Search form

Nengeulaula 17

Si Pablo wey si Silas Diyà te Tiselunika

1Diyè dan mekevayà te menge inged he Empipulis wey Epulunya ne nekeuma zan diyà te inged he Tiselunika. Ne zuen dutun simbahan te menge Hudiyu. 2-3Ne zutun midsimba si Pablo zuma te menge Hudiyu su iyan betasan din. Ne kada Sebadu seled te tetelu he simana mibpekidibati sikandin te menge etew, ne impesavut din kandan is tagnà he insurat diyà te libru he Lalag te Megbevayà he is hadì he mibpilì te Megbevayà, imbanglis kandin kes kedresaya wey kes kedhimetayi kandin ne emun egkeiwas haazà ebenhawen sikandin te Megbevayà. Ne ke si Pablo te, “Heini is etew he egngezanan ki Jesus, iyan en sikan is hadì he mibpilì te Megbevayà.” 4Ne zutun neketuu is duma he menge Hudiyu ne midsunud ki Pablo wey ki Silas. Mezakel zaan is nemeketuu he menge Gerisyahanen he zaan he edsimba te Megbevayà, wey elin daan nemeketuu is mezakel te menge vai zutun te inged.

5Ne zutun, nengesina engki Pablo is menge Hudiyu ne midtig̵um dan is mezakel he menge tepulan he wazà menge pulus he etew. Ne mid-eneb dan is tivuuk he inged te edsinamuk. Midhendiyè dan te valey ni Jason su edteg̵elen dan egkuwaa si Pablo wey si Silas su wey zan meuwit diyà te menge etew. 6Iyan, hein wazè dan sikandan maahà, midakep dan si Jason wey is duma pa he menge tumutuu zutun, ne miguyud dan diyà te menge upisyal zutun te inged dan te ebensag he egkag̵i te, “Heini is menge etew, nekevaal zan te samuk diyà te minsan hendei! Ne g̵untaan, kayi zan en maan te inged tew. 7Ne heini si Jason,” ke sikandan, “impepemenahik din sikandan diyà te valey zin. Pudu sikandan nekesupak te velaud te hadì tew ziyà te Ruma su egkeg̵iyen dan he iyan hadì is etew he egngezanan ki Jesus.” 8Ne hein nezineg haazà dutun te menge upisyal wey menge etew, ne mibmezaat utew is gehinawa zan. 9Ne si Jason wey haazà is menge zuma zin, impevayad sikandan dutun te menge upisyal te piyansa te lawa zan ne human sikandan ipaawà.

Si Pablo wey si Silas Diyà te Biriya

10Ne hein mezukilem en, impehipanew si Pablo wey si Silas te menge tumutuu pehendiyà te inged he Biriya. Ne hein nekeuma zan midhendiyè dan te simbahan te menge Hudiyu. 11Ne zeyzey is menge Hudiyu zutun te Biriya kenà te menge Hudiyu ziyà te Tiselunika su memetulanged dan mulà. Ne utew zan egkesuat he ebpemineg te impesavut kandan. Ne kada andew edsusiyen dan is insurat he Lalag te Megbevayà su ed-ahaan dan ke tutuu ve iyan haazà is ibpenurù eni Pablo. 12Mezakel zan is nemeketuu ki Jesus. Ne is mezakel zutun, ne menge telehuzen he vahi he menge Gerisyahanen wey elin daan nemeketuu is menge Gerisyahanen he maama.

13Ne sikan is menge tigTiselunika he menge Hudiyu, hein nezineg dan he impesavut daan ni Pablo is Lalag te Megbevayà dutun te inged he Biriya, midhendutun dan ne midhimu zan he mengepauk engki Pablo is mezakel he menge etew. 14Ne zutun impaawà dutun si Pablo te menge tumutuu pehendiyà te zag̵at, iyan, si Silas wey si Timoteo, intag̵ak din diyà te Biriya. 15Sikan is menge maama he midhated ki Pablo, miduma zan kandin taman diyà te inged he Etinas. Ne zutun mid-ulì dan diyà te Biriya ne mibpenudtul zan ki Silas wey ki Timoteo he ibpeg̵aanggaan dan ibpetelukun ni Pablo.

Si Pablo Ziyà te Etinas

16Ne zutun te kedteg̵azi ni Pablo ki Silas wey ki Timoteo ziyà te Etinas, utew neseeng sikandin su neehè din he utew mezakel is menge ledawan he edsimbahan te menge meg̵inged dutun. 17Ne tenged dutun, midseled sikandin diyà te simbahan te menge Hudiyu, ne mibpekidibati sikandin te menge Hudiyu wey te kenà menge Hudiyu he edsimba zaan te Megbevayà. Ne minsan daan diyà te mirkadu ebpekidibati sikandin te minsan hentei he zutun. 18Ne zuen dutun menge menunudlù te menge penurù dengan ni Ipikuranu wey ni Sinu. Mibpekidibati zan daan ki Pablo. Ne is duma zutun egkag̵i te, “Paglung heini he mepedelig̵en. Hengkey vuwa pezem is egkeg̵iyen din?” Ne is duma egkag̵i te, “Iyan buwa ibpesavut din is menge selakew pa he menge ziwata he edsimbahan diyà te meziyù he inged.” Umba egkekag̵i zan haazà su impesavut kandan ni Pablo is keag̵i ni Jesus wey is kegkevanhew zin. 19Ne mid-uwit dan si Pablo ziyà te etuvangan te upakat dutun he egngezanan te Eriyupagu ne ke sikandan te, “Egkesuat key he metueni zey heini is beg̵u he penurù he ibpesavut nu. 20Duen edtudtulen nu he sikan dey pa mezineg; umba ebpemineg key kenikew su wey nu ikeseysey.” 21(Umba egkekag̵i zan haazà su is menge tig-Etinas wey minsan is menge umuuliey zutun, utew zan egkesuat he ebpemineg wey ebpenudtul te menge penurù he sikan dan pa mezineg minsan ke egkehepunan pa.)

22Ne zutun midhitindeg si Pablo ziyà te etuvangan dutun te hukmanan he Eriyupagu ne ke sikandin te, “Sikiyu is tig-Etinas, nesavut ku he utew kew metinumanen te menge tuluuwen niw. 23Su te kedrig̵urig̵u ku kayi te inged niw nengeehè ku is menge ed-ezapen niw. Ne zuen daan sevaha he pemuhatà he neehè ku he insurat dutun is lalag he edhenduen te, ‘Kayi ed-ezapa is Megbevayà he Wazè Pa Metueni.’ Ne sikan is Megbevayà he ed-ezapen niw minsan wazè niw pa metueni, iyan heini is ibpesavut ku en keniyu. 24Su heini he Megbevayà, iyan nenlimbag te kelibutan wey te minsan hengkey he tag̵ù din. Nengazen sikandin te langit wey tanà, ne kenà diyè dà ed-ubpà te menge simbahan he mibeelan te etew, 25ne wazà minsan hengkey he egkeveelan te etew he egkinehenglanen din. Su iyan sikandin ebeg̵ey te g̵ehinawa wey untung wey is minsan hengkey ziyà te langun he menge etew. 26Ne te sebsevaha zà he kepuun mibeelan din is langun he kelasi te etew ne in-eneb din sikandan kayi te tivuuk he kelibutan. Ne midtukud din he zaan is egketemanan te ed-ubpaan tew te menusiyà wey is timpu te ked-ubpè tew kayi. 27Umba mibeelan din heini su wey tew sikandin mepen-ahà ne wey tew meturedu sikandin. Ne is Megbevayà, kenà daan meziyù te kada sevaha kenitew, 28su ‘pinaag̵i te kandin he g̵ehem ebpekewaleng kiw, ne zuen daan untung tew wey kegkeetew te kada sevaha kenitew.’ Su iring te lalag te memetau he egkag̵i te ebpenlumlumbayan he lalag dini te keniyu he egkag̵i te, ‘Sikitew zaan, menge anak kiw zin.’ 29Ne g̵eina te menge anak kiw zin, iring kiw kandin. Ne tenged dutun kenè tew ed-isipen he is Megbevayà, sevaha he ledawan he vulawan wey selapì wey vatu he mideyzeyanan te etew he metau. 30Dengan hein wazè pa sikandin mekilala te menusiyà, mibpesagdan din is mezaat he ulaula te menge etew, iyan, guntaan indawey zin en te langun he menge etew te minsan hendei he ibpeiniyug̵an is memezaat he ulaula. 31Midtendek din en is andew keuzemà he zutun ed-imbistigahan din is tivuuk he menusiyà, ne metazeng daan is ked-imbistiga zin pinaag̵i te etew he mibpilì din. Impeehè din he tutuu heini is ebeelan din su haazà is etew, minatey ne mibanhew te Megbevayà!”

32Ne hein nezineg dan haazà is kegkevanhew he nekag̵i ni Pablo, is duma zutun midsumpalit dan sikandin. Iyan, duen duma he egkag̵i te, “Likù ka kayi su egkesuat key pa he ebpemineg te kedseysaya nu kayi.” 33Ne zutun, mid-awà si Pablo zutun te hukmanan. 34Duen menge etew zutun he neketuu ki Jesus ne midsunud dan ki Pablo. Iyan haazà ensi Dionisio, is sevaha he zatù dutun te Eriyupagu wey elin daan is bahi he egngezanan ki Demaris wey zuen pa menge zuma zutun he neketuu.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index