Search form

Lucas 24

Is Kegkevanhew ni Jesus

(Lucas 24:1-12; Mateo 28:1-10; Marcos 16:1-8; Juan 20:1-10)

1Ne hein neiwas is Andew te Kedhimeley te kegkepawè din dutun te andew he Duminggu, mibpehendiyè en maan haazà is menge vahi te midlevengan ki Jesus ne mid-uwit dan sikan is menge mehemut he idhaplas he mid-andam dan. 2Nekeuma zan dutun ne neehè dan he in-awè en sikan is batu he inlekeb dutun te surung he penlevengà. 3Ne mid-ahuk dan dutun ne ebpenlenglenguwen dan kes lawa te Nengazen he si Jesus ne wazè en dutun. 4Ne zutun utew zan egkengereg̵enan he ebpen-isip-isip; ne netik-ew mebpaahà kandan is dezuwa he maama he ebpemengenamag te keputì is bisti zan. 5Ne haazà is menge vahi, ne midluhud dan is edungul su utew zan nengehandek. Ne migkag̵i kandan haazà is menge maama te, “Maan is kayi niw ebpen-ahaa te edlevengan te minatey is etew he uuyag? 6Su si Jesus, ne wazè en kayi su nevanhew en. Tentenuzi niw ke hengkey is migkag̵i zin keniyu hein diyè kew pa te Geliliya 7su migkag̵i zin he sikandin is Kakey te Menusiyà, ne ibpalad diyà te menge lalung he etew ne idransang sikandin diyà te krus ne seled te tetelu he andew ne egkevanhew sikandin.” 8Ne human metenuzi zutun te menge vahi haazà is migkag̵i ni Jesus. 9Ne zutun mid-ulì haazà is menge vahi ne mibpenudtulan dan sikan is sepulù wey sevaha he menge epustul ni Jesus wey is duma pa he menge etew. 10Haazà is menge vahi, ne iyan si Maria Megdelina, si Juana, wey elin daan si Maria he iney ni Santiago, ne zuen pa menge zuma zan he vahi. Iyan sikandan mibpenudtul ziyà te menge epustul te nengehitavù kandan. 11Iyan, sikan is menge epustul ni Jesus, kunaan dan ke kenà tutuu haazà ne wazè dan medtuu zutun te tudtul te menge vahi. 12Iyan, si Pedro, hein nezineg din haazà is tudtul ne mibpelelag̵uy sikandin is ebpehendiyà te surung he penlevengà. Ne hein nekeuma zutun ne midsiniling sikandin ne iyan din dà naahà kes meputì he manggad he imbukus te lawa ni Jesus ne mid-awà dutun sikandin is mid-ulì ne utew neinuinu ke maan is wazà dutun is lawa ni Jesus.

Is Kebpaahà ni Jesus Duen te Zezuwa he Etew

(Lucas 24:13-35; Marcos 16:12,13)

13Ne zutun daan he andew ne zuen dezuwa he sumusundan he ebpuun diyà te Hiruselim he edhendiyà te inged he egngezanan te Imawus. Ne haazà he inged, ne menge sepulù wey tetelu he kilumitru is keziyù din diyà te inged he Hiruselim. 14Ne zutun te edhipanew sikandan ne iyan dan edhisgutan is mehitenged te langun he neulaula ki Jesus. 15Ne zutun te kebitiyara zan dutun ne midlambag si Jesus kandan ne mibpekiduma kandan. 16Neehè dan sikandin, iyan, wazà mebpekilala kandan si Jesus. 17Ne migkag̵i si Jesus diyà te kandan te, “Hengkey is edhisgutan niw te edhipanew?” Ne neketeren dan dutun ne egkeahà diyà te kebuvuked dan he utew zan egkeseeng. 18Ne midtavak is sevaha zutun he egngezanan ki Keliyupas, ke sikandin te, “Iyan ke zà buwa etew he nekehengkayi te inged he Hiruselim he wazà metau kayi te veg̵u pa he nehitavù.” 19Ne mid-uman med-insà si Jesus kandan te, “Maan? Hengkey is nehitavù?” Ne midtavak dan te, “Iyan is nehitavù ki Jesus he tigNeserit. Ebpeneuven sikandin te Megbevayà ne midtuuwan sikandin te langun he menge etew. Dekelà is gehem din te ebpenurù ne mekeg̵eg̵ehem daan sikandin he ebaal te menge egkengein-inuwan. 20Is menge punuan he memumuhat wey is menge ebmeg̵urangen tew, ne impalad dan sikandin diyà te ki Pilatu. Ne midhukuman sikandin he edhimetayan. Ne zutun midhimetayan dan pinaag̵i te kedrensanga kandin te krus. 21Ne netag̵ù diyà te g̵ehinawa zey he iyan en pezem sikandin kes midsug̵ù te Megbevayà he edlibri te langun he kevuwazan ni Israyil, iyan, seled en guntaan te tetelu he kezukileman is kedhimetayi kandin. 22Ne g̵eina te meselem neumanan is kegkeinuinu zey su zuen menge zuma zey he menge vahi he midselem dan diyà te midlevengan kandin. 23Ne nekeuma zan dutun ne wazè dan maahà sikan is lawa zin. Ne midlikù dan diyà te kenami ne mibpenudtul zan he zuen menge velinsug̵uen te Megbevayà he mibpaahà kandan. Ne migkag̵i kun dutun te menge velinsug̵uen he nevanhew en si Jesus. 24Ne zuen pa zuma zey zutun he midsuvar mebpehendutun te surung he penlevengà ne iring ded daan dutun is neehè dan te migkag̵i zutun te menge vahi, iyan, wazè dan maahà is lawa ni Jesus.”

25Ne zutun migkag̵i si Jesus diyà te kandan te, “Kurang kew pe bes te ked-isip. Maan is utew mereg̵en diyan te keniyu is kebpeketuu niw te langun he netagnà dengan te menge ebpemeneuven te Megbevayà? 26Su kinahanglan he ebpekeag̵i pa te kemeresayan sikan is hadì he mibpilì te Megbevayà ne human ibeg̵ey kandin is kebayàbayà te minsan hengkey.” 27Ne zutun midseysey ni Jesus kandan ke hengkey is langun he menge lalag te Megbevayà mehitenged kandin he insurat te langun he menge ebpemeneuven te Megbevayà igenat dà ki Moises dengan taman te huziyan he menge ebpemeneuven.

28Ne hein ebpekeuma zan en dutun te ebpeveyaan dan he inged ne henduen be te edlaus pa si Jesus, 29iyan, migkeg̵iyan dan sikandin te, “Kenè ke pa laus, ne zini ka hulavung su mahapun en utew.” Ne iyan dà haazà, ne mibpekiduma si Jesus kandan. 30Ne hein diyè dan en te valey ne mibpinuu zan is egkaan. Ne si Jesus, migkuwa zin is egkeenen dan he supas. Ne mibpeselematan din te Megbevayà ne mibpenevì din ne human din ipemeg̵ey kandan. 31Ne zutun, human dan mekilala si Jesus su nemelmeleg̵an dan te ed-ahà. Iyan, netekew maawà dutun si Jesus diyà te ked-ehè dan. 32Ne mibpelelag̵à haazà is dezuwa he etew he egkag̵i te, “Umba ves utew ta nesuati g̵eina ziyà te zalan te ebpemineg is kedseysayi zin kenita zuen te Lalag te Megbevayà.”

33Ne zutun ne midhitindeg dan ne migaanggaan dan medlikù diyà te Hiruselim. Ne hein nekeuma zan ne neumahan dan sikan is sepulù wey sevaha he menge epustul ni Jesus wey is menge zuma he sumusundan he nengetig̵um diyà te sengevaley. 34Ne iyan ingketig̵um dan su ebpetudtudtulè dan he egkag̵i te, “Benar ves iyan he nevanhew is Nengazen su mibpaahà ki Pedro.” 35Ne zutun, haazà is dezuwa he ebpuun te Imawus, ne mibpenudtul zan ke hengkey is nehitavù kandan diyà te zalan. Ne midtudtul zan daan he zutun dan en mekilala si Jesus hein mibpenevì din en is supas dutun te kegkaan dan.

Is Kebpaahà ni Jesus te Menge Epustul

(Lucas 24:36-49; Mateo 28:16-20; Marcos 16:14-18; Juan 20:19-23; Nengeulaula 1:6-8)

36Ne zutun te kemulu zan pa ebpetudtudtulà kayi ne netekewtekew mebpeg̵awag̵awa si Jesus diyà te teliwazè dan. Ne migkag̵i sikandin te, “Kenè kew mengeseeng.” 37Ne utew zan dutun nengehandek su kunaan dan ke g̵imukud dà ni Jesus is mibpaahà kandan. 38Iyan, migkag̵i zutun si Jesus diyà te kandan te, “Ne maan is egkengehandek kew kedì? Maan is egkezuwazuwa kew kedì? 39Ahaa niw man heini is palad ku wey paa ku su iyan e zed! Semsama a keniyu ne egketuenan niw! Su is gimukud, ne wazè din lawa, iyan, siak, ahaa niw man, duen lawa ku,” ke sikandin. 40Ne impeehè din kandan is menge imbayà te ransang diyà te menge palad din wey paa zin. 41Ne g̵eina te kemulu zan pa eduwazuwa, asal, utew zan nengeg̵alew, mid-insà si Jesus te, “Duen be egkeenen niw kayi?” 42Ne mibeg̵ayan dan sikandin te tinuug he pait. 43Ne migkuwa zin haazà is pait ne migkaan din.

44Ne zutun migkag̵i si Jesus diyà te kandan te, “Iyan heini sikan is migkag̵i ku keniyu hein kemulu e pa zuma niw. Is langun mehitenged kedì he impesurat dengan te Megbevayà ki Moises, wey kes langun he impesurat din te zuma pa he ebpemeneuven din, wey minsan kes insurat dengan duen te libru te menge Salmo, ne kinahanglan he egketuman pinaag̵i te neulaula zini te kedì.” 45Ne zutun impesavut din human kandan is langun te impemesurat he Lalag te Megbevayà. 46Ke sikandin te, “Ibpesavut duen te insurat he Lalag te Megbevayà he kinahanglan he siak is hadì he mibpilì te Megbevayà, ne edhimetayan a ne seled te tetelu he andew zutun ne ebenhawen a te Megbevayà. 47Ne ibpesavut daan dutun he kinahanglan he edsug̵uen ku sikiyu te kebpenudtul te Meupiya he Tudtulanen. Ebpuunan niw is kebpenudtul niw zini te Hiruselim ne ieneb niw heini ipesavut te tivuuk he kelibutan. Ipesavut niw he kinahanglan he ed-iniyug̵an te menge etew is memezaat he ulaula ne human dan ebpeseyluwa te Megbevayà. 48Ne kinahanglan he iyan kew mebpesavut kayi te langun he impesurat he Lalag te Megbevayà he netuman kayi te kedì su nengeehè niw en. 49Ne edsug̵uen ku zini te keniyu is Wag̵as he Mulin-ulin he impesarig te Amey ku he Megbevayà. Iyan, dini kew tag̵ad te inged he Hiruselim taman te kenè kew pa egkevulusan te g̵ehem din he ebpuun te langit.”

Is Kegkevatun ni Jesus Diyà te Langit

(Lucas 24:50-53; Marcos 16:19,20; Nengeulaula 1:9-11)

50Ne te nekepasad si Jesus dutun is egkag̵i ne mid-uwit din sikandan diyà te g̵awas te inged he Hiruselim, ne hein diyè dan en te uvey te inged he egngezanan te Bitanya, ne imbayew zin is menge velad din su ebpenubtuvazan din sikandan. 51Ne zutun te kemulu pa sikandin ebpenuvadtuvad ne nevatun sikandin pehendiyà te langit. 52Ne mid-azap dan sikandin ne utew zan nengelipey is mid-ulì diyà te Hiruselim. 53Ne andew-andew ne layun sikandan diyà te simbahan he Valey te Megbevayà is edalig te Megbevayà.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index