Search form

Juan 20

Is Kegkevanhew ni Jesus

(Juan 20:1-10; Mateo 28:1-8; Marcos 16:1-8; Lucas 24:1-12)

1Ne zutun te egkerkeriwaswas en te andew he Duminggu, midhendutun te surung he penlevengà si Maria Megdelina te kemulu pa merusirem. Neehè din he naawà kes batu he inlekeb dutun te g̵emawan te surung. 2Ne tenged dutun, mibpelelag̵uy ne midhendiyà te ki Simon Pedro wey zuen te sevaha he sumusundan, sikan is mahal ziyà te g̵ehinawa ni Jesus. Ne migkeg̵iyan sikandan ni Maria te, “Is Nengazen tew he si Jesus, in-awè dan duen te midlevengan kandin ne wazè dey metueni ke hendei zan uwita.” 3Ne migaanggaan si Pedro wey haazà is duma zin he sumusundan su edhendutun dan te surung. 4Ne mibpelelag̵uy zan is dezuwa, iyan, nehunaan si Pedro zuen te zuma zin he sumusundan, ne nehuna he nekeuma zutun te surung he penlevengà. 5Ne midtikintikin sikandin su edsinilingen din haazà is surung. Neehè din sikan is menge meputì he manggad he nekesavuk dutun, iyan, wazà sikandin medseled. 6Ne zutun nekeuma si Simon Pedro is nehuziyan, ne midseled mulà sikandin. Neehè din daan kes menge meputì he manggad 7ne elin daan neehè din kes penyuwilu he imbukus te ulu ni Jesus. Wazà heini iamur zutun te menge zuma he manggad su midlumpì ne nekesivey te nesevukan. 8-9Ne zutun midseled daan sikan is sumusundan he nehuna he nekeuma. Neehè din daan haazà is langun, ne minsan pa te wazè dan pa metueni is menge insurat he tagnà he kinahanglan he ebenhawen si Jesus, midtuu sikandin dutun he nevanhew en si Jesus. 10Ne zutun mid-ulì haazà is dezuwa he sumusundan.

Is Kebpaahà ni Jesus ki Maria Megdelina

(Juan 20:11-18; Mateo 28:9,10; Marcos 16:9-11)

11Ne si Maria mulà, kemulu pa sikandin dutun te g̵awas te surung is edsineg̵ew. Ne zutun te edsineg̵ew sikandin, edtikintikin is edsiniling dutun te surung. 12Ne zutun neehè din is dezuwa he velinsug̵uen te Megbevayà he utew meputì is bisti zan. Ebpimpinuu zan dutun te nesevukan te lawa ni Jesus; haazà is sevaha, ne ziyà te egkeulunan ne is sevaha, diyà te egkesikuwayan. 13Ne mid-insaan dan si Maria te, “Bayi, hengkey is idsineg̵ew nu?” Ne ke si Maria te, “Migkuwa te etew is lawa te Nengazen, ne wazè ku metueni ke hendei zan uwita!” 14Ne zutun midlilingey sikandin ne neehè din si Jesus is edhithitindeg dutun, iyan, wazè din mekilala si Jesus. 15Ne migkeg̵iyan ni Jesus te, “Bayi, hengkey is idsineg̵ew nu? Hentei is ebpen-ahaan nu?” Ne kunaan ni Maria ke iyan sikandin sikan is ed-elima te menge pinemula zutun, umba migkag̵i te, “Mama, ke iyan ka migkuwa te lawa zin, keg̵iya nu ke hendei nu isavuk su egkuwaan ku.” 16Ne zutun migkag̵i si Jesus te, “Maria!” Ne mid-etuvang si Maria ne te kineg̵iyan he Hibriyuhanen migkeg̵iyan din si Jesus te, “Rebuni!” he ke và dà kenitew, “Menunudlù.” 17Ne migkag̵i kandin si Jesus te, “Kenè ka kepkep dini su wazè e pa vetuna pehendiyà te Amey ku. Beyai nu is menge suled ku ne keg̵iya nu te, ‘Edhendiyà a te Amey ku, diyà te Megbevayè ku. Iyan daan sikandin Amey niw wey Megbevayè niw.’ ” 18Ne mibeyaan ni Maria Megdelina sikan is menge sumusundan ne ke sikandin te, “Neehè ku is Nengazen tew,” ne zutun mibpenudtul zin haazà is migkag̵i ni Jesus.

Is Kebpaahà ni Jesus Duen te Menge Sumusundan Din

19Ne hein mezukilem dutun te andew he Duminggu, netig̵um haazà is menge sumusundan diyà te sevaha he valey he midlekevan dan su nahandek dan te menge punuan he menge Hudiyu. Ne netekewtekew zan te ziyà si Jesus te teliwazè dan ne ke sikandin te, “Berakat he mebmelinawen kew.” 20Ne zutun impeehè din kandan is menge palì diyà te menge velad din wey ziyà te tengkilizan din. Ne utew nengelipey is menge sumusundan te kebpaahà kandan te Nengazen. 21Ne mid-uman si Jesus megkag̵i ziyà te kandan te, “Mebmelinawen kew. Ne iring te midsug̵ù a te Amey tew he Megbevayà, edsug̵uen ku zaan sikiyu.” 22Ne te nekag̵i zin heini midhiyupan din sikandan ne ke sikandin te, “Berakat he meulini kew te Wag̵as he Mulin-ulin. 23Ne tenged kayi emun ebpeseyluwen niw is minsan hentei he nekesalà, ebpeseyluwen daan te Megbevayà, ne emun kenè niw ebpeseyluwen, kenà daan ebpeseyluwen te Megbevayà.”

Is Kebpaahà ni Jesus ki Tomas

24Ne si Tomas, he migngezanan te Sereping, sevaha sikandin dutun te sepulù wey zezuwa he mibpilì ni Jesus. Wazà sikandin dutun te mibpaahà kandan si Jesus. 25Ne tenged dutun midtudtulan sikandin te menge zuma zin he sumusundan, ke sikandan te, “Mibpaahà kenami is Nengazen tew.” Iyan, migkag̵i si Tomas te, “Kenà a ebpeketuu he nevanhew sikandin emun kenè ku egkeahà is menge velad din he nepelian te ransang. Ne emun kenè ku egketiyukan te tezù ku is palì diyà te velad din wey ziyà te kilid din, kenà a ebpeketuu.”

26Nekewalu pa zutun, nengetig̵um en maan haazà is menge sumusundan ni Jesus duen te netig̵uman dan ded he valey, ne zutun daan si Tomas. Midlekevan dan ded haazà is baley ne minsan pa zutun netekewtekew si Jesus mekehitindeg dutun te teliwazè dan. Ke sikandin te, “Berakat he mebmelinawen kew.” 27Ne zutun migkeg̵iyan din si Tomas te, “Itiyuk nu kayi is tezù nu; is belad nu zaan, itiyuk nu kayi te kilid ku; ahaa nu is menge velad ku ne kenà ke en maan meduwazuwa, kekenà, tuu ka.” 28Ne zutun midtavak si Tomas te, “Iyan ka Nengazen ku, iyan ka Megbevayè ku!” 29Ne migkag̵i kandin si Jesus te, “Midtuu ke ve tenged dà te naahà a kenikew? Utew zeyzey sikandan is minsan wazà kedì mekeahà, iyan, edtuuwan e zan.”

30(Duen mezakel he egkengein-inuwan he naahà te menge sumusundan ni Jesus he wazà ikesurat kayi te libru. 31Ne iyan insurata ku kayi te menge egkein-inuwan su wey kew meketuu he iyan si Jesus Anak te Megbevayà wey sikan is mibpilì te Megbevayà he ibpahadì, ne emun edtuu kew kandin ebeg̵ayan kew te untung he wazà pidtemanan.)

Is begu he paagi: ang pulong sa Dios

© Wycliffe Bible Translators, Inc. 

More Info | Version Index