Search form

Lucas 4

Is Kebpenulaya ki Jesus

(Lucas 4:1-13; Mateo 4:1-11; Marcos 1:12,13)

1Ne hein nebewtismuwan en si Jesus, mid-awà sikandin dutun te wahig he Hurdan. Nepurung sikandin meulini te Wag̵as he Mulin-ulin ne mid-uwit sikandin te Wag̵as he Mulin-ulin pehendiyà te tanà he wazà duen ed-ubpà he etew.

2Ne zutun, seled te kepatan he andew, migezaman si Jesus ni Setanas ke ebpekesalè be. Ne te zutun he menge andew wazà minsan hengkey he nekaan ni Jesus, ne zutun te ikekepatan en he andew utew nevitil si Jesus. 3Ne migkeg̵iyan sikandin ni Setanas te, “Emun tutuu iyan he Anak ka te Megbevayà pengelinteuwi nu he mevaluy he egkeenen heini is menge vatu.” 4Ne midtavak si Jesus te, “Duen insurat he Lalag te Megbevayà he edhenduen te, ‘Kenà iyan dà igkeuyag te menusiyà is egkeenen.’ ”

5Ne zutun mid-uwit si Jesus ni Setanas diyà te utew metikang ne te sengeperè dà dutun impeehè din is langun he g̵inhedian dini te kelibutan.

6Ne migkag̵i si Setanas te, “Is kebayàbayà kayi te langun he menge g̵inhedian wey is langun kayi he ketig̵eyunan, ibeg̵ey ku kenikew. Impeveyveyaan kediey heini is langun ne egkehimu he ibeg̵ey ku zaan diyà te minsan hentei he egkesuatan ku. 7Langun kayi ne ibeg̵ey ku kenikew emun ed-azap ka kedì.”

8Ne zutun midtavak si Jesus te, “Duen insurat he Lalag te Megbevayà he edhenduen te, ‘Iyan niw zà ezapa is Nengazen he Megbevayè niw. Ne is duma pa he ngazan he megbevayà, kenè niw tumana is sug̵ù din.’ ”

9Ne zutun mid-uwit si Jesus ni Setanas diyà te inged he Hiruselim. Ne miduma zin diyà te utew metikang he limbuvungan te valey he egngezanan te Valey te Megbevayà. Ne migkeg̵iyan din te, “Emun tutuu iyan he Anak ka te Megbevayà, umpak ka 10su zuen insurat he Lalag te Megbevayà he edhenduen te, ‘Ebpetevangan ka te Megbevayà te menge velinsug̵uen din 11ne edtemukan ke zan su wey kenà egkerudruzan is minsan paa nu te vatu.’ ”

12Ne midtavak kandin si Jesus te, “Duen daan insurat he Lalag te Megbevayà he edhenduen te, ‘Kenè kew mebaal te paag̵i he igezam niw te g̵ehem te Nengazen he iyan Megbevayè niw.’ ” 13Ne hein netuenan ni Setanas he kenè din bes egkepenulayan si Jesus, ne mid-ewaan din dè pa.

Is Kebpuun ni Jesus te Kebpenurù

(Lucas 4:14,15; Mateo 4:12-17; Marcos 1:14,15)

14Ne zutun mid-ulì si Jesus diyà te prubinsya he Geliliya ne zekelà diyà te kandin is gehem te Wag̵as he Mulin-ulin. Ne segugunà nekeeneb diyà te langun he menge inged dutun is tudtul mehitenged ki Jesus. 15Ne nenurù sikandin diyà te menge simbahan te menge Hudiyu zutun te menge inged ne nemekezalig kandin is langun he menge etew.

Si Jesus Diyà te Neserit

(Lucas 4:16-30; Mateo 13:53-58; Marcos 6:1-6)

16Ne zutun midhendiyà si Jesus te Neserit, sikan is inged he zutun en sikandin medekelà. Ne zutun te andew he Sebadu he iyan Andew te Kedhimeley midseled si Jesus te simbahan su iyan betasan din. Ne midhitindeg su ebesahan din is insurat he Lalag te Megbevayà. 17Ne induwal zan kandin is belesahan he menge surat ni Esaias, sikan is ebpeneuven dengan te Megbevayà. Mibekar zin haazà ne neehè din ne mibasa zin is insurat he edhenduen te,

18“Mid-ulinan a te Wag̵as he Mulin-ulin he ebpuun te Megbevayà.

Ne mibpilì a te Nengazen su wey ku ikepesavut te menge egkengeayuayu is Meupiya he Tudtulanen.

Ne mibpeveyaan din kedì

is menge etew wey ku sikandan metudtuli

he egkengevelukasan is nengevihag ni Setanas,

ne egkengeulian is nengelakap

wey zan mekeahà ne egketevangan

is egkengereg̵enan.

19Midsug̵ù e zin daan wey ku metudtul

he iyan heini tuig he ibpeehè din

is gag̵ew zin te menusiyà.”

20Ne zutun midlulun ni Jesus haazà is belesahan ne induwal zin diyà te miduwal kandin ne mibpinuu su ebpenurù. Ne is langun he menge etew zutun, midtengtengan dan sikandin su ebpemineg dan. 21Ne ke sikandin te, “Heini is netagnà he insurat he Lalag te Megbevayà he mibasa ku, ne netuman en guntaan dini te etuvangan niw.” 22Ne haazà is menge etew he nevurun dutun, nevenaran sikandan te menge penurù din, iyan, utew zan nengeinuinu su utew sikandin metau he edseysey. Ne ke sikandan te, “Kenè be anak heeyan ni Jose?” 23Ne migkag̵i si Jesus te, “Siguradu ebpekekag̵i kedì is duma keniyu te erubasa he edhenduen te, ‘Sikew is mememawì, hunai nu vewii is kenikew he lawa, he ke và dà egkeg̵iya, emun tutuu ka he ebpeneuven te Megbevayà ne ipeehè nu is gehem nu zini te inged nu. Su nezineg dey is egkengein-inuwan he mibeelan nu ziyà te inged he Kepirnaum, ne beeli nu zaan kayi te keugelingen nu he inged.’ 24Iyan,” ke si Jesus, “utew venar is egkeg̵iyen he is ebpeneuven te Megbevayà, kenà sikandin ebpemineg̵en te menge etew ziyà te keugelingen din he inged. 25Tutuu heini is egkeg̵iyen ku he iring heini is ulaula niw g̵untaan te timpu zengan hein kaazen pa ni Elias he ebpeneuven te Megbevayà; wazà ipeuzan te Megbevayà dini seled te tetelu he tuig wey heenem he vulan, ne nesug̵at te zekelà he vitil is langun he menge inged dini te kenitew. Ne mezakel is menge zuma tew he Hudiyu he menge valu he vahi he nengereg̵enan dutun te vitil. 26Iyan, wazà minsan sevaha kandan he mibpeveyaan ki Elias te Megbevayà wey zin metevangi, kekenà, nasì sikandin sug̵ua te Megbevayà diyà te inged he Seripta ziyà te prubinsya he Sidun wey zin metevangi is balu he vahi zutun he kenà Hudiyu. 27Ne iring din ded daan is sevaha he neulaula. Dengan te kaazen daan ni Elisio te sevaha zuen te ebpemeneuven te Megbevayà, mezakel is menge Hudiyu he ebpen-it-iten. Ne wazà Hudiyu he mibewian ni Elisio, kekenà, iyan is etew he kenà Hudiyu he si Naaman he tigSirya,” ke si Jesus. 28Ne is menge etew zutun te simbahan, hein nezineg dan haazà is migkag̵i ni Jesus ne utew zan nengepauk. 29Nemenhitindeg dan ne migewezan dan si Jesus ne mid-uwit dan pehendiyà te pangpang dutun te puntur te vuvungan he zutun benguna haazà is inged dan su ed-ulug̵en dan pezem dutun si Jesus te pangpang. 30Iyan, nenelektelek dà si Jesus diyà te kandan ne mid-awà sikandin dutun.

Is Etew he Midsuukan te Mezaat he Mulin-ulin

(Lucas 4:31-37; Marcos 1:21-28)

31Ne midlaus si Jesus pehendiyà te Kepirnaum he inged he sakup te Geliliya. Ne zutun te Andew te Kedhimeley mibpenurù din is menge etew ziyà te simbahan. 32Ne is menge etew, hein nezineg dan haazà is kebpenurù din, utew zan nengeinuinu su zekelà is gehem ni Jesus te kebpenurù. 33Ne te kemulu pa ebpenurù si Jesus, duen maama zutun te simbahan he edlelungen te mezaat he mulin-ulin. Ne hein neehè din si Jesus, mibensag sikandin is egkag̵i te, 34“Sikew, Jesus he tigNeserit, hengkey is lavet nu kenami te menge mezaat he mulin-ulin? Kela ke iyan inhendini nu is edezeetan key kenikew. Egkekilala ku sikew; iyan ka sikan is hadì he mibpilì te Megbevayà!” 35Ne zutun midawey ni Jesus haazà is mezaat he mulin-ulin ne ke sikandin te, “Med-engked ka ne awè ka ziyan te kandin!” Ne zutun mibpengelinteuwan duen te mezaat he mulin-ulin he mekebadas diyà te tanà dutun te etuvangan te langun he menge etew haazà is edlelungen din. Ne mid-awà sikandin ne wazè din mekeizi haazà is etew he midlalung din. 36Ne utew nengeinuinu is langun he menge etew zutun ne neked-iinseey zan is egkag̵i te, “Hendei ebpuun heini is gehem ni Jesus te kebayàbayà? Su utew mekeg̵eg̵ehem is kedsug̵ua zin te menge mezaat he mulin-ulin he med-awè dan ne ebpemineg dan kandin!” 37Ne zutun pinaag̵i kayi nekeeneb haazà is bentug̵an ni Jesus diyà te langun he menge inged he uvey zutun.

Is Kebewii te Menge Etew

(Lucas 4:38-41; Mateo 8:14-17; Marcos 1:29-34)

38Ne te ked-awà ni Jesus dutun te simbahan, midhendiyà te valey ni Simon. Ne egkezeruwan dutun is enug̵ang he vahi ni Simon ne utew meinit is lawa zin. Ne midhangyù dan ki Jesus he vewii zin haazà is bahi. 39Ne mid-uvayan ni Jesus haazà, ne mibpengelinteuwan din he maawà haazà is dateng din. Ne zutundutun neulian haazà is bahi. Ne zutun mid-enew ne midsuba sikandin te ibpekaan din engki Jesus.

40Ne hein edsanlep en is andew, is langun he menge etew he zuen duma zan he egkezeruwan, mibpen-uwit dan diyà te ki Jesus haazà is egkengezeruwan. Ne edempaan dà ni Jesus is kada egkezeruwan dutun ne egkeulian en. 41Ne minsan sikan is menge mezaat he mulin-ulin, impemaawè din dutun te menge etew he edlelungen dan. Nemekekulahì haazà is menge mezaat he mulin-ulin he egkag̵i te, “Iyan ka iyan sikan is Anak te Megbevayà!” Iyan, impeengked sikandan ni Jesus su wazè din itug̵ut he zuen egkeg̵iyen dan su netuenan dan he iyan sikandin kes mibpilì te Megbevayà he hadì.

Is Kebpenurù ni Jesus Diyà te Menge Simbahan

(Lucas 4:42-44; Marcos 1:35-39)

42Ne hein egkepkepawè en mid-awà si Jesus dutun te inged ne midsiveysivey zutun te wazè din duma he etew. Iyan, mibpemengahà sikandin te menge etew, ne hein neturedu zan, midhangyù dan kandin he kenè pa sikandin med-awà dutun te inged dan. 43Iyan, migkeg̵iyan din sikandan te, “Is Meupiya he Tudtulanen te keag̵i te kedhadì te Megbevayà, kinahanglan he ibpenudtul ku ziyà te menge etew ziyà te menge zuma he inged su iyan heini insug̵ua kediey te Megbevayà.” 44Ne zutun midlaus si Jesus ne midweliyan din is menge etew zutun te menge simbahan te menge Hudiyu ziyà te prubinsya he Hudiya.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index