Search form

Nengeulaula 20

Is Kedhendiyà ni Pablo te Mesidunya wey Gerisya

1Ne si Pablo, hein mid-engked is menge etew he edsinamuk, midtig̵um din is menge sumusundan. Midweliyan din sikandan su wey meheg̵et is kedtuu zan ne impesavut din he edhipanew en sikandin. Ne migenat ne midlikù diyà te prubinsya he Mesidunya. 2Ne mid-eneb din is menge inged dutun ne mibpurungan din weliyi is menge tumutuu zutun te kedheg̵eta zin te kedtuu zan. Ne zutun midlaus diyà te Gerisya. 3Ne zutun sikandin med-ubpà taman te tetelu he vulan. Ne zutun neisip din he ed-untud te barku su edhendiyà te Sirya, ne neisip daan dutun te menge Hudiyu he edekepen dan sikandin dutun te kegenat din, umba, nahalin is gehinawa zin su neisip din maan he edlikù diyà te imbayè din pehendiyà te Mesidunya. 4Ne zuen tigBiriya, si Supatir he anak ni Piru he nekezuma kandin. Elin daan miduma si Eristarku wey si Sigundu he menge tigTiselunika, si Gayu he tigDirbi, wey si Timoteo, si Tikiku wey si Trupimu he menge tig-Asya. 5Midhuna heini is menge zuma zey ne sikami ki Pablo, midteg̵azan key zan diyà te inged he Truwas. 6Mid-untud key te barku ziyà te inged he Pilipus hein neiwas is Pista te Kegkaan te Supas he Wazè Din Tapey. Ne nekelima zutun nesaut dey sikandan diyà te Truwas ne zutun key med-ubpà taman te sengesimana.

Is Huziyan he Kedhendiyà ni Pablo te Truwas

7Ne hein midsanlep en is andew zutun te andew he Sebadu midtig̵um key su wey zey metuman kes Wag̵as he Idlavung. Ne si Pablo, midweliyan din is menge etew ne taman te metaneb en is kezukileman te kedwali zin su zutun te egkepawà egenat sikandin. 8Mezakel is sulù dutun te rug̵u he ziyà te zivavew he iyan netig̵uman dey. 9Ne zuen kenakan he si Yutiku he ziyà ebpimpinuu te sulawà dutun te iketelu he endanas. Ne g̵eina te melug̵ayad is kedwali ni Pablo, ne utew nekelipezeng. Hein neug̵et wazè din en maantus is kebpekelipezeng din ne neulug diyà te tanà. Ne hein mibitbit dan, minatey en. 10Ne mibeyaan ni Pablo ne midlengkevan din ne migkepkepan din. “Kenè kew meseeng,” ke si Pablo, “su neuyag en.” 11Ne mibpemenahik maan si Pablo ne migkuwa te egkeenen ne migkaan. Ne neug̵et pa is kebpekidlalag din kandan, ne hein nepawà migenat. 12Ne in-ulì dan haazà is kenakan he neuyag ne nengelipey zan utew.

Is Kedhendiyà eni Pablo te Militu

13Ne nekeuntud key te barku ne midhendiyè key te inged he Asun. Intelaan kenami ni Pablo he ebpetuluy sikandin dutun te inged he Asun su ebpemeyvey mulà sikandin. 14Ne neuma zey sikandin diyà te Asun ne impeuntud dey ne zutun midlaus key pa ziyà te inged he Mitilini. 15-16Ne neisip ni Pablo is edlevayan dey is inged he Ipisu su wey key kenà meug̵et diyà te prubinsya he Asya. Egkezeg̵usu si Pablo su egkesuatan din he mekeuma sikandin diyà te inged he Hiruselim te kenà pa andew he Pintikusti. Ne mid-awè key zutun te Mitilini ne sengekezukileman pa zutun midseg̵azan dey is inged he Kiyu, ne sengekezukileman pa zutun midseg̵azan dey is inged he Samu. Ne sengekezukileman pa ne neketuluy key ziyà te inged he Militu.

Is Kebpeneltelaan ni Pablo Ziyà te Menge Tumutuu he Tig-Ipisu

17Ne mibpesuratan ni Pablo is menge ebmeg̵urangen te menge tumutuu ziyà te inged he Ipisu, ne migkag̵i zin he ebpetelavuk sikandin diyà te Militu. 18Ne hein nekeuma zan, migkeg̵iyan din te, “Netuenan niw en he mibpurungan ku is menge ulaula ku kayi te keniyu puun pa zutun te nehuna he andew te kedseled ku kayi te prubinsya he Asya. 19Midtuman ku is ebpeveelan kedì te Megbevayà ne wazà a mebpelavew. Mibpenig̵is is menge luhè ku tenged te mahal kew zini te g̵ehinawa ku. Mezakel is kemereg̵enan wey kemeresayan he neulaula ku tenged te menge pesipala he mibeelan kediey te menge iring ku he Hudiyu. 20Netuenan niw zaan he mibpurungan ku sikiyu penurua ziyà te menge ketig̵uman wey minsan diyà daan te menge valey niw. Dutun te kebpenurua wey kebpesevuta ku keniyu te Lalag te Megbevayà, in-amin ku keniyu ipenurù is minsan hengkey he ibmeupiya te kedtuu niw. 21Hudiyu se kenà Hudiyu, ne wazè ku impelavi su pudu ku midweliyi he kinahanglan he edtumanen dan is ebpeveelan kandan te Megbevayà he iniyug̵i zan is menge mezaat he ulaula zan ne medtuu zan te Nengazen tew he si Jesus. 22Ne g̵untaan, geina te edtumanen ku is sug̵ù kedì te Wag̵as he Mulin-ulin, edhendiyà a te Hiruselim. Ne kenè ku egketuenan ke hengkey is egkeulaula ku zutun. 23Iyan dà egketuenan ku is: diyà te kada inged he imbayè dey ne impezayag kedì te Wag̵as he Mulin-ulin he egkepirisu ad ne mezakel pa he kemereg̵enan is egkeseg̵azan ku. 24Iyan, kenè ku en egkenug̵unan heini is untung ku zini te kelibutan su wey ku mepasad is ebpeveelan kedì te Nengazen tew he si Jesus he iyan is kedsengyawa te Meupiya he Tudtulanen te g̵ag̵ew kenitew te Megbevayà.

25Midtukid ku sikiyu weliyi te kedhadì te Megbevayà Ne g̵untaan netuenan ku en he kenà ad maan keniyu egkeahà. 26Ne egkeg̵iyen ku keniyu he ke zuen minsan sevaha keniyu he kenà egkelibri te silut te Megbevayà, wazè ku salà kandin 27su in-amin ku keniyu ipenurù is minsan hengkey he egkesuatan te Megbevayà. 28Bentayi niw is ulaula niw wey ventayi niw zaan is langun he tumutuu he insarig keniyu te Wag̵as he Mulin-ulin; kinahanglan he iyan kew edlig-en te kedtuu te menge tumutuu te Megbevayà. Nehimu kiw zin he sakup pinaag̵i te kebpehimatey te anak din. 29Netuenan ku he emun ed-ewaan ku sikiyu, duen edlepew kayi te keniyu he menge menunudlù he is ibpenurù dan, ne ebpekezezaat te upakat ne edèdeetan dan iyan is upakat niw te menge tumutuu. 30Ne egkeulaula keuzemà he ebpengag̵i te tarù is minsan menge zuma niw su wey zan meuwit is menge tumutuu su wey mekesundan kandan. 31Ne tenged kayi mebpekevantey kew; kenè niw lipati he seled te tetelu he tuig, andew se mezukilem, mid-em-eminan ku sikiyu te penurù. Mibpenig̵is is menge luhè ku tenged te hizu ku keniyu.

32Ne g̵untaan idsarig ku sikiyu ziyà te Megbevayà he iyan ebpeketavang keniyu. Ebpeketavang daan is impenurù ku keniyu he g̵ag̵ew zin kenitew. Is Megbevayà, iyan ebpekeveg̵ey kenitew te kezesen te kedtuu. Diyà te kandin egkekuwa ta zaan is kenita he vahin te menge tuvad he ibeg̵ey zin diyà te langun he menge tumutuu zin. 33Is selapì wey minsan manggad te minsan hentei keniyu, kenà iyan tuyù ku. 34Netuenan niw he mibpenigudu a medterebahu wey ku mekuwa is menge kinahanglan dey te menge zuma ku. 35Ne pinaag̵i kayi te langun, impeehè ku keniyu he kinahanglan he pinaag̵i te kebpenigudu tew egketevangan tew is egkengeayuayu su egketenuzan tew is menge lalag dengan te Nengazen tew he si Jesus su ke sikandin te, ‘Dekelà is kelipey ta ke ebeg̵ey ki, kenà ke iyan ki edawat.’ ”

36Ne hein nekepasad si Pablo is egkag̵i zutun, midluhud sikandin ne mibpengumew-umew zin is Megbevayà. 37Ne mibpenig̵is is luhè dan te menge tumutuu ne migkepkepan dan si Pablo ne midhezekan dan. 38Utew zan ingkeseeng is lalag din he kenè dan en maan sikandin egkeahà. Ne zutun midumahan dan diyà te barku.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index