Search form

San Juan 16

1Je² cjoa⁴-vi⁴ tsa³cja³cao⁴-no³, jme¹-ni³ nca³ tsi² tsao⁴tˀa³xin²-si¹nio³. 2Cˀaon⁴sje³-no³ ntˀia³ sinagoga. Cjoa⁴ˀai¹ hora cˀia⁴ nca³ to⁴ˀya³-ni³ xi³ si⁴²cˀen³-no³ si⁴²cja³ˀai³tsjen³ nca³ cˀoa⁴-sˀin² si⁴²xa¹-le⁴ Ni³na¹. 3Je²-vi⁴ cjoa⁴ cˀoa⁴si⁴²cao⁴-no³, nca⁴ tsi² tsa² ve³xcon³ Nˀai³-na¹ cao⁴ an³.

Je² xa¹ xi³ sˀin¹ Espíritu Santo

4Cˀoa⁴qui³xin³-no³ je² cjoa⁴-vi⁴, jme¹-ni³ nca³ cjoa⁴ˀai¹tsjen³-si¹ni³no³ nca³ je³cˀoa⁴qui³xin³-no³, cˀia⁴ nca³ cjoa⁴ˀai¹ hora je²-ve⁴. A³li²coi³ cˀoa⁴qui³xin³-no³ nca³ ti¹tjon², nca⁴ an³ tsa³ca²te⁴jna³cao⁴-no³. 5To⁴nca³ je³ti²fi³con³-le⁴ je² xi³ qui³si³ca³sen¹-na³. Ni⁴ˀya³-jin² xi³ jon² xi³ tso²-na³: Jña¹ ti³ˀmi³. 6To⁴nca³ cjai¹nca³ to⁴va³-le⁴ ni⁴ma⁴-no³, nca⁴ tsa³cja³cao⁴-no³ je² cjoa⁴-vi⁴. 7Cˀoa⁴ ti²xin³-no³ xi³ cjoa⁴qui²xi⁴: Cjai¹nca³ to⁴ma³chjen¹-no³ nca³ an³ cjoia¹³. Tsa² tsi² tsa² cjoia¹³, li²coi³ cjoa⁴ˀai¹con³-no³ je² xi³ va³sen¹cao⁴. Tsa² an³ cjoia¹³, si³ca³sen¹³-no³ je² xi³ va³sen¹cao⁴. 8Cˀia⁴ nca³ je² cjoa⁴ˀai¹, cˀoa⁴-sˀin² si⁴²qui²xi⁴ya³-le⁴ cho⁴ta⁴son³ˀnte³-vi⁴ je¹-le⁴, cˀoa⁴ si⁴²qui²xi⁴ya³-le⁴ cjoa⁴qui²xi⁴ xi³ tjin¹-na³, cˀoa⁴ si⁴²qui²xi⁴ya³-le⁴ nca³ sˀe⁴nta³jin³ cjoa⁴. 9Si⁴²qui²xi⁴ya³-le⁴ je¹-le⁴, nca⁴ tsi² tsa² ma³cjain¹-le⁴ xi³ tˀa³tsˀan⁴. 10Si⁴²qui²xi⁴ya³-le⁴ cjoa⁴qui²xi⁴ xi³ tjin¹-na³, nca⁴ cjoi¹con³-le⁴ Nˀai³-na⁴, cˀoa⁴ li²coi³ ti⁴jcha⁴-ni³nao¹³. 11Si⁴²qui²xi⁴ya³-le⁴ nca³ sˀe⁴nta³jin³ cjoa⁴, nca⁴ je² nai⁴² xi³ va³te¹xo³ma³ son³ˀnte³-vi⁴ ti¹jna³ne²-le⁴ cjoa⁴ñˀain³. 12To⁴jo³ tjin¹-sa³na³ cjoa⁴ xi³ cˀoa⁴xin³-no³, to⁴nca³ ntˀai⁴-vi⁴ li²coi³ coan⁴cho⁴ya³-no³. 13Cˀia⁴ nca³ cjoa⁴ˀai¹ je² Espíritu Santo xi³ ña³qui³ cjoa⁴qui²xi⁴, je² xi³ si⁴²qui³ncha¹ya³ntia³-no³ nca³yi³je³ xi³ ña³qui³ cjoa⁴qui²xi⁴, nca⁴ tsi² tsa² to⁴je² xi³ cˀoa⁴-sˀin² coi⁴nchja⁴, to⁴cˀoa⁴-sˀin² coi⁴nchja⁴ jña³-le⁴ xi³ cjoi⁴nčhˀoe¹, cˀoa⁴-sˀin² si⁴²cji³nčhˀoe¹-no³ jme³-sa³ni³ cjoa⁴ xi³ cjoa⁴ˀai¹. 14Je² xi³ cˀoa⁴sje³je³ya³-na³, nca⁴ scoe¹ xi³ tsˀan⁴, cˀoa⁴ si⁴²cji³nčhˀoe¹-no³. 15Je² nca³yi³je³ xi³ tjin¹-le⁴ Nˀai³-na¹, tsˀan⁴ nia¹³. Coi³ cˀoa⁴ca²xin³-nia³ nca³ scoe¹ xi³ tsˀan⁴, cˀoa⁴ si⁴²cji³nčhˀoe¹-no³.

Cjoa⁴va³ cjoa⁴tsjoa³ coan⁴

16Jnco³ tjo², cˀia⁴ li²coi³ ti⁴jcha⁴-ni³nao¹³. Nqui²jnco³ tjo², cˀia⁴ jcha⁴-nao¹³, nca⁴ cjoi¹con³-le⁴ Nˀai³-na¹. 17Cˀia⁴ cˀa³ cho⁴ta⁴-le⁴ tsa³cja¹cao⁴ xi¹ncjin¹: Jme¹-ni³ xo⁴ tso²-le⁴vi⁴. Jnco³ tjo², cˀia⁴ li²coi³ ti⁴jcha⁴-ni³nao¹³. Nqui³jnco³ tjo², cˀia⁴ jcha⁴-nao¹³, nca⁴ cjoi¹con³-le⁴ Nˀai³-na¹. 18Cˀoi⁴qui³tso²: Jme¹-ni³ xo⁴ tso²-le⁴ve⁴: Jnco³ tjo². Li²coi³ ma³cho⁴ya³-na¹ jo³ tso². 19Tsen³ coan³-le⁴ Jesús nca³ me³-le⁴ nca³ sco¹na³nqui³-le⁴, cˀoa⁴ qui³tso²-le⁴: A³ cho¹na³nqui³-lao⁴³ xi²nquio⁴³ jo³ ca²xian³: Jnco³ tjo², cˀia⁴ li²coi³ ti⁴jcha⁴-ni³nao¹³. Nqui²jnco³ tjo², cˀia⁴ jcha⁴-nao¹³. 20Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Cjai¹nca³ to⁴chi¹ˀntao¹³, jo³ to⁴coan⁴va³-no³, to⁴nca³ je² son³ˀnte³ cjai¹nca³ to⁴tsjoa³ coan⁴-le⁴. Nta³ tsa² jon² va³ coan⁴-no³, je² cjoa⁴va³-no³ cjoa⁴tsjoa³ coan⁴. 21Cˀia⁴ nca³ jnco³ chjon⁴² vˀe¹ ˀnti¹, tse³ cjoa⁴ñˀain³ vˀe¹-ni³, nca⁴ je³ja³ˀai³ hora-le⁴. To⁴nca³ cˀia⁴ nca³ je³tsa³cˀe¹ ˀnti¹, li²coi³ ti⁴fa³ˀai³tsjen³-ni³le⁴ je² cjoa⁴ñˀain³ xi³ ca²fa³ˀa³to³. To⁴cjoa⁴tsjoa³ xi³ tjin¹-le⁴ nca³ jnco³ cho⁴ta⁴ ca²tsin³ i⁴ son³ˀnte³. 22Cˀoa⁴-ti⁴ jon² cjoa⁴qui²xi⁴ cjai¹nca³ va³-no³ ntˀai⁴-vi⁴, to⁴nca³ scoe³ nqui²jnco³cˀa²-no³. Cjai¹nca³ coan⁴tsjoa³-le⁴ ni⁴ma⁴-no³. Ni⁴ˀya³-jin² xi³ cjoa⁴ˀa²xin²-no³ cjoa⁴tsjoa³-no³. 23Cˀia⁴ ni⁴čhjin³-ve⁴ ni⁴jme³-jin² xi³ cho⁴na³nqui³-nao¹³. Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³, to⁴jme³-ni³ xi³ si⁴je¹-lao⁴³ Nˀai³-na¹ cao⁴ jan³ˀain¹-na⁴, je² tsjoa¹-no³. 24Sa³ˀnta³ ntˀai⁴-vi⁴ ni⁴jme³-jin² xi³ ti³ma³ni²jao¹³ cao⁴ jan³ˀain¹-na⁴. Ti⁴jao¹³, cˀoa⁴-sˀin² cˀoai⁴-no³, jme¹-ni³ nca³ cˀoa⁴-sˀin² cjoa⁴tsjoa³-no³ coan⁴tse³ya³-si¹ni³.

Jesús tso²: An³ je³qui³si³qui³njen³-le⁴ son³ˀnte³

25Je² en¹ tsa³cja³cao⁴-ni³no³ cao⁴ cjoa⁴xco¹son². Cjoa⁴ˀai¹ hora cˀia⁴ nca³ tsi² tsa² ti⁴cjoa²cao⁴-ni³no³ cao⁴ cjoa⁴xco¹son², to⁴nca³ si³cji³nčhˀoe¹tsen³-no³ xi³ tˀa³tsˀe⁴ Ni³na¹. 26Cˀia⁴ ni⁴čhjin³-ve⁴ si⁴jao¹³ cao⁴ jan³ˀain¹-na⁴. A³li²coi³ cˀoa⁴xin³-no³ nca³ an³ cˀoe³tsˀoa²³-le⁴ Nˀai³-na¹ xi³ tˀa³tsaon⁴³. 27Ti⁴je²-ni³ Nˀai³-na¹ tsjoa³que³-no³ nca⁴ je³coan³tsjoa³cha³-nao¹³, cˀoa⁴ je³coan³cjain¹-no³ nca³ ya⁴ ji²tjo⁴-nia³ Ni³na¹. 28Ji²tjo⁴-nia³ Nˀai³-na¹, ja²ˀa⁴sˀen³ son³ˀnte³. Cˀoe³jna²³-nia³ son³ˀnte³, cjoi¹con³-le⁴ Nˀai³-na¹. 29Cho⁴ta⁴-le⁴ qui³tso²-le⁴: Coe⁴-ni³ ntˀai⁴-vi⁴, ti³no²cjoa⁴tsain³. Ni⁴jme³-jin² cjoa⁴xco¹son² si³. 30Je³ˀyai³⁴-jin⁴ ntˀai⁴ nca³ ji³ ni¹³ xi³ ˀyai³ nca³yi³je³, li²coi³ ma³chjen¹-li² nca³ ˀya³ xi³ sco¹na³nqui³-li². Cˀoa⁴-sˀin² ma³cjain¹-na³jin⁴ nca³ ji²tjo⁴-ni³ Ni³na¹. 31Jesús qui³tso²-le⁴: A³ ma³cjain¹-no³ ntˀai⁴. 32Coe⁴-ni³ cjoa⁴ˀai¹ hora, cˀoa⁴ je³ja³ˀai³, cˀia⁴ nca³ jnco¹jnco¹³ tsao⁴va³-nio³ jña³ nca³ tsaon⁴³. To⁴ˀan³ si⁴cˀe¹jna³-nao¹³. To⁴nca³ li² to⁴ˀan³-jin² ti²jna⁴, nca⁴ je² Nˀai³-na¹ ti¹jna³cao⁴-na³. 33Je² cjoa⁴-vi⁴ je³qui³xin³-no³, jme¹-ni³ nca³ cao⁴ an³ coi⁴njen³nchˀan¹jin³-si¹ni³no³. I⁴ son³ˀnte³-vi⁴ cjoa⁴ñˀain³ chja⁴ˀao²³, to⁴nca³ ca²ta³ma³nˀion¹-ta³con²³. An³ je³qui³si³qui³njen³-le⁴ son³ˀnte³.