Search form

Nengeulaula 25

Is Ked-imbistigaha ni Pistu ki Pablo

1Ne neketelu pa te kebpekeuma ni Pistu zutun te prubinsya he Hudiya mid-awà sikandin diyà te inged he Sisarya ne midhendiyà te Hiruselim. 2Ne zutun, is menge punuan he memumuhat wey is menge egalen te menge Hudiyu, midtudtul zan ki Pistu is insumbunga zan ki Pablo. Inhangyù dan ki Pistu 3he emun meupiya zà te g̵ehinawa zin kandan ne ipeuwit din si Pablo ziyà te Hiruselim. Umba midhangyù dan te iring kayi su wey zan meeyani si Pablo ziyà te ibayè din wey zan mehimetayi. 4Ne midtavak si Pistu te, “Diyè pa si Pablo pirisuwa te Sisarya ne g̵eina te meg̵aan e en edlikù diyà, 5ipezuma niw kedì is menge egalen niw su wey zan mekevaal te sumbung mehitenged kandin ke zuen mid-ulaula zin he mezaat.”

6Ne subra zà te sengesimana is ked-ubpà ni Pistu zutun ne midlikù en diyà te Sisarya. Ne hein nepawà mibpinuu zutun te hukmanan ne insug̵ù din he ipeetuvang kandin si Pablo. 7Ne hein nekeuma si Pablo midlingutan sikandin te menge Hudiyu he ebpemuun diyà te Hiruselim ne utew mezaat he ulaula is insumbunga zan kandin, iyan, wazè dan igkepaahà he tutuu is sumbung dan mehitenged kandin. 8Iyan, mibpengetezengan si Pablo he egkag̵i te, “Wazè e man mekesupak te kesug̵uan tew te menge Hudiyu, ne wazà a zaan mekesupak te simbahan tew wey lavew en is hadì tew he ziyà te inged he Ruma.” 9Ne zutun si Pistu, geina te iyan gustu zin he mebmeupiya is gehinawa te menge Hudiyu mehitenged kandin, migkeg̵iyan din si Pablo te, “Egkesuat ke ve he edhendiyà te Hiruselim su ziyè ku sikew ed-imbistigaha?” 10Ne midtavak si Pablo te, “Kayi a g̵untaan te hukmanan sumalà is belaud ni Cesar te hadì tew ziyà te Ruma ne iyan heini hustu he ed-imbistigahan kedì. Ne netuenan nu he wazà mezaat he mid-ulaula ku ziyà te menge Hudiyu. 11Emun nekesupak a te velaud pinaag̵i te mid-ulaula ku he zait he igkehimetayi kedì, ne kenè ku zaan ed-engkezan is silut kedì. Iyan, ke kenà tutuu is menge insumbunga zan kedì wazà minsan hentei he zuen gehem he ebpalad kedì diyà te kandan. Ne tenged kayi egkesuatan ku he iyan ed-imbistiga kedì si Cesar is hadì tew ziyà te Ruma.” 12Ne zutun mid-insaan ni Pistu is menge sumesambag din ne human din keg̵iyi si Pablo te, “Geina te ebpeimbistiga ka te hadì tew ziyà te Ruma, ibpeuwit ku sikew ziyà te kandin.”

Is Kebpelelag̵à ni Pistu wey ni Hadì Egripa

13Ne nepipira he andew zutun, nekeuma ziyà te Sisarya si Hadì Egripa wey is esawa zin he si Birinisi su edtelavuk dan ki Pistu. 14Ne nekepira pa zutun impesavut ni Pistu ki Egripa is kasu mehitenged ki Pablo, ke sikandin te, “Duen pirisu kayi he wazà libriya ni Felix. 15Ne hein midhendiyà a te Hiruselim zuen menge sumbung mehitenged kandin te menge punuan he memumuhat wey menge ebmeg̵urangen te menge Hudiyu. Ne midhangyù dan he hukumi ku sikandin te kemetayen. 16Ne migkag̵i ku kandan he sikami is menge Rumanu, kenè dey igkepalad is etew he insumbung ke wazè pa sikandin mekeetuvang te menge midsumbung kandin su wey sikandin mekepengetezengan. 17Ne hein midhendini zan te Sisarya wazà a medlanganlangan su hein nepawà dutun, nekepinuu a ziyà te hukmanan ne insug̵ù ku he ipeetuvang sikandin diyà te kedì. 18Ne zutun mid-etuvang daan is menge midsumbung kandin. Ne kunaan ku ke iyan insumbunga kandin is menge mezaat he salà, iyan, wazà. 19Su iyan dà ingkepeuki zan kandin is menge tuluuwen din he kenè dan edewaten. Ne elin daan ingkepeuki zan is egkeg̵iyen ni Pablo he nevanhew sikan is etew he egngezanan ki Jesus he minatey en. 20Ne g̵eina te wazà egketuenan ku he paag̵i te kedhusaya ku kayi, mid-insaan ku si Pablo ke egkesuatan din be he edhendiyà te Hiruselim wey ku sikandin meimbistiga zutun. 21Iyan, migkag̵i sikandin he ebpeimbistiga sikandin te hadì tew ziyà te Ruma su wey iyan mekehusey kayi is hadì. Umba, insug̵ù ku he kenè pa sikandin ibpeg̵uwà te pirisuwan taman te kenè ku pa igkepeuwit diyà te hadì.” 22Ne zutun migkag̵i si Egripa ziyà te ki Pistu te, “Egkesuatan ku he mezineg ku zaan is menge ketezengan din.” “Ne keeselem nu egkezineg,” ke si Pistu.

Is Ked-etuvang ni Pablo Ziyà te ki Hadì Egripa

23Ne hein nepawà nekeuma si Hadì Egripa wey si Birinisi he midsul-uvan sikandan te bisti te hadì wey bisti te singyuda ne midseled dan dutun te hukmanan. Ne midseled daan dutun is menge kepitan te sundaru wey is menge telehuzen he etew zutun te inged dan. Ne zutun insug̵ù ni Pistu he ipeseled si Pablo. Ne hein dutun en si Pablo, 24migkag̵i si Pistu te, “Hadì Egripa wey is langun te sikiyu he nengetig̵um kayi, ahaa niw heini is etew. Midhangyù kedì he ebpememensag is langun he menge Hudiyu zini te Sisarya wey ziyà te Hiruselim he pehimetayi ku sikandin. 25Iyan, hein midsusi ku, wazè ku netuenan he mid-ulaula zin he zait he igkehimetayi kandin. Ne g̵eina te ebpetavang te hadì tew ziyà te Ruma, neisip ku he ibpeuwit ku sikandin diyà te hadì. 26Ne wazà ketezengan he igkesurat ku mehitenged kandin he zait he idhendiyà te hadì tew. Umba ibpeetuvang ku en keniyu g̵untaan lavew en diyan te kenikew, Hadì Egripa, su wey zuen igkesurat ku ke egkeimbistiga nu sikandin. 27Su henduen be te wazà utew pulus emun ibpeuwit ku heini is pirisu ziyà te hadì ne wazà daan ipesavut kandin ke hengkey is insumbunga kandin.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index