Search form

Marcos 12

Is Sempità Mehitenged te Impeelima te Perasan

(Marcos 12:1-12; Mateo 21:33-46; Lucas 20:9-19)

1Ne impenurù en maan ni Jesus is menge sempità. Ke sikandin te, “Duen etew he zuen din tanà he mibpemulaan din te g̵awed he paras. Mid-alad din haazà, ne mibudsiyan din te meluag is dekelà he vatu su ebeelan din he keresà te wahig dutun te veg̵as te paras. Ne midlelawig te ed-ubpaan te ebantey zutun te perasan. Ne mibpeelimahan din haazà is perasan ne zutun midhendiyà te sengeg̵inhedian. 2Ne hein neume en is tirag̵un dutun, midsug̵ù din is sevaha he sulug̵uen din he ibpekuwa te kandin he vahin dutun te nerag̵un. 3Iyan, hein nekeuma haazà is sulug̵uen din, migewezan dutun te impemeelima zin ne mibug̵el zan ne impeulì dan sikandin he wazà uwiten. 4Ne haazà is teg̵ig̵aked te perasan, midsug̵ù en maan te sevaha pa he sulug̵uen din, iyan, haazà is sulug̵uen, mibpelian dan diyà te ulu ne mid-eled-eled dan. 5Ne haazà is teg̵ig̵aked, midsug̵ù din pa zutun is selakew pa he sulug̵uen din, ne haazà is sulug̵uen, midhimetayan dan. Mezakel pa zutun is sunudsunud he midsug̵ù din, ne is duma zutun, mibpemug̵el zan, ne is duma, midhimetayan dan. 6Ne te ketepusan dutun, iyan dà nesamà sikan is minahal zin he anak. Ne haazà midsug̵ù din diyà te kandan su egkeisip din is: ‘Kenà egkehimu he kenè dan edtehuzen is anak ku,’ ke sikandin. 7Iyan, hein nekeuma haazà is anak dutun te teg̵ig̵aked, migkag̵i haazà is impemeelima te, ‘Na! Iyan heini anak din; kuwa kew en su edhimetayan tew wey tew maangken heini is perasan din!’ 8Ne zutun migewezan dan sikandin ne midhimetayan dan ne intimbag dan diyà te g̵awas te perasan.” 9Ne mid-uman megkag̵i si Jesus te, “Ne g̵eina te iyan haazà mid-ulaula zutun te impemeelima te perasan, hengkey is ed-ul-ulahan kandan dutun te teg̵ig̵aked? Ebeyaan din haazà is menge etew ne ebpenhimetayan din ne ebpeelimahan din haazà is perasan din te selakew en maan he menge etew.” 10Ne ke si Jesus en maan te, “Siguradu nevasa niw en sikan is insurat he Lalag te Megbevayà he edhenduen te,

‘Sikan is batu he himan te valey he vatu,

mid-engkezan te menge pandey

su kunaan dan ke wazè din pulus.

Ne heini, nehimu en guntaan

he vatu he iyan dà ebpekepurung te valey.

11Ulaula heini te Nengazen ne igkeinuinu tew utew.’ ”

12Ne zutun, haazà is menge punuan te menge Hudiyu, nesavut dan he iyan sikandan ebpesumbingayan ni Jesus dutun te sempità he migkag̵i zin, ne ed-isipen dan en pezem edekepa si Jesus, iyan, wazè dan mehimu haazà is ed-isipen dan su nahandek dan te mezakel he menge etew. Ne zutun nepesagdan dan si Jesus ne mid-ewaan dan.

Is Kebayad te Vuhis Diyà te Hadì te Ruma

(Marcos 12:13-17; Mateo 22:15-22; Lucas 20:20-26)

13Ne midsug̵ù dan is duma zutun te menge Perisiyu wey te menge sakup te upakat he midtukud ni Hirudis su wey zan mepulutikahi si Jesus he meveeli zan te sumbung. 14Ne hein nekeuma haazà is menge sug̵ù, migkag̵i zan diyà te ki Jesus te, “Menunudlù, netuenan dey he metazeng ka he etew. Is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei, kekenà, tutuu is ibpenurù nu he ibpeveelan kenitew te Megbevayà. Umba, keg̵iyi key kenikew, ebpekesupak ki ve te kesug̵uan tew ke ebayad ki te vuhis diyà te hadì tew he ziyà te inged he Ruma?” 15Ne netuenan ni Jesus he akal haazà is netag̵ù diyà te g̵ehinawa zan, ne ke sikandin te, “Maan is egezaman a keniyu? Ipeehè niw kediey ke memenumenu is selapì he ibayad niw te vuhis diyà te hadì he ziyà te Ruma.” 16Ne impeehè dan dutun ki Jesus is sengeelad he selapì. Ne ke si Jesus te, “Hentei ki zagwey wey ngazan heini is nekesurat kayi?” Ne midtavak dan te, “Ngazan wey zagwey te hadì diyà te Ruma.” 17Ne ke si Jesus te, “Ne emun kandin ne iyan egkesuatan din, iveg̵ey niw ziyà te kandin, ne iveg̵ey niw zaan diyà te Megbevayà is kandin he azen.” Ne utew zan ingkeinuinu haazà is migkag̵i ni Jesus.

Is Ketudluanan Mehitenged te Kegkevanhew

(Marcos 12:18-27; Mateo 22:23-33; Lucas 20:27-40)

18Ne zuen daan menge Sedusiyu he midhendiyà te ki Jesus. Ne is menge Sedusiyu, iyan kes menge Hudiyu he edtuu he kenà egkengevanhew keuzemà is minsan hentei. 19Ne migkag̵i zan diyà te ki Jesus te, “Menunudlù, impenurù dengan ni Moises he penenglitan, ke zuen maama he zuen din esawa ne ebpatey haazà is maama ne wazà mevuwad, kinahanglan he ebpemeluwen te suled dutun te maama haazà is ipag din su wey mevuwad haazà is minatey pinaag̵i zutun te suled din.

20Ne zengan duen pitu he menge maama he teltelehazi. Mibpengesawa sikan is kakey, iyan, minatey he wazà med-anak. 21Ne mibpemalu zutun te ikezuwa haazà is ipag dan ne minatey zaan ne wazà mevuwad. Ne iring din ded haazà is iketelu. 22Ne henduen dà duen su naamin haazà is pitu ikevalu zutun te vahi ne wazà mevuwad. Ne te huziyan dutun, minatey zaan haazà is bahi. 23Ne keuzemà te kegkevanhew te menge etew, hentei is hustu he esawa zutun te vahi? Su haazà is pitu he teltelehazi, pudu zan man nemekeesawa zutun te vahi.”

24Ne zutun, midtavak ni Jesus sikandan te, “Umba ves nengesayep kew su wazè niw mesavut sikan is ingkesurat he Lalag te Megbevayà, ne wazè niw zaan mesavut he mekeg̵eg̵ehem sikandin te kebpemanhew te menge minatey. 25Su zutun te kegkevanhew te etew he nemematey, wazè en ebpengesawa he maama ne wazè en daan bahi he ebpeesawa su egkengeiring en pudu is menge etew te velinsug̵uen te Megbevayà diyà te langit ne kenè dan ebpees-eseweey. 26Ne mehitenged te menge minatey he ebenhawen, wazè niw ve mevasa ziyà te libru he insurat dengan ni Moises kes egkeregreg he sagbet he zutun mibpaahà kandin is Megbevayà? Su minsan te minatey en dutun si Abraham wey si Isaak wey si Hakub, migkag̵i is Megbevayà diyà te ki Moises te, ‘Iyan a Megbevayà he ed-ezapen ni Abraham wey ni Isaak wey ni Hakub,’ 27he ke và dà egkeg̵iya, kemulu zan pa ed-azap te Megbevayà, su is ed-azap kandin minsan ke ebpatey, duen din pa untung. Umba utew kew nengesayep.”

Is Utew Lavew he Sug̵ù

(Marcos 12:28-34; Mateo 22:34-40; Lucas 10:25-28)

28Ne zuen dutun sevaha he menunudlù te kesug̵uan he nezineg din is kebpekidlewanè dan ki Jesus ne hein nesavut din he utew tutuu is menge tavak ni Jesus kandan, mid-insà sikandin te, “He Menunudlù, hendei zapit is edhuna zuen te langun he kesug̵uan?” 29Ne midtavak si Jesus te, “Iyan heini is edhuna: ‘Pemineg kew, sikiyu is menge kevuwazan ni Israyil. Is Megbevayà tew he Nengazen te langun, sebsevaha zà sikandin he Megbevayà. 30Kinahanglan he iyan nu sikandin mahala ziyà te g̵ehinawa nu is Megbevayà he Nengazen tew. Iyan nu sikandin mahala ziyà te g̵ehinawa nu, isip nu, kedsavut nu wey tivuuk he ulaula nu.’ 31Ne is ikezuwa, iyan heini: ‘Kinahanglan he mahala nu is duma nu; isipa nu sikandin he iring te kenikew en he g̵ehinawa.’ Wazè en insug̵ù kenitew he ebpekelavew kayi te zezuwa.” 32Ne zutun migkag̵i haazà is menunudlù te kesug̵uan diyà te ki Jesus te, “Tutuu iyan. Nevenaran a keniyan te egkeg̵iyen nu he sebsevaha zà is Megbevayà ne wazè en duma pa he Megbevayà. 33Ne is kebmahala ta te Megbevayà he Nengazen diyà te g̵ehinawa ta, diyà te isip ta, diyà te kedsavut ta wey ziyà te tivuuk he ulaula ta, wey is kebmahala ta te zuma ta he iring en sikandin te keugelingen ta he g̵ehinawa, ne lavew pa heini kenà te langun he menge pemuhat he edtutungen wey menge halad.” 34Ne nesavut ni Jesus he utew hustu haazà is migkag̵i zutun te menunudlù ne migkag̵i si Jesus te, “Benar heeyan; meseyun ka ebpekepahadì te Megbevayà.” Ne zutun wazè en maan nekeaku pa he egezam ki Jesus pinaag̵i te minsan hengkey he insè.

Is Hadì he Mibpilì te Megbevayà he Kevuwazan ni David

(Marcos 12:35-37; Mateo 22:41-46; Lucas 20:41-44)

35Ne te ebpenurù si Jesus te menge etew ziyà te simbahan he Valey te Megbevayà, mid-insà sikandin te, “Maan is egkehimu he ibpenurù te menge menunudlù te kesug̵uan he is ebpeebuten he hadì, kevuwazan dà ni Hadì David? 36Umba id-insè ku heini su mid-ulinan si Hadì David te Wag̵as he Mulin-ulin ne migkag̵i, ke sikandin te,

‘Migkag̵i is Megbevayà diyà te Nengazen ku te,

“Kayi ka pinuu te zapit te egkekewanan ku

taman te kenè ku pa ibpeluhud diyà te kenikew is menge kuntada nu.” ’ ”

37Ne impelaus ni Jesus haazà is egkeg̵iyen din te, “Emun migkag̵i ni David he Nengazen din is ebperetengen he ibpahadì, kenà egkehimu he kevuwazan dà duen ni Hadì David.” Ne utew nengesuat is mezakel he menge etew zutun te kebpenurù kandan ni Jesus.

Is Menge Etew he Uvag Edsunud te Megbevayà

(Marcos 12:38-40; Mateo 23:1-36; Lucas 20:45-47)

38Ne zutun te kebpenurù din, ke sikandin te, “Andam kew limbe wey kew kenà mekeiring te menge menunudlù te kesug̵uan su iyan dà egkesuatan dan is kedhiphipanew he memelayat is kemisula he edtehuzen sikandan te menge etew emun diyè dan te mirkadu. 39Ne emun diyè dan te simbahan, egkesuatan dan he iyan sikandan ibpepinuu ziyà te ebpepinuuwan te lavew he menge etew. Ne egkesuatan dan daan he utew zan metahud ke edtelavuk dan te keemuran. 40Ne heini is menge menunudlù te kesug̵uan, edlimbungan dan is menge valu he vahi wey zan maangken is menge valey zutun te menge vahi. Ne utew melug̵ayad is ked-ampù dan he iyan idtambun dan te mezaat he vaal zan. Ne utew edekelà is silut te Megbevayà kandan keuzemà.”

Is Halad Duen te Valu he Vahi

(Marcos 12:41-44; Lucas 21:1-4)

41Ne sevaha he timpu zutun he ziyà ebpimpinuu si Jesus te seled dutun te simbahan he Valey te Megbevayà, ne ziyà sikandin te uvey te teleg̵uey te halad he selapì. Ne ebantey sikandin te menge etew he edsavuk te halad dutun te teleg̵uey. Ne mezakel is menge sepian dutun he utew zekelà he selapì is insavuk dan dutun. 42Ne nekeuma zutun is balu he vahi he utew egkeayuayu. Ne inhalad din is dezuwa he selapì he tumbag̵a he utew zeisey is bali zin. 43Ne zutun mid-umew ni Jesus is menge sumusundan din he med-uvey zan diyà te kandin ne ke sikandin te, “Benar is egkeg̵iyen ku he haazà is balu he vahi, sumalà is ked-isipa te Megbevayà, utew lavew is inhalad din te langun he inhalad kayi te zuma he menge etew. 44Su is menge zuma he nemenhalad kayi, subra zà te ketig̵eyunan dan is inhalad dan. Iyan, heeyan is egkeayuayu he vahi, minsan pa te edlisedlised sikandin te igkeuyag din, inhalad din is namànamè en he ketig̵eyunan din.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index