Search form

Juan 6

Is Kebpekeena te Lelima he Libu he Menge Etew

(Juan 6:1-15; Mateo 14:13-21; Marcos 6:30-44; Lucas 9:10-17)

1Ne neipus heini mid-awà si Jesus dutun ne midhendiyà te tanà he ziyà layun te ranew he Geliliya, he migngezanan daan te Tibiryu. 2Ne zuen utew mezakel he menge etew he ebpemenduma kandin su nengeehè dan is menge egkein-inuwan he mibeelan din te kebewii zin te menge egkengezeruwan. 3Ne midtekezeg si Jesus wey haazà is menge sumusundan din te vuvungan ne zutun dan mebpinuu. 4Egkesipeg̵an dutun is andew he edsilibrahan te menge Hudiyu is pista he egngezanan te Kedlevayi. 5Ne mibpememantew si Jesus ne neehè din is utew mezakel he menge etew he ebpemehendiyà te kandin. Ne migkeg̵iyan din si Felipe te, “Hendei kiw ebpekekuwa te egkeenen he ibpekaan tew kayi te menge etew?” 6(Umba migkag̵i zin heini su egezaman din si Felipe su si Jesus, netuenan din en man ke hengkey is ebeelan din dutun.) 7Ne midtavak si Felipe te, “Minsan ke utew zekelà is egestuwen tew he selapì, minsan dezuwa he g̵atus he dinaryu, ne ebeg̵ayan tew is kada sevaha te minsan sengepindut dà he egkeenen, kenè pa ebpeketukid.” 8Ne zutun migkag̵i si Andres. Si Andres, hazi ni Simon Pedro wey sevaha zutun te menge sumusundan ni Jesus, ne ke sikandin te, 9“Duen kayi vatà he midlulutù te lelima he supas he erina he sibada wey zezuwa he pait, iyan, ebmenuwen tew zè be kayi te utew medmezakel he menge etew!” 10Ne migkag̵i si Jesus te, “Ipemepinuu is menge etew.” Ne zutun impemepinuu sikandan. Meluag haazà is perekpekan dutun ne menge lelima he libu is kezakel te menge maama zà. 11Ne migkuwa ni Jesus haazà is menge supas ne mibpeselematan din te Megbevayà, ne impepenalad din dutun te impemepinuu he menge etew. Ne iring din ded daan sikan is menge pait, taman te nengehantey haazà is menge etew. Ne minsan pa zutun, wazà maamin haazà is supas wey pait. 12Ne hein nengehantey en dutun is langun, migkeg̵iyan ni Jesus haazà is menge sumusundan din te, “Himesa niw is nengesamà he egkeenen su wey kenà mezeeti.” 13Ne zutun nehimes dan is sepulù wey zezuwa he vinevey he nepenù te menge tevì te lelima he supas he sibada.

14Ne hein naahà te menge etew is egkein-inuwan he nehimu ni Jesus migkag̵i zan te, “Tutuu ves iyan he iyan en heini sikan is netagnà he ebpeneuven te Megbevayà he ibpehendini zin te kelibutan!” 15Ne si Jesus, geina te netuenan din he ebeyaan dan sikandin su edteg̵elen dan sikandin edhimuwa he hadì dan, mid-awà dutun te sebsevaha zin ne midtekezeg diyà te vuvungan.

Is Kedhipanew ni Jesus Diyà te Ranew

(Juan 6:16-21; Mateo 14:22-33; Marcos 6:45-52)

16Ne hein mahapun en dutun, midhendiyà is menge sumusundan din te veyvey te ranew, 17ne mid-untud dan te avang su edrapas dan diyà te inged he Kepirnaum. Mezukilem en dutun haazà is ked-untud dan, ne wazè pa si Jesus mekelikù diyà te kandan. 18Ne ebpengeramag dutun ne zezekelà is menge vag̵el zutun te wahig. 19Ne hein menge lelima en he kilumitru is imbayè dan dutun te lawed te ranew, neehè dan si Jesus is edhendiyà te kandan he edhipanew zutun te wahig. Utew zan nengehandek, 20iyan, migkag̵i si Jesus kandan te, “Iyan a; kenè kew mahandek.” 21Ne zutun nelipey zan ne impeuntud dan sikandin. Ne zutundutun te kebpeuntuza zan ki Jesus, nekezunggù dan dutun te inged he ebeyaan dan.

22Ne hein nepawà dutun, diyè pa te layun te ranew sikan is mezakel he menge etew. Netuenan dan he sevaha zà is avang dutun ne iyan kes mid-untuzan te menge sumusundan ni Jesus. Netuenan daan te menge etew he wazà sikandin med-untud dutun te kegenat te menge sumusundan din su neewaan sikandin. 23Ne zutun te uvey te lugar he zutun nemekekaan sikan is menge etew te supas he mibpeselematan te Nengazen he si Jesus, duen nemekezunggù he menge avang he ziyà ebpemuun te inged he Tibiryu. 24Ne hein netuenan te menge etew he wazè en dutun si Jesus wey is menge sumusundan din, nemen-untud dan dutun te menge avang su ebpen-ahaan dan si Jesus diyà te inged he Kepirnaum.

Is Keenen he Ebpekeveg̵ey te Untung

25Ne hein nekezunggù dan neehè dan sikandin. Ne mid-insè dan te, “He Menunudlù,” ke sikandan, “keenu ka mekeuma zini?” 26Ne midtavak si Jesus te, “Benar is egkeg̵iyen ku keniyu he, umba ebpen-ahaan a keniyu kenà tenged te tutuu is kedsavut niw te menge egkein-inuwan he nengeehè niw, kekenà, tenged te nengehantey is getek niw te supas he nekaan niw g̵evii. 27Kenè niw pen-ahaa is egkeenen he meg̵aan dà egkehanew, kekenà, hag̵ù kew wey niw mekuwa is egkeenen he ebpekeveg̵ey te untung he wazà pidtemanan. Siak is Kakey te Menusiyà, iyan heini egkeenen he igkeveg̵ey ku keniyu su impeehè en te Amey ku he Megbevayà he ingkesuat din is menge vaal ku.” 28Ne zutun mid-insaan si Jesus te menge etew, ke sikandan te, “Hengkey is ebeelan dey emun edtumanen dey is ebpeveelan kenami te Megbevayà?” 29Ne midtavak si Jesus te, “Iyan heini ebpeveelan keniyu te Megbevayà: siak is midsug̵ù te Megbevayà kayi te kelibutan, tuu kew kediey.” 30Ne zutun migkeg̵iyan dan en maan te, “Hengkey is egkein-inuwan he igkepeehè nu kenami wey key meketuu kenikew? 31Su zengan is menge kepuun tew, hein diyè dan te tanà he kenà ed-ubpaan te etew, mana is egkeenen he imbeg̵ey kandan te Megbevayà, su zuen insurat he Lalag te Megbevayà he egkag̵i te, ‘Egkeenen he ebpuun te langit is imbeg̵ey kandan ni Moises.’ ” 32Ne midtavak dutun si Jesus te, “Benar is egkeg̵iyen ku keniyu, kenà iyan si Moises nekeveg̵ey te egkeenen he nengeulug he ebpuun te langit, kekenà, iyan is Amey ku he Megbevayà. Ne is tutuu he egkeenen he ebpuun te langit, ibeg̵ey keniyu te Amey ku. 33Sikan is egkeenen he ibeg̵ey te Megbevayà, ebpenaug he ebpuun te langit ne iyan ebpekeveg̵ey te untung diyà te tivuuk he menusiyà.” 34Ne migkeg̵iyan dan si Jesus te, “Beg̵ayi key en keniyan te egkeenen he egkeg̵iyen nu ne kenà guntaan dà, kekenà, wazè en pidtemanan.” 35Ne midtavak si Jesus te, “Iyan a egkeenen he ebpekeveg̵ey te untung he wazà pidtemanan. Sikan is edsundan kediey, kenè en egkevitil wey sikan is edtuu kediey, kenè en maan egkemezahan.

36Iring te migkag̵i ku en keniyu he minsan te neehè niw en is menge egkein-inuwan he nehimu ku, kenè kew edtuu kediey. 37Is langun he menge etew he ibeg̵ey kediey te Amey ku he Megbevayà, ebpekesundan dan kediey, ne is edsundan kediey, edewaten ku. 38Iyan igkeg̵iya ku kayi keniyu su midhendini a he ebpuun te langit wey ku metuman is egkesuatan te Megbevayà he midsug̵ù kediey; kenè ku iyan edtumanen is kediey zà he egkesuatan. 39Ne is Amey ku he Megbevayà he midsug̵ù kediey, iyan din egkesuatan is: edlig-enan ku is langun he menge etew he imbeg̵ey zin kediey su wey wazà minsan sevaha kandan he kenà egkeveg̵ayan te untung. Ne ebenhawen ku sikandan keuzemà dutun te ketepusan he andew. 40Is langun he nesayud ke hentei a is anak din, ne edtuu kediey, egkesuatan te Amey ku he meveg̵ayi te untung he wazà pidtemanan ne ebenhawen ku keuzemà dutun te ketepusan he andew.”

41Ne zutun nengepauk ki Jesus haazà is menge punuan he menge Hudiyu tenged te migkag̵i zin he ke sikandin te, “Iyan a sikan is egkeenen he ebpuun diyà te langit.” 42Ne migkag̵i zan te, “Si Jesus dà duen heini. Anak sikandin ni Jose. Maan is egkeg̵iyen din he ebpuun sikandin diyà te langit he wazà mekeeles kenitew ke hentei is amey zin wey iney zin?” 43Ne midtavak si Jesus te, “Maan is egkepeukan a keniyu? 44Wazà minsan hentei he ebpekesundan kediey emun wazà sikandin ulini te Amey ku he iyan midsug̵ù kediey. Ne ke zuen edsundan kediey, ebenhawen ku sikandin keuzemà dutun te ketepusan he andew. 45Duen netagnà he insurat dengan te ebpeneuven te Megbevayà he edhenduen te, ‘Ebpenuruen te Megbevayà is tivuuk he menusiyà.’ Umba,” ke si Jesus, “is langun he ebpemineg te ibpenurù kandin te Amey ku he Megbevayà, edsundan kediey. 46Kenè ku iyan ibpesavut he zuen etew he nekeahà te Megbevayà su siak is midsug̵ù dini te Amey ku he Megbevayà, iyan e zà nekeahà kandin.

47Utew venar is egkeg̵iyen ku he is etew he edtuu kediey, naangken din en is untung he wazà pidtemanan. 48Iyan a kes egkeenen he ebpekeveg̵ey kayi te untung. 49Is egkeenen he mana, migkaan te menge kepuun niw zengan, hein diyè dan pa te tanà he kenà ed-ubpaan, iyan, nemematey zan gihapun, 50iyan, heini is egkeenen he ebpuun te langit, emun egkeenen heini te minsan hentei, duen din untung he wazà pidtemanan. 51Iyan a egkeenen he ebpuun te langit wey ebpekeveg̵ey te untung; ne ke zuen egkaan kediey kenè en ebpatey is gimukud din. Is egkeenen he ibeg̵ey ku, iyan is lawa ku. Ibeg̵ey ku heini su wey maangken te tivuk he menusiyà is untung he wazà pidtemanan,” ke si Jesus.

52Ne zutun egkesumpakì is menge punuan he menge Hudiyu. Ke sikandan te, “Ebmenmenuwen kayi te etew is kebeg̵aya zin kenitew te lawa zin su wey tew mekaan?” 53Ne migkag̵i si Jesus te, “Utew venar is egkeg̵iyen ku keniyu, siak is Kakey te Menusiyà, emun kenè kew egkaan te lawa ku wey emun kenè kew ed-inum te lengesa ku, wazè niw untung he wazà pidtemanan. 54Su is egkaan te lawa ku wey ed-inum te lengesa ku, nekeangken en te untung he wazà pidtemanan ne ebenhawen ku sikandin keuzemà dutun te ketepusan he andew; 55su is lawa ku wey is lengesa ku, egkehimu he keuyag̵an wey inumen te wazà pidtemanan. 56Is egkaan te lawa ku wey ed-inum te lengesa ku, kenà ed-awà dini te kediey ne siak, kenà a zaan ed-awà diyà te kandin. 57Is Amey ku he iyan midsug̵ù kediey, duen din untung, ne tenged dutun duen ku zaan untung. Ne iring din ded daan is egkaan kediey su ebeg̵ayan ku sikandin te untung he wazà pidtemanan. 58Heini is egkeenen he egkeg̵iyen ku, ne ziyà ebpuun te langit. Kenà iring te egkeenen he mana he migkaan te menge kepuun tew su nemematey zan gihapun; iyan, is minsan hentei he egkaan kayi te egkeenen he egkeg̵iyen ku, kenè en ebpatey is gimukud din te minsan keenu.” 59Iyan heini impenurù ni Jesus dutun te simbahan te menge Hudiyu ziyà te inged he Kepirnaum.

Is Kedsuwey te Menge Etew ki Jesus

60Ne hein nezineg te menge sumusundan din haazà is kebpenurù din, mezakel kandan is migkag̵i te, “Mereg̵en egkezawat heini is penurù din, ne hentei zà buwa is ebpekepemineg kayi?” 61Ne netuenan ni Jesus he zuen menge sumusundan din he neepes te impenurù din, ne ke sikandin diyà te kandan te, “Igkeepes niw ve heini is migkag̵i ku? 62Hengkey vuwa is egkekag̵i niw emun siak is Kakey te Menusiyà, egkeahà a keniyu is ebetunen pehendiyà te zivavew, diyà te langit he mibpuunan ku. 63Iyan dà ebpekeveg̵ey te untung he wazà pidtemanan is Wag̵as he Mulin-ulin. Wazà egkehimu te lawa zà duen. Is menge lalag he migkag̵i ku keniyu, diyà ebpuun te Wag̵as he Mulin-ulin, ne ebpekeveg̵ey te untung he wazà pidtemanan. 64Duen duma keniyu he wazà medtuu kediey,” ke si Jesus. (Umba migkag̵i zin haazà su netuenan din he zaan ke hentei is wazà medtuu, ne netuenan din daan ke hentei is ed-akal kandin.) 65Ne impelaus din haazà is egkeg̵iyen din, ke sikandin te, “Tenged kayi egkeg̵iyen ku keniyu he wazà minsan hentei he ebpekesundan kediey emun wazà sikandin ulini te Amey ku he Megbevayà.”

66Ne puun dutun mezakel is menge sumusundan he midsuwey kandin ne wazè en sikandan mebpekiduma kandin. 67Ne zutun migkeg̵iyan ni Jesus sikan is sepulù wey zezuwa he menge epustul, ke sikandin te, “Sikiyu zaan, edsuwey kew ve kedì?” 68Ne midtavak si Simon, sikan is migeraran ki Pedro, ke sikandin te, “Wazà duma he egkesundanan dey su iyan ke zà ebpenurù te paag̵i te kebpekeangken te untung he wazà pidtemanan. 69Edtuu key kenikew su netuenan dey he iyan ka sikan is mibpilì te Megbevayà he ibpahadì.” 70Ne migkag̵i kandan si Jesus te, “Siak, mibpilì ku sikiyu is sepulù wey zezuwa, iyan, sakup ni Setanas is sevaha keniyu.” 71Iyan egkeg̵iyen din si Hudas he anak ni Simon he tigKeriyuti su sevaha sikandin dutun te sepulù wey zezuwa, ne iyan si Hudas ed-akal kandin.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index