Search form

Lucas 3

Is Kedsangyew ni Juan Megbebewtismu

(Lucas 3:1-18; Mateo 3:1-12; Marcos 1:1-8; Juan 1:19-28)

1-2Ne zutun te ikesepulù wey lelima he tuig te kedhadì ni Hadì Tibiryu ziyà te inged he Ruma duen impesavut te Megbevayà diyà te ki Juan he anak ni Zacarias. Ne ziyà si Juan te tanà he wazà duen ed-ubpà he menge etew. Ne zutun he timpu iyan gubirnedur ziyà te prubinsya he Hudiya si Punsyu Pilatu. Ne ziyà te prubinsya he Geliliya iyan gubirnedur si Hirudis. Ne si Felipe, is hazi ni Hirudis, iyan gubirnedur ziyà te menge prubinsya he Iturya wey Terekuniti. Ne si Lisanyas, iyan gubirnedur diyà te prubinsya he Ebilinya. Ne si Anas wey si Keyipas, ne iyan menge lavew he memumuhat diyà te inged he Hiruselim. 3Si Juan, mibeyaan din is langun he menge inged dutun te uvey te wahig he Hurdan ne mibpenurù din is menge etew zutun. Ke sikandin te, “Iniyug̵i niw is memezaat he menge ulaula ne mebpebewtismu kew ne ebpeseyluwen te Megbevayà is menge salè niw.” 4Heini is kebpenurù ni Juan, iyan kegketuman te netagnà he insurat dengan ni Esaias te ebpeneuven te Megbevayà su ke si Esaias te, “Duen etew ziyà te tanà he wazà duen ed-ubpà he etew. Ne egkezineg sikandin te menge etew he edangep kandin is egkag̵i te,

‘Meg̵aan ebpekeuma is Nengazen.

Hig̵ewani niw is ibayè din;

tendanga niw is dalan he ed-ikulen din,

he ke và dà egkeg̵iya, endami niw

is kebpekeuma zin.

5Ne tembaki is menge zal-ug;

ne emun nenlebilebi haazà is ibayà, ne petag̵a.

Ne emun nengepekùpekù ne kinahanglan he tendanga,

ne emun duen menge mibuketur

ne kinahanglan he ebpenhayen.

6Ne zutun ibpaahà te Megbevayà

te tivuuk he menusiyà is edsug̵uen din

he Menluluwas.’ ”

7Ne zuen mezakel he menge etew he nemenhendiyà te ki Juan su ebpemebewtismu. Ne migkeg̵iyan din sikandan te, “Iring te ulaula te uled is ulaula niw su teruen kew. Maan is edhendini kew? Kunaan niw vuwa ke ebpekeg̵awas kew te silut te Megbevayà. 8Emun tutuu he mid-iniyug̵an niw is memezaat he ulaula, ipeehè niw pinaag̵i te menge meupiya he vaal niw. Ne kenè niw iyan serig̵i is kevuwazan kew ni Abraham su wazà dutun pulus diyà te Megbevayà. Su egkeg̵iyan ku sikiyu he emun iyan egkinehenglanen te Megbevayà, ne egkehimu he ebeelan din heini is menge vatu he kevuwazan ni Abraham. 9Is ebpiley te kayu, migkayew en su ebpemilayen din en is minsan hengkey he kayu he kenà meupiya is beg̵as din su wey mevinsuli, he ke và dà egkeg̵iya, is etew he kenà meupiya is ulaula zin, edsilutan sikandin te Megbevayà.”

10Ne haazà is menge etew, mid-insaan dan si Juan, ke sikandan te, “Hengkey is ed-ul-ulahan dey wey key mekelikey keniyan te egkeg̵iyen nu?” 11Ne midtavak ni Juan sikandan te, “Sikan is etew he zezuwa is kumbalè din, ne veg̵ayi zin sikan is wazè din kumbalà. Ne iring din ded daan sikan is etew he zuen din keenen, ne veg̵ayi zin sikan is wazà egkekaan,” ke sikandin. 12Ne zutun nekeuma is menge menunukut te vuhis su ebpebewtismu zaan sikandan. Ke sikandan te, “Menunudlù, hengkey is egkesuatan te Megbevayà he ed-ul-ulahan dey?” 13Ne ke si Juan te, “Emun ebpenukut kew, kenè niw limbungi is menge etew te ibayad dan te vuhis. Iyan niw zà kuwaa ziyà te kandan is insug̵ù keniyu te gubirnu.” 14Ne zutun duen menge sundaru he mid-insà diyà te ki Juan te, “Sikami, hengkey is ibpeulaula kenami te Megbevayà?” Ne midtavak si Juan te, “Engkezi niw is kebpelihendeka te menge etew wey is ked-ulug̵i niw kandan te kewsa te kegkuwaa niw te selapì dan. Is sildu niw, metengkai en diyà te g̵ehinawa niw.”

15Is menge etew zutun, hein nezineg dan haazà is kebpenurù ni Juan netenuzan dan is netagnà he hadì he mibpilì te Megbevayà ne egkeisip dan he kela ke iyan si Juan. 16Ne tenged kayi, migkag̵i si Juan diyà te kandan te langun te, “Duen ed-ilis kediey he utew lavew su minsan is kebpul-ut dà te menge sepatus din, kenè e pa zait he sulug̵uen din. Wahig is ibewtismu ku keniyu,” ke si Juan, “iyan, haazà is migkag̵i ku, ebewtismu zaan keniyu. Is edtuu, ne ebewtismuwan din te Wag̵as he Mulin-ulin. Ne is kenà edtuu, ne iyan din ibewtismu kandan is hapuy. 17Geina te ibpedsivayè din te edtapid is menge metazeng wey is menge lalung he etew, iring sikandin te ebpalid te parey he id-awè din is ukap dutun te parey. Ne haazà is parey ederengdengen, iyan, is ukap, edtutungen din diyà te hapuy he kenà egkeevukan,” ke si Juan.

Is Kebewtismuwi ki Jesus

(Lucas 3:18-22; Mateo 3:13-17; Marcos 1:9-11)

18-22Ne sevaha he andew zutun hein neketapus is langun he menge etew he ebpemebewtismu, mibpebewtismu zaan si Jesus diyà te ki Juan. Ne zutun mid-ampù si Jesus ne te kemulu pa sikandin ed-ampù nepuwasan is langit ne midlugtanà diyà te kandin is Wag̵as he Mulin-ulin he henduen te merepatik. Ne nezineg dutun is Megbevayà he egkag̵i ziyà te langit he ke sikandin te, “Minahal ku sikew he Anak ku. Utew ku en sikew igkelipey.”

Utew pa mezakel is impenurù ni Juan dutun te menge etew su ibpesavut din kandan is Meupiya he Tudtulanen. Migkag̵i ni Juan diyà te menge etew he mezaat is ulaula ni Gubirnedur Hirudis su mid-ag̵ew zin is ipag din he si Hirudyas he esawa te hazi zin he si Felipe. Ne kenà iyan dà mezaat he ulaula ni Hirudis haazà is nekag̵i ni Juan su mezakel pa zutun is utew memezaat he vaal zin. Ne kenà dutun dà taman te memezaat he ulaula zin he mibeelan din, kekenà, impepirisu zin pa si Juan.

Is Kepuun ni Jesus

(Lucas 3:23-38; Mateo 1:1-17)

23Ne hein menge ketluan en he tuig is penuig̵en ni Jesus ne mibpuunan din is ebpeveelan kandin te Megbevayà. Iyan diyà te isip te menge etew he anak sikandin ni Jose. Ne si Jose, anak ni Hili. 24Ne si Hili, anak ni Matat; ne si Matat, anak ni Levi; ne si Levi, anak ni Milki; ne si Milki, anak ni Hani; ne si Hani, anak ni Jose. 25Ne si Jose, anak ni Metatyas; ne si Metatyas, anak ni Amos; ne si Amos, anak ni Nahum; ne si Nahum, anak ni Isli; ne si Isli, anak ni Nagey. 26Ne si Nagey, anak ni Maat; ne si Maat, anak ni Metatyas; ne si Metatyas, anak ni Simi; ne si Simi, anak ni Jose; ne si Jose, anak ni Huda. 27Ne si Huda, anak ni Huwanan; ne si Huwanan, anak ni Risa; ne si Risa, anak ni Surubebil; ne si Surubebil, anak ni Selatil; ne si Selatil, anak ni Niri; 28ne si Niri, anak ni Milki; ne si Milki, anak ni Adi; ne si Adi, anak ni Kusam; ne si Kusam, anak ni Ilmudam; ne si Ilmudam, anak ni Iyir; 29ne si Iyir, anak ni Josue; ne si Josue, anak ni Eliezer; ne si Eliezer, anak ni Hurim; ne si Hurim, anak ni Matat; ne si Matat, anak ni Levi. 30Ne si Levi, anak ni Simeon; ne si Simeon, anak ni Huda; ne si Huda, anak ni Jose; ne si Jose, anak ni Hunan; ne si Hunan, anak ni Iliyakim. 31Ne si Iliyakim, anak ni Miliya; ne si Miliya, anak ni Meinan; ne si Meinan, anak ni Metata; ne si Metata, anak ni Natan; ne si Natan, anak ni David; 32ne si David, anak ni Isai; ne si Isai, anak ni Ubid; ne si Ubid, anak ni Buus; ne si Buus, anak ni Salmun; ne si Salmun, anak ni Nasun. 33Ne si Nasun, anak ni Eminadab; ne si Eminadab, anak ni Admin; ne si Admin, anak ni Arni; ne si Arni, anak ni Isrum; ne si Isrum, anak ni Piris; ne si Piris, anak ni Huda; 34ne si Huda, ne anak ni Hakub; ne si Hakub, anak ni Isaak; ne si Isaak, anak ni Abraham; ne si Abraham, anak ni Tari; ne si Tari, anak ni Nakur. 35Ne si Nakur, anak ni Siruk; ne si Siruk, anak ni Ragaw; ne si Ragaw, anak ni Pilig; ne si Pilig, anak ni Ibir; ne si Ibir, anak ni Sile; 36ne si Sile, anak ni Keynan; ne si Keynan, anak ni Erpaksad; ne si Erpaksad, anak ni Sim; ne si Sim, anak ni Noe; ne si Noe, anak ni Lamik; 37Ne si Lamik, anak ni Metusalin; ne si Metusalin, anak ni Inuk; ne si Inuk, anak ni Harid; ne si Harid, anak ni Meheleliyil; ne si Meheleliyil, anak ni Keynan; 38ne si Keynan, anak ni Inus; ne si Inus, anak ni Sit; ne si Sit, anak ni Adan; ne si Adan, ne anak te Megbevayà.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index