Search form

Lucas 18

Is Hangyù te Valu he Vahi

1Ne zuen en maan sempità he impezineg ni Jesus te menge sumusundan din. Ibpesavut din kandan dutun he kinahanglan he kenè dan bungasa te layun ked-ampù ne kenà daan med-engked he edsarig te Megbevayà. 2Ne ke sikandin te, “Duen huwis diyà te sengeinged; ne haazà is huwis, ne kenà egkehandek te Megbevayà ne wazè din daan kedtahud te minsan hentei he etew. 3Ne zutun te inged ne zuen daan balu he vahi he layun ebpehendutun te huwis su edhangyù he ebpetavang. Ke sikandin dutun te huwis te, ‘Tevangi a kenikew su wey kenà meileg te kuntada ku is menge azen ku.’ 4Ne neug̵et en haazà he kenà edseg̵ipaan dutun te huwis is hangyù dutun te vahi. Ne g̵eina te neug̵et en is layun kedlikùlikù dutun te vahi he edhangyù diyà te kandin, ne neisip dutun te huwis is, ‘Minsan wazè ku kehandek te Megbevayà ne wazè ku zaan kedtahud te minsan hentei etawa, 5edtevangan ku nasì heini is bahi su wey mekeengked is ed-uringer kedì.’ ” 6Ne ke si Jesus te, “Isipa niw is mid-ulaula zutun te huwis he kenà pezem metazeng is kedhusey zin. 7Su emun nehimu he midtevangan din haazà is bahi, iyan pe be kenà tevangi te Megbevayà sikiyu is menge nengepilì din he etew he ebpenigudu ed-ampù diyà te kandin te mezukilem wey maandew. 8Egkeg̵iyen ku keniyu he utew meg̵aan is kedtevangi zin keniyu. Kenà ebungasen is Megbevayà he edtavang keniyu. Iyan, keuzemà emun edlikù a is Kakey te Menusiyà dini te kelibutan mezelag dà is etew zutun he neketuu kedì.”

Is Ampù te Perisiyu wey Menunukut te Vuhis

9Ne sengeandew maan dutun ne impezineg ni Jesus is sempità. Ne heini is sempità, ne iyan egkesug̵at is menge etew he kunaan dan ke iyan dan dà memeupiya is ulaula ne edsudien dan is langun he menge zuma he etew. 10Ne ke si Jesus te, “Duen dezuwa he etew he midhendiyà te zekelà he simbahan he Valey te Megbevayà su ed-ampù dan. Ne is sevaha zutun, ne Perisiyu, ne is sevaha, ne menunukut te vuhis. 11Ne midhitindeg haazà is Perisiyu ne mid-ampù pinaag̵i te g̵ehinawa zin, ke sikandin te, ‘Megbevayà, ebpeselamat a kenikew su kenà a iring te zuma. Kenà a leg̵ezen; kenà a ebpenlimbung; kenè ku edselselaan is esawa ku. Ebpeselamat a zaan kenikew su kenà a iring keniyà te limbungan he menunukut te vuhis. 12Kezezuwa a edsalang te kegkaan te sengesimana ne ibeg̵ey ku ziyà te kenikew is ikesepulù he vahin te langun he egketig̵eyunan ku!’ ke sikandin. 13Iyan, haazà is sevaha he etew he menunukut te vuhis, ne mibpekeziyù sikandin is ebpekezuzungul ne egkepenempaling din is kumeng din su utew neseeng. Ne mid-ampù sikandin diyà te Megbevayà he egkag̵i te, ‘Megbevayà, ikehizu a utew kenikew is sevaha he etew he mekesesalà!’ ” 14Ne ke si Jesus dutun te, “Benar is egkeg̵iyen ku he haazà is menunukut te vuhis, hein mid-ulì diyà te valey zin ne wazè en isipa te Megbevayà is salè din su nepesaylu en. Iyan, kenà iring dutun haazà is gelbuwen he Perisiyu su is etew he kunaan din ke utew lavew sikandin diyà te etuvangan te Megbevayà, ne ebminusen sikandin te Megbevayà, iyan, is etew he netuenan din he utew sikandin mekesesalà, ne ibpelavew sikandin te Megbevayà.”

Si Jesus wey kes Dezeisey he Menge Vatà

(Lucas 18:15-17; Mateo 19:13-15; Marcos 10:13-16)

15Ne sevaha maan he andew ne zuen menge etew he mid-uwit dan is menge anak dan he zezeisey pa ziyà te ki Jesus wey zin mezepeneti te palad din wey mepenubtuvazi. Ne is menge sumusundan ni Jesus, midawey zan haazà is menge etew. 16Iyan, si Jesus, mid-umew zin diyà te kandin haazà is menge vatà ne ke sikandin diyà te menge sumusundan din te, “Ipehendini niw te kediey heeyan is menge vatà; ne kenè niw zewaya su is etew he zuen din kedsarig he iring te kedsarig te vatà ne iyan ebpekepahadì te Megbevayà. 17Benar is egkeg̵iyen ku keniyu he ke zuen etew he kenà iring is kedsarig din te Megbevayà te kedsarig te zezeisey he vatà, ne kenà egkehedian haazà is etew te Megbevayà.”

Sikan is Sepian he Egalen

(Lucas 18:18-30; Mateo 19:16-30; Marcos 10:17-31)

18Ne zuen timpu he zuen sevaha he punuan he Hudiyu he mid-insà ki Jesus te, “He Zatù, utew meupiya is menge ulaula nu. Hengkey is ed-ul-ulahan ku wey a meveg̵ayi te untung he wazà pidtemanan?” 19Ne midtavak si Jesus, ke sikandin te, “Maan is egkag̵i ka he meupiya is ulaula ku su sebsevaha zà is meupiya is menge ulaula zin ne iyan is Megbevayà. 20Netuenan nu sikan is menge sug̵ù te Megbevayà he imbilinbilin kenitew he iyan is: kenè nu selselai is esawa nu; kenè ka mebunù; kenè ka mebpenakew; kenè ka medtarùtarù diyà te hukmanan; ne tehuza nu is amey nu wey iney nu.” 21Ne midtavak haazà is maama ziyà te ki Jesus, ke sikandin te, “Menunudlù, is langun keniyan, mibenteyanan ku ne wazè ku nesupak puun pa te vatè e pa.” 22Ne hein nezineg ni Jesus haazà, migkeg̵iyan din te, “Duen nu pa kurang; iyan is: ulì ka ne ivelegyè nu is langun he azen nu, ne is halin, ipemeg̵ey nu ziyà te egkengeayuayu ne edsepian ka ziyà te langit. Ne ke egkeipus nu heeyan, likù ka zini wey ka mekesundan kediey.” 23Ne hein nezineg dutun te etew is sambag ni Jesus ne utew mibmesakit is gehinawa zin su zekelà is ketig̵eyunan din.

24Ne zutun midtengtengan sikandin ni Jesus ne ke si Jesus te, “Utew mereg̵en te sepian he etew is kebpesakup din te Megbevayà wey mehedii sikandin te Megbevayà. 25Kenè din egkehimu su melemu pa te langgam he kemilyu is kedseled din diyà te vudsi te rag̵um, kenà te sepian he etew te kebpesakup din te Megbevayà wey sikandin mehedii.” 26Ne hein nezineg heini te menge etew, ke sikandan te, “Ne emun kenà egkehimu te sepian ne kenè bes egkehimu te minsan hentei is ked-angken te untung he wazà pidtemanan.” 27Ne midtavak si Jesus te, “Kenà iyan egkehimu te etew, iyan, egkehimu mulà te Megbevayà he meveg̵ayi sikandan te untung he wazà pidtemanan su egkehimu zin is langun.”

28Ne zutun migkag̵i si Pedro te, “Sikami, mid-ewaan dey is langun he menge azen dey wey key mekesunud kenikew.” 29Ne ke si Jesus te, “Benar is egkeg̵iyen ku he emun duen etew he mid-ewaan din is baley zin, is esawa zin, is menge suled din, is menge g̵inikanan din, wey is menge anak din su wey zin ikepesavut te menge etew is kedhedii kandan te Megbevayà, 30ne utew zekelà is suhul te Megbevayà kandin te kemulu pa sikandin dini te kelibutan ne keuzemà te timpu te kedhukum te Megbevayà, ebeg̵ayan sikandin te untung he wazà pidtemanan.”

Is Iketelu he Kegkeg̵iya ni Jesus te Kemetayen Din

(Lucas 18:31-34; Mateo 20:17-19; Marcos 10:32-34)

31Ne zutun migkeg̵iyan ni Jesus haazà is sepulù wey zezuwa he menge sumusundan din he medtapid dan ne ke sikandin dutun te, “Netuenan niw he edhendiyè kiw te inged he Hiruselim ne emun ebpekeuma kiw zutun ne sikan is langun he insurat he nengetagnà te ebpemeneuven dengan te Megbevayà mehitenged kedì, ne egkengetuman en. 32Siak is Kakey te Menusiyà, ne ibpalad a ziyà te menge etew he kenà menge Hudiyu ne haazà he menge etew, ne edsumpeliten e zan, ed-el-elezen e zan, ne ebpengilevan e zan. 33Ebug̵elen e zan, ne human e zan edhimetayi. Iyan, seled te tetelu he andew zutun ne ebenhawen a te Megbevayà,” ke si Jesus. 34Iyan, haazà is menge sumusundan din, ne wazè dan mekesavut dutun te egkeg̵iyen din. In-eles kandan haazà is kehulug̵an dutun ne wazè dan metueni ke hengkey haazà is ibpesavut kandan ni Jesus.

Is Kebewii Zuen te Lakap

(Lucas 18:35-43; Mateo 20:29-34; Marcos 10:46-52)

35Ne hein uvey zan en diyà te inged he Hiriku ne zuen dutun lakap he ebpimpinuu ziyà te kilid te zalan ne iyan dà baal zin is edtepayà su ebpemumuyù te limus. 36Ne hein nezineg dutun te lakap is dabekdabek te mezakel he menge etew he edsag̵ad ne nekeinsà ke hengkey en haazà. 37Ne zuen migkag̵i ziyà te kandin te, “Iyan si Jesus he tigNeserit is edsag̵ad.” 38Ne hein nezineg din haazà, ne mid-umew sikandin te, “He Jesus he kevuwazan te hadì dengan he si David, kehizuwi a kenikew!” 39Ne haazà is menge etew he edhuhuna ki Jesus, ne midawey zan haazà is etew wey med-engked sikandin, iyan, nasì en ebpekezag̵ing sikandin he egkag̵i te, “He kevuwazan te hadì dengan he si David, kehizuwi a kenikew!” 40Ne zutun midteren si Jesus ne migkag̵i he ipehendutun te kandin haazà is lakap. Ne hein impeetuvang dan en ki Jesus ne migkag̵i si Jesus te, 41“Hengkey is egkesuatan nu he ebeelan ku?” Ne midtavak haazà is lakap te, “Iyan egkesuatan ku is: mekeahà is menge mata ku.” 42Ne migkag̵i si Jesus te, “Mekeehè ke en; is kedsarig nu kediey, ne iyan igkeulii te menge mata nu.” 43Ne segugunà nekeahà haazà is lakap. Ne zutun midumazuma en sikandin ki Jesus is utew nekezalig te Megbevayà. Ne haazà is menge etew he nemekeahà dutun, ne nemekezalig dan daan te Megbevayà.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index