Search form

Lucas 19

Is Ked-iniyug̵i ni Sekiyu te Mezaat he Ulaula

1Ne nekeuma ensi Jesus diyà te inged he Hiriku ne zutun dan ebayà su edlaus dan pa. 2Ne zuen dutun maama he tigHiriku he egngezanan ki Sekiyu. Ne haazà si Sekiyu, ne iyan egalen te menge menunukut te vuhis dutun; ne sepian daan utew sikandin. 3Egkesuat pezem sikandin he mekeahà ki Jesus, iyan, kenè din egkeahà geina te nepurung en si Jesus melinguti te menge etew ne mevavà daan he etew si Sekiyu. 4Ne iyan mid-ulaula ni Sekiyu is: mibpelelag̵uy ziyà te egkehunaan ne mibpemenahik te kayu he egngezanan te sikemur he egkeseg̵azan ni Jesus su wey zin mepurungi te ed-ahà si Jesus ke edsag̵ad dutun. 5Ne hein nekeuma si Jesus dutun te puun te kayu he mibpemenehikan ni Sekiyu ne midteren ne midlingahà ne ke sikandin te, “He Sekiyu, gaanggaan ke en penaug keniyan su kinahanglan he ziyan a ebpemenahik te valey nu g̵untaan.” 6Ne zutun ne migaanggaan mebpenaug si Sekiyu ne midlimùlimù ki Jesus he utew egkelipey. 7Ne hein nezineg haazà te menge etew is lalag ni Jesus diyà te ki Sekiyu ne wazè dan mesuati ne pesikag̵i sikandan te, “Maan is ebpemenahik si Jesus diyà te valey te etew he utew mesinupaken te Megbevayà?” 8Ne si Sekiyu, hein nekeuma zan engki Jesus diyà te valey zin ne midhitindeg sikandin is egkag̵i te, “Ibeg̵ey ku is ketengà kayi te ketig̵eyunan ku ziyà te menge ayuayu. Ne minsan hentei he etew he nelimbungan ku zengan, ne id-ulì ku ziyà te kandin is keheepat egketakep haazà is nekuwa ku.” 9Ne migkag̵i si Jesus diyà te kandin te, “Sikew wey menge zuma nu zini te valey, edlibriyen kew g̵untaan te Megbevayà te silut tenged te menge salè niw su mid-iringan niw g̵untaan is kepuun niw he si Abraham su midtuu kew te Megbevayà. 10Ne siak is Kakey te Menusiyà, iyan inhendini ku te kelibutan su wey ku melibri te silut is langun he nemekesuwey te hustu he ibayà.”

Sikan is Tetelu he Sinerig̵an

(Lucas 19:11-27; Mateo 25:14-30)

11Ne haazà is menge etew he nemekezineg dutun te menge lalag ni Jesus, impezineg din pa kandan is sempità. Uvey zan en te inged he Hiruselim ne tenged dutun kunaan te menge etew ke ebpuunè en si Jesus edhadì. 12Ne tenged dutun migkag̵i zin heini is sempità. Ke sikandin te, “Duen sevaha he prinsipi he midtawag te lavew he hadì diyà te sengeg̵inhedian su edhimuwen sikandin he hadì dutun te kandin he inged. Ne emun egketapus haazà ne human ebpekeulì. 13Ne hein meg̵aan en sikandin edhipanew pehendiyà te sengeg̵inhedian, mid-umew zin is sepulù te menge sulug̵uen din ne kada sevaha zutun, mibeg̵ayan din te selapì. Ne neked-iiring is kezekelà te selapì he imbeg̵ey zin te kada sevaha. Ne migkag̵i sikandin diyà te kandan te, ‘Heini ve is selapì he ibpiyal ku keniyu, ne iyan kew en metau te ked-iseg din kedekelà taman te kenè e pa ebpekeulì dini,’ ke sikandin. 14Iyan, is menge meg̵inged dutun te inged te prinsipi, ne ingkeepes dan sikandin, ne hein migenat en, duen midsug̵ù dan he ibpetelukun kandin wey zan ikepesayud is lavew he hadì dutun te ebeyaan te prinsipi he kenè dan igkesuat he iyan mekehadì kandan haazà is prinsipi.

15Ne minsan pa zutun nehimu g̵ihapun he hadì haazà is prinsipi ne zutun te kebpekeulì din ne segugunè din mid-umew sikan is sepulù he impetipig din te selapì su ed-ahaan din ke sengemenu is uswag te selapì te kada sevaha. 16Ne migkag̵i is nehuna te, ‘Hadì, kesepulù metakep is selapì nu.’ 17Ne midtavak haazà is hadì te, ‘Utew meupiya heeyan. Meg̵ied ke ves iyan. Ne g̵eina te egkeserig̵an ka te minsan deisek he selapì ne iyan suhul ku kenikew is iyan ku sikew ibpezumala te sepulù he inged.’ 18Ne migkag̵i haazà is ikezuwa he sulug̵uen te, ‘Hadì, kelelima metakep is selapì nu.’ 19Ne midtavak haazà is hadì te, ‘Iyan ku sikew ibpezumala te lelima he inged.’ 20Ne zutun mid-uvey haazà is iketelu he sulug̵uen ne ke sikandin te, ‘Heini zed sikan is selapì nu he impiyal nu kedì. Midtegteg̵aman ku tengesa ne intag̵ù ku 21su ingkehandek ku sikew, su is egkekag̵i nu ne idteg̵el nu, ne ebperateng ka te uswag te ibpiyal nu te zuma nu. Ne iring ded daan te ibpepemula nu su ebperetengen nu is abut.’ 22Ne midtavak haazà is hadì te, ‘Lalung ke ves he sulug̵uen! Heeyan dà te menge lalag nu ne mibpesavut he nekesalè ke en kediey. Su netuenan nu ves he is egkekag̵i ku, ne idteg̵el ku, ne is ibpiyal ku, ne ebperetengen ku is uswag din, ne is ibpepemula ku ne ebperetengen ku is abut din. Ne utew venar heeyan. 23Ne maan is wazè nu ipeutang is selapì ku wey mebpursintuwi wey medekelà is egkekuwa ku kayi te kedlikù ku?’ 24Ne zutun migkag̵i haazà is hadì diyà te menge etew he ebpemenhithitindeg dutun te, ‘Kuwaa niw is selapì diyà te kandin ne iveg̵ey niw ziyà te nekepeuswag te kesepulù metakep!’ 25Ne migkag̵i zan te, ‘Duen en kandin su kesepulù metakep sikan is uswag te impetipig̵an nu kandin.’ 26Ne midtavak haazà is hadì te, ‘Benar is egkeg̵iyen ku keniyu he sikan is egkeserig̵an te insarig kandin, ed-umanan pa. Iyan, sikan is kenà egkeserig̵an, edhewien pa ziyà te kandin minsan is deisek he insarig kandin.’ 27Ne mid-uman megkag̵i haazà is hadì te, ‘Ne sikan is menge etew he kenè dan egkesuat he iyan a mekehadì kandan, ne uwita niw zini ne penhimetayi niw sikandan dini te etuvangan ku.’ ”

Is Kedhendiyà ni Jesus te Hiruselim

(Lucas 19:28-40; Mateo 21:1-11; Marcos 11:1-11; Juan 12:12-19)

28Ne hein neipus ni Jesus te egkag̵i haazà is sempità ne midlaus dan is edhipanew petekezeg diyà te Hiruselim. 29Ne hein uvey zan en diyà te inged he Bitpagi wey ziyà te inged he egngezanan te Bitanya he ebpeketekezeg dutun te vuvungan he egngezanan te Ulivuwan, ne midsug̵ù ni Jesus is dezuwa te menge sumusundan din. 30Ke sikandin te, “Hendutun kew te inged he egkeumahan tew ne emun ebpekeuma kew zutun, ne egkeehè niw is intagkes he asnu he nati he wazè pa meuntuzi. Hekazi niw ne uwita niw zini. 31Ne ke zuen ed-insà keniyu ke maan is edhekazan niw, kag̵i kew te, ‘Egkinehenglanen heini te Nengazen tew he si Jesus.’ ” 32Ne haazà is midsug̵ù din, hein nekeuma zan dutun ne wazè en medhehelinà sumalà is nekag̵i ni Jesus. Ne neehè dan haazà is asnu zutun. 33Ne hein edhekazan dan en haazà is asnu ne migkag̵i is menge teg̵ig̵aked dutun te, “Maan is edhekazan niw heeyan?” 34Ne midtavak dan te, “Egkinehenglanen heini te Nengazen tew he si Jesus.” 35Ne zutun mid-uwit dan diyà te ki Jesus haazà is asnu. Ne mibelhenan dan haazà te menge kumbalè dan ne impeuntud dan sikandin. 36Ne zutun tenged te ibpaahà te menge etew is dekelà he kedtahud dan ki Jesus, impendempas dan is menge impenamput dan diyà te ibayè din. 37Ne hein edtupang dan en dutun te vuvungan he Ulivuwan su uvey zan en diyà te inged he Hiruselim, ne langun dutun te menge sumusundan din he nemenduma kandin, utew zan nengelipey he edhabet edalig te Megbevayà tenged te langun he nengeehè dan he menge egkengein-inuwan he mibeelan ni Jesus. 38Ke sikandan is edalig te, “Delig̵a is hadì he ebpekeuma he midsug̵ù te Nengazen! Melinew en is kedepitè tew te Megbevayà! Delig̵a is Megbevayà diyà te langit!”

39Ne zutun te mezakel he menge etew he nengetig̵um dutun, duen menge Perisiyu. Ne migkag̵i zan diyà te ki Jesus te, “Dewaya nu heeyan is menge sumusundan nu.” 40Ne zutun midtavak si Jesus te, “Kenà egkehimu su emun ed-engked dan is ebpendalig ne iyan edsambey he ebpendalig is langun keniyan te menge vatu su utew kinahanglan guntaan he zuen ebpendalig.”

Is Hizu ni Jesus te Menge TigHiruselim

41Ne midlaus ensi Jesus pehendutun te inged he Hiruselim ne hein neehè din en haazà is inged ne midsineg̵awan din su utew sikandin nehizu te menge meg̵inged dutun. 42Ke sikandin te, “Angin pezem ke netuenan niw zà ke hengkey is hustu he ed-ul-ulahan su wey zuen kelinew ziyan te inged niw, iyan, kenè niw en guntaan egketuenan! 43Ne zuen andew he zutun egkeumahan kew te menge kuntada niw ne egkelingutan kew ne edtebeken kew zan ne kenè kew ebpekeg̵awas dutun. 44Ne edèdeetan dan is menge valey niw wey kutè niw ne langun niw te menge etew, ne egkeg̵erà ne wazà edresik keniyu. Ne is menge vatu he imbevaley keniyan, wazà minsan sevaha he ebpekeuntud diyà te sevaha su egkewag̵ey is langun. Ne egkeulaula heini su wazè niw seg̵ipaa he iyan heini sikan is timpu te kegkehizu keniyu te Megbevayà.”

Is Kedseled ni Jesus Diyà te Valey te Megbevayà

(Lucas 19:45-48; Mateo 21:12-17; Marcos 11:15-19; Juan 2:13-22)

45Ne hein nekeuma si Jesus diyà te Hiruselim ne midlaus sikandin diyà te zekelà he simbahan he egngezanan te Valey te Megbevayà. Ne midseled sikandin dutun ne impemeawè din is menge etew he ebpememelegyà dutun. 46Ne ke sikandin diyà te kandan te, “Awè kew kayi su zuen insurat he Lalag te Megbevayà he edhenduen te, ‘Is baley ku, ne egngezanan he Valey he Elempuanan.’ Ne sikiyu,” ke si Jesus, “nasì niw veeli he ubpeey te ebpemenlimbung.”

47Igenat dà dutun ne kada andew ne ebpenurù si Jesus dutun te zekelà he simbahan. Ne is menge punuan dutun te menge memumuhat te Megbevayà, wey is menge menunudlù te kesug̵uan, wey is ebmeg̵urangen te menge Hudiyu, ne egkesuatan dan pezem si Jesus te edhimatey. 48Iyan, kenè dan egkeg̵aanggaan te edhimatey sikandin su is langun he menge etew, ne utew zan egkengevenari he ebpememineg kandin.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index