu rë me cuitjin:

2―‍Ha hyun xi chaja sa jo nixtin xi cuechú suhi tsëhë pascua ne hane ngahan xi Quihndi rë Xuta Jain ngahan ne, hatuxa hya cumá ngahan entregadu tsja xuta xi cuetaha ná xcun cru. ―‍Cuatjin cachja me.

3Nixtin hya ne, yëjë nahmi xi matitjun cojo xuta changá rë xuta tjë rë Israel ne, casahmi me ngu junta ngajan ndihya jyë rë Caifás, me xi vitexa yëjë nahmi xi matitjun. 4Ngajan xi caviyuju me cjuatacun rë me hacutjin xi cuma cuindacha me Jesús cojo sa xi cuma cjuahahma me me xi tsiquehen me me. 5Peru cachja me ta:

―‍Ndatjin xi cuinechanyan ne cuatju suhi, sehe chjahanhma cha, sá tu cumacjan rë xutacjín, hane cumá ngu suë jyë.

Cavitejnu ngu chjuun aceite rcu Jesucristu

6Hya ne, Jesús ne, nandya Betania quitaha me. Tacun me ndava cha Simú, cha xi camandaja tsëhë chíhin vitaha xi casatë chuxin rë cha. 7Hane ngajan camá xi cafehetjengui rë me ngu chjuun xi yaha na ngu frascu xi ndyojo camá, hincha ngu aceite ndaja xi jercu hnga chji rë. Hya xi camá ne, cavitejnu na aceite jan rcu Jesús hora xi tijinë me niñu. 8Peru xi cavutsejen cha ladu rë me xi cuatjin casahmi na jan ne, camacjan rë cha cachja cha cuitjin:

―‍¿Mé má tu mahya ni catsichaja na aceite vë? 9Sá xi xteña ne ndaja sacú tujún rë. Hane tujún vëhë ne cuma cuisecoo rë xuta yuma. ―‍Cuatjin cachjataha cha na.

10Peru xi camachaya rë Jesús xi cuatjin chja cha ne, catsicuya me cjua cuitjin:

―‍¿Mé má cuatjin tivichuncjun tsëhë na ta jemu vengui chjí rë xcusun xi casahmi na cojo ná? 11Xuta yuma ne, yëjë nu yëjë nixtin ne, siu me cojo nuju. Peru ngahan ne, hacuiin yëjë nu yëjë nixtin tejña cojo nuju. 12Tsëhë xi xi cavitejnu ná na aceite jan ne cojo tjun ni ne cuëhëchjine na yojo naha xi seyaniji ngahan. 13Cuichjáquixë cojo nuju ta tuyani ni tsëhë jingujyë ni ngasunhndë xi cuichja xuta cjua tsëhë Nina ne, hacuaha cueyanangui me na vihi, cojo sa xi xuta xi yahnga ne, cumachaya rë me xcusun xi casahmi na cojo ná. ―‍Cuatjin cachja Jesús.

Judas casahmi cha compromisu xi cuiteña cha Jesús

14Hya xi camá ne, ngu cha tsëhë ngajñi rë me xi tejó xi má ladu rë Jesús, cha xi hmí rë Judas Iscariote ne, quiji cavisiajmi cha cojo nahmi xi matitjun 15cavinenguise cha me cuitjin:

―‍¿Há cjín tujún tuhun ná sá xi sahme entregadu nuju Jesús?

Ngajan xi cavexqui me hane casua me cha cantë tujún tyava. 16Hane ngajan cavejñaya cha ngu hora xi ndaja xi cuma sahmi cha entregadu Jesús cojo xuta xi cuacun jan.

Hacutjin cajinë Jesús tsëhë suhi rë Pascua

17Hya xi camá ne, nixtin xi tjun tjun tsëhë suhi xi chinë pan xi tsajin san rë, cafehe xuta ladu rë Jesús xi tejo jan, cachja cha cojo me cuitjin:

―‍¿Jani meje nuju xi cuihinchjini xi xine nguixun tsëhë suhi?

18Sehe cafayangui Jesús cuitjin:

―‍Tangun nandya Jerusalén. Hane xi cuechú ndava ngu cha xi cuacun jan ne, tinújun cojo rë cha cuitjin: “Chja maestru naja cuitjin: Meje cuechú hora naha, hindë ne, ndya nuju ne sínë niñu tsëhë pascua cojo xuta ladu naha.”

19Sehe quiji xuta ladu rë me ne, casahmi cha sacuaha xi cavitexa Jesús cha, hane cavëhëndaja cha xi sinënguixun me tsëhë pascua.

20Hya xi quiji hora jan ne, tijinë me niñu cojo xuta ladu rë me xi tejó jan, 21hane ngajñi hora xi tijinë me ne, cachja Jesús cuitjin:

―‍Cuichjá cojo nuju cjuaquixi ta ngu ngayun ne, nihñu ná entregadu. ―‍Cuatjin cachja me.

22Ngajan xi jemu choho camá rë cha, cavetsihin cha cachja chuva ngu chuva ngu cha cojo rë me cuitjin:

―‍Nai, ¿há cumácacun xi ngahan sahme?

23Hya xi camá ne, cafayangui Jesús cuitjin:

―‍Ngu cha xi ngu ni tyuva tsinguísehenquinda niñu naha cojo ne, cha vëhë xi sahmi ná entregadu. 24Ngahan xi Quihndi rë Xuta Jain ngahan ne, hatuxa tjin ná xi cueya sacuatjin ha camá camahindu xcun xujun tsahan, peru jemu chojyihi tsëhë cha xi sahmi ná entregadu. Vengui sa chji rë xi catsiin cha.

25Sehe Judas, cha xi sahmi rë me entregadu cachja cha ta:

―‍Maestro, ¿há cumácacun xi ngahan sahme?

Ngajan xi cafayangui Jesús tsëhë cha cuitjin:

―‍Juun, quixi.

26Hora xi tijinë me comida ne, cafaha me ngu niñutsju hacuaha casua me nacuechji rë Nina ne, sehe cavotohocja me niñutsju jan, casua rë me xi tejó jan ne, sehe cachja me cuitjin:

―‍Chjuhun xinu. Vihi ne, yojo naha vi.

27Hya xi camá ne, cafaha me ngu vasu ne, sehe casua me nacuechji rë Nina, sehe cachja me cuitjin:

―‍Juhun vihi sehe siuhun ngajñi ngayujun ni, 28ta xan rë uva vihi ne, vihi jni naha xi cuetju ngatsë rë xuta sehe cuma chihin compromisu xi cuaxëtje rë xuta tsëhë jyë́ rë me. 29Hacuaha cuichjá cojo nuju ta quihndë cojo nixtin xi cjuiniji sa ne, ha quihndë cuyaan cuëhë xan rë uva. Cuëhë, peru hisca hya xi cuëhë nga cojo nuju ngajan hiscan sahmi Nina gubiernu.

Casua Jesucristu camachaya rë Pedru xi cuichja me xi hvíin me yo Jesucristu

30Xi cajnetaha cajinë me ne, casë me ngu tsëhë Nina. Sehe cavetju me quiji me Naxi Olivu. 31Hane sehe ngajan cachja Jesús cojo xuta ladu rë me cuitjin:

―‍Ngayujun ni ngayun ne, nismutacun ná hacuaha cuma ndaya cjuatacun nuju quihndë nguixun vi ne, hane cuejñu ná suva ta cumá sacuaha camahindu xcun xujun rë Nina xi chja xi: “Nina ne, tsiquehen me cha xi sahmi cuidadu rë chu tsánga, hane chu tsánga vë ne cuitsojo chu.” 32Cuatjin cumá, peru hya xi cúya nga cjuahñu naha ne cjuë́ titjun tsujun hisca distritu Galilea.

33Pedru ne, cafayangui cha cuitjin:

―‍Ha ndasa ngayëjë cha xi cuicun vi cuejña suva cha ngayun, hatuxa tsajin nixtin xi cojo ngahan sahme cuatjin.

34Hya xi camá ne, cuitjin cachja Jesús cojo cha:

―‍Cuichjáquixë cojo ri ta tajñu ni xi chaja squihnda xahnda ne, ha jyan ndiya cuinoje xi hyiin yo ngahan. ―‍Cuatjin cachja Jesús.

35Cachja Pedru cuitjin:

―‍Ha ndasa hisca cueya cojo nuju ne, peru cuichjaan xi hveen yo ngayun.

Hacuaha cuanitjin ni cachja cha xi yahnga.

Casahmi Jesucristu oración rë me ngajan Getsemaní

36Sehe quiji Jesús cojo cha xi tejó jan ne, cafehe me ngu cahndë́ xi hmí rë Getsemaní. Ngajan cachja Jesús cuitjin:

―‍Nechun ni nguehe. Cjuë́ nguvan hitsë ni cuisiajme cojo Nina. ―‍Cuatjin cachja me.

37Hya xi camá ne, cavaxë me Pedru cojo jo cha quihndi rë Zebedeo xi quiji cojo me cha. Hane xi cjui me ne, cavetsihin jemu camá va rë me, hacuaha jemu macjincacun me. 38Sehe cachja me cojo cha cuitjin:

―‍Jercu choho camahani má rë xahasen naha, sacuaha xi vëhë ni tsiquehen ná. Nguehe nechuncun ngayun cojo ná.

39Sehe ngajan xi Jesús ne, quiji me hitsë nguvan. Hane ngajan cafañatsacjan me, cafehya rë me Nina cuitjin:

―‍Ngayun Nahmi naha, sá tjin sa ngu chuva rë ne, catisatiin ná cjuañihi xi cuátju cuma vi. Peru catama sacuatjin xi meje nuju ngayun, hacuiin sacuatjin xi meje ná ngahan.

40Hya xi camá ne, cavuya cafehe me hiscan siu jyan xuta ladu rë me xi quijicojo me jan ne, casacutsja me xi siufë me. Ngajan xi cachja Jesús cojo Pedru cuitjin:

―‍Cahyun ni, ¿há camaji cavacun ngayun cojo ná hisca ngu hora ni? 41Nechuncun ngayun, nihñu oración nuju, sátu chjaháchuva nuju cojo cjuatacun nuju. Xahasen nuju ne, ndaja meje rë xi nihñu, peru yojo nuju ne, chuvacacun.

42Hya xi camá ne, camá jo ndiya xi quiji me nguvan cafehya me Nina cuitjin:

―‍Nahmi naha, sá xi cumaji cuatju chuva rë xi satiin ná cjuañihi ne, catama sacuatjin xi meje nuju ngayun.

43Hya xi camá ne, cavuya nga cafehe me hiscan siu jyan xuta jan casacutsja me xi siufë me ta jemu hai nijña rë me. 44Hya xi camá ne, camá jyan ndiya xi quiji me nguvan ne hacuaha cojo vëhë nga ne, cafehya me Nina. 45Sehe cavuya nga me cafehe me hiscan siu xuta jan ne, cachja Jesús cuitjin:

―‍¿Há tsjuñufun cuhun? Chutsujun ne, ha cavechú hora xi ngahan Quihndi rë Xuta Jain ne, cjuaha ná xuta xi sahmi ná entregadu cojo xuta tsehen. 46Tisatjunhngun, cuanguen chutsejen ta ha nduva cha xi sahmi ná entregadu.

Cafaha xuta Jesucristu

47Jinguyëjë rë xi tichja cuaha Jesús ne, cafehe Judas, cha xi cojo jiyajñi ngajñi rë cha xi tejó xi catsujyihiya cojo me. Hacuaha jemu cjín xuta tivisecoo rë cha, xuta xi cavitexa nahmi xi matitjun cojo xuta changá xi quijijaha me Jesús. Hane yaha me quicha, yaha me ya. 48Chaja sa xi cjuehe cha jan xi sahmi cha entregadu Jesús ne, cachja cha cojo xutacjín jan cuitjin:

―‍Cha xi cjuë́ cuitatsuha xi suá rë nina ne, cha vëhë xi hacui cha.

49Xi tu cavechu cha hiscan nduva Jesús ne, ngutjen quiji casahmitiña cha tsëhë me hacuaha casua cha me nina cachja cha cuitjin:

―‍Cuhndanu, maestro ―‍chja cha.

Hane quiji cavitatsuha cha me. 50Ngajan xi cachja Jesús cojo cha cuitjin:

―‍Tai, Nihñichihin xa vëhë xi candove.

Hya xi camá ne, quiji xuta jan ne, cafaha me Jesús. 51Ngajan xi ngu cha xi secun cha cojo Jesús ne, cavaxë cha quichanduju rë cha, hane cavaja rë cha ngu cha mosu rë nahmi xi matitjun, hane cavatësun cha ngu ladu tyjavañuju.

52Ngajan xi cachja Jesús cojo cha cuitjin:

―‍Teyendeje quicha riji vë. Xuta xi tsicojo me quicha ne, hacuaha cojo quicha cueya me.

53¿Há hyuun ta sá xi cjuehya rë Nahmi naha ne, jemu cjín mil ángel tsingatju me cuisecoo ná? 54Peru sá xi cuatjin sahme ne, ¿hacutjin cumachihin cjua rë xujun rë Nina? ta cuitjin meje rë xi cumá.

55Hya xi cajnetaha cachja Jesús cojo xuta ladu rë me ne, sehe cachja me cojo xutacjín cuitjin:

―‍¿Há nduvun chjuhun ná sacuaha ngu xuta xi chëjë me, xi cuatjin nduvun cojo ya cojo quicha vë ni? Xi cavitejñaya cojo nuju nchunchujun ni ndatsen yungun jan ne, cavetuhunntsuun ná cachjuun ná. 56Peru cuitjin tijima cojo sa xi cuetjucaa jain hacutjin camahindu xcun xujun rë Nina xi catsihindu profeta.

Quiji me cojo Jesús ndava nahmi xi matitjun

57Hya xi camá ne, xi cafaha xuta jan Jesús ne, quijicojo me me ndava Caifás, nahmi xi matitjun tsëhë yëjë ni nahmi ta tsëhë xi ngajan ha camá tangun yëjë ni cha xi vicuya cjuachacun cojo yëjë ni xuta changá. 58Pedru ne, hacuaha tjengui cha cjui cha tu cjin tu cjin ni hacutjin cjui xuta jan cojo Jesús hisca xi cavisehen cha ndatsen rë ndava nahmi xi matitjun jan. Hane ngajan cavéjña cha cojo cha nísë rë yungun cojo sa xi cumachaya rë cha mé cumá.

59Hane nahmi xi matitjun jan cojo yëjë sa xuta xi matitjun ne, cavangui me xuta ndacha xi tsinguixi jyë́ rë Jesús, cojo sa xi cuma tsiquehen me me. 60Peru tsajin mé jyë́ rë Jesús xi casacu rë me handasa jemu cjín má xuta ndacha xi cachja me. Hisca xi ha tisacuiiyiin rë me hacutjin cuma, sehe cafehe jo cha ndacha xi cachja cha 61cuitjin:

―‍Cha vi cuitjin cachja cha ta: “Ngahan ne, cuma tsinguétsun yungun xi matitjun vi xi casahmi xuta tsëhë Nina, hane cahntsua xi jyan nixtin ne, sahme nga ngu.”

62Ngajan xi nahmi xi matitjun tsëhë nahmi xi yahnga jan ne casecunvasen me, cavinenguise me Jesús cuitjin:

―‍¿Há chjayinnguiin hisca ngu cjua? ¿Mé noje tsëhë jyë́ xi vincha xuta jan?

63Hane Jesús ne, tu jyuu ni casecun me. Sehe cachja nahmi xi matitjun jan cojo Jesús cuitjin:

―‍Cuitexa ri ngatsë rë xi macjain ri tsëhë ngu ni Nina quicun xi hora xi cjuahataha ri ne cuinoje cjuaquixi. ¿Há ngaye xi Quihndi rë Nina? ¿Há ngaye xi Cristu?

64Ngajan cafayangui Jesús tsëhë me ta:

―‍Sacuatjin nújun vë ne, cuatjin jain. Hacuaha cjuehe nixtin xi chutsujun ná xi tejña ladu quixi tsëhë ngahñu rë Nina. Hacuaha chutsujun ná xi cuinduvajne ngajñi rë yufí tsëhë ngahnga.

65Hane ngajan xi nahmi xi matitjun tsëhë nahmi xi yahnga jan ne xi jemu camacjan rë me ne, hisca tsjian rë me cavicheya me. Hacuaha cuitjin cachja me:

―‍Tsixcuehyu cha Nina. Tsajin sa cjua testigu xi mameje. Ngayun ne, ha canuhyun hacutjin tsixcuehyu cha Nina. 66¿Mé nújun quihndë?

Ngajan cafayangui me cuitjin:

―‍¡Meje rë xi cueya cha!

67Hya xi camá ne, ngu jo me cavetsihin me cavëhënatya me Jesús hacuaha cavajaya me xcun. Yahnga nga me ne, cojo cahntsua tsja me cavaja me xcun Jesús. 68Cachja me cuitjin:

―‍Tinoje, ngaye Cristu, ¿yo xi cavaja ri?

Cachja Pedru xi hvíin me yo Jesucristu

69Jinguyëjë rë xi cuatjin tijima ne, Pedru ne, tacun me ndatsen ndihya. Hya xi camá ne canduva ngu na mosu hndixahan tsëhë nahmi jan, cafehe cachja na cojo Pedru cuitjin:

―‍Ngaye ne, ladu rë Jesús tsëhë distritu Galilea má ye.

70Peru xcun yëjë me xi siu me ne, cafahahma me cachja me cuitjin:

―‍Hisca hveen mé xi noje.

71Hya xi camá ne, sehe cavetju me quiji me casecun me hiscan tu cuiseen ni tsëhë ndatsen ndihya. Hane ngajan xi ngu nga na cachja na cojo xuta xi siu ta:

―‍Cha vihi ne, ladu rë Jesús nandya Nasarét má cha.

72Hya xi camá ne, ngu ndiya nga ne cafahahma me cuitjin:

―‍Vëë Nina xi hveen xuta jan.

73Hya xi cavatju ngu hora ne, sehe camatiña xuta xi hinchacun cojo Pedru jan cachja me cuitjin:

―‍Ha cjuaquixindaja ta ngaye ne, cojo ngaye nechin cojo cha xi cuajyihi vë, ta tsëhë xi cjua riji tsingacun xi xuta distritu vë ngaye.

74Ngajan xi cavetsihin nga Pedru cafahahma me cjuaquixi hisca cachja me xi catinduva ngu cjuacjintacun xi cuatju me sá xi tichja me ngu ndesu. Cuitjin cachja me:

―‍Vëë Nina jain xi hveen yo me xi nújun vë.

Hane hora vëhë ne, cajihnda ngu xahnda. 75Hane Pedru ne, catsinguitsjen me cjua xi cachja Jesús cojo rë me xi cachja me cuitjin: “Chaja sa xi squihnda ngu xahnda ne, hacuaha camá jyan ndiya nújun xi hyúun yo ngahan.” Hane xi cavetju me candatsen ne, cajihnda susu me.