Search form

Juan 14

Si Jesus is Dalan Pehendiyà te Megbevayà

1“Kenà mebmesakit is gehinawa niw,” ke si Jesus, “kekenà, sarig kew te Megbevayà ne sarig kew zaan kediey. 2Mezakel is menge egkeubpaan diyà te ed-ubpaan te Amey ku, su ke kenà tutuu heini, wazè ku g̵eina sikiyu keg̵iyi he edhendiyà a te ked-andam te egkeubpaan niw. 3Ne emun ebpekehendiyà ad su ed-endaman ku sikiyu te egkeubpaan, edlikuan ku sikiyu ne ziyà ku sikiyu ed-uwita te ed-ubpaan ku. Ne zutun, ke hendei a, ne zutun kew zaan. 4Ne netuenan niw en is ibayà pehendiyà te ebeyaan ku.” 5Ne migkeg̵iyan si Jesus ni Tomas te, “Wazè dey metueni ke hendei ka ebpevayà. Ebmenmenuwen dey ve te kegketureduwa zey te ibayè nu?” 6Ne midtavak si Jesus te, “Iyan a sikan is ibayà; iyan a kes tutuu he edtuuwan; iyan a kes ebpuunan te untung he wazà pidtemanan. Wazà ebpekehendiyà te ed-ubpaan te Amey ku emun kenà a iyan ibayè din. 7Emun egketuenan niw ke hentei a, egketuenan niw zaan ke hentei is Amey ku. Puun guntaan netuenan niw en ke hentei sikandin su neehè niw en sikandin.”

8Ne zutun migkag̵i ziyà te kandin si Felipe te, “Ipeehè nu kenami is Amey nu he Megbevayà ne iyan dà egkinehenglanen dey.” 9Ne midtavak si Jesus te, “Neug̵et en utew is kebpekiduma ku kenikew, Felipe, ne wazè nu ves metueni ke hentei a? Su is nekeahà kedì, ne nekeehè en daan te Amey ku he Megbevayà. Maan is egkesuat ka he ibpeehè ku kenikew is Amey ku? 10Wazè ke ves medtuu he zini te kedì is Amey ku, ne ziyà a zaan te kandin su sevaha key zà? Minsan is menge lalag ku keniyu, kenè ku egkeg̵iyen te kediey zà he isip su is Amey ku he zini ed-ubpà te kediey, kandin he vaal heini. 11Tuu kew te egkeg̵iyen ku he ziyà a te Amey ku ne zini sikandin te kediey. Ne emun kenè kew ebpeketuu kayi tenged dà te migkag̵i ku, tuu kew tenged te menge vaal ku su is menge vaal ku, egkeehè niw zutun he tutuu is egkeg̵iyen ku keniyu. 12Utew venar is egkeg̵iyen ku keniyu he ke zuen edtuu kediey, egkehimu zin is nengeveelan ku, asal lavew pa he mekeg̵eg̵ehem is egkeveelan din tenged te ed-ulì a ziyà te Amey ku he Megbevayà. 13Ke zuen ebuyuen niw kediey tenged te kedtuu niw kediey, ebeelan ku su wey mevantug is Amey ku tenged kediey. 14Su is minsan hengkey he ebuyuen niw tenged te kedtuu niw kediey, ebeelan ku.

Insaad ni Jesus is Wag̵as he Mulin-ulin

15Emun mahal a ziyà te g̵ehinawa niw, edtumanen niw is menge sug̵ù ku keniyu, 16ne edhengyuan ku is Amey ku su wey zin ikeveg̵ey keniyu is Menenavang he ed-ilis kediey he kenà edsuwey keniyu te minsan keenu. 17Iyan sikandin sikan is Wag̵as he Mulin-ulin he tutuu is ibpenurù din. Kenà heini egkezawat te menge etew zini te kelibutan he kuntada te Megbevayà su kenè dan egkekilala sikandin ne kenè dan egkesavut ke hentei sikandin. Sikiyu mulà, nesavut niw en ke hentei sikandin su ziyà ed-ubpà te keniyu ne kenà daan ed-awà diyà te keniyu.

18Ne kenè ku sikiyu ed-ewaan he iring te nengeilu su edlikuan ku zed sikiyu. 19Kenè en egketegteg̵aad ne kenà ad maan egkeahà te menge kuntada ku he etew zini te kelibutan, iyan, sikiyu mulà, egkeehè e pa egkeuman keniyu. Kenà egkeawà is untung ku te minsan keenu, umba zuen niw en daan untung he kenà egkeawà te minsan keenu. 20Ne zutun te andew te kedlikui ku keniyu, egketuenan niw he siak, diyà a te Amey ku wey is Amey ku, dini zaan te kediey, ne sikiyu, dini kew te kediey ne ziyà a zaan te keniyu.

21Is etew he edewaten din is menge sug̵ù ku ne edtumanen din, iyan sikandin etew he utew a mahal ziyà te gehinawa zin. Ne mahal zaan sikandin dini te g̵ehinawa zey te Amey ku, ne edhimuwen ku he metueni zin he iyan a zuma zin.” 22Ne zutun migkag̵i si Hudas (kenà sikan is Hudas he tigKeriyuti), ke sikandin diyà te ki Jesus te, “Maan is edhimuwen nu he metueni zey sikew ne kenè nu edhimuwen he metueni ka te menge etew he wazà medtuu kenikew?” 23Ne midtavak si Jesus te, “Ke zuen etew he mahal a ziyà te g̵ehinawa zin, edtumanen din is menge sug̵ù ku, ne zutun mahal sikandin diyà te g̵ehinawa te Amey ku. Ne siak wey is Amey ku, edhendiyè key te kandin ne ziyà key ed-ubpà te kandin. 24Ke zuen etew he kenà a mahal ziyà te g̵ehinawa zin, kenè din edtumanen is menge sugù ku. Heini is menge lalag ku, kenà dini zà te isip ku ebpuun, kekenà, diyà ebpuun te Amey ku he iyan midsug̵ù kediey.

25Egkeg̵iyen ku keniyu heini is langun te kemulu e pa zini te keniyu. 26Ne edsug̵uen te Amey ku zini te keniyu is Menenavang he ed-ilis kediey. Iyan sikandin sikan is Wag̵as he Mulin-ulin ne ibpenurù din keniyu is langun, ne ibpetenuzan din keniyu is langun he migkag̵i ku keniyu.

27Edteg̵akan ku is isip niw te kelinew. Is kelinew he zini te isip ku, iyan idtag̵ak ku keniyu. Is menge etew zini te kelibutan he kenà edtuu, kenè dan ebpekeveg̵ey keniyu te kelinew he iring kayi. Ne kinhanglan he kenà mebmesakit is gehinawa niw ne kenè kew zaan mahandek. 28Nezineg niw is migkag̵i ku he ed-ewaan ku sikiyu ne edlikù e zed dini te keniyu. Angin ke tutuu he mahal a ziyà te g̵ehinawa niw su igkelipey niw pezem heini su g̵untaan egkehimu he ed-ulì a ziyà te Amey ku he iyan lavew kenà a. 29Ne te wazè pa meuma is ked-ewai ku keniyu, migkag̵i ku en keniyu heini he zaan su emun egkeulaula en, ebpeketuu kew he iyan a sikan is hadì he mibpilì te Megbevayà. 30Mevavè dà utew is menge lalag ku keniyu su meg̵aan en ebpekeuma si Setanas is egalen te menge etew zini te kelibutan he kuntada ku. Wazè din keg̵ehem kediey, 31iyan, is ed-ul-ulahan ku g̵untaan, ne iyan insug̵ù kediey te Amey ku he Megbevayà. Edtumanen ku heini su wey metueni te menusiyà he mahal zini te g̵ehinawa ku is Amey ku.

Ne kuwa kew en su ed-awè kiw kayi.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index