Search form

Marcos 10

Is Ketudluanan Mehitenged te Kebpeengkezà

(Marcos 10:1-12; Mateo 19:1-12; Lucas 16:18)

1Ne mid-awà si Jesus dutun te inged he Kepirnaum ne midhendiyà te prubinsya he Hudiya. Ne zutun midrapas sikandin te wahig he Hurdan. Ne utew en maan mezakel is menge etew he nengeamur-amur ziyà te kandin. Ne g̵eina te iyan layun ed-ul-ulahan din is kebpenurù, ne mibpenurù din daan haazà is menge etew. 2Ne zutun, duen menge Perisiyu he mid-uvey ziyà te ki Jesus su ebpengahaan dan is paag̵i te kedsumbunga kandin. Ke sikandan te, “Idtug̵ut be te kesug̵uan is ked-engkezi ta te esawa ta?” 3Ne insà daan is intavak ni Jesus dutun, ke sikandin te, “Hengkey man is insug̵ù kenitew ni Moises he egkevasa ta zuen te kesug̵uan mehitenged te kebpekidsuwey?” 4Ne midtavak dan te, “Intug̵ut ni Moises diyà te maama he suwayi zin is esawa zin, asal kinahanglan he ebeg̵ayan dutun te maama is esawa zin te kemetuuzan he midsuwayan din.” 5Ne ke si Jesus diyà te kandan te, “Umba intug̵ut ni Moises is kedsuwayi niw te esawa niw su g̵eina te edsumpeliten niw is penurù, 6iyan, is Megbevayà, dutun te kedlimbag̵a zin te menusiyà, mibeelan din is maama wey vahi. 7Umba ed-ewaan te maama is amey zin wey iney zin su ebpekidsevaha te esawa zin. 8Ne sikandan is teleesawa, kuwinta kenè en maan dezuwa he etew, kekenà, nesevehe en sikandan. 9Ne zutun haazà is dezuwa he etew he midsevaha te Megbevayà, kenè en egkehimu he ebpekedsuwey,” ke si Jesus.

10Ne is menge sumusundan ni Jesus, hein diyè dan en maan te valey he midetengan dan, in-uman dan iinsà kandin is kebpekidsuwey te esawa. 11Ne ke si Jesus diyà te kandan te, “Ke zuen maama he ebpengesawa te sengevevahi su mid-engkezan din is esawa zin, ebpekesalà sikandin dutun te mid-engkezan din he esawa. 12Ne is bahi zaan, ke ebpekidsuwey te esawa zin ne ebpeesawa te sengememaame en, ebpekesalà sikandin dutun te midsuwayan din he esawa zin.”

Si Jesus Wey kes Dezeisey he Menge Vatà

(Marcos 10:13-16; Mateo 19:13-15; Lucas 18:15-17)

13Ne zutun, duen menge etew he ebpen-uwit diyà te ki Jesus te menge zezeisey he vatà su ebpezepenetan dan te palad ni Jesus, iyan, midawey haazà te menge sumusundan din. 14Ne hein netuenan ni Jesus haazà is mid-ulaula te menge sumusundan din, wazè din ikesuat, ne ke sikandin diyà te kandan te, “Ipehendini niw te kediey heeyan is menge vatà ne kenè niw zewaya su is etew he zuen din kedsarig he iring te kedsarig te vatà ne iyan ebpekepahadì te Megbevayà. 15Benar is egkeg̵iyen ku keniyu he ke zuen etew he kenà iring is kedsarig din te Megbevayà te kedsarig te zeisey he vatà, ne kenà egkehedian haazà is etew te Megbevayà.” 16Ne zutun midsekepu zin haazà is menge vatà ne mibpendepenetan din te palad din is menge purù dan ne midtuvazan din sikandan.

Sikan is Sepian he Etew

(Marcos 10:17-31; Mateo 19:16-30; Lucas 18:18-30)

17Ne zutun te edlaus en edhipanew ensi Jesus, nekesaut kandan is sevaha he maama ne midluhud haazà diyà te etuvangan ni Jesus. Ne ke sikandin te, “He Menunudlù, utew meupiya is menge ulaula nu. Hengkey is ed-ul-ulahan ku wey a meveg̵ayi te untung he wazà pidtemanan?” 18Ne midtavak si Jesus te, “Maan is egkag̵i ka he meupiya is ulaula ku te sebsevaha zà is meupiya is menge ulaula zin ne iyan is Megbevayà. 19Netuenan nu en sikan is menge sug̵ù te Megbevayà he imbilinbilin kenitew he iyan is: kenè ka mebunù; kenè nu selselai is esawa nu; kenè ka mebpenakew; kenè ka medtarùtarù diyà te hukmanan; kenè ka medlimbung; ne tehuza nu is amey nu wey iney nu.” 20Ne midtavak haazà is maama ziyà te ki Jesus te, “Menunudlù, is langun keniyan, mibenteyanan ku ne wazè ku mesupak puun pa te vatè e pa.” 21Ne si Jesus, midtengtengan din haazà is etew su ingkehizu zin ne ke sikandin te, “Duen nu pa kurang; iyan is: ulì ka ne ivelegyè nu is langun he azen nu, ne is halin, ipemeg̵ey nu ziyà te egkengeayuayu ne edsepian ka ziyà te langit. Ne ke egkeipus nu heeyan, likù ka zini wey ka mekesundan kediey.” 22Ne hein nezineg dutun te etew haazà is migkag̵i ni Jesus, ne utew mibmesakit is gehinawa zin ne mid-awà dutun is utew neseeng su zekelà is ketig̵eyunan din.

23Ne zutun mibpenlangulangu si Jesus diyà te menge sumusundan din ne ke sikandin diyà te kandan te, “Utew mereg̵en te sepian he etew is kebpesakup din te Megbevayà wey mehedii sikandin te Megbevayà,” ke sikandin. 24Ne is menge sumusundan din, hein nezineg dan haazà is migkag̵i ni Jesus, utew zan ingkeinuinu. Ne mid-uman megkag̵i si Jesus te, “Utew mereg̵en te etew is kebpesakup din te Megbevayà wey sikandin mehedii. 25Kenè din egkehimu su melemu pa te langgam he kemilyu is kedseled din diyà te vudsi te rag̵um kenà te sepian he etew te kebpesakup din te Megbevayà wey sikandin mehedii.” 26Ne hein nezineg haazà te menge sumusundan din, mid-iseg is kegkeinuinu zan. Ne ke sikandan te, “Emun kenà egkehimu te sepian, ne kenè bes egkehimu te minsan hentei is ked-angken te untung he wazà pidtemanan.” 27Ne zutun midtengtengan sikandan ni Jesus te egkag̵i te, “Kenà iyan egkehimu te etew, iyan, egkehimu mulà te Megbevayà he ibpaangken din is etew te untung he wazà pidtemanan su egkehimu zin is langun.”

28Ne zutun migkag̵i si Pedro te, “Ahaa nu man, mid-ewaan dey en is langun he menge azen dey wey key mekesunud kenikew.” 29Ne migkag̵i si Jesus te, “Kenè niw lipati he is minsan hentei he mid-ewaan din is baley zin, is menge suled din he vahi wey maama, is iney zin wey amey zin, anak din, wey menge tanè din su edsunud sikandin kediey wey idsangyew zin is Meupiya he Tudtulanen, 30haazà he etew, egkezawat din is kenenggatus edtekepa haazà is mid-ewaan din he menge valey, menge suled din he maama wey vahi, iney zin, menge anak din, wey menge tanà ne liyu zutun ibeg̵ey kandin keuzemà is untung he wazà pidtemanan. Asal te zini pa sikandin te kelibutan, egkeseg̵azan din is memereg̵en he pesipala kandin. 31Mezakel is menge etew g̵untaan he henduen be te zekelà is pid-etawan dan, iyan, utew minus is pid-etawan dan keuzemà. Ne mezakel zaan is etew g̵untaan he utew minus is pid-etawan dan, iyan, keuzemà, dekelà is pid-etawan dan,” ke sikandin.

Is Iketelu he Kegkeg̵iya ni Jesus te Kemetayen Din

(Marcos 10:32-34; Mateo 20:17-19; Lucas 18:31-34)

32Si Jesus wey is menge sumusundan din, hein diyè dan en te zalan pehendiyà te inged he Hiruselim, midhunahuna si Jesus. Is menge sumusundan din, ne nengeinuinu ne nesemukan is gehinawa zan su maan is edhendiyà si Jesus te Hiruselim. Ne zuen daan menge etew he edtinundug ne nengehandek sikandan. Ne zutun migkeg̵iyan ni Jesus is sepulù wey zezuwa he menge sumusundan din he medtapid dan ne impesavut din dutun ke hengkey is egkehitavù kandin. 33Ke sikandin te, “Netuenan niw he edhendiyè kiw te Hiruselim ne emun ebpekeuma kiw zutun, siak is Kakey te Menusiyà, ibpalad a ziyà te menge punuan he menge memumuhat wey menge menunudlù te kesug̵uan. Ne egkeuyun dan he ebpehimetayan a ne ibpalad e zan daan diyà te menge etew he kenà menge Hudiyu. 34Ne is menge etew he kenà menge Hudiyu, ed-iringen e zan te velvelayen; ebpengilevan e zan, ne ebug̵elen e zan ne edhimetayan e zan ne seled te iketelu he andew zutun ebenhawen a te Megbevayà.”

Is Hangyù ni Santiago wey ni Juan

(Marcos 10:35-45; Mateo 20:20-28)

35Ne zutun mid-uvey ziyà te ki Jesus is dezuwa he anak ni Sibidiyu he si Santiago wey si Juan, ne ke sikandan te, “He Menunudlù, duen dey idhangyù diyà te kenikew.” 36Ne ke si Jesus te, “Hengkey is egkesuatan niw?” 37Ne ke sikandan te, “Iyan edhengyuen dey he keuzemà ke ebpinuu ke en diyà te pinuuwè nu te kedhadì, ipepinuu key zaan, is sevaha ziyà te egkekewanan nu ne is sevaha ziyà te egkeg̵ivang nu.” 38Ne midtavak si Jesus te, “Wazè niw mesavut ke hengkey is edhengyuen niw. Egkeantus niw ve is merasey he ibpaantus kedì? Ne egketigker niw ve is kemereg̵enan he ibpetigker kediey?” 39Ne midtavak dan te, “Uya egkeantus dey.” Ne migkag̵i si Jesus te, “Benar iyan he ibpaantus keniyu is iring te merasey wey is kemereg̵enan he ibpaantus daan kediey, 40iyan, kenà a iyan ebpilì ke hentei is ibpepinuu ziyà te zapit te egkekewanan ku wey ziyà te zapit te egkeg̵ivang ku su iyan dà ebpekepinuu zutun is etew he midteg̵enahan te Amey ku he Megbevayà.”

41Ne hein nezineg haazà dutun te sepulù he zuma zan he sumusundan, wazè dan ikesuat haazà is midhimu eni Santiago wey ni Juan. 42Ne tenged dutun mid-umew ni Jesus sikandan langun ne ke sikandin te, “Netuenan ta he is menge punuan te menge inged, ne utew memevurut. Edatùdatù dà sikandan is layun ebmandar te menge etew. 43Iyan, sikiyu mulà, kenà egkehimu is iring kayi zini te keniyu. Ke zuen sevaha keniyu he egkesuat he mekelavew, kinahanglan he sulug̵uen sikandin te langun he menge zuma zin. 44Ne emun duen sevaha keniyu he egkesuat he iyan sikandin metikang te langun keniyu, kinahanglan he mebpekevavà sikandin te langun keniyu. 45Su siak is Kakey te Menusiyà, kenè ku iyan inhendini te kelibutan is wey a metevangi te menusiyà, kekenà, wey a meketavang te menusiyà ne wey a zaan mebpehimatey su wey ku mevelukasi is mezakel he menge etew.”

Is Kebewii ki Bertimeo

(Marcos 10:46-52; Mateo 20:29-34; Lucas 18:35-43)

46Ne nekeuma zan diyà te inged he Hiriku, ne hein ed-awà ensi Jesus wey is menge sumusundan din dutun, utew mezakel is menge etew he nemenduma kandin. Ne zuen lakap dutun he mekelilimus he egngezanan ki Bertimeo he anak ni Timiyu. Ne ebpimpinuu haazà is mekelilimus dutun te kilid te zalan. 47Ne hein nezineg din he iyan ensi Jesus he tigNeserit haazà is edsag̵ad, ne mibpekezag̵ing sikandin is ed-umew te, “He Jesus he kevuwazan te hadì dengan he si David, kehizuwi a kenikew!” 48Ne midawey haazà is lakap te mezakel he menge etew zutun te, “Engked ka!” Iyan, nasì en ebpekezag̵ing sikandin he egkag̵i te, “He kevuwazan te hadì dengan he si David, kehizuwi a kenikew!” 49Ne zutun te kegkezineg̵a ni Jesus kayi te ebpengumew, midteren sikandin ne migkag̵i te, “Ipehendini niw heeyan is etew.” Ne zutun migkeg̵iyan te menge etew haazà is lakap te, “Na, hitindeg kad su ibpehendiyè ke zin.” 50Ne zutun midhitindeg sikandin ne midluwas din is divavew he kumbalè din ne midhendiyà te ki Jesus. 51Ne mid-insaan sikandin ni Jesus te, “Hengkey is egkesuatan nu he ebeelan ku?” Ne midtavak haazà is lakap te, “Iyan egkesuatan ku is mekeahà is menge mata ku.” 52Ne ke si Jesus te, “Is kedsarig nu kediey, iyan igkeulii te menge mata nu. Genat kad.” Ne segugunà nekeahà haazà is menge mata zutun te lakap ne miduma sikandin ki Jesus dutun te hipenawan din.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index