Search form

Nengeulaula 10

Is Naahà ni Cornelio

1Ne ziyà te inged he Sisarya zuen etew he kenà Hudiyu he egngezanan ki Cornelio. Kepitan sikandin te kumpeniya te menge sundaru he Rumanu, sikan is migngezanan te kumpeniya te menge tig-Italya. 2Heini si Cornelio, ne metinumanen te sug̵ù te Megbevayà. Sikandin wey is tivuuk he pemilya zin, minsan kenè dan menge Hudiyu, ed-azap dan te Megbevayà. Dekelà is tavang din te menge egkengeayuayu he menge Hudiyu wey layun sikandin ed-ampù diyà te Megbevayà. 3Ne sengeandew te liwazè pa ebpenaug is andew zutun te mahapun, mibpaahà ki Cornelio is belinsug̵uen te Megbevayà. Ne nepurung memelmeleg̵i ni Cornelio haazà. Ne midseled dutun te valey haazà is belinsug̵uen ne migkeg̵iyan din si Cornelio te, “He Cornelio!” 4Ne si Cornelio, netengtengan din haazà is belinsug̵uen ne utew sikandin nahandek. Ne ke sikandin te, “Hengkey?” Ne migkag̵i haazà is belinsug̵uen te, “Midineg en te Megbevayà is ked-ampù nu ne neehè din is ketulanged nu ne kenè ke zin egkelipatan. 5Ne g̵untaan sug̵ua nu ziyà te inged he Hupi is ed-angey te etew he egngezanan ki Simon Pedro. 6Diyà sikandin te valey te etew he egngezanan daan ki Simon he mememaal te g̵elemiten puun te lundis. Diyà sikandin ed-ubpà te veyvey.” 7Ne zutun mid-awà haazà is belinsug̵uen te Megbevayà. Ne segugunà midtawag ni Cornelio is dezuwa he menge sulug̵uen din wey is sundaru he sevaha zutun te menge sinerig̵an din. Ne heini he sundaru, ed-azap daan te Megbevayà. 8Midtudtul kandan ni Cornelio is nehitavù kandin ne midsug̵ù din sikandan diyà te inged he Hupi.

Is Naahà ni Pedro

9Ne hein neudtu te ilis he andew zutun, diyè dan pa te zalan ne meg̵aan dan en ebpekeuma ziyà te Hupi. Ne te iyan haazà daan he timpu, si Pedro, mibpemenahik diyà te perenggayà he atep te valey he patag is atep din su ed-ampù te Megbevayà. 10Ne hein netegteg̵aad dutun, nevitil utew ne egkaan pezem. Ne te wazè pa melutù is sinuba zan, duen impaahà te Megbevayà ki Pedro. 11Neehè din is langit he nepuwasan ne zuen midteyuntun he iring te layag he utew meluag. Midhiketan is heepat he kilid din ne midteyuntun. 12Ne zutun te seled is langun he menge kelasi te keranapranap, iring te menge langgam wey menge uled wey menge tagbis. 13Ne zuen migkag̵i ziyà te ki Pedro te, “He Pedro, lapè ka wey ka mekekaan.” 14Ne midtavak si Pedro te, “Kenà a, Nengazen, su wazè e pa mekekaan te minsan hengkey he meremerik he iring keniyan su indawey te kesug̵uan.” 15Ne mid-umanan keg̵iyi sikandin te, “Is migkag̵i te Megbevayà he meupiya, kenè nu keg̵iya he meremerik.” 16Ne ketetelu en mesublì haazà is langun he menge lalag diyà te ki Pedro, ne zutun, in-ulì diyà te langit haazà is midteyuntun.

17Ne te kemulu pa ed-is-isipa ni Pedro ke hengkey is kehulug̵an dutun te neehè din, nekeuma zutun te inged kes menge sug̵ù ni Cornelio. In-insè dan ke hendei is baley ni Simon. Ne hein diyè dan en te g̵awas uvey te g̵emawan, 18mibpenelehuzen dan ne mid-insè dan te, “Duen be meg̵eliyug niw he egngezanan ki Simon Pedro?” 19Ne si Pedro zutun, kemulu zin pa ed-isipa ke hengkey is ibpesavut te neehè din. Ne zutun migkeg̵iyan sikandin te Wag̵as he Mulin-ulin te, “Duen tetelu he etew he ebpen-ahà kenikew. 20Gaanggaan ka penaug ne kenè ka melenew he eduma kandan su iyan a midsug̵ù kandan.” 21Ne mibpenaug si Pedro ne migkeg̵iyan din sikandan te, “Iyan a ebpen-ahaan niw. Hengkey is tuyù niw kedì?” 22Ne migkag̵i zan te, “Impehendini key ni Kepitan Cornelio. Metazeng sikandin he etew. Ed-azap sikandin te Megbevayà, ne telehuzen daan sikandin te langun he menge Hudiyu. Migkeg̵iyan sikandin te velinsug̵uen te Megbevayà te, ‘Ipaangey nu si Simon Pedro wey nu mezineg is ibpesavut din,’ ” ke sikandan.

23Ne impeseled dan ni Pedro ne impehizeg̵è din sikandan te sengekezukileman.

Hein Diyà si Pedro te Valey ni Cornelio

Ne te nepawà dutun, miduma si Pedro kandan. Ne zuen daan miduma he menge tumutuu he tigHupi. 24Ne nepawè pa zutun, ne human dan mekeuma ziyà te Sisarya. Ebpeebuten sikandan ni Cornelio ne midtig̵um din is kezuzumahi zin wey menge emig̵u zin. 25Ne hein edseled en si Pedro zutun te valey, midsinug̵ung si Cornelio ne midluhud kandin su ed-azap. 26Iyan, impehitindeg sikandin ni Pedro he egkag̵i te, “Hitindeg ka su etew e zà daan iring kenikew.” 27Ne mibpekibitiyara si Pedro kandin dutun te edseled dan en. Ne zutun naahà ni Pedro is mezakel he nengetig̵um dutun te valey. 28Ne migkeg̵iyan din sikandan te, “Netuenan niw en he sikami is menge Hudiyu, indawey kenami te tuluuwen dey is kebpekiduma wey kebpenumbaley ziyà te iring keniyu te kenà menge Hudiyu. Iyan,” ke si Pedro, “impesavut kedì te Megbevayà he kenè din egkesuatan he isipa ku he meremerik is minsan hentei su edewaten din is langun. 29Ne tenged dutun, kayi te mibpeveyaan a keniyu, ne wazà a melenew he edhendini. Ne g̵untaan tudtula niw ke hengkey is igkinehenglana niw kedì.”

30Ne midtavak si Cornelio te, “Heepat en he andew g̵untaan, te iring kayi he uras dini a te valey te liwazè en ebpenaug is andew su ed-ampù a. Netekewtekew a te mibpaahà kedì is maama he ebpenganlag is bisti zin. 31Ke sikandin te, ‘Cornelio, midineg en te Megbevayà is ked-ampù nu, ne wazè din daan melipati is tavang nu te menge etew. 32Ne g̵untaan ipaangey nu te menge sulug̵uen nu ziyà te inged he Hupi is etew he egngezanan ki Simon Pedro. Diyà ed-ubpà te valey te etew he Simon daan is ngazan din he mememaal te g̵elemiten puun te lundis. Diyà te veyvey is baley zin.’ 33Umba,” ke si Cornelio, “segugunè ku sikew impeveyai ne selamat utew su nekeuma ka kayi. Ne g̵untaan nengetig̵um key en dini te etuvangan te Megbevayà su ebpemineg̵en dey is minsan hengkey he insug̵ù din kenikew he ipesavut kenami.”

34Ne zutun migkag̵i si Pedro te, “Netuenan ku en he venar iyan he wazà ibpelavi te Megbevayà te minsan hentei, 35su is meg̵inged te minsan hengkey he inged dini te kelibutan, emun edtehuzen din is Megbevayà wey metazeng is ulaula zin, edewaten sikandin te Megbevayà. 36Netuenan niw en is Meupiya he Tudtulanen he impesavut te Megbevayà kenami te menge kevuwazan ni Israyil su pinaag̵i ki Jesu Kristu he iyan Nengazen te langun he menge etew, impesavut din he egkeawà is pauk te Megbevayà kenitew. 37Ne netuenan niw zaan kes neulaula ziyà te tivuuk he tanà te menge Hudiyu, iyan, dutun mebpuun te prubinsya he Geliliya, dutun te timpu he neipus ni Juan is kebpesavut din te kebewtismu. 38Si Jesus he tigNeserit, mibpeulinan sikandin te Megbevayà te Wag̵as he Mulin-ulin ne mibeg̵ayan sikandin te zekelà he g̵ehem. Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas. Neveelan din heini su kenà edsuwey kandin is Megbevayà. 39Ne sikami, ebpekepenistig̵us key kayi su neehè dey is langun he mibeelan din diyà te langun he menge inged te menge Hudiyu wey ziyà daan te Hiruselim. Ebpekepenistig̵us key zaan he midhimetayan sikandin te menge Hudiyu pinaag̵i te kedrensanga kandin te krus. 40Iyan, mibanhew te Megbevayà seled te tetelu he andew ne impaahà kenami te Megbevayà he neuyag en. 41Te nevanhew en sikandin wazà pudu mekeahà kandin is menge etew, kekenà, sikami zà is menge tistig̵us he zaan he mibpilì te Megbevayà. Sikami, nekekaan key wey nekeinum key zuma kandin hein nevanhew en sikandin. 42Ne insug̵ù din kenami he ipesavut dey te menge etew is Lalag te Megbevayà. Insug̵ù daan ni Jesus he ibpesavut dey he iyan sikandin sikan is intezù te Megbevayà he edsusi keuzemà te menge nengeulaula te menge etew he uuyag pa wey minsan is nemematey en. 43Netagnà si Jesu Kristu te langun he ebpemeneuven dengan te Megbevayà ne migkag̵i zan he pinaag̵i te g̵ehem te ngazan din, is langun he edsarig kandin, ebpeseyluwen din sikandan te menge mezaat he ulaula zan.”

44Ne te kemulu pa egkag̵i si Pedro zutun, mibulusan te Wag̵as he Mulin-ulin is langun he etew he ebpemineg dutun. 45Is menge tumutuu he Hudiyu he nemekezuma ki Pedro, utew zan nengeinuinu su is Megbevayà, mibpeulinan din daan te Wag̵as he Mulin-ulin is minsan menge etew he kenà menge Hudiyu. 46Su is menge Hudiyu zutun, nezineg dan haazà is menge kenà Hudiyu he ebpendalig te Megbevayà wey netekewtekew zan pintezi te menge kineg̵iyan he wazè dan dutun hanew ke hengkey haazà is egkeg̵iyen dan. 47Ne zutun migkag̵i si Pedro te, “Heini is menge etew he kenà menge Hudiyu, mibeg̵ayan daan sikandan te Wag̵as he Mulin-ulin iring te sikitew is menge Hudiyu. Ne tenged kayi kenà egkehimu he kenà sikandan egkebewtismuwan.” 48Ne insug̵ù ni Pedro he bewtismuwi sikandan wey metueni he nekidsevaha sikandan ki Jesu Kristu. Ne hein nepasad haazà, si Pedro, midhengyuan eni Cornelio he med-ubpè dè pa ziyà te kandan seled te egkepipira he andew.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index