Search form

Marcos 7

Is Tulumanen te Menge Perisiyu

(Marcos 7:1-13; Mateo 15:1-9)

1Ne sevaha he timpu nemekeuma ziyà te ki Jesus is menge Perisiyu wey menge menunudlù te kesug̵uan he ebpuun sikandan diyà te Hiruselim. 2Neehè dan he is duma zutun te menge sumusundan ni Jesus, edsupaken dan is tuluuwen te menge Perisiyu su ebpemengaan dan he wazè dan mebpenlùlù te menge velad dan.

3Su is menge Hudiyu, lavew en is menge Perisiyu, kenè dan egkaan ke kenè dan egkelùluan is menge velad dan su iyan haazà betasan he imbilinbilin te menge g̵in-epuan dan dengan. 4Ne emun ebpekeulì dan he ebpuun te mirkadu ne ebpirikan dan edhunai te wahig is lawa zan ne human dan egkaan. Ne mezakel pa is neleyaman dan he tuluuwen iring te kebpenlùlù te menge inumà wey menge kuzen wey menge edtengelan he g̵alang.

5Ne tenged kayi haazà is menge Perisiyu wey menge menunudlù te kesug̵uan, mid-insaan dan si Jesus te, “Maan is midlipatan en te menge sumusundan nu is imbilinbilin he tuluuwen te g̵in-epuan tew su maan is tekew zan en egkaan ne kenè dan ebpenlùlù?” 6Ne midtavak si Jesus te, “Sikiyu is akal zà is kedtuu niw te Megbevayà, utew hustu is Lalag te Megbevayà he insurat te tipehuna he ebpeneuven he si Esaias. Netagnè kew zin su ke sikandin te,

‘Heini is menge etew,’ egkag̵i is Megbevayà,

‘egkag̵i zan he edtehuzen e zan,

iyan, wazà kedtuu he neseled te g̵ehinawa zan.

7Wazà pulus te kedsimba zan kedì

su ibpenurù dan he menge sugù

ku is kandan dà he ebpeveelan te menge etew.’

8Is kesug̵uan te Megbevayà,” ke si Jesus, “midlipatan niw en, ne iyan niw edtumanen is imbilinbilin he vetasan he midhimuhimu zà te menge etew.”

9Ne mid-uman megkag̵i si Jesus te, “Utew kew metau te paag̵i te ked-engkezi niw te insug̵ù te Megbevayà wey niw mepurungi te edtuman is kesug̵uan he mibeelan te etew. 10Sikan is Lalag te Megbevayà he insug̵ù kenitew zengan ni Moises, edhenduen te, ‘Tehuza niw is amey niw wey iney niw.’ Ne migkag̵i zin daan dutun he, ‘Ke zuen edsulà te amey zin wey iney zin, kinahanglan he edhimetayan.’ 11Ne iyan keniyu he ibpenurù is: ke zuen etew he zuen din igketavang te iney zin wey amey zin, edtug̵utan niw haazà is etew ke egkag̵i zutun te menge g̵inikanan din te, ‘kurban’, he ke và dà egkeg̵iya, ‘Heini is idtavang ku pezem keniyu, kenè ku igkeveg̵ey su imbuwis ku ziyà te Megbevayà.’ 12Ne pinaag̵i zutun kenè niw idtug̵ut he edtevangan dutun te etew is amey zin wey iney zin. 13Ne pinaag̵i kayi te nepengevilin niw he menge vetasan, ed-iniyug̵an niw is Lalag te Megbevayà ne kenà ebpulus diyan te keniyu. Ne mezakel pa is menge ulaula niw he iring kayi.”

Is Ibpekesalà te Etew

(Marcos 7:14-23; Mateo 15:10-20)

14Ne impeuman ipeuvey ni Jesus is menge etew ziyà te kandin ne ke sikandin te, “Langun te sikiyu, pemineg̵a niw heini is menge lalag ku ne sevuta niw he 15is egkehimu he igkeepesi te Megbevayà te etew, kenà iyan is keuyag̵an he ebpekeseled diyà te vèbè din, minsan ke wazà sikandin mebpenlùlù, kekenà, iyan is menge lalag he egawas puun diyà te vèbè din. 16Is minsan hentei keniyu, sevuta niw heini is menge lalag ku.”

17Ne hein mid-awà si Jesus dutun te menge etew ne midseled diyà te valey, ne mid-insaan sikandin te menge sumusundan din ke hengkey is kehulug̵an duen te migkag̵i zin. 18Ne ke si Jesus te, “Iring kew ves te menge zuma he etew su maan is wazè niw g̵eina mesavut he is egkekaan te etew, ne kenà egkehimu he igkeepesi kandin te Megbevayà 19su is egkeenen din, ne ziyè dà ebpekevayà te g̵etek din ne zutun ed-awà diyà te kandin; kenà diyà ebpekevayà te g̵ehinawa zin.” (Ne pinaag̵i kayi te menge lalag ni Jesus, egketuenan ta he is minsan hengkey he egkekaan, idtug̵ut kenitew he egkeenen tew.) 20-22Ne migkag̵i si Jesus med-uman te, “Is egkehimu he igkeepesi te Megbevayà te etew ne iyan is egawas he ebpuun diyà te g̵ehinawa zin. Su ziyà te g̵ehinawa zin ebpuun is memezaat he isip, is kedhilavet te kenè din esawa, kebpenakew, kebpemumunù, kegkesina, kebpesipala, kebpenlimbung, is memahawag he ulaula, kegkeima, kedèdeeti te zengeg te menge zuma zin, kebpelavew zin wey is kedlalunglalung. 23Heini is memezaat he ulaula, diyà ebpuun te g̵ehinawa te etew ne iyan igkeepesi kandin te Megbevayà.”

Is Kedtuu Zuen te Vahi he Kenà Hudiyu

(Marcos 7:24-30; Mateo 15:21-28)

24Ne mid-awà si Jesus dutun te prubinsya he Geliliya ne midhendiyà te menge inged he uvey te inged he Tiru. Ne te kebpekeuma zin dutun ne mibpemenahik diyà te sevaha he valey. Ne kenè din pezem egkesuatan he metueni te menge etew ke hendei sikandin medateng, iyan, wazà haazà iyan mehitavù is egkesuatan din su segugunà nekeeneb haazà is tudtul te kebpekeuma zin. 25Ne zuen dutun sevaha he vahi he zuen din anak he rag̵arag̵a he edlelungen te mezaat he mulin-ulin. Ne hein nezineg din he nekeuma si Jesus ne midhendutun ne midluhud diyà te etuvangan din. 26Ne midhangyù he vewii ni Jesus is anak din he edlelungen te mezaat he mulin-ulin. Ne haazà is bahi, ne kenà Hudiyu su tigPinisya ziyà te prubinsya he Sirya. Is kineg̵iyan din ne Gerisyahanen. 27Ne migkeg̵iyan sikandin ni Jesus te, “Idhuna ibpekaan is menge vatà su kenà meupiya ke egkuwaan ta is egkeenen te menge vatà ne idsamak te menge asu.” Ne iyan ibpesavut ni Jesus dutun is: edhunaan din te edtavang is menge Hudiyu, ne human is kenà menge Hudiyu. 28Ne migkag̵i haazà is bahi te, “Benar, Datù, heeyan, iyan, is asu, egkehimu zaan he ebpenelisimen din is egkengeulug he mumu puun dutun te egkeenen te vatà.” 29Ne si Jesus, migkag̵i ziyà te kandin te, “Geina te iyan heeyan lalag nu, ulì ke en su is anak nu, mid-ewaan en sikandin te mezaat he mulin-ulin.” 30Ne hein nekeuma haazà is bahi ziyà te valey zin, neehè din he edhidhizeg̵à haazà is anak din he mid-ewaan en te mezaat he mulin-ulin he edlalung kandin.

Is Kebewii Zuen te Ngulit he Vengel

31Ne zutun te ked-ulì ni Jesus, ne ziyà sikandin mebayà te inged he Tiru wey ziyà te prubinsya he Dikepulis, ne human diyà te ranew he Geliliya. 32Ne zuen menge etew he mid-uwit dan diyà te ki Jesus is etew he vengel wey ngulit pa ke egkag̵i. Ne midhangyù dan si Jesus he zempaa zin haazà wey meulii. 33Ne zutun mid-ag̵ak ni Jesus haazà is bengel he ngulit su idsivey zin dutun te menge etew ne intiyuk din is tezù din dutun te telinga te vengel ne midhames din te ileb din is tezù din ne indazas din dutun te zilà te etew. 34Ne midlingahà si Jesus diyà te langit ne migeg̵ehinawa te mezalem ne ke sikandin te, “Ipata!” he ke và dà egkeg̵iya, “Mepuwasi!” 35Ne zutundutun nepuwasan is kedineg dutun te etew ne naawà is kegkevisekeg te zilè din ne metandang en is kegkag̵i zin. 36Ne zutun migkeg̵iyan ni Jesus is menge etew zutun he kenè dan penudtula haazà is neehè dan he mibeelan din, iyan, nasì wazà meeren is tudtul zan mehitenged dutun te neehè dan. 37Utew zan haazà ingkeinuinu ne ke sikandan te, “Utew meupiya is kebeeli zin kayi te langun su edhimuwen din minsan is kenà ebpekezineg he mekezineg ne sikan is kenà ebpekekag̵i ne ebpekekag̵i!”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index