Search form

Nengeulaula 12

Is Kebpeg̵uwaa ki Pedro Ziyà te Pirisuwan

1Ne zutun he timpu, ebpesipelahan ni Hadì Hirudis is duma he menge tumutuu ki Jesus. 2Si Santiago, sikan is suled ni Juan, impetibas ni Hirudis su wey mebpatey. 3Ne hein netuenan ni Hirudis he utew ingkesuat te menge Hudiyu is kedhimetayi ki Santiago, impezakep din daan si Pedro. (Nehitavù heini hein Pista te Supas he Wazè Din Tapey.) 4Ne zutun te kegkezakep ki Pedro, impepirisu sikandin ni Hirudis ne impalad din diyà te heepat he gurupu he menge sundaru he iyan eguwardya kandin. Ne tig-epat he sundaru is kada gurupu. Neisip ni Hirudis he emun egkeipus haazà is pista he egngezanan te Pista te Kedlevayi, ed-imbistigahan din si Pedro ziyà te etuvangan te menge Hudiyu. 5Ne tenged dutun diyà si Pedro te seled te pirisuwan he ebentayan dutun te menge sundaru. Ne nenigudu med-ampù is menge tumutuu su edhengyuen dan diyà te Megbevayà he tevangi zin si Pedro.

6Ne zutun te kezukileman he emun egkepawà dutun ibpeetuvang ni Hadì Hirudis si Pedro te menge etew, ne si Pedro, diyà ipehizeg̵à te teliwazà te zezuwa he sundaru. Midhiketan sikandin te zezuwa he kedina ne zuen daan menge sundaru he impevantey zutun te g̵emawan te pirisuwan. 7Ne netekewtekew te zuen mibpaahà kandin he velinsug̵uen te Nengazen ne zuen daan neketayew zutun te seled te pirisuwan. Ne migewezan dutun te velinsug̵uen si Pedro ziyà te kilid ne migunggel zin ne mibpukew zin. Ke sikandin te, “Enew ka gaanggaan.” Ne zutundutun naawà is menge kedina ziyà te menge velad ni Pedro. 8Ne migkeg̵iyan sikandin te velinsug̵uen te, “Bevakes ka wey sesepatus ka.” Ne mibpemineg si Pedro. Ne migkag̵i en maan haazà is belinsug̵uen te, “Samput ka ne zuma ka kedì.” 9Ne midsunud si Pedro kandin pehendiyà te g̵awas, iyan, wazè din metueni he kenè din teg̵einep dà haazà is kedtevangi kandin dutun te velinsug̵uen. 10Ne midlevayan dan is aney en he guwardya zutun te ibayè dan ne human is ikezuwa, ne te kebpekeuma zan dutun te lekeb he putew te pultahan he ziyà ipesinaru te inged, netekewtekew mepuwas dà duen haazà te wazà mibpuwas duen ne migawas dan dutun. Ne midlaus dan is dezuwa, ne te kegketegteg̵aad te kedhipanew zan ne nahanew haazà is belinsug̵uen, ne netag̵ak si Pedro zutun te sebsevaha zin.

11Ne human mesavut ni Pedro he kenè bes teg̵einep dà haazà ne ke sikandin te, “Tutuu ves iyan he midsug̵ù te Nengazen is belinsug̵uen din ne midlibri e zin wey kenà a mekeizi te g̵ehem ni Hirudis. Nelibri ad guntaan te langun he mezaat he ed-ul-ulahan kedì he ebperetengen pezem te tivuuk he kehudiyuwan.”

12Ne zutun te kegkesevuta zin kayi te langun, midlaus diyà te valey ni Maria, sikan is iney ni Juan he iyan kes Juan he ed-umawen daan ki Marcos. Ne zutun te valey mezakel is nengetig̵um he menge tumutuu su ed-ampù dan diyà te Megbevayà. 13Ne midteg̵uktuk ni Pedro is pultahan te ibpeg̵unselang dutun te lama. Ne zuen dutun sulug̵uen he vahi he egngezanan ki Ruda ne mid-ehè din su edsusiyen din ke hentei. 14Ne nekilala zin is lag̵eng ni Pedro, iyan, tenged te utew zin kegkesuat te kebpekeuma ni Pedro, wazè din mepuwasi haazà su mibpelelag̵uy nasì is edlikù su ebpenudtulan din is menge zuma zin te nekeuma en si Pedro ne zutun en te g̵awas. 15Ne migkag̵i is menge zuma zin te, “Ebuneg̵en ka!” Iyan, edteg̵el si Ruda te, “Kenà, iyan en si Pedro.” Ne ke sikandan te, “Kenà iyan si Pedro, kekenà, iyan sikan is belinsug̵uen te Megbevayà he ebantey kandin.” 16Ne wazà med-engked si Pedro he edteg̵uktuk. Ne hein mibpuwasan dan, utew zan nengeinuinu su si Pedro en iyan haazà. 17Ne in-uyew zin kandan he kenè dan megurub ne mibpenudtul zin kandan is paag̵i te Nengazen te kedlibriya kandin puun diyà te pirisuwan. Ne migkeg̵iyan din sikandan te, “Tudtuli niw zaan si Santiago wey is menge zuma he suled tew.” Ne mid-awà sikandin dutun, ne midhendiyà te sengeinged.

18Ne hein nepawà dutun, utew nengeliveg is menge sundaru ziyà te pirisuwan su hendei vuwa si Pedro? 19Impepengahà ni Hirudis, iyan, wazè dan sikandin maahà. Ne impepengimbistiga zin sikan is menge guwardya ne impepenhimetayan din sikandan.

Ne zutun mid-awà si Hirudis diyà te prubinsya he Hudiya ne midtupang diyà te Sisarya ne ziyà med-ubpà.

Is Kebpatey ni Hirudis

20Ne zutun he timpu nepeukan ni Hadì Hirudis is menge meg̵inged diyà te menge inged he Tiru wey Sidun. Mibpetavang dan ki Belastu he sinerig̵an ni Hirudis he edumala te turug̵an din. Ne nengetig̵um dan su edhendiyè dan te ki Hirudis su edhengyuan dan he maawà is pauk din kandan. Umba mid-ulaula zan haazà su ziyè dan dà ebpekekuwa te keuyag̵an te inged dutun te hadì.

21Ne zutun te andew he midtelaan ni Hadì Hirudis, mid-etuvang dan kandin. Insun-ud ni Hirudis is bisti zin te kedhadì ne mibpinuu ziyà te pinuuwè din te kedhadì ne midlelag̵an din sikandan. 22Ne nengelipey zutun is menge etew. Mibpengulahì dan is egkag̵i te, “Kenà etew zà duen is egkag̵i, kekenà, diwata en.” 23Ne segugunà midlatun diyà te lawa zin is daru he insavuk te velinsug̵uen te Nengazen su ingkesuat ni Hirudis haazà is ked-ezapa kandin te menge etew, ne wazè din iyan ipaazap is Megbevayà. Ne midtegkayan is lawa zin ne wazà utew meug̵et ne minatey.

24Iyan, mid-iseg is kedsengyawa te menge tumutuu te Lalag te Megbevayà, ne mibmezakel utew is menge tumutuu zutun. 25Ne mid-ulì si Bernabe wey si Seulu is ebpuun diyà te inged he Hiruselim hein neipus dan is mibpeveelan kandan, ne miduma zan daan si Juan, sikan is ed-umawen ki Marcos.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index