Search form

Lucas 22

Is Bitiyara Mehitenged te Kedekepa ki Jesus

(Lucas 22:1-6; Mateo 26:1-5,14-16; Marcos 14:1,2,10,11; Juan 11:45-53)

1Ne meg̵aan en dutun egketuman is pista te kegkeena te supas he wazè din tapey he egngezanan te Pista te Kedlevayi. 2Ne zutun, is menge punuan he memumuhat wey is menge menunudlù te kesug̵uan, ebpengahà te paag̵i te kegkehimetayi zan ki Jesus he kenà egketuenan te mezakel he menge etew su egkehandek dan te menge etew.

3Ne zutun he timpu si Hudas, is sevaha zutun te sepulù wey zezuwa he sumusundan ni Jesus, ne mid-ulinan sikandin ni Setanas. 4Ne heini si Hudas, ne midhendiyà te menge punuan te menge memumuhat wey menge kepitan te menge ebantey zutun te zekelà he simbahan ne migkeg̵iyan din sikandan he egkehimu he ibpalad din si Jesus diyà te kandan. 5Ne utew zan dutun nengesuat ne mibpesarig dan he ebeg̵ayan dan si Hudas te selapì. 6Ne mid-uyun dutun si Hudas; ne puun dutun ne mibpengahà sikandin te paag̵i wey zin meekali si Jesus wey zan mezakep he kenà egketuenan te menge mezakel he etew.

Is Kedseulug ni Jesus Duma te Menge Sumusundan Din

(Lucas 22:7-13; Mateo 26:17-25; Marcos 14:12-21; Juan 13:21-30)

7Ne neume en dutun is andew te pista te kegkeena te supas he wazè din tapey. Ne iyan haazà andew te kedlepaa te menge Hudiyu te ibpemuhat he menge nati he kerehidu he egkeenen dan dutun te Pista te Kedlevayi. 8Ne zutun midsug̵ù ni Jesus si Pedro wey si Juan he ibpehuna zin sikandan ne migkeg̵iyan din te, “Huna kew en ne teg̵enaha niw en is idlavung tew kayi te Pista te Kedlevayi.” 9Ne mid-insà sikandan ki Jesus te, “Hendei he valey is edhilutuan dey te idlavung te Pista te Kedlevayi?” 10Ne midtavak si Jesus te, “Emun ebpekeuma kew en diyà te inged, egkesinug̵ung niw is maama he ed-uwit te umuy he nepenù te wahig. Tundug kew kandin diyà te valey he edselezan din. 11Ne keg̵iyi niw,” ke si Jesus, “is teg̵ig̵aked dutun te valey, ke sikiyu te, ‘Ibpeinsà te zatù tew kenikew ke hendei he rug̵u sikandin egkaan duma te menge sumusundan din kayi te Pista te Kedlevayi.’ ” 12Ne ke si Jesus maan te, “Ne zutun ibpeehè din keniyu is meluag he rug̵u ziyà te zivavew he zaan he nehimani. Ne zutun niw teg̵enaha is idlavung tew.” 13Ne migenat dutun haazà is midsug̵ù din, ne langun dutun te migkag̵i ni Jesus, ne iyan en iyan neehè dan ne zutun dan teg̵enaha is idlavung te pista.

Sikan is Kedlavung te Nengazen

(Lucas 22:14-23; Mateo 26:26-30; Marcos 14:22-26; 1 Kurintu 11:23-26)

14Ne hein iyan en uras te kedlavung ne mibpinuu si Jesus wey is menge epustul zin is ebpemengaan. 15Ne migkag̵i si Jesus diyà te kandan te, “Utew zekelà dini te g̵ehinawa ku heini is kegkesevaha tew te kegkaan te idlavung kayi te Pista te Kedlevayi te kenè e pa ebpatey. 16Su venar is egkeg̵iyen ku, kenà ad maan egkaan te idlavung te kedlevayi taman te timpu keuzemà ke egketuman is hustu he kehulug̵an din dutun te kedhedii te Megbevayà te menusiyà.” 17Ne zutun ne migkuwa ni Jesus is tasa he midteg̵uan te vinu ne mibpeselematan din te Megbevayà ne migkag̵i sikandin diyà te menge sumusundan din te, “Med-inum is kada sevaha keniyu. 18Ne egkeg̵iyen ku keniyu he kayi zà taman is ked-inum ku kayi te vinu taman dutun keuzemà te egkeume en is kedhadì te Megbevayà.” 19Ne zutun mid-amì si Jesus dutun te egkeenen dan he supas ne mibpeselematan din daan haazà te Megbevayà. Ne mibpenevìtevì din ne impenduwal zin kandan, ke sikandin te, “Iyan heini lawa ku he ibelukas keniyu. Emun egkeenen niw heini isipa a keniyu.” 20Ne hein neipus dan dutun is egkaan ne migkuwa en maan ni Jesus is tasa ne migkag̵i te, “Heini ve is inumen, ne tuus te veg̵u en he paag̵i te kegkelibri he midtukud te Megbevayà ne egkehimu heini pinaag̵i te lengesa ku he ibpaag̵as tenged keniyu.

21Sevuta niw heini,” ke si Jesus, “he sikan is etew he ebpalad kedì diyà te menge kuntada ku, ne kayi zed guntaan duma tew te ebpememimpinuu! 22Siak is Kakey te Menusiyà, ebpatey e zed gihapun sumalà is imbanglis kedì te Megbevayà, iyan, kehizu utew te etew he ed-akal kedì.” 23Ne zutun mibpein-inseey haazà is menge sumusundan din ke hentei kandan haazà is egkeg̵iyen din he ebpalad kandin.

Is Lavew Keuzemà

24Ne zutun mibpelewlewanà haazà is menge sumusundan din ke hentei is lavew kandan keuzemà. 25Ne zutun migkag̵i si Jesus te, “Dini te kelibutan, is hadì te kada inged, ne iyan dà ulaula zan is edsug̵ùsug̵ù dà te menge sakup dan su tuus he zekelà is pid-etawan dan. Ne minsan pa zutun egeraran sikandan te, ‘Menenavang te menge Etew.’ 26Iyan, sikiyu mulà,” ke si Jesus, “ne kenà egkehimu he iring kayi is ulaula niw. Su sikan is lavew keniyu, ne isipa zin he iyan en sikandin kinevevaan; ne sikan is egalen, ne isipa zin he sulug̵uen sikandin te langun. 27Ne penenglitan, hentei is lavew? Iyan be is ebpinuu su egkaan wey ke iyan be haazà is sulug̵uen he edtangel kandin? Ne siguradu iyan lavew is ebpinuu, ne minsan pa zutun, siak is egalen niw, ne iring a te edtangel keniyu.”

28Ne mid-uman megkag̵i si Jesus te, “Sikiyu, iyan kew nekid-uunungen kedì te langun he menge kemereg̵enan ku. 29Mibeg̵ayan a te Amey ku he Megbevayà te ketenged te kedhadì keuzemà. Ne iring din ded daan ne ebeg̵ayan ku zaan sikiyu te ketenged te kedhadì. 30Keuzemà ke edhadì a ne ebpinuu kew zuma kedì su ebpetugtug̵enè kiw is egkaan wey ed-inum. Ne ibpehadì ku sikiyu te menge kevuwazan duen te sepulù wey zezuwa he menge anak ni Israyil.”

Is Kegkeg̵iya ni Jesus te Kebarew ni Pedro

(Lucas 22:31-34; Mateo 26:31-35; Marcos 14:27-31; Juan 13:36-38)

31Ne migkag̵i si Jesus diyà te ki Simon Pedro te, “He Simon, duen egkeg̵iyen ku kenikew. Midtug̵utan si Setanas te Megbevayà he ebpenggezam keniyu te langun. Is kebpenggezam din ne iring te ked-ukap te parey su kela ke iring te ukap is kedtuu niw. 32Iyan, in-ampù ku sikew, Simon, diyà te Megbevayà he kenà maawà is kedtuu nu kediey. Ne emun melig-en en is kedtuu nu kediey ne himuwa nu he mebmelig-en daan is kedtuu te menge zuma nu.” 33Ne midtavak si Pedro te, “Kenà a edsuwey kenikew! Su minsan ke egkepirisu ka ne eduma e en kenikew; ne ke edhimetayan ka ne ed-unung e en kenikew!” 34Ne zutun midtavak si Jesus te, “Utew venar, Simon, is egkeg̵iyen ku kenikew he kengkuwan te mezukilem te kenè pa ed-ukarà is manuk ne ketetelu ke en ebpekekag̵i he kenà a kenikew egkekilala.”

Is Telaan Diyà te Menge Sumusundan

35Ne zutun migkag̵i si Jesus diyà te kandan te, “Hein midsug̵ù ku sikiyu zengan he indawey ku keniyu he wazà med-uwit te selapì, ne wazà med-uwit te ed-ilisan, ne wazà daan med-uwit te ed-ilisan he sepatus, ne hengkey is kurang niw zutun te kedhipanew niw?” Ne midtavak dan te, “Wazè dey kurang.” 36Ne migkag̵i si Jesus te, “Iyan, guntaan, emun duen selapì niw wey ed-ilisan niw ne uwita niw en. Ne sikan is wazè din ubpit ne ivelegyè din is kumbalè din wey mekepemasa te sundang. 37Su kinahanglan he egketuman en dini te kedì sikan is insurat he Lalag te Megbevayà he edhenduen te, ‘Inragkes sikandin dutun te menge selaan he etew.’ ” 38Ne zutun migkag̵i is menge sumusundan din te, “Ahaa nu man su zuen dey en dezuwa he sundang.” Ne ke si Jesus te, “Ne netengkaan en heeyan.”

Is Ked-ampù ni Jesus Diyà te Buvungan he Ulivuwan

(Lucas 22:39-46; Mateo 26:36-46; Marcos 14:32-42)

39Ne zutun migawas si Jesus puun te valey ne midhendiyà te vuvungan he egngezanan te Ulivuwan su zutun dan layun edhizeg̵à ne nemenduma kandin is menge sumusundan din. 40Ne hein nekeuma zan dutun ne migkeg̵iyan ni Jesus haazà is menge sumusundan din te, “Ampù kew wey kew kenà mezaag te penuley keniyu.” 41Ne zutun midlaus si Jesus diyà te uvey zà ne midluhud ne mid-ampù diyà te Megbevayà. 42Ke sikandin te, “Amey ku, emun iyan egkesuatan nu ne kenè nu en kediey ipeseg̵azi heini is merasey he imbanglis nu kediey, iyan, kenà egkesunud is kediey he egkesuatan, kekenà, iyan egkesunud is kenikew.” 43Ne zutun te ked-ampù din ne nekeuma is belinsug̵uen te Megbevayà he ebpuun te langit su edlig-enan din is gehinawa ni Jesus. 44Ne utew si Jesus dutun neseeng ne midheg̵etan din is ked-ampù din te Megbevayà ne edteg̵aktak is rimuseng din he iring te lengesa.

45Ne mid-engked si Jesus is ed-ampù ne midhitindeg ne midlikuan din is menge sumusundan din. Ne langun dutun te menge sumusundan din, ne nemekelipezeng su utew zan mibmeluya tenged te kegkeseeng dan. 46Ne zutun migkag̵i si Jesus diyà te kandan te, “Maan is ebpemenlipezeng kew? Enew kew wey med-ampù wey kew kenà mezaag te penuley keniyu.”

Is Kedekepa ki Jesus

(Lucas 22:47-53; Mateo 26:47-56; Marcos 14:43-50; Juan 18:3-11)

47Ne zutun te kemulu pa egkag̵i si Jesus, ne nekeume en si Hudas, is sevaha zuen te sepulù wey zezuwa he menge sumusundan din. Ne iyan sikandin edhuna te mezakel he menge etew. Ne mid-uvey sikandin diyà te ki Jesus su edhezekan din. 48Ne zutun migkag̵i si Jesus diyà te kandin te, “Kenè be tutuu, Hudas, he heini is kedhazek nu kedì te Kakey te Menusiyà, ne iyan en kebpezekepa nu kedì keniyan te menge zuma nu?” 49Ne hein netuenan dutun te menge sumusundan ni Jesus ke hengkey is ed-ul-ulahan te menge etew, migkag̵i zan diyà te ki Jesus te, “Menu, Datù, egkesuatan nu ve he edsukul key su heini zed is sundang dey?” 50Ne is sevaha zutun te menge sumusundan ni Jesus, midtibas din is sulug̵uen te lavew he memumuhat ne netenaan haazà diyà te kewanan he telinga ne nesapla haazà is telinga zin. 51Ne zutun migkag̵i si Jesus diyà te menge sumusundan din te, “Ereg kew!” Ne zutun inlikù ni Jesus haazà is telinga zutun te nelepungan ne henduen te wazà pig̵eyanan gihapun te telinga zin.

52Ne elin daan dutun te nemenhendutun te kedakep ki Jesus is menge punuan te memumuhat wey is menge kepitan te ebantey zutun te zekelà he simbahan wey is menge ebmeg̵urangen te menge Hudiyu. Ne migkeg̵iyan sikandan ni Jesus te, “Tulisan e ve? Su maan is neg̵umeenan kew te ubpit wey lagkut is edakep kedì? 53Ne hein duma a keniyu kada andew ziyà te Valey te Megbevayà is ebpenurù ne wazà a keniyu zutun dà dekepa. Iyan, iyan heini g̵untaan kes timpu he imbanglis keniyu wey niw meveeli is egkesuatan ni Setanas.”

Is Kebpemarew ni Pedro

(Lucas 22:54-62; Mateo 26:57,58,69-75; Marcos 14:53,54,66-72; Juan 18:12-18,25-27)

54Ne zutun midakep dan si Jesus ne mid-uwit dan diyà te valey te lavew he memumuhat. Ne si Pedro, midtinundug daan asal kenà utew ed-uvey. 55Ne zuen hapuy ziyà te lama zutun te valey ne zuen menge etew he ebpemenhizazang. Ne mid-uvey zutun si Pedro ne midhizazang daan. 56Ne zuen dutun sulug̵uen he vahi ne neehè din si Pedro is edhidhizazang. Ne midtengtengan din si Pedro ne migkag̵i te, “Minsan heeyan is maama ne zuma keniyan te midakep dan.” 57Ne midtavak si Pedro te, “Bayi, kenè ku egkekilala heeyan is midakep dan.” 58Ne netegteg̵aad dutun ne zuen en maan etew he nekekilala ki Pedro. Ne migkag̵i haazà te, “Sikew, duma ka zaan keniyà te midakep dan.” Ne midtavak si Pedro te, “Mama, kenà a iyan duma zin.” 59Ne netegteg̵aad pa maan dutun ne zuen en maan sevaha he etew he nekekilala ki Pedro he ke sikandin te, “Tutuu iyan he zuma zaan heeyan dutun te midakep su egketuusan he tigGeliliya zaan sikandin.” 60Iyan, midtavak en maan si Pedro te, “Kenè ku egketuenan heeyan is migkag̵i niw.” Ne zutun te kemulu pa egkag̵i si Pedro ne mid-ukarè en is manuk. 61Ne zutun midlilingey ni Jesus si Pedro ne midtengtengan din. Ne zutun human metenuzi ni Pedro sikan is migkag̵i ni Jesus kandin he, “Te kenè pe kan ebpengukarà is manuk, ne ketetelu ke en ebpekekag̵i he kenà a kenikew egkekilala.” 62Ne zutun mid-awà si Pedro zutun te menge etew ne nekelelendag is edsineg̵ew.

Is Kebpesipelahi ki Jesus

(Lucas 22:63-65; Mateo 26:67,68; Marcos 14:65)

63-64Ne haazà is menge etew he ebantey ki Jesus, ne mid-eled-eled dan sikandin. Ne mibagkes dan is menge mata zin ne midsumbag dan sikandin, ne ke sikandan te, “Tegnaa nu ke hentei is midsumbag kenikew.” 65Ne kenà iyan dà haazà su mezakel pa is memezaat he lalag dan kandin te kedsumpelita zan kandin.

Is Ked-imbistigaha ki Jesus te Menge Punuan

(Lucas 22:66-71; Mateo 26:59-66; Marcos 14:55-64; Juan 18:19-24)

66Ne hein nepawà dutun, netig̵um is langun he menge ebmeg̵urangen te menge Hudiyu wey is menge punuan he menge memumuhat, wey is menge menunudlù te kesug̵uan, ne impeetuvang kandan si Jesus. 67Ne mid-insaan dan si Jesus te, “Hengkey, iyan ke en be iyan sikan is mibpilì te Megbevayà he ibpahadì?” Ne midtavak si Jesus te, “Minsan ke egkeg̵iyen ku keniyu he iyan a, ne kenè kew edtuu te egkeg̵iyen ku. 68Ne emun id-insè ku heini keniyu ne kenè kew zaan edtavak. 69Iyan, heini zà is egkekag̵i ku keniyu, ‘Meg̵aan en egketuman is andew he siaken, is netagnà he Kakey te Menusiyà, ne ebpekepinuu e en diyà te zapit te egkekewanan te Megbevayà he utew mekeg̵eg̵ehem.’ ” 70Ne migkag̵i zan is langun te, “Ne emun iyan heeyan lalag nu ne hentei ke ve? Anak ke ve te Megbevayà?” Ne midtavak si Jesus te, “Uya, iyan is migkag̵i niw.” 71Ne zutun migkag̵i zan te, “Wazè en kinahanglan pa he zuen pa menge edsumbung kandin su nezineg tew en is menge lalag din he utew supak te Megbevayà.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index