Search form

Marcos 2

Is Kebewii Zuen te Etew he Mibinting

(Marcos 2:1-12; Mateo 9:1-8; Lucas 5:17-26)

1Ne nepipira pa zutun he menge andew, midlikù si Jesus diyà te inged he Kepirnaum. Ne nezineg te menge etew he ziyà si Jesus te valey zin. 2Ne nengetig̵um sikandan dutun te valey. Utew mezakel is menge etew zutun ne tenged kayi wazè dan en ed-ereg̵an minsan diyà te zeringdingan he uvey te g̵emawan. Ne impesavut kandan ni Jesus is Lalag te Megbevayà. 3Ne zutun, duen nemekeuma he menge etew he ed-uwit te sevaha he etew he minatey is divaluy he lawa zin. Ebintingen haazà is etew te heepat he zuma zin. 4Ne kenè dan ebpekeuvey ziyà te ki Jesus tenged te utew mezakel he menge etew he nengeamur-amur zutun. Ne zutun mibudsiyan dan is atep he renged ni Jesus ne hein meluag en haazà is budsi, ne midteyuntun dan diyà te ki Jesus haazà is etew he impehizeg̵à diyà te zuyanè din. 5Ne si Jesus, hein nesavut din he zekelà is kedsarig dan kandin, migkeg̵iyan din haazà is etew he minatey is divaluy he lawa zin te, “Mama, nepesaylu en is menge salè nu.”

6Ne zuen ebpimpinuu zutun he menge menunudlù te kesug̵uan ne hein nezineg dan haazà is migkag̵i ni Jesus, neepes dan ne neisip dan is, 7“Tekew en egkag̵i heini he etew he ebpekepesaylu sikandin te salà. Edsupaken din is Megbevayà su hentei is ebpekepesaylu te menge salà, kekenà, iyan dà is Megbevayà?” 8Ne zutun nesavut ni Jesus he iyan haazà diyà te isip dan ne ke sikandin diyà te kandan te, “Maan is egkeisip niw is iring keniyan? 9Su hendei zapit is egkehimu te etew zà duen? Iyan be is kebpesaylu te salà kayi te etew he minatey is divaluy he lawa zin, wey ke iyan is kegkeulii kandin wey sikandin mekeenew ne mekuwa zin is duyanè din ne mekehipanew? 10Pinaag̵i te kebewii ku g̵untaan kayi te etew, ibpeehè ku keniyu he siak is Kakey te Menusiyà, duen ku keg̵ehem dini te lumpad te kebpesaylu te salà.” Ne zutun migkeg̵iyan din haazà is etew he minatey is divaluy he lawa te, 11“Sikew, Mama, enew ka; kuwaa nu heeyan is duyanè nu ne ulì ka.” 12Ne zutun, haazà is etew, mid-enew sikandin ne migkuwa zin haazà is duyanè din ne midlawang puun dutun te valey ne naahà haazà te langun he menge etew zutun. Ne is menge etew, hein neehè dan haazà ne utew zan nengeinuinu ne midalig dan is Megbevayà. Ne ke sikandan te, “Wazè tew pa keenu maahà is iring kayi!”

Is Ked-umawa ki Levi

(Marcos 2:13-17; Mateo 9:9-13; Lucas 5:27-32)

13Ne neipus haazà, ne mid-awà dutun si Jesus, ne midhendiyè en maan te veyvey te ranew, ne nengetig̵um diyà te kandin is mezakel he menge etew ne mibpenurù din sikandan. 14Ne hein nepasad haazà is kebpenurù din ne midlaus si Jesus, ne ziyà te ibayè din duen upisina te menunukut te vuhis. Ne zutun neehè din is anak ni Alpiyu he si Levi he menunukut te vuhis he ebpimpinuu zutun. Ne migkeg̵iyan din te, “Sunud ka kedì.” Ne zutun midhitindeg si Levi ne midsunud ki Jesus.

15Ne hein egkaan si Jesus wey menge sumusundan din diyà te valey ni Levi mezakel is menge menunukut te vuhis wey menge mesinupaken he etew he nemengaan duma kandan su mezakel is nemekesundan kandin. 16Ne zuen dutun daan menge Perisiyu he menge menunudlù te kesug̵uan. Ne hein neehè dan he egkaan si Jesus duma zutun te menge mesinupaken wey menunukut te vuhis, nenginginsà sikandan duen te menge sumusundan ni Jesus, ke sikandan te, “Maan is egkaan si Jesus wey ed-inum duma te menge limbungan he menge menunukut te vuhis wey menge mesinupaken?” 17Nezineg haazà ni Jesus ne midtavak sikandin pinaag̵i te sempità, ke sikandin te, “Sikan is wazè din daru, ne kenà egkinahanglan he ebewian, kekenà, iyan dà sikan is duen din daru. Siak, wazà a medhendini wey ku ikepeengked te ed-ulaula te mezaat is menge metazeng, kekenà, iyan is menge mesinupaken te Megbevayà.”

Is Insà Mehitenged te Kedsalang Kegkaan

(Marcos 2:18-22; Mateo 9:14-17; Lucas 5:33-39)

18Ne sengeandew zutun, edsalang te kegkaan is menge Perisiyu wey is menge sumusundan ni Juan Megbebewtismu su edtumanen dan is tuluuwen te menge Hudiyu. Ne zuen menge etew he midhendiyà te ki Jesus ne ke sikandan te, “Is menge sumusundan ni Juan Megbebewtismu wey is menge sumusundan te menge Perisiyu, edsalang dan te kegkaan su wey zan mepurungi is ked-azap dan te Megbevayà. Ne maan man is kenà mulà edsalang te kegkaan is kenikew he menge sumusundan?” 19-20Ne migkag̵i si Jesus diyà te kandan te, “Penenglitan ke zuen eseweey, is menge zuma zutun te ebpengesawa, kenè dan egkeisip he edsalang dan te kegkaan ke kemulu zan pa zuma haazà is ebpengesawa. Ne zutun te timpu he ibpaawà diyà te kandan sikan is ebpengesawa, human dan edsalang egkaan. Ne iring din ded daan is menge sumusundan ku su te kemulu e pa zini te kandan, kenè dan edsalang te kegkaan.”

21Ne zutun insempità ni Jesus is kenà kebpeked-amur te veg̵u he penurù din wey te zaan he tuluuwen. Ke sikandin te, “Is beg̵u he manggad he wazè pa megkenseng, kenà meupiya he idapi ziyà te kumbalà he merunut en he manggad su emun ebpìpian, egkenseng haazà is beg̵u ne egkevindas is merunut en he manggad ne tuwas pa he meluag is kegkevindas din. 22Ne iring din ded daan is binu he sikan pa ebeeli he idtag̵ù diyà te teleg̵uey he lundis te kambing. Kenà egkehimu he ziyà itag̵ù te zaan he teleg̵uey su ebetu haazà is teleg̵uey ne egkeulaan haazà is binu ne egkezeetan daan haazà is teleg̵uey. Kinahanglan he is binu he sikan pa ebeeli, ne ziyà idtag̵ù te veg̵u he teleg̵uey.”

Is Ebayàbayà te Andew te Kedhimeley

(Marcos 2:23-28; Mateo 12:1-8; Lucas 6:1-5)

23Ne zutun te sevaha he andew he Sebadu ingkevayà eni Jesus is pemuleey. Iyan haazà andew he insug̵ù dengan te Megbevayà te menge Hudiyu he wazà etew he ibpevaal zutun he andew su iyan Andew te Kedhimeley. Ne mibpengetù is menge sumusundan ni Jesus te trigu zutun. 24Ne zutun migkeg̵iyan si Jesus te menge Perisiyu te, “Is menge sumusundan nu, edsupaken dan is insug̵ù kenitew te Megbevayà su maan is edlegtey zan guntaan kayi te Andew te Kedhimeley?” 25Ne midtavak si Jesus te, “Kenà egkehimu he wazè niw mevasa ziyà te ingkesurat dengan kes mid-ulaula ni Hadì David. Sikandin wey is menge sundaru zin, midlised sikandan su nengevitil zan. 26Ne tenged dutun midseled si David diyà te simbahan he Valey te Megbevayà ne migkaan din is egkeenen he insavuk diyà te etuvangan te Megbevayà. Ne impekaan din daan dutun is menge zuma zin. Iyan lavew he memumuhat dutun si Ebiyatar. Supak te kesug̵uan haazà is kegkeena zan dutun su iyan dà ebpekekaan dutun he egkeenen is menge memumuhat. 27Ne minsan pa zutun wazè dan mekesalà. Iyan aney he midlimbag te Megbevayà is etew ne human din insug̵ù is Andew te Kedhimeley, he ke và dà egkeg̵iya, mahal is etew, kenà is Andew te Kedhimeley. 28Umba, siak is Kakey te Menusiyà, iyan a zuen keg̵ehem te egkag̵i ke hengkey is hustu he ed-ul-ulahan te etew emun Andew te Kedhimeley.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index