Search form

Juan 11

Is Kebpatey ni Lazaro

1Duen maama he nezeruwan. Is ngazan din si Lazaro he tigBitanya. Duen dezuwa he etevey zin he zutun daan ed-ubpà te Bitanya, si Maria wey si Marta. 2Iyan si Maria kes bahi he inhaplas din is agwa ziyà te menge paa ni Jesus, ne interapu zin dutun is menge vulvul zin. Ne meemahan dutun haazà is egkezeruwan he si Lazaro. 3Ne mibpesug̵uan si Jesus dutun te zezuwa he vahi ne ke sikandan te, “Datù, egkezeruwan si Lazaro, is mahal ziyà te g̵ehinawa nu.” 4Ne hein nezineg haazà ni Jesus migkag̵i te, “Kenà ibpatey ni Lazaro is daru zin, kekenà, iyan ketezengan ke maan is egkezeruwan sikandin su wey mevantug is Megbevayà ne wey e zaan mevantug is Anak te Megbevayà.”

5Minsan pa te mahal ziyà te g̵ehinawa ni Jesus ensi Marta, si Maria, wey si Lazaro, 6hein nezineg din haazà is kegkezeruwi ki Lazaro, wazè pa sikandin medwaleng seled te zezuwa he andew zutun te neubpaan din. 7Ne hein netapus haazà, migkeg̵iyan din is menge sumusundan din te, “Edlikù kiw ziyà te prubinsya he Hudiya.” 8Ne migkeg̵iyan sikandin te menge sumusundan din te, “Menunudlù, deyzey ke kenè ka edlikù diyà te Hudiya su wazè pa mepirai he edhimetayan ka pezem te menge Hudiyu.” 9Ne midtavak si Jesus te, “Sepulù wey zezuwa he uras is sengeandew, ne ke zuen edhipanew te maandew kenà ebpekesipà su egketeyawan sikandin te andew. 10Ne ke zuen edhipanew te mezukilem, ebpekesipà su kenè en merayag.” 11Ne mid-uman megkag̵i si Jesus te, “Nekelipezeng en is emig̵u tew he si Lazaro. Umba edhendiyà a te kandin su wey ku sikandin mepukew.” 12Ne migkag̵i haazà is menge sumusundan din te, “Emun nekelipezeng en, meupiya su egkeulian en.” 13Iyan ibpesavut dutun ni Jesus is: minatey en si Lazaro, iyan, kunaan te menge sumusundan din ke kedlipezeng dà duen is egkeg̵iyen din. 14Ne zutun migkag̵i si Jesus kandan te, “Minatey en si Lazaro. 15Ne tenged keniyu inmeupiya heini te g̵ehinawa ku te wazà a ziyà te kebpatey zin su zuen ibpeehè ku keniyu wey med-iseg is kedtuu niw kediey. Ne kuwa kiw en su edhendiyè kiw te kandin.” 16Ne si Tomas, kes migeraran dan te Sereping, migkag̵i ziyà te menge zuma zin he sumusundan te, “Edhendiyè kiw en su wey kiw mebpatey zuma ki Jesus.”

Si Jesus is Ebpemanhew

17Ne zutun te kebpekeuma eni Jesus diyà te Bitanya, nezineg din he heepat en he andew zutun is kedlevenga ki Lazaro. 18Is inged he Bitanya, uvey zà te inged he Hiruselim su menge tetelu zà he kilumitru is elang. 19Mezakel is menge Hudiyu he midhendutun te ki Marta wey ki Maria su edlangan dan kandan tenged dutun te meemahan dan he minatey.

20Ne hein nezineg ni Marta he ebpekeuma en si Jesus, midtelavuk din, ne si Maria, diyè pa sikandin te valey. 21Migkag̵i si Marta ziyà te ki Jesus te, “Angin ke zini ka su kenà pezem ebpatey kes meemahan ku. 22Ne netuenan ku he minsan guntaan ke zuen ebuyuen nu ziyà te Megbevayà, ibeg̵ey zin kenikew.” 23Ne migkag̵i si Jesus te, “Egkevanhew zed is kakey nu.” 24Ne migkag̵i si Marta te, “Uya, netuenan ku he egkevanhew sikandin keuzemà ke ebpemenhawen is menge minatey zutun te ketepusan he andew.” 25Ne migkag̵i si Jesus te, “Iyan a sikan is ebpemanhew; iyan a kes ebeg̵ey te untung. Ke zuen etew he edtuu kedì, minsan ke ebpatey, uuyag gihapun is gimukud din. 26Su is etew he edtuu kedì, duen din untung he wazà pidtemanan ne kenè en ebpatey is gimukud din. Bayi, edtuu ke ve kayi?” 27Ne midtavak si Marta te, “Uya, edtuu a he iyan ka sikan is Anak te Megbevayà; iyan ka kes netagnà he hadì he ebperetengen dey he edhendini te kelibutan.”

28Ne te nekag̵i ni Marta haazà, mibeyaan din sikan is suled din he si Maria ne midnèneesan din te, “Nekeuma en si Jesus ne ibpehendiyè ke zin.” 29Ne hein nezineg ni Maria haazà, neketik-ew sikandin mekehitindeg ne midsinug̵ung ki Jesus. 30Ne wazè pa si Jesus mekeuma ziyà te inged su zutun pa sikandin te nesinug̵ungan kandin ni Marta. 31Ne is menge Hudiyu he edlangan kandan, diyè pa sikandan te valey he zuma ni Maria. Ne hein neehè dan si Maria is neketik-ew mekehitindeg he midlawang, midtelukun dan su kunaan dan ke edhendiyà te penlevengà su edsineg̵ew zutun.

32Hein nekeuma si Maria ziyà te ki Jesus, mid-uvey ziyà te kandin ne midluhud. Ne ke sikandin te, “Angin ke zini ka pezem su kenà ebpatey kes meemahan ku.” 33Ne hein naahà ni Jesus he edsineg̵ew si Maria wey is menge Hudiyu he zuma zin, utew mibmezaat is gehinawa zin su neseeng. 34Ne migkag̵i sikandin te, “Hendei niw ileveng?” Ne midtavak dan te, “Ebeyaan tew.” 35Ne zutun mibpenig̵is is menge luhà ni Jesus. 36Umba, migkag̵i is menge Hudiyu te, “Utew mahal ziyà te g̵ehinawa ni Jesus si Lazaro.” 37Iyan, duen dutun menge etew he migkag̵i te, “Maan is wazè din bewii si Lazaro wey kenà mebpatey? Su emun nevewian din is mata te lakap siguradu egkehimu zin daan heini.”

Is Kegkevanhew ki Lazaro

38Ne zutun mid-iseg is kegkeseeng ni Jesus, ne mid-uvayan din haazà is midlevengan. Su haazà is penlevengà, surung diyà te pangpang. Duen inlekeb dutun he vatu te g̵emawan din. 39“Iawè niw heini is batu!” ke si Jesus. Ne si Marta, is etevey zutun te minatey, migkag̵i sikandin te, “Memahù en su heepat en guntaan he andew is kedlevenga kandin.” 40Ne migkag̵i ziyà te kandin si Jesus te, “Migkag̵i ku en kenikew he ke edtuu ka, egkeehè nu is utew igkeventug̵a te Megbevayà.” 41Ne in-awè dan dutun haazà is batu he inlekeb te surung. Ne midlingahà si Jesus diyà te langit ne migkag̵i te, “Amey ku, ebpeselamat a kenikew su ebpemineg̵en nu is ebuyuen ku. 42Netuenan ku he layun ka ebpemineg te egkeg̵iyen ku, iyan, tenged te menge etew kayi te uvey ku ed-ampù a kenikew g̵untaan wey zan meketuu he midsug̵ù a kenikew zini te kelibutan.” 43Ne te nekag̵i zin heini, midhabet megkag̵i te, “He Lazaro, gawas ka keniyan!” 44Ne migawas si Lazaro he nevanhew. Nevukusan is lawa zin wey menge velad din wey paa zin te manggad. Ne is ulu zin, nevukusan te penuwilu. Ne migkag̵i si Jesus te, “Bedbazi niw wey ipaawà.”

Is Bitiyara Mehitenged te Kedekepa ki Jesus

(Juan 11:45-57; Mateo 26:1-5; Marcos 14:1,2; Lucas 22:1,2)

45Ne haazà is menge Hudiyu zutun he miduma ki Maria, hein neehè dan haazà is mibeelan ni Jesus, mezakel kandan is midtuu ki Jesus. 46Iyan, is duma kandan, midhendiyà te menge Perisiyu ne mibpenudtul zan is mibeelan ni Jesus. 47Ne zutun midtig̵um te menge punuan he memumuhat wey menge Perisiyu is menge ebmeg̵urangen te menge Hudiyu. Ne hein netig̵um dan en, migkag̵i zan te, “Ebmenumenu kiw su heini si Jesus, mezakel is menge egkein-inuwan he ebeelan din. 48Emun ebpesegdanen tew, edtuuwan te langun he menge etew he iyan sikandin sikan is mibpilì te Megbevayà he ibpahadì. Ne emun iyan en heini vag̵ad, ebeyaan kiw te menge sundaru te hadì tew ziyà te Ruma, ne edèdeetan dan is simbahan tew he Valey te Megbevayà wey is gubirnu tew.” 49Ne zutun migkag̵i is sevaha kandan he si Keyipas. Iyan sikandin lavew he memumuhat dutun he tuig. Ke sikandin te, “Wazè niw menge isip! 50Wazè niw ves mesavut he kinahanglan he zuen sevaha zà he etew he ebpatey he elili te tivuuk he kehudiyuwan su wey kenà mezeeti is kebpekesavuk tew te menge Hudiyu,” ke sikandin. 51Kenà kandin dà he isip haazà is kegkeg̵iya zin dutun su g̵eina te iyan sikandin lavew he memumuhat, impinted kandin te Megbevayà. Netagnè din he ebpatey si Jesus he elili te tivuuk he kehudiyuwan. 52Ne kenà tenged te menge Hudiyu zà su netagnè din daan he pinaag̵i te kebpatey ni Jesus egkesevaha is langun he menge etew he egkehimu he menge anak te Megbevayà minsan hendei he inged. 53Ne puun dutun he andew, ebpengahaan te menge punuan is paag̵i wey zan mehimetayi si Jesus. 54Ne tenged dutun wazè en maan si Jesus mebpeg̵awag̵awa zutun te menge inged te menge Hudiyu, kekenà, midhendiyà te inged he egngezanan te Ipraim he uvey te tanà he kenà ed-ubpaan te etew. Ne zutun sikandin med-ubpà duma te menge sumusundan din.

55Meg̵aan en dutun is pista te menge Hudiyu he egngezanan te Kedlevayi, ne te wazè pa meuma haazà is pista, ne mezakel he menge etew is nemenekezeg diyà te Hiruselim he ebpemuun te menge zuma he inged su edtumanen dan is tuluuwen te menge Hudiyu te kebpelumpiyu. 56Ebpen-ahaan dan si Jesus ne ebpelelelag̵è dan diyà te simbahan he Valey te Megbevayà, ke sikandan te, “Hengkey is isip niw; edtelavuk be si Jesus kayi te pista wey ke kenà?” 57Ne insug̵ù he zaan te menge punuan he memumuhat wey menge Perisiyu he ke zuen egketau ke hendei si Jesus keg̵iya zin kandan wey zan ikepezakep.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index