Search form

Nengeulaula 16

Si Pablo, si Silas wey si Timoteo

1Ne midlaus ensi Pablo ziyà te menge inged he Dirbi wey Listera. Ne zuen sumusundan ni Jesus he meg̵inged dutun he egngezanan ki Timoteo. Is iney zin, ne Hudiyu he tumutuu zaan, asal is amey zin ne Gerisyahanen. 2Sumalà is lalag te menge tumutuu ziyà te Listera wey Ikunya, utew meupiya is ulaula ni Timoteo. 3Egkesuat si Pablo he edumahan din si Timoteo ne tenged dutun midsirkunsidar zin. Iyan insirkunsidara zin ki Timoteo su wey kenà meepesi si Timoteo te menge Hudiyu he ziyà te menge inged he ibayè dan, su is langun he menge Hudiyu zutun, netuenan dan he Gerisyahanen is amey ni Timoteo. 4Ne migenat dan en maan ne zutun te langun he menge inged he imbayè dan, impesavut dan diyà te kenà Hudiyu he menge tumutuu zutun is insug̵ù te menge epustul wey ebmeg̵urangen diyà te Hiruselim, ne migkag̵i zan kandan he kinahanglan he iyan haazà bentayi zan. 5Ne tenged dutun neheg̵et is kedtuu te menge tumutuu ne mid-iseg te kada andew is kezakel te nemeketuu.

Is Nelewasan ni Pablo Ziyà te Truwas

6Ne ziyè dan mekevayà te menge inged he ziyà te Perigya wey Gelasya su wazà sikandan tug̵uti te Wag̵as he Mulin-ulin he ibpesavut dan is Lalag te Megbevayà diyà te prubinsya he Asya. 7Ne hein nekeuma zan diyà te netemanan te prubinsya he Misya, edlaus dan pezem diyà te prubinsya he Bitinya, iyan, wazà daan itug̵ut kandan te Wag̵as he Mulin-ulin he ebpuun diyà te ki Jesus. 8Ne tenged dutun diyè dan mekevayà te Misya ne midtupang dan ne nekeuma zan diyà te inged he Truwas he ziyà te veyvey te zag̵at. 9Ne si Pablo, te mezukilem dutun, duen impaahà kandin te Megbevayà. Neehè din is iring te etew he tigMesidunya he edhangyù kandin te, “Laus kew en dini te Mesidunya su wey key keniyu metevangi.” 10Ne zutun dà te neehè din en heini, nen-ehè key te paag̵i wey key mekelaus diyà te Mesidunya su nesavut dey he intuvad kenami is kedsengyawa te Meupiya he Tudtulanen diyà te menge tigMesidunya.

Is Kebpeketuu ni Lydia Ziyà te Pilipus

11Mid-untud key te barku ziyà te Truwas ne midhendiyè key te pulu he Semutrasya; ne zutun te ilis he andew midlaus key ne nekezunggù key ziyà te inged he Niyepulis. 12Ne midrenè key zutun ne mid-uzahik key ne nekeuma key ziyà te inged he Pilipus he ziyà te aney en he distritu te prubinsya he Mesidunya. Ne zutun te inged he Pilipus, ne mezakel is menge Rumanu he umuuliey. Ne nepipira key he andew zutun te inged he Pilipus. 13Ne zutun te Sebadu he iyan Andew te Kedhimeley, mid-awè key ziyà te inged ne midhendiyè key te veyvey te wahig su ed-ahaan dey ke zuen be zutun edtig̵uman te menge Hudiyu he ed-empuan dan te Megbevayà. Ne zuen menge vahi he nengetig̵um dutun, ne mibpinuu key ne mibpekidlalag key kandan. 14Is sevaha zutun te menge vahi, ne egngezanan ki Lydia he tigTiyetira he zutun ed-ubpà te inged he Pilipus. Iyan petig̵ayun din is ebpemelegyà te manggad he merudtem. Edsimba sikandin te Megbevayà. Midtuvazan sikandin te Megbevayà wey mekezawat te ibpesavut ni Pablo. 15Mibpebewtismu sikandin wey is menge emurè din dutun te valey zin. Ne migkeg̵iyan key zin te, “Emun ed-isipen a keniyu he tutuu is kedtuu ku te Nengazen, diyè kew pemenahik te valey ku.” Ne wazè din mehimuwa zutun he wazè key mekezuma kandin.

Is Kegkepirisu ni Pablo wey ni Silas Diyà te Pilipus

16Sengeandew zutun te edhendiyè key te elempuey zan, midsinug̵ung kenami is bahi he uripen he mid-ulinan te mezaat he mulin-ulin he ibpeketagnè din. Ne zekelà is selapì he nekuwa te teg̵iuripen kandin pinaag̵i te kebpenagnè din. 17Ne miduma kenami ki Pablo haazà is bahi he ebpengulahì te, “Heini is menge etew, menge sulug̵uen sikandan te lavew he Megbevayà. Ibpesavut dan keniyu is paag̵i wey kew melibri te idsilut din.” 18Ne kada andew zutun iyan en haazà ed-ul-ulahan din. Ne te malù neug̵et, si Pablo, kenè en ebpekeantus ne midlilingey ne migkeg̵iyan din haazà is mezaat he mulin-ulin te, “Pinaag̵i te g̵ehem te ngazan ni Jesu Kristu, egkeg̵iyan ku sikew he med-awè ka keniyan te vahi!” Ne zutundutun mid-ewaan haazà is bahi te mezaat he mulin-ulin. 19Ne is menge teg̵iuripen dutun te vahi, hein netuenan dan he naawà is kegketig̵ayun dan pinaag̵i zutun te vahi, ne migewazan dan si Pablo wey si Silas ne miguyud dan pehendiyà te menge punuan te inged he zutun te pelasa. 20Ne hein diyè dan en, impeetuvang dan te menge upisyal he Rumanu ne ke sikandan te, “Heini he menge etew, menge Hudiyu sikandan ne ebaal zan te samuk kayi te inged tew. 21Ibpenurù dan is menge vetasan he supak te velaud tew. Ne sikitew is menge Rumanu, kenè kiw mulà ebpekezawat wey ebpeketuman te ibpenurù dan he vetasan.” 22Ne zutun midtistig̵usan haazà te mezakel he menge etew is kedsumbunga zan ki Pablo wey ki Silas; ne haazà is menge upisyal, mibpemindas dan is menge ugelingen ni Pablo wey ni Silas su edlevasan dan ne insug̵ù dan he vug̵ela haazà is dezuwa. 23Ne hein nepurung en mevug̵el si Pablo wey si Silas, mibpirisu sikandan. Sikan is ebantey zutun te pirisuwan, midteleenan dan he purungi zin bentayi haazà is dezuwa. 24Ne zutun in-ahuk din sikandan diyà te rug̵u he ziyà te teliwazà te pirisuwan, ne is menge paa zan, midlipit te petungà.

25Ne hein metaneb en is kezukileman, mid-ampù si Pablo wey si Silas wey migkanta zan is edalig te Megbevayà, ne ebpememineg kandan is menge zuma zan he pirisu. 26Ne zutun midtik-ew medlinug te utew mezesen ne nepurung mehuyung haazà is pirisuwan. Ne segugunà nepuwas is menge lekeb dutun te pirisuwan ne nengetangtang is menge pusas te langun he menge pirisu. 27Ne zutun nepukew sikan is ebantey zutun te pirisuwan. Ne hein neehè din he nengepuwas is menge lekeb te pirisuwan, kunaan din ke nemekepelag̵uy is menge pirisu ne midhulavut din is sundang din. Edsundangen din en pezem is lawa zin su edhiket. 28Ne zutun mibensag si Pablo te, “Kenè nu pelii is lawa nu su heini key zed te seled ne wazà mibpelag̵uy kenami.” 29Ne haazà is ebantey, midsug̵ù he uwita is sulù ne migaanggaan medseled ne midluhud is egkerkeren diyà te etuvangan ni Pablo wey ni Silas. 30Ne miduma zin sikandan diyà te g̵awas ne ke sikandin te, “Hengkey is ed-ul-ulahan ku wey a melibri te silut te Megbevayà?” 31Ne midtavak dan te, “Tuu ka te Nengazen he si Jesus ne egkelibri ka, ne egkelibri zaan is pemilya nu ke edtuu zan.” 32Ne sikandin wey is menge emurè din diyà te valey zin, impesavut kandan eni Pablo is Lalag te Nengazen. 33Ne zutun te metaneb pa is kezukileman, migkuwa si Pablo wey si Silas dutun te ebantey te pirisuwan, ne mibpenlùluan din is menge palì dan ne zutun mibewtismuwan dan sikandin wey is tivuuk he pemilya zin. 34Impepemenahik din si Pablo wey si Silas diyà te valey zin ne impekaan din. Ne sikandin wey haazà is pemilya zin, utew zan nengelipey su neketuu zan en te Megbevayà.

35Ne hein nepawà dutun, midsug̵ù te menge upisyal he menge Rumanu is menge pulis. Ke sikandan te, “Ipaawè niw en heeyan he menge etew.” 36Ne zutun midtudtul haazà ki Pablo te ebantey te pirisuwan. Ke sikandin te, “Insug̵ù te menge upisyal he Rumanu he ibpaawà kew en ki Silas. Ne ebpekeawà kew en kun asal kinahanglan he wazà samuk.” 37Ne zutun, wazà dewata ni Pablo ne migkag̵i sikandin diyà te menge pulis te, “Kenà egkehimu su ed-inged key he zizalem te velaud te inged he Ruma ne nesupak dan is belaud te menge Rumanu su wazè key zan imbistigaha ne wazè key mekesupak te velaud, ne impevug̵el key zan diyà te etuvangan te langun he menge etew ne mibpirisu key zan. Ne g̵untaan id-eles-eles key keniyu ibpaawa! Kenà egkehimu su kinahanglan he iyan ebpaawà kenami sikan is menge egalen niw he upisyal he Rumanu.” 38Ne haazà is lalag ni Pablo, midtudtul zutun te pulis diyà te menge upisyal, ne hein netuenan dan he sakup bes si Pablo wey si Silas te inged he Ruma, nengehandek dan. 39Ne tenged dutun midhendiyè dan ne mibuyù dan te pesaylu. Ne miduma zan sikandan diyà te g̵awas te pirisuwan ne midhengyuan dan he med-awè dan dutun te inged. 40Ne mid-awà si Pablo wey si Silas dutun te pirisuwan ne midhendiyè dan te valey ni Lydia. Midlelag̵an dan is menge tumutuu ne midsembag̵an dan wey meheg̵et is kedtuu zan. Ne zutun midlaus dan te hipanew zan.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index