Search form

Nengeulaula 18

Hein Diyà si Pablo te Kurintu

1Wazà meug̵et ne mid-awà si Pablo zutun te Etinas ne midlaus diyà te Kurintu. 2Ne zutun neuma zin is dezuwa he Hudiyu he teleesawa he tigPuntu, si Ekilu wey is esawa zin he si Priscila. Beg̵u pa sikandan he nekeuma zutun he ebpuun te Italya su zuen belaud ni Hadì Claudio he ibpaawà diyà te inged he Ruma is langun he menge Hudiyu. Ne mibpenumbelayan sikandan ni Pablo 3ne mid-amur sikandin kandan su neked-iring is terebahu zan he iyan is kebpemaal te idlelawig he terapal. 4Ne kada Sebadu edhendiyà si Pablo te menge simbahan te menge Hudiyu is ebpekidlewanà su wey mesavut te menge Hudiyu wey menge Gerisyahanen he tutuu is ibpenurù din.

5Ne hein nekeuma si Silas wey si Timoteo is ebpuun te Mesidunya, wazà duma he vaal ni Pablo, kekenà, iyan dà is kebpesevuta zin te Lalag te Megbevayà su ibpeehè din te menge Hudiyu he tutuu iyan he iyan si Jesus sikan is mibpilì te Megbevayà he ibpahadì. 6Ne hein wazè dan dewata su edsumpalit sikandan kandin, inhuyab din is kumbalè din he tuus te mid-engkezan din en sikandan. Ke sikandin te, “Kenè en kediey he salà ke edsilutan kew te Megbevayà. Ne g̵untaan diyè ku en ibpesavut is Lalag te Megbevayà te kenà menge Hudiyu.” 7Ne mid-ewaan din sikandan ne midhendiyà te valey ni Tito Hustu, sevaha he etew he kenà Hudiyu he midtuu zaan te Megbevayà. Nekesiringan is baley zin te simbahan te menge Hudiyu. 8Ne si Crispo, is egalen dutun te simbahan, neketuu te Nengazen ne neketuu zaan is pemilya zin. Ne zutun mezakel is menge tigKurintu, hein nezineg dan is Lalag te Megbevayà, neketuu zan ne mibpemebewtismu sikandan.

9Ne mibpaahà ki Pablo is Nengazen hein mezukilem dutun ne migkeg̵iyan din te, “Kenè ka mahandek. Kenè nu engkezi, kekenà, ipenigudu nu is kebpesevuta nu te lalag ku, 10su zuma a kenikew. Wazà minsan hentei he ebpekekaid kenikew. Mezakel pa is ebpeketuu kediey kayi he inged.” 11Ne ziyà med-ubpà si Pablo te inged he Kurintu taman te sengetuig wey heenem he vulan su impenurù din te menge etew is Lalag te Megbevayà.

12Ne hein iyan midhimu si Galyu he gubirnedur te prubinsya he Gerisya, midtig̵um is menge Hudiyu ne midakep dan si Pablo ne impeetuvang dan ki Galyu. 13Ke sikandan te, “Heini he etew, ibpesimba zin is menge etew te Megbevayà te paag̵i he supak te velaud tew.” 14Ne edtavak pezem si Pablo, iyan, migkag̵i si Galyu ziyà te menge Hudiyu te, “Sikiyu is menge Hudiyu, emun utew zekelà he samuk iring te hustu en he salà wey ke mezaat be he ulaula kayi te etew, ed-entusen ku te edhusey keniyu. 15Ne g̵eina te mehitenged dà heeyan te kegkesumpakì niw tenged te menge ngazan wey is kesug̵uan niw, iyan kew en medhuhusey su kenà a iyan ebpenhusey te iring dutun.” 16Ne zutun impaawè din sikandan dutun te hukmanan. 17Ne is menge kenà Hudiyu zutun, midakep dan si Sustinis, is edumala te simbahan te menge Hudiyu, ne mibpemug̵el zan dutun te uvey te hukmanan. Ne minsan pa zutun wazà itetenged haazà ni Galyu.

Is Kedlikù ni Pablo Ziyà te Entiyukya

18Ne si Pablo, malù pa netegteg̵aad is ked-ubpè din dutun te Kurintu zuma te menge tumutuu ne human medlaus. Miduma zin si Ekilu wey si Priscila ne migenat dan. Ne zuen dutun impenaad ni Pablo ziyà te Megbevayà. Ne hein nekeuma zan diyà te inged he Singkriya, mibpaalut si Pablo he iyan tuus te midtuman din en. Ne mid-untud dan te barku he edhendiyà te prubinsya he Sirya. 19Nekeuma zan diyà te inged he Ipisu ne mid-ewaan ni Pablo si Ekilu wey si Priscila. Midhendiyà sikandin te simbahan te menge Hudiyu ne mibpekibpezeyag̵à sikandin te menge ketezengan. 20Midhangyù dan kandin he kenà petuluy sikandin med-awà diyà te kandan, iyan, wazà si Pablo mebpemineg. 21Su ke sikandin dutun te kegenat din te, “Edlikù a zini ke edtug̵ut is Megbevayà.” Ne nekeuntud te barku ne mid-awà diyà te Ipisu.

22Ne hein nekezunggù diyà te inged he Sisarya midlaus sikandin diyà te Hiruselim ne mibpenumbelayan din is menge tumutuu zutun. Ne zutun mid-ulì sikandin diyà te inged he Entiyukya. 23Ne hein malù sikandin neug̵et dutun ne midlaus en maan. Mid-eneb din is menge prubinsya he Perigya wey Gelasya ne midheg̵etan din is kedtuu te menge sumusundan ni Jesus dutun.

Hein Diyà si Epulus te Ipisu wey Kurintu

24Ne zutun, diyà te Ipisu zuen nekeuma he Hudiyu he tig-Elihendriya he egngezanan ki Epulus. Metau he edikursu ne metau zaan he edseysey te insurat he Lalag te Megbevayà. 25Duen nekepenurù kandin he zaan te keag̵i te Nengazen tew he si Jesus ne utew sikandin mezesen he ebpenurù wey hustu is kedseysey zin mehitenged ki Jesus. Asal, iyan pa netuenan din is kebpemewtismu he impenurù dengan ni Juan. 26Ne zutun, layun ebpenurù si Epulus diyà te simbahan te menge Hudiyu, ne kenè din igkelenew is kebpenurù. Ne si Ekilu wey si Priscila, hein nezineg dan is kebpenurù din, miduma zan sikandin diyà te valey zan ne impurung dan kandin ipenurù is menge Lalag te Megbevayà he wazè din pa metueni. 27Ne zutun neisip ni Epulus is edhendiyà te prubinsya he Gerisya. Ne midtevangan sikandin te menge tumutuu ziyà te Ipisu su mibpesuratan dan is menge tumutuu ziyà te Gerisya ne midhangyù dan he zewata zan sikandin. Ne hein nekeuma si Epulus diyà te Gerisya, is langun he nemeketuu ki Jesus pinaag̵i te g̵ag̵ew te Megbevayà, dekelà he tavang haazà is penurù din kandan. 28Su utew mezesen is menge ketezengan din dutun te insurat he Lalag te Megbevayà he iyan si Jesus sikan is mibpilì te Megbevayà he ibpahadì. Ne pinaag̵i zutun, diyà te etuvangan te mezakel he menge etew, nezaag din is menge Hudiyu he mibpekidibati kandin.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index