Search form

Nengeulaula 8

Is Kebpesipelahi wey Kebpekedsusuwey te Menge Tumutuu

1-2Ingkesuat utew ni Seulu is kedhimetayi zan ki Esteban. Ne inleveng si Esteban te menge tumutuu te Megbevayà. Utew zan ingkeseeng haazà ne midlendag̵an dan. Ne puun dutun te andew te kebpatey ni Esteban, is menge tumutuu, ebpemesipelahan en sikandan te menge punuan he menge Hudiyu ziyà te Hiruselim, ne mibpemelag̵uy zan ne nekedsusuwey zan diyà te tivuuk he prubinsya he Hudiya wey Semarya. Iyan dà wazà mekepelag̵uy is menge epustul.

3Ne si Seulu, egkesuatan din he mezezeeti zin is upakat te menge tumutuu ne mezaat is ed-ul-ulahan din kandan. Midsusi zin is kada valey ne midakep din is menge tumutuu ne mibpen-uwit din is menge maama wey menge vahi ne mibpirisu zin.

4Ne sikan is nemekedsusuwey he menge tumutuu he nemelag̵uy, impesavut dan diyà te menge inged is Lalag te Megbevayà. 5Ne si Felipe, is sevaha kayi, ne midhendiyà sikandin te inged dutun te prubinsya he Semarya ne inwali zin diyà te menge tigSemarya ke hentei sikan is mibpilì te Megbevayà he ibpahadì. 6Ne is mezakel he menge etew zutun, hein nesavut dan haazà is inwali ni Felipe wey hein neehè dan is menge egkein-inuwan he mibeelan din, mibpurung dan mebpemineg te impesavut din kandan. 7Mezakel is nengeulian din he etew he edlelungen te mezaat he mulin-ulin ne nekekulahì is menge mezaat he mulin-ulin te ked-awè dan dutun te edlelungen dan. Ne elin daan nengeulian din is menge piang wey mibpematey is divaluy he lawa. 8Ne utew nengelipey is menge etew zutun he inged.

Si Simon he Selemengkiru

9Ne zuen etew he tigSemarya he selemengkiru he egngezanan ki Simon. Nepipira en he tuig ne kemulu zà duen igkengeinuinu te menge etew is menge vaal zin. Impetuu zin is menge tigSemarya he kenà sikandin etew zà duen. 10Ne mibentayan is menge lalag din te minsan hentei ziyà te Semarya, menge lavew se kenà lavew. Ne ke sikandan te, “Heini is gehem he egemiten din, gehem te Megbevayà he egngezanan te Lavew he Gehem.” 11Umba edsundanan dan sikandin su neug̵et en is ked-uwita zin kandan pinaag̵i te menge ketau zin. 12Ne hein impesavut ni Felipe is Meupiya he Tudtulanen te kedhadì te Megbevayà wey is gehem te ngazan ni Jesu Kristu, neketuu zan ne sikandan is menge vahi wey menge maama, mibpebewtismu zan, ne minsan si Simon, kes selemengkiru, neketuu zutun. 13Ne hein nebewtismuwan si Simon, mibpekiduma sikandin ki Felipe ne neinuinu sikandin utew zutun te kegkeehaa zin te menge singyal wey menge egkengein-inuwan he edhimuwen ni Felipe.

14Ne nezineg te menge epustul ziyà te Hiruselim he neketuu en te Lalag te Megbevayà is menge tigSemarya. Ne tenged dutun midsug̵ù dan diyà si Pedro wey si Juan. 15Ne midhendiyè dan ne in-ampù dan he meveg̵ayi is menge tumutuu he tigSemarya te Wag̵as he Mulin-ulin, 16su wazè pa zutun ulini is menge tumutuu he tigSemarya te Wag̵as he Mulin-ulin, su iyan pa nehimu kandan is nebewtismuwan sikandan wey metueni he zuen dan en kebpekidsevaha ki Jesus. 17Ne midepenetan sikandan ni Pedro wey ni Juan ne puun dutun mid-ulinan sikandan te Wag̵as he Mulin-ulin.

18Ne zutun naahà ni Simon he ed-ulinan is menge etew te Wag̵as he Mulin-ulin emun egkezepenetan te zezuwa he epustul. Ne ebeg̵eyan din pezem sikandan te selapì, 19ke sikandin te, “Beg̵ayi a zaan kayi te g̵ehem niw su wey a mekezepenet te etew ne egkeulinan te Wag̵as he Mulin-ulin.” 20Ne migkag̵i si Pedro te, “Berakat he siluti ka te Megbevayà ne zèdeeti zin is selapì nu su maan is neisip nu he egkepemasa is gehem he ibeg̵ey te Megbevayà. 21Wazè nu kelavet wey ketenged kayi te ebpeveelan kenami su netuenan te Megbevayà he kenà metazeng is egkeisip nu. 22Ewaa nu ziyà te g̵ehinawa nu heini is mezaat he neisip nu ne vuyù ka te pesaylu ziyà te Nengazen su kela ke peseyluwa ke zin te neisip nu 23su neuripen ka te kegkesina ne kenè nu egkelikayan is memezaat he ulaula nu.” 24Ne migkag̵i si Simon te, “Iampù a keniyu te Nengazen; hengyui niw sikandin he kenà meulaula kedì is silut he migkag̵i nu.”

25Ne seled te nepipira he andew zutun, si Pedro wey si Juan, mibpenudtul zan is keag̵i ni Jesus wey impesavut dan is lalag te Nengazen. Ne zutun mid-ulì dan diyà te Hiruselim. Ne ziyà te imbayè dan he mezakel he menge inged te prubinsya he Semarya impesavut dan te menge etew zutun is Meupiya he Tudtulanen.

Si Felipe wey Kes Upisyal he Tig-Itiyupya

26Ne zuen belinsug̵uen te Nengazen he migkag̵i ziyà te ki Felipe, ke sikandin te, “Hipanew ka g̵untaan ne hendiyè ka te zivavà, diyà te kersada he ed-awà te inged he Hiruselim pehendiyà te inged he Gasa,” ke sikandin. (Ne heini he zalan, kenè en guntaan utew ibayà.) 27-28Ne migenat dutun si Felipe. Ne zuen dutun etew he tig-Itiyupya he midhendiyà te Hiruselim su edsimba te Megbevayà. Upisyal sikandin he sinerig̵an te kendaki he ke và dà egkeg̵iya, bai, diyà te Itiyupya. Insarig kandin te vai is langun he ketig̵eyunan din. Ne hein ed-ulì en haazà is upisyal he ed-untud te kelisa ebesahan din sikan is libru he insurat dengan ni Esaias he ebpeneuven te Megbevayà. 29Ne zutun migkeg̵iyan si Felipe te Wag̵as he Mulin-ulin te, “Hendiyè ka ne uvayi nu heeyan is kelisa.” 30Ne hein nekeuvey si Felipe zutun, nezineg din haazà is upisyal he ebasa zutun te insurat ni Esaias. Ne ke si Felipe te, “Egkesavut nu ve heeyan is ebesahan nu?” 31Ne midtavak haazà is upisyal te, “Ebmenumenu a te kedsavut kayi te wazà edseysey kedì?” Ne impeuntud din si Felipe. 32Iyan ebesahan dutun te upisyal is insurat ni Esaias dengan he edhenduen te,

“Iring sikandin te vuutan he kerehidu

he migkuwa zan su edhimetayan.

Ne wazà migkag̵i zin su iring sikandin

te nati he kerehidu he kenà ed-erang ke ed-elutan.

33Mid-eled-eled dan sikandin

ne kenà metazeng is kedsiluti zan kandin.

Wazà egkeg̵ug̵ud he kevuwazan din

su mevavè dà utew is untung din

dini te kelibutan.”

34Ne mid-insà haazà is upisyal ziyà te ki Felipe te, “Hentei vuwa is egkeg̵iyen kayi te ebpeneuven te Megbevayà? Iyan be sikandin wey ke selakew en be he etew?” 35Ne zutun midseysayan sikandin ni Felipe. Midhunaan din haazà is ebesahan te upisyal ne impesavut din kandin is Meupiya he Tudtulanen te keag̵i ni Jesus. 36Ne netegteg̵aad dutun nekeuma zan te wahig, ne migkag̵i haazà is upisyal te, “Wahig en heini; egkehimu ve ke ebewtismuwan a kenikew?” 37Ne midtavak si Felipe te, “Egkehimu emun hustu en is kedtuu nu.” Ne midtavak haazà is upisyal te, “Neketuu ad; edtuuwan ku he Anak te Megbevayà si Jesu Kristu.” 38Ne impeteren din haazà is kelisa ne mibpenaug dan is dezuwa, si Felipe wey haazà is upisyal, ne midhendutun dan te wahig ne mibewtismuwan sikandin ni Felipe. 39Ne hein migaun dan dutun te wahig, intik-ew in-awà dutun si Felipe te Wag̵as he Mulin-ulin ne nahanew te ked-ahà dutun te upisyal. Ne haazà is upisyal, midlaus pehendiyà te inged din ne utew zekelà is kelipey zin. 40Ne si Felipe, diyè en maahà te inged he Asdud ne midlaus medhipanew is ebpenudtul te Meupiya he Tudtulanen diyà te langun he menge inged he ibayè din taman te nekeuma sikandin diyà te Sisarya.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index