Search form

Nengeulaula 11

Is Tudtul ni Pablo Ziyà te Hiruselim

1Sikan is menge epustul ziyà te prubinsya he Hudiya wey is menge zuma zan he tumutuu he menge Hudiyu, nezineg dan he midawat te menge kenà Hudiyu is Lalag te Megbevayà he impesavut kandan. 2Ne hein mid-ulì si Pedro ziyà te Hiruselim, duen midsawey kandin he menge tumutuu he Hudiyu. 3Ne ke sikandan te, “Maan is sikew he Hudiyu, nenumbaley ka ziyà te menge etew he kenà menge Hudiyu he wazà mesirkunsidar ne mibpekidtug̵en ka zaan kandan?” 4Ne midtudtul ni Pedro is langun puun pa te nehuna he nehitavù kandin.

5Ke sikandin te, “Diyà a te inged he Hupi is ed-ampù ne zuen impaahà kediey te Megbevayà. Neehè ku is midteyuntun he ebpuun te langit he iring te zekelà he layag he midhiketan is heepat he kilid din ne neketanà diyà te uvey ku. 6Ne midtengtengan ku ne neehè ku is tag̵ù din he menge keranapranap, iring te menge langgam, menge uled, wey menge tagbis. 7Ne zutun nezineg ku is egkag̵i te, ‘He Pedro, lapè ka wey ka mekekaan.’ 8Ne midtavak a te, ‘Kenà a, Nengazen, su wazè e pa mekekaan te minsan hengkey iring keniyan te meremerik he indawey te kesug̵uan.’ 9Ne ziyà te langit nezineg ku en maan is egkag̵i, ke sikandin te, ‘Is migkag̵i te Megbevayà he meupiya, kenè nu keg̵iya he meremerik.’ 10Ne hein ketetelu en mesublì haazà is langun he menge lalag, in-ulì diyà te langit haazà is midteyuntun. 11Ne zutun duen nemekeuma ziyà te valey he neubpaan ku he tetelu he etew he kenà menge Hudiyu he midsug̵ù diyà te kedì he ebpuun te inged he Sisarya. 12Ne migkeg̵iyan a te Wag̵as he Mulin-ulin he ibpezume e zin dutun te menge etew ne kenà a melenew te keduma kandan. Heini zaan is heenem he tumutuu he menge zuma tew he Hudiyu is miduma kedì diyà te Sisarya. Ne midseled key ziyà te valey ni Cornelio. 13Ne midtudtulan key ni Cornelio he zuen belinsug̵uen te Megbevayà he mibpaahà kandin diyà te valey zin. Ne migkag̵i kandin haazà is belinsug̵uen te, ‘Sug̵ua nu ziyà te inged he Hupi is ed-angey te etew he egngezanan ki Simon Pedro. 14Sikew wey is pemilya nu, ibpesavut din keniyu is paag̵i he iyan igkelibri niw te silut te Megbevayà keniyu.’ Iyan heini tudtul ni Cornelio,” ke si Pedro. 15Ne ke si Pedro te, “Hein edweliyan ku en sikandan, dutundutun mibulusan sikandan ne mid-ulinan sikandan te Wag̵as he Mulin-ulin iring kenitew te menge Hudiyu zutun te aney kiw en ulini. 16Ne zutun netenuzan ku is lalag te Nengazen tew he si Jesus he ke sikandin te, ‘Wahig is imbewtismu ni Juan te menge etew, iyan, iyan kebewtismuwi keniyu is edlumunan kew te Wag̵as he Mulin-ulin.’ 17Ne emun mibpeulinan sikandan te Megbevayà te Wag̵as he Mulin-ulin iring dutun te kebpeulini zin dengan kenitew te kedtuu tew te Nengazen he si Jesu Kristu, kenà egkehimu he kenè ku edewaten is kebpeulini zin kandan te kenà menge Hudiyu.” 18Ne hein nezineg te menge tumutuu he Hudiyu haazà is ketezengan ni Pedro, mid-engkezan dan is kedsewaya zan kandin ne midalig dan is Megbevayà su ke sikandan te, “Mibulusan en bes te Megbevayà is menge kenà Hudiyu wey zan daan meiniyug̵i is mezaat he ulaula wey zan mezawat is untung he wazà pidtemanan.”

Is Menge Tumutuu Ziyà te Entiyukya

19Ne zuen menge tumutuu he nememelag̵uy tenged te menge kebpesipelahi zutun te menge edsarig ki Jesus hein mibunù si Esteban. Ne nemekedsusuwey zan pehendiyà te tanà he Pinisi wey te pulu ziyà te zag̵at he egngezanan te Sipru wey ziyè dan daan te inged he Entiyukya. Ne mibpenudtul zan is Lalag te Megbevayà, iyan, diyè dà te menge Hudiyu. 20Ne tigSipru wey tigSirini is duma zutun te nemelag̵uy. Ne hein nekeuma zan diyà te Entiyukya, mibpenudtulan dan daan is menge kenà Hudiyu; ne impesavut dan is keag̵i te Nengazen tew he si Jesus. 21Ne midtevangan te Megbevayà sikandan is mibpenudtul su utew mezakel he etew is neketuu te Nengazen tew he si Jesus ne midtuman dan is menge sug̵ù din.

22Heini is neulaula, nezineg te menge tumutuu he ziyà te Hiruselim ne midsug̵ù dan si Bernabe ziyà te Entiyukya. 23Ne hein nekeuma si Bernabe, neehè din he utew zekelà is tuvad te Megbevayà te menge etew, ne heini, utew zin ingkelipey. Inhangyù din kandan he hemeni zan wey heg̵eta zan is kedtuu zan te Nengazen. 24Ne si Bernabe, meupiya is ulaula zin, ne meheg̵et is ked-ulini kandin te Wag̵as he Mulin-ulin ne meheg̵et daan is kedtuu zin te Megbevayà, ne mezakel zutun is nemeketuu te Nengazen tew he si Jesus.

25Ne midhendiyà si Bernabe te Tarsu su ebpen-ahaan din si Seulu. 26Ne hein neturedu zin, miduma zin diyà te Entiyukya. Ne seled te sengetuig, diyè dan is dezuwa med-amur te menge tumutuu ziyà te Entiyukya ne mezakel is mibpemenurù dan. Ne ziyà te Entiyukya, sikan is menge sumusundan, aney en gerari he menge Kristiyanus.

27Ne zutun he timpu, duen ebpuun diyà te Hiruselim he menge ebpeneuven te Megbevayà he midtupang su edhendiyè dan te inged he Entiyukya. 28Is sevaha zutun he migngezanan ki Egebu, ne mid-ulinan te Megbevayà, ne midhitindeg sikandin ne midtagnè din is utew zekelà he vitil he ebpekeeneb te tivuuk he kelibutan. (Ne nehitavù heini hein iyan pa hadì diyà te Ruma si Claudio.) 29Ne tenged dutun neuyun is menge sumusundan diyà te Entiyukya he ed-emutè dan te selapì. Ne mebeg̵ey is kada sevaha sumalà is egkehimu zin wey zan metevangi is menge egkengeayuayu he menge zuma zan he menge tumutuu ziyà te prubinsya he Hudiya. 30Ne mid-ulaula zan heini ne midsug̵ù dan si Bernabe wey si Seulu he iyan ibpahated te selapì diyà te menge ebmeg̵urangen te menge tumutuu ziyà te Hiruselim.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index