Search form

Marcos 1

Is Kedsangyew ni Juan Megbebewtismu

(Marcos 1:1-8; Mateo 3:1-12; Lucas 3:1-18; Juan 1:19-28)

1-2Si Esaias, is tipehuna he ebpeneuven dengan te Megbevayà, insurat din is Lalag te Megbevayà duen te Anak din, ne iyan haazà puunà te Meupiya he Tudtulanen te keag̵i ni Jesu Kristu he Anak te Megbevayà. Migkag̵i is Megbevayà te,

“Duen keuzemà ibpehuna ku kenikew

he etew he ibpepenudtul ku he meg̵aan ka ebpekeuma.

3Diyà sikandin te tanà he wazà duen ed-ubpà he etew.

Ne zutun egkezineg sikandin te menge etew he edangep kandin

is egkag̵i te, ‘Meg̵aan ebpekeuma is Nengazen.

Hig̵ewani niw is ibayè din;

tendanga niw is dalan he ed-ikulen din,

he ke và dà egkeg̵iya,

endami niw is kebpekeuma zin.’ ”

4Ne netuman haazà diyà te ki Juan, sikan is migeraran ki Megbebewtismu, su ziyà sikandin te tanà he wazà duen ed-ubpà he etew ne midweliyan din daan is menge etew. Ke sikandin te, “Iniyug̵i niw is memezaat he ulaula ne mebpebewtismu kew su wey metueni he mid-iniyug̵an niw en is memezaat he ulaula niw, ne human egkepesaylu te Megbevayà is menge salè niw,” ke si Juan. 5Ne zutun, mezakel he menge etew is midangep kandin he ebpemuun diyà te menge inged te tivuuk he prubinsya he Hudiya wey minsan is menge etew he ebpemuun diyà te inged he Hiruselim. Ne haazà he menge etew, intangdù dan is menge salè dan ne mibewtismuwan sikandan ni Juan diyà te wahig he Hurdan.

6Ne heini si Juan, kukumbalà te midhavel he vulvul te kemilyu ne vevakes te lundis he neg̵angu. Ne is keuyag̵an din ne terapan wey teneb. 7Ne zutun midweliyan ni Juan is menge etew, ke sikandin te, “Duen etew he ebpekeuma he ed-ilis kediey. Iyan sikandin utew lavew kenà siak su minsan is kebpul-ut dà te menge sepatus din, kenè e pa zait he sulug̵uen din. 8Wahig is ibewtismu ku keniyu, iyan, haazà he etew is ed-ilis kediey, iyan ibewtismu zin keniyu sikan is Wag̵as he Mulin-ulin, he ke và dà egkeg̵iya, ibeg̵ey zin keniyu is Wag̵as he Mulin-ulin.”

Is Kebewtismuwi Wey is Kebpenulaya ki Jesus

(Marcos 1:9-13; Mateo 3:13–4:11; Lucas 3:21,22; 4:1-13)

9Ne zutun te timpu te kebpemewtismu ni Juan, nekeuma ziyà te ki Juan si Jesus is ebpuun diyà te inged he Neserit he ziyà te prubinsya he Geliliya. Ne mibewtismuwan sikandin ni Juan diyà te wahig he Hurdan. 10Ne te egaun en si Jesus dutun te wahig, segugunè din naahà is langit he nepuwasan ne is Wag̵as he Mulin-ulin, edlugtanà diyà te kandin he iring te merepatik. 11Ne zutun nezineg is Megbevayà diyà te langit he egkag̵i te, “Minahal ku sikew he anak ku. Utew ku en sikew igkelipey.”

12Ne segugunà dutun, impehendiyà si Jesus te Wag̵as he Mulin-ulin te tanà he wazà duen ed-ubpà he etew. 13Ne zutun mekeubpà si Jesus seled te kepatan he andew, ne migezaman sikandin ni Setanas ke ebpekesalè be. Ne zuen daan dutun menge ebpekekaid he menge langgam, iyan, mibeyaan si Jesus te menge velinsug̵uen te Megbevayà ne mid-elimahan dan sikandin.

Is Kebpuun ni Jesus te Kebpenurù

(Marcos 1:14,15; Mateo 4:12-17; Lucas 4:14,15)

14Ne hein impezakep en ni Hadì Hirudis si Juan, midlikù si Jesus diyà te prubinsya he Geliliya ne impesavut din dutun te menge etew is Meupiya he Tudtulanen he ebpuun te Megbevayà. 15Ne ke sikandin te, “Iyan en heini timpu he egketuman sikan is nengetagnà dengan su meg̵aan en edhadì keniyu is Megbevayà. Iniyug̵i niw en is memezaat he ulaula ne tuu kew te Meupiya he Tudtulanen.”

Is Ked-umawa Zuen te Heepat he Menlelaya

(Marcos 1:16-20; Mateo 4:18-22)

16Ne sevaha he andew zutun, te edhipanew si Jesus diyà te veyvey te ranew he Geliliya, ne neehè din ensi Simon wey is hazi ni Simon he si Andres he ebpenlaya zutun te ranew su menge menlelaya sikandan. 17Ne migkag̵i si Jesus diyà te kandan te, “Menunug̵es kew ves te pait? Duma kew kedì ne etew mulà is egkekuwa niw wey zan mekesundan kedì.” 18Ne zutundutun mid-engked dan is ebpenlaya ne miduma zan kandin.

19Ne midlaus medhipanew ensi Jesus ne zutun te kedhipanew zan en, naahà ni Jesus ensi Santiago wey is hazi ni Santiago he si Juan he menge anak ni Sibidiyu he ebpurungan dan is menge laya zan diyà te avang dan. 20Ne te naahà ni Jesus sikandan, mid-umew zin sikandan he meduma zan kandin, ne zutun mid-ewaan dan is amey zan wey is menge sinuhulan dan he menlelaya zutun te avang ne miduma zan ki Jesus.

Is Etew he Midsuukan te Mezaat he Mulin-ulin

(Marcos 1:21-28; Lucas 4:31-37)

21Ne midhendiyè dan te inged he Kepirnaum, ne hein neume en is andew he Sebadu he iyan Andew te Kedhimeley ne midseled si Jesus diyà te simbahan te menge Hudiyu ne mibpenurù din is menge etew zutun. 22Ne haazà is menge etew, hein nezineg dan is kebpenurù din, utew zan nengeinuinu su is kebpenurù din, ne kenà iring te kebpenurù te menge menunudlù te kesug̵uan te menge Hudiyu su zekelà mulà is gehem ni Jesus te kebpenurù.

23Ne zutun te kemulu pa ebpenurù si Jesus, netekew zan te nekeuma zutun te simbahan is maama he edlelungen te mezaat he mulin-ulin. 24Ne hein neehè din si Jesus, mibensag sikandin is egkag̵i te, “Sikew, Jesus he tigNeserit, hengkey is lavet nu kenami te menge mulin-ulin? Kela ke iyan inhendini nu is edezeetan key kenikew. Egkekilala ku sikew; iyan ka kes hadì he mibpilì te Megbevayà!” 25Ne migkeg̵iyan ni Jesus haazà is mezaat he mulin-ulin te, “Med-engked ka ne awè ka keniyan te kandin!” 26Ne zutundutun midhimu te mezaat he mulin-ulin he mevidbid haazà is etew ne impepengulahì din te mezag̵ing. Ne mid-awà haazà is mezaat he mulin-ulin puun dutun te etew. 27Ne utew nengeinuinu is langun he menge etew zutun, ne tenged dutun mibpelelelag̵è dan te, “Hengkey vuwa heini? Kela ke veg̵u en heini he tuluuwen su maan is utew sikandin mekeg̵eg̵ehem te kebayàbayà te minsan menge mezaat he mulin-ulin, ne ebpemineg kandin.” 28Ne pinaag̵i zutun segugunà nekeeneb is bentug̵an ni Jesus diyà te tivuuk he prubinsya he Geliliya.

Is Kebewii te Menge Etew

(Marcos 1:29-34; Mateo 8:14-17; Lucas 4:38-41)

29Ne mid-awà ensi Jesus dutun te simbahan ne midhendiyè dan te valey eni Simon wey ni Andres. Ne miduma zaan kandan si Santiago wey si Juan. 30Ne egkezeruwan dutun is enug̵ang he vahi ni Simon ne edhidhizeg̵à su edetengen. Ne te kebpekeuma ni Jesus dutun te valey, migkeg̵iyan dan si Jesus he egkezeruwan is enug̵ang ni Simon. 31Ne mibeyaan sikandin ni Jesus ne migewezan din diyà te velad ne impeenew zin. Ne zutundutun ne naawà is dateng din ne midsuba sikandin te ibpekaan din engki Jesus.

32Ne hein edsanlep en is andew zutun, is langun he egkengezeruwan wey is ebpenlelungen te mezaat he mulin-ulin, mibpen-uwit sikandan te menge etew ziyà te ki Jesus. 33Ne utew mezakel he menge etew zutun te inged is netipun diyà te lama te valey he zutun si Jesus. 34Ne zuen mezakel he egkengezeruwan dutun te migkelingulingu he menge zaru is nengeulian ni Jesus. Mezakel zaan he menge mezaat he mulin-ulin is impemaawè din puun dutun te menge etew. Ne haazà is menge mezaat he mulin-ulin, wazà tug̵uti ni Jesus he mekekag̵i sikandan su nekilala zan ke hentei si Jesus.

Is Kebpenurù ni Jesus Diyà te Menge Simbahan

(Marcos 1:35-39; Lucas 4:42-44)

35Ne hein egkepkepawè en, ne mid-enew si Jesus ne mid-awà diyà te valey ne midsivey sikandin diyà te wazà duen etew su ed-ampù. 36Ne hein nepawà dutun mibpen-ahà ni Simon wey te menge zuma zin ke hendei si Jesus. 37Ne hein neturedu zan, migkag̵i zan diyà te kandin te, “Ebpen-ahaan ka te langun he menge etew.” 38Iyan, migkag̵i si Jesus diyà te kandan te, “Edhendiyè kiw te menge zuma he inged su wey ku meweliyi zaan su umba midhendini a su edweliyan ku is menge etew.” 39Ne mid-eneb eni Jesus is langun he menge inged diyà te prubinsya he Geliliya ne midwali sikandin diyà te menge simbahan te menge Hudiyu zutun. Ne impemaawè din is menge mezaat he mulin-ulin puun dutun te edlelungen dan.

Is Kebewii te It-iten

(Marcos 1:40-45; Mateo 8:1-4; Lucas 5:12-16)

40Ne zuen sevaha he it-iten he etew he mid-uvey ziyà te ki Jesus. Ne haazà he etew, midluhud sikandin diyà te etuvangan ni Jesus is ed-akul kandin he egkag̵i te, “Emun meupiya zà te g̵ehinawa nu ne egkeulian a kenikew kayi te utew meremerik he egezamen ku.” 41Ne nehizuwan sikandin ni Jesus ne midampè din te egkag̵i te, “Utew meupiya te g̵ehinawa ku; meulii ka.” 42Ne zutundutun nahanewhanew zutun te etew haazà is it-it din. 43-44Ne zutun mibeleuzan sikandin ni Jesus te, “Kenè nu zè pa tudtula ziyà te minsan hentei he etew heini is nehimu zini te kenikew, kekenà, hendiyè ka g̵untaan te memumuhat he midhimu te Megbevayà wey zin maahà he neulian ka ne iveg̵ey nu kandin is ibpemuhat wey nu metuman sikan is insug̵ù dengan ni Moises su wey metueni te langun he menge etew he tutuu iyan he neulian ke en.” Ne zutun impehipanew sikandin ni Jesus. 45Iyan, hein mid-awà dutun haazà is etew, midtudtul zin haazà is nehimu ziyà te kandin diyà te minsan hentei. Ne tenged dutun kenè en maan si Jesus ebpekepeg̵awag̵awa ke edhendutun te menge inged su egkeamur-amur is mezakel he menge etew. Diyè dà si Jesus edrig̵urig̵u te menge unayan. Ne midangep kandin is menge etew he ebpemuun diyà te minsan hendei he inged.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index