Search form

Lucas 8:27-29

27-29Ne zutun te kegaun ni Jesus neuma zin is etew he zaan he meg̵inged dutun te inged te menge Geresinen. Ne midsuukan sikandin te menge mezaat he mulin-ulin. Ne haazà is etew, neug̵et en utew he wazè din seseberen. Kenà ed-ubpà diyà te valey, kekenà, diyà ed-ubpà te penlevengà he menge surung. Kenà kepipira zà uwita haazà is maama zutun te ebpemekaid kandin. Ne minsan pa te layun sikandin edhiketan ne ibpenagkes te kedina ne ebentayan pa te menge etew, iyan, melemu zin dà he ebpemidtawen is kedina ne ed-uwiten sikandin dutun te mezaat he mulin-ulin pehendiyà te tanà he wazà ubpai te menge etew. Ne hein neehè din si Jesus, mid-erang ne midlangkeb diyà te etuvangan din is egkag̵i he utew mezag̵ing te, “Sikew, Jesus he Anak te utew lavew he Megbevayà, ebmenuwen a kenikew? Ebpengemuyù a kenikew he kenè e pa kenikew siluti!” Nekag̵i zin heini su migkeg̵iyan ni Jesus haazà is mezaat he mulin-ulin he ibpaawà diyà te kandin. 30Ne mid-insaan ni Jesus haazà is etew te, “Hentei is ngazan nu?” Ne midtavak te, “Iyan ngazan ku si Liblibuwen.” Umba nekag̵i zin heini su utew zan mezakel is mezaat he mulin-ulin he nemen-ulin dutun te etew.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index