Search form

Juan 9

Is Etew he Lakap En Puun te Ked-enaka Kandin

1Ne zutun te kedhiphipanew ni Jesus, neehè din is etew he puun pa te ked-enaka kandin ne lakap en. 2Ne mid-insaan si Jesus te menge sumusundan din, ke sikandan te, “He Menunudlù, hentei vuwa is mid-ulaula te mezaat, iyan be heini is lakap wey ke iyan be is iney zin wey ke amey zin be su maan is te ked-enaka kandin daan en he lakap?” 3Ne midtavak si Jesus te, “Kenà tenged te salè din is kegkelakap din wey kenà daan tenged te salà te amey zin wey iney zin, kekenà, iyan ingkelakap din su wey ikepaahà pinaag̵i kandin is gehem te Megbevayà. 4Te kemulu pa maandew, he ke và dà egkeg̵iya, te kemulu ki pa uuyag, kinahanglan he edtumanen ta is ebpeveelan kenita te Megbevayà he midsug̵ù kediey su emun mezukilem wazà ebpekevaal. 5Kayi te zini e pa te kelibutan, iyan a kerayag he ebpeketayew te tivuuk he menusiyà.” 6Ne te nekag̵i ni Jesus haazà, mid-ilevan din is tanà ne migkuwa zin sikan is basak he neveelan dutun te ileb din ne indazas din diyà te mata zutun te lakap. 7Ke sikandin te, “Hendiyè ka te linew he egngezanan te Siluwi ne pendapug ka zutun.” (Is kehulug̵an te lalag he Siluwi, iyan is: midsug̵ù.) Ne midhendutun haazà is lakap ne mibpendapug. Ne hein midlikù ebpekeehè en.

8Is menge siringan din wey is menge etew he layun ebpekeahà kandin te lilimusan he lakap, migkag̵i zan te, “Henduen be te iyan sikandin kes iyan dà baal zin is ebpimpinuu he ebpelimus.” 9Ne migkag̵i is duma pa te, “Iyan iyan sikandin.” Ne migkag̵i zaan is duma te, “Kenà iyan, iyan, henduen be te iyan sikandin.” Ne midtavak haazà is neulian he lakap te, “Iyan a iyan sikan is lakap.” 10Ne migkag̵i is menge etew te, “Emun iyan ka, nemenumenu is kegkeulii te mata nu?” 11Ne midtavak haazà is neulian te, “Sikan is etew he egngezanan ki Jesus, mid-ilevan din is tanà ne indazas din is neveelan he vasak dini te mata ku, ne migkeg̵iyan e zin he medhendiyà a te linew he Siluwi ne mebpendapug a. Ne midhendiyà a te egkeg̵iyen din he linew ne mibpendapug a, ne puun dà dutun ebpekeahà ad.” 12Ne mid-insà is menge etew te, “Hendei sikandin?” Ne midtavak haazà is etew te, “Wazè ku metueni.”

Is Ked-imbistiga te Menge Perisiyu

13Ne zutun miduma zan diyà te menge Perisiyu haazà is neulian he lakap. 14Andew te Kedhimeley haazà is kebeeli ni Jesus dutun te vasak he imbawì din dutun te mata te lakap. 15Ne is menge Perisiyu, in-insè dan iuman dutun te etew is paag̵i te kegkeulii zutun te ked-ehè din. Ne ke sikandin te, “Indazas ni Jesus is basak dini te mata ku, ne mibpendapug a ne zutun ebpekeahà ad.” 16Ne zutun migkag̵i is duma zutun te menge Perisiyu, ke sikandan te, “Heini si Jesus, kenà iyan sikandin sug̵ù te Megbevayà su edsupaken din layun is kesug̵uan mehitenged te Andew te Kedhimeley.” Iyan, migkag̵i zaan is duma pa he menge Perisiyu te, “Emun mesinupaken he etew, kenè din egkehimu is menge egkein-inuwan he iring kayi!” Ne zutun kenè dan egkengeuyun.

17Ne tenged dutun mid-insaan dan en maan haazà is neulian he lakap, ke sikandan te, “Sikew, hengkey is kenikew he isip mehitenged kandin su kenikew he menge mata is mibewian din?” Ne midtavak haazà is etew te, “Ebpeneuven sikandin te Megbevayà.” 18Ne is menge punuan he menge Hudiyu, wazè dan dutun meketuu he lakap sikandin he neulian. Umba, impetawag dan is iney wey amey zutun te neulian he lakap, 19ne mid-insaan dan sikandan. Ke sikandan te, “Anak niw ve heini? Benar ve is egkeg̵iyen he lakap sikandin he zaan puun pa te ked-enaka kandin? Nemenumenu is kegkeulii te menge mata zin?” 20Ne midtavak is menge g̵inikanan dutun te neulian, ke sikandan te, “Netuenan dey he anak dey heini; ne netuenan dey zaan he lakap en sikandin puun pa te ked-enaka kandin. 21Iyan, ke nemenumenu is kebpekeehè din wey ke hentei is nekevawì te menge mata zin, wazè dey metueni. Deyzey ke iyan niw sikandin insai su meg̵urang en sikandin; egkehimu he iyan sikandin edtavak.” 22Umba iyan haazà tavak dutun te menge g̵inikanan din su nahandek dan te menge punuan he Hudiyu su neuyun en he zaan is menge punuan he ke zuen egkag̵i he iyan si Jesus sikan is mibpilì te Megbevayà he ibpahadì, ne haazà is egkag̵i, kenè dan en ibpeseled te menge simbahan dan. 23Ne tenged dutun migkag̵i haazà is menge g̵inikanan din te, “Meg̵urang en sikandin; iyan niw insai.”

24Ne zutun mid-umanan dan umawa haazà is neulian he lakap ne migkeg̵iyan dan te, “Iyan nu keg̵iya is tutuu su kayi ka te etuvangan te Megbevayà. Netuenan dey he heini si Jesus, mesinupaken sikandin te sug̵ù te Megbevayà.” 25Ne midtavak is etew te, “Kenè ku egketuenan ke mesinupaken be sikandin wey ke kenà. Iyan dà egketuenan ku is: hein aney, lakap a iyan, ne g̵untaan ebpekaahà ad!” 26Ne mid-uman dan megkag̵i te, “Hengkey is mibeelan din kenikew? Mibmenumenu zin is kebewii zin te mata nu?” 27Ne midtavak haazà is neulian te, “Nekag̵i ku en keniyu ne wazè kew mebpemineg. Maan is egkesuatan niw te ed-uman ebpemineg? Kela ke egkesuatan niw he mehimu kew zaan he menge sumusundan ni Jesus!” 28Ne nepauk dan dutun ne mezaat is menge lalag dan kandin, ke sikandan te, “Iyan ka sumusundan din; sikami mulà, sumusundan key te ebpeneuven dengan he si Moises! 29Netuenan dey he zengan midlelag̵an si Moises te Megbevayà, iyan, heini he etew, wazè dey hanew ke hendei sikandin ebpuun.” 30Ne midtavak maan haazà is etew te, “Utew ku heini igkeinuinu! Duen gehem ni Jesus ne mibewian din is menge mata ku, ne minsan pa zutun wazè niw ves metueni ke hendei sikandin ebpuun! 31Netuenan tew he is Megbevayà, kenè din edtevangan is mesinupaken he etew, iyan, ke zuen etew he ed-azap kandin wey edtuman te egkesuatan din, iyan edtevangan din. 32Puun pa te kedlimbag̵a te kelibutan taman en guntaan sikan tew pa mezineg is etew he ebpekevawì wey meulii is mata te etew he zaan en he lakap puun pa te ked-enaka kandin. 33Ke kenà sug̵ù si Jesus te Megbevayà wazà egkehimu zin.”

Is Tutuu he Lakap

34Ne midtavak dutun is menge punuan te, “Ebpenurù ke ve kenami he mesinupaken ke man utew puun pa te ked-enaka kenikew!” Ne zutun migkeg̵iyan dan sikandin he kenè dan en maan ebmehimuwen he ebpekeseled sikandin diyà te menge simbahan dan te menge Hudiyu.

35Ne nezineg ni Jesus haazà is mid-ulaula te menge punuan he menge Hudiyu zutun te neulian he lakap, ne mibpen-ehè din, ne hein neehè din mid-insaan din te, “Edtuu ke ve te Kakey te Menusiyà?” 36Ne midtavak haazà is etew te, “Keg̵iya nu kediey ke hentei sikandin su wey a meketuu kandin.” 37Ne midtavak si Jesus te, “Neehè nu en su siak is ebpekidlalag kenikew, iyan a.” 38Ne egkag̵i haazà is etew te, “Emun iyan heeyan, edtuuwan ku sikew.” Ne zutun mid-azap din si Jesus.

39Ne migkag̵i si Jesus diyà te kandin te, “Umba midhendini a te kelibutan su wey mesusi is nengeulaula te menge etew. Ne is etew he netuenan din he lakap is kedsavut din, ebewian ku wey mebmeupiya is kedsavut din. Ne is etew he egkeg̵iyen din he kenà lakap is kedsavut din, utew pa ed-iseg is kegkelakap te kedsavut din.” 40Ne zuen menge Perisiyu he nekezineg dutun te menge lalag din, ne ke sikandan te, “Lakap bes is kedsavut dey?” 41Ne midtavak si Jesus te, “Emun wazè niw metueni he lakap is kedsavut niw, wazè niw g̵eina salà, iyan, geina te egkag̵i kew he meupiya is kedsavut niw te hustu, kenà egkeawà is salè niw.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index