Search form

Lucas 10

Is Kepituwan Wey Zezuwa he Midsug̵ù ni Jesus

1Ne hein neipus heini, duen daan kepituwan wey zewuwa he menge maama he nepilì te Nengazen he si Jesus su ibpehuna zin ibpehipanew te tigduwazuwa ziyà te langun he menge inged he ebpemeyaan din daan. 2Ne migkag̵i sikandin diyà te kandan te, “Mezakel pezem is edawat te Meupiya he Tudtulanen. Iring sikandan te kamet he nelutuan en. Utew meluag is kamet, iyan, deisey kiw zà is ebpemenlegtey. Iampù niw ziyà te Nengazen he sug̵ua zin pa ziyà te kamet din is duma pa he ebpekelegtey. 3Genat kew en, iyan, andam kew su edsug̵uen ku sikiyu ziyà te menge etew he kumekaid. Iring kew te menge nati he kerehidu ne sikandan ne iring te menge erimaung. 4Kenè kew med-uwit te selapì, wey kempilù, wey sepatus he ed-ilisan niw. Ne kenà utew melug̵ayad is kedlelag̵i niw te etew he egkeuma niw ziyà te zalan.

5Ne ke hendei is baley he ebpemenehikan niw ne penelehuzan kew. Kag̵i kew te, ‘Sikiyu is meg̵inged kayi, tuvazi kew te Megbevayà.’ 6Ne emun dait he edtuvazan is etew zutun dekelà is tuvad te Megbevayà kandan. Ne emun kenà, ne kenà sikandan edleusan edtuvazi te Megbevayà. 7Ne haazà is baley he zuen etew he egalewg̵alew keniyu, ne zutun kew pundu taman te kegenat niw. Ne zewata niw is minsan hengkey he ibpekaan dan wey ibpeinum dan keniyu su iring te suhul zan keniyu. Dait is edterebahu he edsuhulan. Kenè kew en penhalinhalin pa maan diyà te zuma pa he menge valey. 8Ne emun ebpekeuma kew ziyà te inged ne zuen egalewg̵alew keniyu, minsan hengkey is keenen dan he ibpekaan dan keniyu, ne keena niw. 9Pemewii niw is egkengezeruwan dutun te inged. Ne keg̵iyi niw is menge etew zutun he meg̵aan en is timpu te kedhedii kandan te Megbevayà. 10Iyan, emun ebpekeuma kew ziyà te inged ne wazà egalewg̵alew keniyu zutun, ne peehè kew te menge etew zutun, ne ke sikiyu te, 11‘Minsan is menge eliyavuk kayi te inged niw he nemendeket te menge paa zey, edtektaken dey en wey niw metueni he edsilutan kew te Megbevayà.’ Ne ke sikiyu zaan te, ‘Kinahanglan he metueni niw he meg̵aan en is timpu te kedhadì te Megbevayà.’ 12Egkeg̵iyen ku keniyu,” ke si Jesus, “he lavew pa is idsilut te Megbevayà dutun te inged emun egkeuma keuzemà is andew te kedsilut, kenà te silut din dengan diyà te menge lalung he etew he meg̵inged diyà te inged he Suduma.”

Is Kedhukumi te Kenà Edtuu

(Lucas 10:13-16; Mateo 11:20-24)

13Ne mid-uman megkag̵i si Jesus te, “Mekehizuhizu kew keuzemà is menge tigKurasin! Mekehizuhizu kew zaan keuzemà is menge tigBitsayda. Su is menge egkein-inuwan he impeehè ku ziyan te inged niw te menge Hudiyu, angin ke midhimu ku haazà diyà te menge inged he Tiru wey Sidun he kenà menge Hudiyu is meg̵inged dutun, su nekekukumbalè dan en pezem te saku ne nepen-evuwan dan en is ulu zan he tuus te ed-iniyug̵an dan is memezaat he ulaula. 14Kenè niw lipati he zutun keuzemà te andew te kedsusi te Megbevayà te menusiyà, lavew is silut din keniyu kenà te menge etew ziyà te Tiru wey Sidun. 15Ne sikiyu zaan,” ke si Jesus, “is menge tigKepirnaum, iyan egkesuatan niw pezem is delig̵a kew te minsan hentei, iyan, igketimbag kew ziyà te Impirnu.”

16Ne zutun migkeg̵iyan din haazà is menge sumusundan din te, “Is minsan hentei he etew he ebpemineg te ibpenurù niw, ne iring te iyan e zin nepemineg. Ne sikan is etew he kenè kew zin edseg̵ipaan, ne iring te iyan a wazè din seg̵ipaa. Ne sikan is etew he kenà edseg̵ipà kedì, ne iyan wazè din seg̵ipaa is Megbevayà he midsug̵ù kedì.”

Is Kedlikù Duen te Kepituwan Wey Zezuwa

17Ne nepipira pa he andew zutun hein nemekeulì sikan is kepituwan he midsug̵ù, utew zan nengelipey su ke sikandan diyà te ki Jesus te, “Minsan is menge mezaat he mulin-ulin ne ebpemineg̵en key zan ke ibpaawè dey sikandan pinaag̵i te g̵ehem te ngazan nu!” 18Ne zutun migkeg̵iyan sikandan ni Jesus te, “Si Setanas, is egalen te menge mezaat he mulin-ulin, neehè ku is kegkezaag̵a niw kandin ne utew meg̵aan su iring te kilat he ebpuun te langit. 19Tentenuzi niw heini he mibeg̵ayan ku sikiyu te g̵ehem he minsan ke ebpekeg̵iek kew te uled wey venayew ne kenè kew edhereg̵en. Ne kenè kew zaan egkezaag te g̵ehem te ukag tew he si Setanas ne wazà minsan hengkey he ebpekekaid keniyu. 20Iyan, kenè niw iyan ikelipey is kebpemineg̵a keniyu te menge mezaat he mulin-ulin, kekenà, ikelipey niw is menge ngazan niw he impelista te Megbevayà diyà te langit.”

Is Kebpengumew-umew ni Jesus

(Lucas 10:21-24; Mateo 11:25-27; 13:16,17)

21Ne zutun midlipey si Jesus te Wag̵as he Mulin-ulin ne mid-ampù diyà te Megbevayà, ke sikandin te, “Amey ku he Nengazen te langit wey tanà, dekelà is kebpeselemati ku kenikew su is in-eles nu su wey kenà mesavut te menge uluwanen wey uvag en memetau ne impesavut nu en diyà te menge etew he wazè dan menge hanew. Amey ku, umba ebpeselematan ku su midhimu nu heini te iring kayi su iyan egkesuatan nu tenged te g̵ag̵ew nu.”

22Ne zutun mid-uman megkag̵i si Jesus diyà te menge etew te, “Is minsan hengkey, insarig kediey te Amey ku he Megbevayà. Wazà nesayud kedì te Anak te Megbevayà, kekenà, iyan dà is Amey ku he Megbevayà. Ne wazà daan nesayud te Amey ku he Megbevayà, kekenà, iyan e zà is Anak din wey sikan is menge etew he mibpengelinteuwan ku he mesayud dan kandin.”

23Ne midsineruwan ni Jesus is menge sumusundan din hein iyan dan dà, ne ke sikandin te, “Deyzey kew he menge etew su nemetmetahan niw en heini is langun he edhimuwen ku. 24Su tutuu is egkeg̵iyen ku keniyu he kenà pira zà is menge ebpemeneuven te Megbevayà dengan wey menge hadì dengan he egkesuat pezem he mekeahà kayi te nengeehè niw g̵untaan, iyan, wazà ipaahà kandan. Ne egkesuatan dan daan he ebpemineg̵en heini is nengezineg niw g̵untaan, iyan, wazà ipepemineg kandan.”

Is Sempità Mehitenged te Meupiya he Etew he TigSemarya

25Ne zutun duen sevaha he etew he menunudlù te menge kesug̵uan te menge Hudiyu he midhitindeg su egezaman din edekepa is ketezengan ni Jesus pinaag̵i te menge insà, ne ke sikandin te, “He Zatù, hengkey is ed-ul-ulahan ku wey a meveg̵ayi te untung he wazà pidtemanan?” 26Ne midtavak si Jesus te, “Hengkey is nekag̵i te kesug̵uan te Megbevayà he imbilinbilin ni Moises? Hengkey is kedsevuta nu te nengevasa nu?” 27Ne midtavak haazà is etew te, “Is Megbevayà he Nengazen tew, kinahanglan he iyan tew sikandin ebmahalen dini te g̵ehinawa tew. Iyan sikandin mahal zini te g̵ehinawa tew, isip tew, kedsavut tew, wey tivuuk he ulaula tew. Ne kinahanglan daan he ebpurungan tew is duma tew; ed-isipen tew sikandin he iring en te kenitew he g̵ehinawa.” 28Ne zutun migkag̵i si Jesus diyà te kandin te, “Benar is nekag̵i nu. Ne iyan ul-ulaha nu ne ebeg̵ayan ka te untung he wazà pidtemanan.”

29Iyan, haazà is menunudlù te kesug̵uan, egkesuatan din pezem he meisip ni Jesus he hustu is menge ulaula zin, umba migkag̵i sikandin te, “Hentei is nekag̵i he zuma ku?” 30Ne ke si Jesus te, “Duen sevaha he etew he Hudiyu he midhipanew ebpuun diyà te inged he Hiruselim he sebsevaha zin su edtupang pehendiyà te inged he Hiriku. Ne ziyà te zalan neuma sikandin te menge tulisan ne mibug̵el zan sikandin ne midlevasan dan, ne wey zan ewai hein deisek dà is gehinawa zin. 31Ne te kegkeipus dutun te menge tulisan, nekeuma zutun is Hudiyu he memumuhat te Megbevayà, iyan, hein neehè din haazà is midruug he nekehidhizeg̵à, mid-elig̵u zin ne midlaus te hipanew zin.

32Ne iring din ded daan is nekesunud he nekeuma zutun. Hudiyu zed daan he kevuwazan ni Levi he edtavangtavang te menge memumuhat diyà te simbahan he Valey te Megbevayà, iyan, hein neehè din haazà is nekehidhizeg̵à ne mid-elig̵u zin daan ne midlaus te hipanew zin.

33Ne wazà utew meug̵et ne nekeuma zutun daan is sevaha he kenà Hudiyu su tigSemarya. Ne hein neehè din haazà is nekehidhizeg̵à he midruug ne utew sikandin nehizu. 34Ne mid-uvayan din ne mibewian din te lana wey vinu is menge palì dutun ne mibukusan din te manggad. Ne zutun mibitbit din ne in-untud din te kudè din ne mid-uwit din diyà te valey he hulevungà te menge etew ne zutun mibpurungan din elimahi. 35Ne te nepawà dutun ne mibeg̵ey te selapì dutun te teg̵ig̵aked te valey ne migkag̵i te, ‘Elimahi nu kedì heini is midruug te tulisan ne emun duen selapì nu pa he egkeg̵astu nu kandin he liyu kayi te ibeg̵ey ku, ne zutun te kedlikù ku ne ed-ilisan ku ziyan te kenikew.’ ”

36Ne ke si Jesus diyà te menunudlù te, “Hentei zutun te tetelu he etew is nehimu he hustu he zuma zutun te midruug te menge tulisan?” 37Ne midtavak haazà is menunudlù te, “Iyan nehimu he hustu he zuma zutun te midruug te menge tulisan haazà is nehizu kandin he etew ne midtavang kandin.” Ne ke si Jesus te, “Iyan haazà ul-ulaha nu is iring dutun.”

Si Marta Wey si Maria

38Ne hein midlaus ensi Jesus, ne nekeuma zan diyà te sevaha he inged he zuen dutun bahi he egngezanan ki Marta. Impepemenahik ni Marta si Jesus dutun te valey zin. 39Ne zuen dutun hazi ni Marta he egngezanan ki Maria. Ne mibpinuu si Maria ziyà te uvey ni Jesus su ebpurung ebpemineg te menge penurù ni Jesus. 40Ne si Marta, ne iyan dà sikandin diyà te avu su ebaal te egkekaan dan ne mezakel is igkesamuk din he ebeelan din. Ne zutun mid-uvey sikandin diyà te ki Jesus he ke sikandin te, “Meupiya ve te g̵ehinawa nu he iyan e zà egkeviyuviyu he ebaal te egkekaan tew? Sug̵ua nu si Maria he ug̵upi e zin.” 41Iyan, migkag̵i si Jesus te, “Marta, utew mezakel is igkesemuki nu he kenà utew ebpulus. 42Sevaha zà is dekelà is pulus din he iyan mibpilì ni Maria ne kenà heini igkeawà diyà te kandin.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index