Search form

Nengeulaula 26

1Ne migkag̵i si Egripa ziyà te ki Pablo te, “Egkehimu en he ibpesavut nu kenami is menge ketezengan nu.” Ne si Pablo, imbayew zin is belad din he tuus te egkag̵i en ne ke sikandin te, 2“Hadì Egripa, utew ku ingkelipey is kebpekeetuvang ku kenikew g̵untaan wey ku ikepezineg is menge ketezengan ku tenged te langun he menge sumbung te menge Hudiyu mehitenged kedì. 3Iyan ingkelipey ku su g̵eina te nepurung nu mesavut is menge kegkesumpakì wey vetasan tew te menge Hudiyu. Umba edhengyuen ku kenikew he pemineg̵a nu is egkeg̵iyen ku.

4Is langun he menge Hudiyu, netuenan dan ke hengkey is menge ulaula ku puun pa te zeisek e pa su ziyà a medekelà duma kandan diyà te inged ku wey ziyà daan te Hiruselim. 5Netuenan dan wey igkevenari zan emun egkezawat te g̵ehinawa zan he puun pa te menguhed e pa, Perisiyu e en. Ne emun Perisiyu, utew meheg̵et is kedtumana zin te tuluuwen tew te menge Hudiyu. 6Ne g̵untaan dini ad te etuvangan nu tenged dà te edtuuwen ku he egketuman keuzemà is impesarig dengan te Megbevayà diyà te menge kepuun tew. 7Ne sikitew is tivuuk he kehudiyuwan he nevahin te sepulù wey zezuwa he tribu, edtuuwan tew he egketuman heini. Ne tenged kayi, te andew wey mezukilem ed-azap kiw te Megbevayà. Na, Mahal he Hadì, minsan te iyan heini midtuuwan ku zaan, migamit dan he insumbunga zan kedì. 8Sikiyu is menge zuma ku he Hudiyu, maan is kenè kew ebpeketuu he ebenhawen keuzemà te Megbevayà is menge minatey?

9Ne siak, kunaan ku zengan ke iyan ebpeveelan kedì te Megbevayà is ed-ul-ulahan ku is taman te egkehimu ku su wey maawà diyà te minsan hentei is kedtuu zan ki Jesus he tigNeserit. 10Iyan heini mid-ulaula ku ziyà te Hiruselim. Mibeg̵ayan a te menge punuan te menge memumuhat te keg̵ehem ne mibpirisu ku is mezakel he menge tumutuu te Nengazen. Ne hein neisip te menge ebmeg̵urangen dey he zait sikandan he edhimetayan, mid-uyun a zutun. 11Kenè en egkepangkus is kebpesiluti ku kandan diyà te menge simbahan su ebpeg̵esen ku pezem sikandan he engkezi zan is kedtuu zan. Ne tenged te utew ku sikandan nepeuki, mid-alew ku sikandan minsan diyà te menge meziyù he inged wey ku sikandan mesiluti.

12Ne tenged dutun midhendiyà a te inged he Demasku is ed-uwit te surat he kemetuuzan te g̵ehem he imbeg̵ey kedì te menge punuan he memumuhat. 13Na, Hadì Egripa, hein diyè e pa te zalan ne neudtu is andew ne midtik-awan a enlag̵i te utew merayag kenà is andew. Ne ziyà haazà ebpuun te langit ne neketanà diyà te renged dey te menge zuma ku. 14Ne sikami is langun, nepiley key ne nezineg ku is egkag̵i te kineg̵iyan he Hibriyuhanen te, ‘He Seulu, maan is ebpesipelahan a kenikew? Edlised ka su wazà pulus te kedsukul nu kediey.’ 15Ne ke siak te, ‘Hentei ka?’ Ne midtavak is Nengazen te, ‘Iyan a si Jesus, is ebpesipelahan nu. 16Enew ka. Mibpaahà a kenikew wey ku sikew mehimu he sulug̵uen ku. Tudtula nu ziyà te zuma he menge etew is kebpeehè ku kenikew g̵untaan wey tudtula nu zaan is ibpeehè ku zaan kenikew keuzemà. 17Ebentayan ku sikew ne kenè ku idtug̵ut he mekeizi ka te menge Hudiyu wey te kenà menge Hudiyu. Ne edsug̵uen ku sikew ziyà te menge etew he kenà Hudiyu. 18Ne is ibpesavut nu kandan, egkehimu he iyan igkeawà te kegkelakap dan te kedtuu wey zan daan meewai is merusirem ne medhalin dan diyà te merayag. Ne pinaag̵i kayi egkepeleg̵uyan dan is kebeyveyai kandan ni Setanas ne ebpekepesakup dan te Megbevayà. Ne egkepesaylu is menge salè dan tenged te kedtuu zan kedì ne egkehimu zan daan he menge tumutuu he pinilì te Megbevayà.’

19Na, Hadì Egripa, midtuman ku is impeehè kedì he ebpuun te langit. 20Midhuna a ziyà te inged he Demasku ne human diyà te Hiruselim. Ne zutun mid-eneb ku is prubinsya he Hudiya ne midhendiyà a zaan te menge etew he kenà menge Hudiyu. Impesavut ku kandan he kinahanglan he iniyug̵i zan is menge salè dan, ne medtuu zan te Megbevayà ne ipeehè dan pinaag̵i te ulaula zan he tutuu is ked-iniyug̵i zan te mezaat he ulaula. 21Ne tenged kayi te impenurù ku midakep a te menge Hudiyu ziyà te simbahan he Valey te Megbevayà ne edhimetayan e zan pezem. 22Iyan, taman en guntaan midtevangan a te Megbevayà umba zini ad guntaan te etuvangan niw. Ne ibpenurù ku heini is langun diyà te minsan hentei, dekelà is pid-etawan din se zeisey is pid-etawan din. Ne is ibpenurù ku, iyan ded sikan is netagnà dengan ni Moises wey kes ebpemeneuven te Megbevayà, 23su netuman en is netagnè dan he is mibpilì te Megbevayà he ibpahadì, kinahanglan he edresayen wey edhimetayan. Ne netagnè dan daan he iyan sikandin egkehuna he egkevanhew ne edtudtulan din is menge Hudiyu wey is kenà menge Hudiyu he egketeyawan is isip dan te tutuu he tuluuwen.”

24Ne te kemulu pa egkag̵i si Pablo te iring dutun, nekevensag si Pistu, ke sikandin te, “Pablo, ebuneg̵en ka! Iyan ibuneg̵a kenikew is utew subra he istudyu nu.” 25Ne midtavak si Pablo te, “Minahal he Pistu, is lalag ku, kenà lalag te ebuneg̵en, kekenà, tutuu. 26Sikew, Hadì Egripa, kenà a egkelenew he egkag̵i kenikew su netuenan ku he netuenan nu he zaan is langun he egkeg̵iyen ku. Netuenan nu iyan su heini is nengeulaula, wazà mekeeles. 27Hadì Egripa, edtuuwan nu ve is nengetagnà dengan te ebpemeneuven? Netuenan ku he neketuu ka.” 28Ne zutun midtavak si Egripa te, “Kela ke kunaan nu ke egkeg̵aanggaan a kenikew egkehimu he tumutuu ki Kristu!” 29Ne ke si Pablo te, “Sikew wey is langun he ebpemineg kedì guntaan kayi, id-ampù ku te Megbevayà he menaney se meg̵aan, himuwa kew zin he iring kedì, iyan, kenè kew mulà mepirisu!”

30Ne zutun, haazà is hadì wey is gubirnedur wey si Birinisi wey menge zuma zan, midhitindeg su ed-ulì dan en. 31Ne zutun te kegenat dan mibpelelag̵è dan is egkag̵i te, “Wazà ulaula zin he zait he igkehimetayi kandin wey minsan igkepirisuwa kandin.” 32Ne migkag̵i zaan si Egripa ziyà te ki Pistu te, “Angin ke kenà sikandin ebpeimbistiga te hadì diyà te Ruma su egkehimu en he ibpaawà.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index