Search form

Lucas 5

Is Kedtewag̵a Zuen te Tetelu he Menlelaya

(Lucas 5:1-11; Mateo 4:18-22; Marcos 1:16-20)

1Sevaha he andew te ziyà si Jesus te veyvey te ranew he egngezanan te Giniserit, utew mezakel he menge etew is nengetipun su ebpememineg dan te Lalag te Megbevayà he ibpenurù din. 2Ne naahà ni Jesus is dezuwa he avang diyà te veyvey he wazà dutun mid-untud su midrenà dutun is menge teg̵ig̵aked su edlumpiyuwan dan is menge laya zan. 3Ne mid-untud si Jesus dutun te sevaha he avang he g̵aked ni Simon ne impehalin din ki Simon haazà is avang te malù ebpekeziyù dutun te veyvey. Ne mibpinuu si Jesus dutun te avang ne mibpenurù din is utew mezakel he menge etew.

4Ne hein nekepasad si Jesus is ebpenurù, migkeg̵iyan din si Simon te, “Begsaya niw heini is avang pehendutun te mezalem ne penlaya kew zutun ne ebpekeutel kew te menge pait.” 5Ne midtavak si Simon te, “Tivuuk he kezukileman is kebpenlaya zey ne wazè dey neutel he minsan sevaha, iyan, emun iyan heeyan lalag nu ne ed-uman key ebpenlaya.” 6Ne zutun mibpenlaya zan en maan ne hein mibuwat dan haazà is laya ne nevenbenaran sikandan te utew mezakel he menge pait he neutel su samè dà kenà mevindas haazà is laya te kegkepenù din. 7Ne migkapey zan is menge zuma zan dutun te sevaha he avang wey zan mekeug̵up. Ne hein nekeuma haazà is menge zuma zan, impen-ahuk dan is pait dutun te zezuwa he avang ne samè dà kenà melavu haazà is menge avang tenged te utew nepenù. 8Ne si Simon Pedro, hein neehè din is neulaula, nekeluhud diyà te ki Jesus is egkag̵i te, “Datù, deyzey ke ebpekeziyuan a kenikew su utew a mekesesalà.” 9Iyan ingkekeg̵iya zin kayi su utew neherat is mata zin te nengeutel zan he pait. Ne henduen ded daan haazà is menge zuma zan. 10Elin daan nengeinuinu zutun is menge anak ni Sibidiyu he si Santiago wey si Juan he menge zuma ni Simon te ebpenlaya. Ne migkag̵i si Jesus diyà te ki Simon te, “Kenè ka mahandek. Menlelaya ka te pait, iyan, puun guntaan iyan ku ibpeveelan kenikew is kebpen-ahà te etew wey mehimu he menge sumusundan ku.” 11Ne zutun mid-uwit dan haazà is menge avang dan diyà te g̵eunan, ne mid-ewaan dan dutun is langun ne midsundan dan ki Jesus.

Is Kebewii te It-iten

(Lucas 5:12-16; Mateo 8:1-4; Marcos 1:40-45)

12Ne sevaha he andew ne ziyà si Jesus te sevaha he inged ne neuma zin is etew he nepurung en meeneb te menge it-it. Haazà is it-iten, hein neehè din si Jesus, mid-uvey ziyà te kandin ne midluhud ne midungul diyà te etuvangan din is egkag̵i te, “Datù, emun meupiya zà te g̵ehinawa nu ne egkeulian a kenikew kayi te utew meremerik he egezamen ku.” 13Ne zutun midampà sikandin ni Jesus te egkag̵i te, “Utew meupiya te g̵ehinawa ku; meulii ka!” Ne segugunà nehanewhanew zutun te etew haazà is it-it din. 14Ne zutun mibeleuzan sikandin ni Jesus te, “Kenè nu heini zè pa tudtula ziyà te minsan hentei he etew, kekenà, hendiyè ka g̵untaan te memumuhat he midhimu te Megbevayà wey zin maahà he neulian ka. Ne iveg̵ey nu kandin is ibpemuhat wey nu metuman sikan is insug̵ù dengan ni Moises su wey metueni te langun, he tutuu iyan he neulian ke en.” 15Iyan, minsan pa zutun, nekeeneb diyà te meziyù is bentug̵an ni Jesus ne tenged dutun utew mezakel he menge etew is ebpemenhendutun te kandin wey zan mezineg is kebpenurù din ne wey zaan meulii sikandan te menge zaru zan. 16Iyan, duen menge timpu he ed-ewaan din haazà is mezakel he menge etew ne edhendiyà sikandin te tanà he wazà dutun duma zin he etew ne zutun ed-ampù diyà te Megbevayà.

Is Kebewii te Mibinting he Etew

(Lucas 5:17-26; Mateo 9:1-8; Marcos 2:2-12)

17Sevaha he andew he ebpenurù si Jesus, duen ebpemimpinuu he mezakel he menge Perisiyu wey menge menunudlù te kesug̵uan he midtelavuk dutun. Diyà haazà ebpemuun te langun he menge inged he sakup te Geliliya wey sakup te Hudiya. Ne zuen daan duma zan dutun he ebpemuun te Hiruselim. Ne zutun te ki Jesus is gehem te Megbevayà su wey zin mevewii is menge etew. 18Ne zutun nekeuma is menge etew he ed-uwit te etew he minatey is divaluy he lawa zin he impehizeg̵à te zuyanà. Idseled dan pezem dutun te valey su wey zan ikesavuk diyà te etuvangan ni Jesus. 19Ne g̵eina te nepurung mehasek is menge etew zutun te valey ne wazè dan ikevayà sikandin dutun. Diyè dan mebayà te atep ne mibudsiyan dan is atep he renged ni Jesus ne haazà is duyanà he zutun is etew he minatey is divaluy he lawa zin, midteyuntun dan dutun te teliwazà te menge etew he zutun si Jesus. 20Ne hein nesavut ni Jesus he zekelà is kedsarig dan kandin, migkeg̵iyan din heini is etew te, “Mama, nepesaylu en is menge salè nu.” 21Ne zutun, is menge Perisiyu wey is menge menunudlù te kesug̵uan, neisip dan diyà te g̵ehinawa zan is: “Hentei heini he etew is edsupak te Megbevayà? Megbevayà sikandin uvag su hentei is ebpekepesaylu te menge salà, kekenà, iyan dà is Megbevayà.” 22Ne nesavut ni Jesus is diyà te isip dan ne migkeg̵iyan din sikandan te, “Maan is egkeisip niw is iring keniyan? 23Hendei zapit is egkehimu te etew zà duen, iyan be is kebpesaylu te salà kayi te etew wey ke iyan is kegkeulii kayi te etew su wey mekeenew ne mekehipanew? 24Pinaag̵i te kebewii ku g̵untaan kayi te etew, ibpeehè ku keniyu he siak is Kakey te Menusiyà, duen ku keg̵ehem dini te lumpad te kebpesaylu te salà.” Ne zutun migkeg̵iyan din haazà is etew he minatey is divaluy he lawa, ke sikandin te, “Sikew, Mama, enew ka, ne kuwaa nu heeyan is duyanè nu ne ulì ka!” 25Ne zutundutun mid-enew haazà is etew zutun te etuvangan dan te langun ne migkuwa zin haazà is impehizeg̵aan kandin ne mid-ulì is edalig te Megbevayà. 26Ne is langun he menge etew zutun ne nengeherat is mata zan, ne utew zan nengeinuinu ne midalig dan is Megbevayà, ne ke sikandan te, “Heini is neehè tew g̵untaan, ne utew egkein-inuwi!”

Is Kedtewag̵a ki Levi

(Lucas 5:27-32; Mateo 9:9-13; Marcos 2:13-17)

27Ne hein neipus haazà, ne mid-awà dutun si Jesus ne neehè din is sevaha he menunukut te vuhis he egngezanan ki Levi he ebpimpinuu ziyà te upisina zin. Ne migkeg̵iyan ni Jesus te, “Mama, sunud ka kedì.” 28Ne zutun ne mid-ewaan ni Levi is minsan hengkey zutun ne midsunud ki Jesus.

29Ne zutun midtukud te zekelà he keemuran si Levi ziyà te valey zin su zutun si Jesus. Ne mezakel is nemenelavuk dutun he menge menunukut te vuhis he menge zuma ni Levi, ne zuen daan menge zuma he menge etew he nemengaan duma kandan. 30Ne zuen menge Perisiyu wey menge menunudlù te kesug̵uan he nekeahà kayi te menge etew. Ne migkeg̵iyan dan is menge sumusundan ni Jesus te, “Maan is egkaan kew wey ed-inum kew zuma te menge limbungan he menunukut te vuhis wey te menge mesinupaken?” 31Ne iyan midtavak dutun si Jesus, ke sikandin te, “Sikan is wazè din daru, ne kenà egkinahanglan he ebewian, kekenà, iyan dà is duen din daru. 32Siak, wazà a medhendini wey ku ikepeiniyug te ked-ulaula te mezaat is menge metazeng, kekenà, iyan is mesinupaken te Megbevayà.”

Is Insà Mehitenged te Kedsalang Kegkaan

(Lucas 5:33-39; Mateo 9:14-17; Marcos 2:18-22)

33Ne zuen menge etew he migkag̵i ziyà te ki Jesus te, “Is menge sumusundan ni Juan Megbebewtismu wey is menge sumusundan te menge Perisiyu, ne layun dan ed-ampù wey edsalang dan he egkaan su wey zan mepurungi is ked-azap dan te Megbevayà. Iyan, is kenikew he menge sumusundan, kenè dan mulà edsalang he egkaan, kekenà, kada andew egkaan dan wey ed-inum dan.” 34Ne migkag̵i si Jesus diyà te kandan te, “Penenglitan, ke zuen eseweey, is menge zuma te ebpengesawa, kenà egkehimu he ibpesalang sikandan te kegkaan ke kemulu zan pa zuma haazà is ebpengesawa. 35Ne zutun te timpu he ibpaawà diyà te kandan sikan is ebpengesawa, human dan edsalang egkaan, su egkeseeng dan.”

36Ne zutun insempità ni Jesus is kenà kebpeked-amur te veg̵u he penurù din wey te zaan he tuluuwen te menge Hudiyu, ke sikandin te, “Wazà etew he ebindas te veg̵u pa he kumbalà su idapi zin te kumbalà he tug̵ak en. Su emun ebeelan din is iring kayi, ne nezezeetan din dà is beg̵u, ne haazà is daan he kumbalà, kenà ed-engayan te veg̵u he indapi zutun. 37Ne iring din ded daan,” ke si Jesus, “is binu he sikan pa ebeeli he idtag̵ù diyà te teleg̵uey he lundis te kambing. Kenà egkehimu he ziyà idtag̵ù te zaan he teleg̵uey su ebetu is teleg̵uey ne egkeulaan haazà is binu ne egkezeetan daan is teleg̵uey. 38Kinahanglan he sikan is binu he sikan pa ebeeli, diyà idtag̵ù te veg̵u en he teleg̵uey. 39Ne sikan is etew he nekeinum te zaan he vinu, kenè en sikandin ed-inum duen te vinu he sikan pa ebeeli su ke sikandin te, ‘Iyan meupiya is daan he vinu.’ ”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index