Search form

San Lucas 19

Zaqueo jnco³ cho⁴ta⁴ xi³ vˀe¹ña³ taon⁴va³sen³

1Jesús ja³ˀa³sˀen³ Jericó, ti¹fa³ˀa³to³. 2Coe⁴-ni³, jnco³ cho⁴ta⁴ xi³ Zaqueo ˀmi², xi³ nca³jco⁴-le⁴ cho⁴ta⁴ xi³ vˀe¹ña³ taon⁴va³sen³, cˀoa⁴ je²-vi⁴ cho⁴ta⁴nchi⁴-na¹ ni¹. 3Me³-le⁴ sco¹tsen³ ˀya³-ni³ve⁴ Jesús, to⁴nca³ li²coi³ coan³-le⁴ nca³ cjai¹nca³ nˀion¹ ncjin² ma³ cho⁴ta⁴, cˀoa⁴ ˀnti¹jtoa² cji³ nca³ je². 4Qui³to²ca³ ti¹tjon². Jnco³ ya¹ sicómoro qui³quin³ˀa², jme¹-ni³ nca³ sco¹tsen³-si¹ni³le⁴ Jesús, nca⁴ cˀoa⁴-sˀin² cjoa⁴ˀa³to³ ya⁴-ve⁴. 5Cˀia⁴ nca³ ya⁴² ji³nčhoa³ ja⁴ˀnte³ je²-ve⁴, Jesús qui³sco²tsen³ncˀa³, cˀoa⁴qui³tso²-le⁴: Zaqueo, ti²tjo⁴jen⁴ nti⁴toin⁴, nca⁴ ma³chjen¹-na³ coa²te⁴jna³ ni³ˀya³-li⁴ ntˀai⁴-vi⁴. 6Cˀia⁴ Zaqueo ji³tjo³jen³ nti⁴ton⁴, cˀoa⁴ qui³scoe¹tjao² cao⁴ cjoa⁴tsjoa³. 7Cˀia⁴ nca³ tsa³ve³ je²-vi⁴, nca³tsˀi³ qui³si³cˀa³xqui⁴, qui³tso² nca³ je³ja³ˀa³sˀen³ si¹cja¹ya³ ntˀia³-le⁴ jnco³ cho⁴ta⁴tsˀen⁴. 8Cˀia⁴ Zaqueo tsa³ca³sen²nto³, qui³tso²-le⁴ Nai³-na¹: Coe⁴-ni³ Señor, va³sen³ tso³jmi² xi³ tjin¹-na³ tsjoa³-le⁴ cho⁴ta⁴yo⁴ma⁴, cˀia⁴ tsa² tjin¹ xi³ tsa³cˀa³na⁴cha⁴-le⁴, tsjoa³-nca¹ni³le⁴ ño³ cˀa³. 9Cˀia⁴ Jesús qui³tso²-le⁴: Ntˀai⁴-vi⁴ ca²fa³ˀai³ xi³ cjoa⁴vi³tjo³ntjai² i⁴ ntˀia³-vi⁴, nca⁴ ˀnti¹-le⁴ Abraham ni¹ nta³ tsa² je². 10Nca⁴ je² ˀnti¹-le⁴ cho⁴ta⁴ ja³ˀai³ ca¹sjai³, cˀoa⁴ ja³ˀai³ cˀa³sje³ntjai² je² xi³ qui³cha³.

Xi³ tˀa³tsˀe⁴ je² te³ vi²xo⁴-ve⁴

11Cˀia⁴ nca³ cho⁴ta⁴ qui³nčhˀoe¹ je² cjoa⁴-vi⁴, Jesús qui³tso² jnco³ cjoa⁴xco¹son², nca⁴ Jesús ti¹jna³čhian³-le⁴ Jerusalén, cˀoa⁴ nca⁴ cho⁴ta⁴ qui³si³cja³ˀai³tsjen³ nca³ nti⁴ton⁴ coan⁴tsen³ je² cjoa⁴te¹xo³ma³-le⁴ Ni³na¹. 12Cˀoa⁴ qui³tso²-ˀni³: Jnco³ cho⁴ta⁴ xi³ ncˀa³ ti¹jna³ nca³ cˀoa⁴-sˀin² qui³tsin³, qui³ jnco³ ˀnte³ jña³ nca³ cjin³tˀa³, jme¹-ni³ nca³ scoe¹jnco³-ni³ cjoa⁴te¹xo³ma³ xi³ ti⁴tˀa³tsˀe⁴-ni³, cˀoa⁴ cjoi⁴nčhoa³ nqui²ntia³-ni³. 13Qui³nchja⁴-le⁴ te³ cho⁴ˀnta³ xi³ tsˀe⁴, qui³tsjoa³-le⁴ te³ vi²xo⁴. Cˀoa⁴qui³tso²-le⁴: Tˀiaon⁴³ cjoa⁴ma⁴ jo³-sˀin² tjen⁴ nca³ cjoe²ˀe⁴. 14To⁴nca³ cho⁴ta⁴na⁴xi⁴na³nta¹-le⁴ coan³jti³que³, cˀoa⁴ qui³si³ca³sen¹tjen⁴nqui³-le⁴ cho⁴ta⁴ xi³ xa¹ yˀa³, qui³tso²: Li²coi³ me³-na³jin⁴ nca³ je² coa⁴te²xo³ma³-na³jin⁴. 15Cˀia⁴ nca³ ja³ˀai³ nqui²ntia³-ni³ nca³ je³qui³scoe¹ cjoa⁴te¹xo³ma³-ve⁴, tsa³cˀe¹tˀain³ nca³ qui³no²cjoa⁴-le⁴ je² cho⁴ˀnta³ jña³-le⁴ xi³ qui³tsjoa³-le⁴ taon⁴, jme¹-ni³ nca³ jcha⁴-ni³le⁴ jña³-le⁴ cjoa⁴ma⁴ xi³ qui³sˀin³ nca³ jnco¹jnco¹. 16Ja³ˀai³ je² xi³ ti¹tjon², qui³tso²: Señor, je² taon⁴vi²xo⁴-li⁴ qui³si³qui³njen³son² te³ vi²xo⁴. 17Je² nai³-le⁴ qui³tso²-le⁴: Nta³ tjin¹-ni³, nta³-ni¹ cho⁴ˀnta³ ji³. Nta³ qui³ni²tjo³soin²³ cao⁴ xi³ choa³, te³ na⁴xi⁴na³nta¹ coa⁴te²xo³ma³-lai⁴. 18Ja³ˀai³ xi³ ma³jao²-ni³, qui³tso²: Señor, je² taon⁴vi²xo⁴-li⁴ qui³si³qui³njen³son² aon² vi²xo⁴. 19Cˀoa⁴-ti⁴ nai³-le⁴ qui³tso²-le⁴ je²-vi⁴: Cˀoa⁴²-ti⁴ ji³ aon² na⁴xi⁴na³nta¹ coa⁴te²xo³ma³-lai⁴. 20Ja³ˀai³ nqui²jnco³ xi³ qui³tso²: Señor, i⁴ ti¹jna³-li² je² taon⁴vi²xo⁴-li⁴ xi³ ti¹jna³tjao²-na³ ja⁴jin³ pa³ne²to⁴. 21Nca⁴ qui³tsa³cjon³-le²³ nca³ ji³ ni¹³ cho⁴ta⁴ cha³ti¹xai¹³, ji³ chjoai¹³ xi³ tsi² tsa² ji³ tsa³cˀe²jnai³, cˀoa⁴ vˀe²xcoi¹³ xi³ tsi² ji³ tsa³cˀe²ntjai²³. 22Cˀia⁴ je² qui³tso²-le⁴: Chˀao³ cho⁴ˀnta³ cjoain³ ji³, to⁴cao⁴ en¹-li⁴ mˀaon³ne²-le²³ je¹. Tsa² cˀoa⁴-sˀin² tsa³ˀya³-nai¹³ nca³ an³ cho⁴ta⁴cha³ti¹xa¹, nca³ cjoe¹ xi³ tsi² tsa² an³ tsa³cˀe³jna²³, cˀoa⁴ vˀe³xcoa¹³ je² xi³ tsi² tsa² an³ tsa³cˀe³ntje²³, 23a¹-ni³ nca³ tsi² tsa³cˀai²-si¹ni³ taon⁴-na⁴ ntˀia³ jña³ nca³ ma³tse³ taon⁴. Cˀia⁴ nca³ cjoe²ˀe⁴ tsa² cao⁴ ˀnti¹-le⁴ xi³ ca³son² si³je¹-le²³ tsa²cai³. 24Cˀia⁴ qui³tso²-le⁴ xi³ ya⁴ tjio¹: Chja⁴ˀa²xin²-lao⁴³ je² taon⁴vi²xo⁴-ve⁴, cˀoa⁴ je² tˀai²-lao⁴³ xi³ te³ vi²xo⁴ tjin¹-le⁴. 25Cˀia⁴ cho⁴ta⁴ qui³tso²-le⁴: Señor, je³tjin¹-le⁴ te³ vi²xo⁴. 26Cˀoa⁴xin³-no³ jon²-vi⁴, to⁴ˀya³-ni³ve⁴ xi³ tjin¹-le⁴, cˀoai⁴²-sa³le⁴, to⁴nca³ je² xi³ tsin²-le⁴, nta³ tsa² xi³ tjin¹-le⁴, tjo¹ˀa²-le⁴. 27Cˀoa⁴-ti⁴ je² xi³ co²ntran⁴-na⁴ xi³ tsi² coi³ me³-le⁴ nca³ an³ coa³te³xo³ma²³-le⁴ nca³ je², nčhoa¹cao⁴³ i⁴-vi⁴, ti⁴cha¹sion³ i⁴ nqui³xcoan³-vi⁴.

Jesús ja³ˀa³sˀen³ Jerusalén

(Mt. 21:1-11; Mr. 11:1-11; Jn. 12:12-19)

28Cˀia⁴ nca³ Jesús je³²cˀoa⁴qui³tso² je²-vi⁴, qui³ ti¹tjon², qui³mi³ ya⁴ Jerusalén. 29Cˀia⁴ nca³ ji³cho²čhian³-le⁴ ya⁴ Betfagé cao⁴ ya⁴ Betania, ya⁴ ni³nto³ xi³ Olivos ˀmi², qui³si³ca³sen¹ jao² cho⁴ta⁴-le⁴, 30qui³tso²: Ta⁴nquion¹³ na⁴xi⁴na³nta¹ˀnti¹ xi³ ti¹jna³tsen³, ya⁴ jña³ nca³ coi⁴tja¹sˀaon³ coan⁴sjai³jnco³-no³ bo¹rro¹ˀnti¹ xi³ ti¹jna³tˀa³nˀion¹, xi³ ni⁴-sa³ ˀya³-jin² cho⁴ta⁴ tsa³cˀe²jna³son²-le⁴. Chjo¹jnta¹ˀño¹³ nčhoa¹cao⁴-nao¹³. 31Tsa² ˀya³-ni³ve⁴ scoi¹na³nqui³-no³: A¹-ni³ nca³ ti³ma³chjo²jnta¹ˀño¹-si¹nio³, cˀoa⁴tˀin²-lao⁴³, je² Nai³-na¹ ma³chjen¹-le⁴. 32Cˀoa⁴ qui³ xi³ qui³sˀe³tˀain³-le⁴vi⁴, cˀoa⁴ coan³sjai³-le⁴ jo³ nca³ qui³tso²-le⁴. 33Cˀia⁴ nca³ ti¹cjen³jnta¹ˀño¹ bo¹rro¹-ve⁴, nai³-le⁴ qui³tso²-le⁴: A¹-ni³ nca³ ti³chjo³jnta¹ˀño¹-si¹nio³ bo¹rro¹ ˀnti¹-vi⁴. 34Cˀoa⁴ je² qui³tso²: Je² Nai³-na¹ ma³chjen¹-le⁴. 35Cˀia⁴ ja³ˀai³cao⁴-le⁴ Jesús, tsa³ca¹son²-le⁴ tso⁴nca⁴ bo¹rro¹ˀnti¹-ve⁴, qui³si³cˀe¹jna³son² Jesús. 36Cˀia⁴ nca³ ti¹fi² nca³ je², cho⁴ta⁴ tjio¹va¹nta³-le⁴ tso⁴nca⁴-le⁴ ya⁴³ ntia⁴². 37Cˀia⁴ nca³ je³ji³cho²čhian³ jña³ fi²jen³ ni³nto³ Olivos, nca³tsˀi³ cho⁴ta⁴ncjin² xi³ fi²tˀa³-le⁴ coan³tsjoa³-le⁴, tsa³cˀe¹tsˀia⁴ tsa³cˀa³sje³nta³ Ni³na¹, nˀion¹ tsa³cˀe¹jta³ xi³ tˀa³tsˀe⁴ nca³yi³je³ cjoa⁴xcon¹ xi³ tsa³ve³. 38Qui³tso²: Jo¹ to⁴nta³-le⁴ cho⁴ta⁴ti¹tjon² xi³ nčhoa¹ nca³jao³-le⁴ Nai³-na¹. Jña¹ chon³ ncˀa³jmi³, cˀoa⁴ cjoa⁴je³ya³ ya⁴ jña³ ncˀa³-ve⁴. 39Cˀia⁴ cˀa³ cho⁴ta⁴ fariseos xi³ ya⁴ tjen⁴jin³-le⁴ cho⁴ta⁴ncjin²-ve⁴ qui³tso²-le⁴: Maestro, ti⁴no²cjoa⁴ti³coai⁴ cho⁴ta⁴-li⁴. 40Cˀia⁴ Jesús qui³tso²-le⁴: Cˀoa⁴xin³-no³ nca³ tsa² je²-vi⁴ jyo¹ cˀoe¹yo³, la⁴jao⁴ squi³ˀntia¹-ni¹. 41Cˀia⁴ nca³ ji³cho²čhian³, cˀia⁴ tsa³ve³ na⁴xi⁴na³nta¹-ve⁴. Qui³squi³ˀnta¹ xi³ tˀa³tsˀe⁴. 42Qui³tso²: Tsa² cˀoa⁴-ti⁴ ji³ ˀyai³ ntˀai⁴-vi⁴ je² cjoa⁴ xi³ si¹qui³njen³nchˀan¹-li², to⁴nca³ ntˀai⁴-vi⁴ ti¹jna³ˀma³-le⁴ xcoin³. 43Cjoa⁴ˀai¹ne²-li² ni⁴čhjin³ nca³ je² co²ntran⁴-li⁴ cˀoe⁴²jna³-li² jnco³ nchˀoa¹ni³ˀnte³, cjoa⁴ˀai¹ca³tio²ntai³-li², cˀoa⁴ to⁴jña³-ni³ nca³qui³jnta² si⁴²cˀe²jna³ˀncho²nˀion¹-li². 44Cˀoa⁴ si⁴²qui³xo²jen³-li² tˀa³na³nqui³ cao⁴ je² xti³-li⁴ xi³ ya⁴ tjio¹cao⁴-li², li²coi³ ti⁴cˀoe¹yo³son²-ni³le⁴ xi¹ncjin¹ la⁴jao⁴ ya⁴ tsi⁴, nca⁴ tsi² tsa³ˀyai³ ni⁴čhjin³ nca³ Ni³na¹ ja³ˀai³ si¹xa³tˀa³-li².

Jesús qui³si³tsje³ yo⁴nco⁴

(Mt. 21:12-17; Mr. 11:15-19; Jn. 2:13-22)

45Cˀia⁴ Jesús ja³ˀa³sˀen³ yo⁴nco⁴. Tsa³cˀe¹tsˀia⁴cao⁴ nca³ qui³tsˀaon³sje³ nca³tsˀi³ xi³ tjio¹va³te¹na³ cao⁴ xi³ tjio¹va³tse³ ya⁴-ve⁴. 46Qui³tso²-le⁴: Tji¹tˀa³ xon⁴: Ntˀia³-na⁴ ntˀia³ xi³ sˀe³tsˀoa³ya³-ni¹, to⁴nca³ jon²-vi⁴ nqui³jao³-le⁴ che¹ qui³nˀiaon²³. 47Tsa³ca³co¹ya³ ni⁴čhjin³ nca³ nchaon³ ya⁴ yo⁴nco⁴, to⁴nca³ je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano cao⁴ cho⁴ta⁴ti¹tjon²-le⁴ na⁴xi⁴na³nta¹ va¹sjai³ jo³-sˀin² nca³ si⁴²cˀen³ Jesús. 48Cˀoa⁴ li²coi³ coan³sjai³-le⁴ jme³-ni³ve⁴ xi³ si⁴²cao⁴, nca⁴ nca³tsˀi³ na⁴xi⁴na³nta¹ cjai¹nca³ nta³ tjio¹nčhˀoe¹-le⁴.