Search form

Romanos 3

1Sa quixi cuatjin ne, cuma cuinenguisen ta, ¿mé vengui chjí rë xi xuta tjë rë Israel má ngayaan? ¿Mé vengui chjí rë xi cuatjin cati chuxin naja? 2Peru jemu vengui camahani chjí rë. Titjun ne, vengui chjí rë ta, tsëhë xi Nina ne, casuatsja naja me cjua rë me. 3Peru sa xi ngujo xuta tjë rë Israel catsismicacun me Nina ne, ¿mé xi cuma? ¿Há vëhë ni sahmi xi tsismicacun Nina ngayaan xuta rë me? 4¡Jéya! Meje rë xi cuinújan xi Nina ne, hatuxa sahmichihin me yëjë ni cjua xi chja me. Sahmi me handasa yëjë ni xuta ne, jemu ndacha me. Xcun xujun rë Nina ne, cuitjin camahindu:

Ngayun, Nina naha ne, tsëhë yëjë ni cjua xi nújun ne,

tsajin camahani mé jyë́ quitjin, hacuaha hatuxa scaa rë cjua nuju cjue xcun tsëhë cjua rë xuta xi tsichuva nuju me cojo cjuatacun nuju.

Cuatjin camahindu.

5Sa xi ngatsë rë cjuatsehen xi nihña ne, vëhë tsingacun jain xi Nina ne, tsajin camahani jyë́ quitjen me ne, ¿mé cumá cuinújan? ¿Há cuinújan xi Nina ne, hacuaha jyë́ quitjen me ta sahmi naja me castigu? (Tichjá cojo nuju sacuaha cjuatacun rë ngu xutajyë.) 6¡Jéya! quixiin vë ta, sa xi jyë́ quitjen Nina ne, sehe cumaji tsichuva me xuta ngasunhndë cojo cjuatacun rë me.

7Cuejña xi cuichja sa ngu xuta cuitjin: Sa xi hitsë sa cuaxë́ndaja Nina cojo cjuaquixi rë me hya xi sahmi jain me sacuatjin chja me hacuaha hitsë sa ndaja tsejen xi jyë hnga Nina cojo Hasen rë me ngatsë rë cjuandacha naha ne, ¿mé má sehe cuatjin tsichuva ná me sacuaha ngu xuta tsehen? 8O sa tsajin ne, cuejña xi cuichja sa ngu xuta cuitjin: Cuanguen nihña cjuatsehen, cojo sa xi cuma cuetjucaa sa cjuandaja. Hisca tjin yahnga xuta xi choho chja me tsijin ta chja me xi cjuatacun vëhë vicuyin, peru quixiin vë. Xuta xi cuacun vë ne, hatuxa satë rë me castigu xi vitexa jyë́ rë me.

9Sa cuatjin ne, ¿há hitsë sa vengui chjí naja ngayaan xuta tjë rë Israel xi cuma rë xutaxín? ¡Jéya! Ha sehe cachjá ta ngayejen ni, sa xuta tjë rë Israel o sa xutaxín ne, ha nechan ngayejen ni ngajñi rë cjuatsehen. 10Cuatjin camahindu xcun xujun rë Nina hiscan xi chja cuitjin:

Tsajin xuta xi tsajin jyë́ quitjen, hisca ngu me tsajin me;

11tsajin yo xi vijne rcu, tsajin yo xi vanguise ndiya rë Nina.

12Yëjë ni xuta ne, cavetjuxin me tsëhë ndiya rë Nina, yëjë ni me ne, camachjiriin me.

Tsajin yo xi ndaja sahmi me. Ndastu ngu ni me tsajin me.

13Cahntsua hntsua me ne, chojyihi sacuaha ngu tsjun xi catuxaha;

neje me ne, suvá cjuandacha visiajmi,

chuxin hntsua me ne, xan rë chu yë hincha ngahma rë;

14hntsua me ne, suvá cjuahngatacun quitsë rë.

15Cojo ntsacu me ne, ngu hñu sasa cjue tsiquehen xicjin me;

16Ndiya xi hincha me ne, suvá xi tsinguetsun ni me cjuatacun rë xuta, hacuaha sua me xuta cjuachoho.

17Hvíin camahani me ndiya tsëhë cjuajeya.

18Tsajin ngu hora xi tsingatahacacun me xi tsacjun me Nina.

Cuatjin chja xujun rë Nina.

19Ha hyan ta yëjë ni cjua xi chja ley rë Nina ne, chja cojo xuta xi siu ngahma rë ley vëhë. Cuatjin xi tsajin yo cuma cuichja xi tsajin mé jyë́ quitjen. Hacuaha cuatjin xi yëjë ni xuta ngasunhndë vi ne, tsichuva Nina me cojo cjuatacun rë me. 20Nina ne, cuichjaain me tsëhë ngu xuta xi tsajin jyë́ rë me ngatsë rë xi casahmichihin me sacuatjin chja ley ta, ley ne, sua machaya naja xi ngayejen ne ne, xuta tsehen ngayaan.

Nina ne, tsicjë me jyë́ naja sa xi mangutacun cojo rë me

21Peru Nina ne, casua me camachaya naja hacutjin tsicjë me jyë́ naja. Hane hacuiin ngatsë rë ley xi cuatjin sahmi me. Cjuatacun rë Nina vë ne, hisca hatsëë camahindu xcun xujun rë me. 22Cjuatacun vëhë ne, cuitjin fi: Nina ne, tsicjë me jyë́ rë xuta xi mangucacun cojo Jesucristu. Cuatjin sahmi Nina cojo yëjë ni xuta xi cuatjin mangucacun me cojo Jesucristu ta Nina ne, tangun ni vutsejen me xutaxín cojo xuta tjë rë Israel. 23Yëjë ni xuta ne, sahmi me cjuatsehen, hacuaha chaja camaha sa xi cuechutaha me sacuatjin jyë hnga Nina cojo Hasen rë me. 24Peru cojo cjuandaja rë Nina ne, tu cjuatjo ni tsicjë me jyë́ rë xuta, ngatsë rë xi Jesucristu ne, cavechjitje me jyë́ xi quitjen xuta. 25Nina ne, catsingatju me Jesucristu xi cueya me xi cuechjitje me jyë́ rë yëjë ni xuta xi cumangucacun cojo rë me. Cuatjin casahmi Nina, cojo sa xi sua me cumachaya naja xi me vëhë ne, jemu tyjahi me cojo cjuatacun rë me hya xi jemu catsijyëcacun me cojo xuta xi caviyuju titjun hacuaha catsingatjuhnga me jyë́ rë xuta xi cuacun vë. 26Hacuanitjin ni sua me machaya naja xi jemu tyjahi me cojo cjuatacun rë me quihndë xi titsicjë me jyë́ xi quitjen xuta xi mangucacun cojo Jesús.

27Xi cuatjin ne, ¿há cuma naxenndajan yojo naja? ¡Jéya, cumaji! Nina ne, hacuiin tsicjë me jyë́ naja ngatsë rë xcusun xi nihña ta suvá ngatsë rë xi mangutacun cojo Jesucristu. Vëhë xi choho nuhya rë sa xi naxenndajan yojo naja. 28Vëhë xi tsejen xi meje rë xi ningatahantacun cuitjin: Nina tsicjë me jyë́ rë ngu xuta ngatsë rë xi mangucacun xuta jan cojo Jesucristu, hacuiin ngatsë rë ngu ley xi vihndë me.

29Nina ne, ¿há cuma xi suvá ni xuta tjë rë Israel xi Nina rë me má me? ¿O há cojo xutaxín má me Nina tsëhë? Juun, cojo me. 30Ngu ni Nina xi tacun me. Hane me vëhë tsicjë me jyë́ rë xuta tjë rë Israel ngatsë rë xi mangucacun xuta jan cojo Jesucristu, hacuaha tsicjë me jyë́ rë xutaxín xi vatiin me chuxin rë me ngatsë rë xi mangucacun xutaxín cojo Jesucristu. 31Quihndë xi tinújan xi jemu vengui chjí rë xi mangutacun cojo Jesucristu ne, ¿há tininguetsun ngahñu rë ley xi cavitexa Nina? ¡Jéya! Ha hyan ta ley rë Nina ne, hatuxa vengui chjí rë.